ܠܘܩܐ 21
21
ܕܒ݂ܵܚܬܵܐ ܕܐܲܪܡܸܠܬܵܐ
ܡܪܩܘܣ 12:41‐44
1ܓܘܼܫܸܩ ܠܹܗ ܝܼܫܘܿܥ ܒܥܲܬܝܼܪܹ̈ܐ ܕܒܸܕܪܵܝܵܐ ܝܗ݇ܘܵܘ ܕܒ݂ܵܚܝܵܬܲܝ̈ܗܝ ܓܵܘ ܒܹܝܬ ܓܲܙܵܐ. 2ܚܙܹܐ ܠܹܗ ܚܕܵܐ ܐܲܪܡܸܠܬܵܐ ܡܸܣܟܹܢܬܵܐ، ܐܘܼܦ ܗ̇ܝ ܕܪܹܐ ܠܵܗ̇ ܬܪܹܝ ܦܘܼܠܣܹ̈ܐ. 3ܘܐ݇ܡܝܼܪܹܗ، ”ܫܲܪܝܼܪܵܐܝܼܬ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܵܗܵܐ ܐܲܪܡܸܠܬܵܐ ܡܸܣܟܹܢܬܵܐ ܕܪܹܐ ܠܵܗ̇ ܒܘܼܫ ܙܵܘܕܵܐ ܡ̣ܢ ܟܠ ܐ݇ܢܵܫܵܐ. 4”ܣܵܒܵܒ ܐܲܢܹܐ ܟܠܲܝܗܝ ܕܪܹܐ ܠܗܘܿܢ ܓܵܘ ܒܹܝܬ ܓܲܙܵܐ ܕܐܲܠܵܗܵܐ ܡܸܢܕܝܼ ܕܙܵܘܕܵܐ ܝܗ݇ܘܵܐ ܐܸܠܲܝܗܝ، ܐܝܼܢܵܐ ܐܵܗܵܐ ܡ̣ܢ ܒܵܨܘܿܪܘܼܬܘܼܗ̇ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܵܗ̇ ܕܪܹܐ ܠܵܗ̇.“
ܢܲܒܵܝܬܵܐ ܒܘܼܬ ܬܠܵܚܬܵܐ ܕܗܲܝܟܠܵܐ ܘܝܵܘܡܵܢܹ̈ܐ ܐ݇ܚܵܪ̈ܵܝܹܐ
ܡܬܝ 24:1‐2؛ ܡܪܩܘܣ 13:1‐2
5ܗܲܡܙܘܼܡܹܐ ܝܗ݇ܘܵܘ ܐ݇ܢܵܫܹ̈ܐ ܒܘܼܬ ܗܲܝܟܠܵܐ ܕܵܐܟ݂ܝܼ ܦܝܼܫܵܐ ܝܗ݇ܘܵܐ ܒܸܢܝܵܐ ܒܟܹܐܦܹ̈ܐ ܫܲܦܝܼܪܹ̈ܐ ܘܣܘܼܩܠܵܐ ܒܚܲܠܥܲܬܹ̈ܐ. ܐ݇ܡܝܼܪܹܗ ܝܼܫܘܿܥ، 6”ܐܲܢܹܐ ܕܒܸܚܙܵܝܲܝ ܝܬܘܿܢ، ܒܸܬ ܐܵܬܝܼ ܝܵܘܡܵܢܹ̈ܐ ܕܠܹܐ ܦܵܐܹܫ ܫܒ݂ܝܼܩܵܐ ܟܹܐܦܵܐ ܥܲܠ ܟܹܐܦܵܐ ܕܠܵܐ ܦܵܐܹܫ ܣܬܝܼܪܵܐ.“
ܢܝܼܫܲܢܩܹ̈ܐ ܘܪ̈ܕܘܼܦܝܹܐ
ܡܬܝ 24:3‐14؛ ܡܪܩܘܣ 13:3‐13
7ܘܒܘܼܩܸܪܗܘܿܢ ܡܸܢܹܗ، ”ܡܲܠܦܵܢܵܐ، ܐܝܼܡܲܢ ܒܸܬ ܗܵܘܝܼ ܐܲܢܹܐ؟ ܘܡܘܿܕܝܼ ܝܠܹܗ ܢܝܼܫܲܢܩܵܐ ܐܝܼܡܲܢ ܕܐܲܢܹܐ ܩܲܪܒܸܢܝܼ ܠܸܗܘܵܝܵܐ؟“ 8ܘܗ̇ܘ ܓ̰ܘܼܘܸܒ ܠܹܗ ܐܸܠܲܝܗܝ، ”ܗܘܹܝܡܘܼܢ ܗܸܫܝܵܪ ܠܵܐ ܗܵܘܹܐ ܕܚܵܠܛܝܼܬܘܿܢ، ܣܵܒܵܒ ܪܵܒܵܐ ܒܸܬ ܐܵܬܝܼ ܒܫܸܡܝܼ ܘܒܸܬ ܐܵܡܪܝܼ، ’ܐܵܢܵܐ ܝܘܸܢ ܡܫܝܼܚܵܐ، ܘܥܕܵܢܵܐ ܩܘܼܪܒܸܢܵܗ̇.‘ ܐܝܼܢܵܐ ܠܵܐ ܐܵܙܠ݇ܝܼܬܘܿܢ ܒܵܬ݇ܪܲܝܗܝ. 9”ܘܐܝܼܡܲܢ ܕܫܵܡܥܝܼܬܘܿܢ ܦܠܵܫܹ̈ܐ ܘܫܓ݂ܘܼܫܝܹ̈ܐ، ܠܵܐ ܙܵܕܥܝܼܬܘܿܢ، ܣܵܒܵܒ ܐܲܢܹܐ ܒܸܬ ܗܵܘܝܼ ܩܵܕ݇ܡܵܝܬܵܐ، ܐܝܼܢܵܐ ܗܹܫ ܠܹܐ ܝܠܹܗ ܫܘܼܠܵܡܵܐ.“ 10ܗ̇ܝܓܵܗ ܐ݇ܡܝܼܪܹܗ ܐܸܠܲܝܗܝ، ”ܒܸܬ ܩܵܝܡܵܐ ܐܘܼܡܬܵܐ ܥܲܠ ܐܘܼܡܬܵܐ، ܘܡܲܠܟܘܼܬܵܐ ܥܲܠ ܡܲܠܟܘܼܬܵܐ، 11”ܘܒܸܬ ܗܵܘܝܼ ܪ̈ܵܘܕܵܢܹܐ ܓܘܼܪܹ̈ܐ، ܟܸܦܢܹ̈ܐ ܘܡܵܘܬܵܢܹ̈ܐ ܒܕܘܼܟܵܢܹ̈ܐ ܦܪ̈ܝܼܫܹܐ؛ ܒܸܬ ܗܵܘܝܼ ܡܸܢܕܝܼܵܢܹ̈ܐ ܡܲܙܕܸܥܵܢܹ̈ܐ ܘܢܝܼܫܲܢܩܹ̈ܐ ܓܘܼܪܹ̈ܐ ܡ̣ܢ ܫܡܲܝܵܐ. 12”ܐܝܼܢܵܐ ܡ̣ܢ ܩܵܕ݇ܡ ܐܲܢܹܐ ܟܠܲܝܗܝ ܗܵܘܝܼ، ܒܸܬ ܕܵܒ݂ܩܝܼ ܠܵܘܟ݂ܘܿܢ، ܘܒܸܬ ܟܲܡܪܝܼ ܠܵܘܟ݂ܘܿܢ، ܘܒܸܬ ܣܲܦܝܼ ܠܵܘܟ݂ܘܿܢ ܠܟܢܘܼܫܝܵܬܹ̈ܐ ܘܠܒܹܝܬ ܐܲܣܝܼܪܹ̈ܐ، ܘܒܸܬ ܡܲܝܬܝܼ ܠܵܘܟ݂ܘܿܢ ܩܵܕ݇ܡ ܡܲܠܟܹ̈ܐ ܘܫܲܠܝܼܛܹ̈ܐ ܒܘܼܬ ܫܸܡܝܼ. 13”ܐܝܼܢܵܐ ܟܠܵܗ̇ ܐܵܗܵܐ ܒܸܬ ܗܵܘܝܵܐ ܕܝܵܗ݇ܒ݂ܝܼܬܘܿܢ ܣܵܗܕܘܼܬܵܐ. 14”ܩܛܸܥܡܘܼܢ ܒܠܸܒܵܘܟ݂ܘܿܢ ܕܠܵܐ ܐܵܟ݂ܠܝܼܬܘܿܢ ܚܲܡ ܓܵܘ ܓܵܢܵܘܟ݂ܘܿܢ ܒܘܼܬ ܡܘܿܕܝܼ ܒܸܬ ܓ̰ܲܘܸܒܝܼܬܘܿܢ، 15”ܣܵܒܵܒ ܐܵܢܵܐ ܒܸܬ ܝܵܗ݇ܒܹܢܵܘܟ݂ܘܿܢ ܗܹܡܸܙܡܵܢ ܘܚܸܟ݂ܡܬܵܐ، ܗ̇ܝ ܕܠܵܐ ܡܵܨܝܼ ܩܵܝܡܝܼ ܠܕܲܠܩܘܼܒ݂ܠܘܼܗ̇ ܘܡܲܕܸܪܝܼ ܓ̰ܘܼܘܵܒܘܼܗ̇ ܟܠܲܝܗܝ ܕܸܫܡܸܢܵܘ̈ܟ݂ܘܿܢ. 16”ܒܸܬ ܣܲܦܝܼ ܠܵܘܟ݂ܘܿܢ ܐܲܒ݂ܵܗܵܘ̈ܟ݂ܘܿܢ، ܘܐܲܚܘܿܢܘܵܬܵܘ̈ܟ݂ܘܿܢ، ܘܚܸܙܡܵܢܵܘ̈ܟ݂ܘܿܢ، ܘܚܲܒ݂ܪ̈ܵܘܵܬܵܘܟ݂ܘܿܢ، ܘܒܸܬ ܡܲܡܝܸܬܝܼ ܠܚܲܕ݇ܟܡܵܐ ܡܸܢܵܘܟ݂ܘܿܢ. 17”ܘܒܸܬ ܦܵܝܫܝܼܬܘܿܢ ܣܸܢܝܹܐ ܡ̣ܢ ܟܠ ܐ݇ܢܵܫܵܐ ܒܘܼܬ ܫܸܡܝܼ. 18”ܐܝܼܢܵܐ ܐܘܼܦ ܚܕܵܐ ܡܸܙܬܵܐ ܡ̣ܢ ܪܹܫܵܘܟ݂ܘܿܢ ܠܹܐ ܛܵܠܩܵܐ. 19ܘܒܟܠܵܝܬܵܘܟ݂ܘܿܢ ܩܘܝܼܬܵܐ ܒܸܬ ܦܲܪܩܝܼܬܘܿܢ ܠܓܵܢܵܘܟ݂ܘܿܢ.
ܬܠܵܚܬܵܐ ܕܐܘܿܪܸܫܠܸܡ
ܡܬܝ 24:15‐21؛ ܡܪܩܘܣ 13:14‐19
20”ܐܝܼܡܲܢ ܕܚܵܙܹܝܬܘܿܢ ܐܘܿܪܸܫܠܸܡ ܚܘܼܪܕܝܼܘܼܗ̇ ܚܲܝܠܵܘܵܬܹ̈ܐ، ܗ̇ܝܓܵܗ ܝ݇ܕܸܥܡܘܼܢ ܕܩܘܼܪܒܸܢܵܐ ܝܠܹܗ ܚܪܵܒ݂ܘܼܗ̇. 21”ܗ̇ܝܓܵܗ ܐܵܢܝܼ ܕܝܼܢܵܐ ܒܝܼܗܘܼܕ ܥܵܪܩܝܼ ܠܛܘܼܪܵܐ، ܘܐܵܢܝܼ ܕܝܼܢܵܐ ܓܵܘܘܼܗ̇ ܦܵܠܛܝܼ، ܘܐܵܢܝܼ ܕܝܼܢܵܐ ܓܵܘ ܡܵܬܘܵܬܹ̈ܐ ܠܵܐ ܥܵܒ݂ܪܝܼ ܓܵܘܘܼܗ̇. 22”ܐܵܢܝܼ ܝܵܘܡܵܢܹ̈ܐ ܒܸܬ ܗܵܘܝܼ ܝܵܘܡܵܢܹ̈ܐ ܕܫܩܵܠܬܵܐ ܕܬܘܼܥܠܵܐ، ܕܦܵܐܹܫ ܬܘܼܡܸܡܵܐ ܟܠ ܡܸܢܕܝܼ ܕܝܼܠܹܗ ܟܬܝܼܒ݂ܵܐ.#ܗܘܫܥ 9:7 23”ܘܵܝ ܠܒܛܝܼܢܹ̈ܐ ܘܠܡܲܡܸܨܵܢܹ̈ܐ ܒܐܵܢܝܼ ܝܵܘܡܵܢܹ̈ܐ. ܣܵܒܵܒ ܒܸܬ ܗܵܘܹܐ ܐܘܼܠܨܵܢܵܐ ܓܘܼܪܵܐ ܒܐܲܪܥܵܐ، ܘܟܲܪܒܵܐ ܥܲܠ ܐܵܗܵܐ ܥܲܡܵܐ. 24”ܒܸܬ ܢܵܦܠܝܼ ܒܦܘܼܡܵܐ ܕܣܲܝܦܵܐ، ܘܒܸܬ ܦܵܝܫܝܼ ܠܘܼܒܠܹܐ ܐܲܣܝܼܪܹ̈ܐ ܓܵܘ ܟܠܲܝܗܝ ܐܲܬܪ̈ܵܘܵܬܹܐ، ܘܐܘܿܪܸܫܠܸܡ ܒܸܬ ܦܵܝܫܵܐ ܕܘܼܫܕܸܫܬܵܐ ܒܝܲܕ ܐܸܡܘܵܬܹ̈ܐ ܗܲܠ ܕܬܲܡܸܡܝܼ ܙܲܒ݂ܢܹ̈ܐ ܕܐܸܡܘܵܬܹ̈ܐ.
ܐ݇ܬܵܝܬܵܐ ܕܒܪܘܿܢܵܐ ܕܐ݇ܢܵܫܵܐ
ܡܬܝ 24:29‐31؛ ܡܪܩܘܣ 13:24‐27
25”ܒܸܬ ܗܵܘܝܼ ܢܝܼܫܲܢܩܹ̈ܐ ܒܫܸܡܫܵܐ ܘܒܣܲܗܪܵܐ ܘܒܟܵܘܟ݂ܒܹ̈ܐ. ܘܥܲܠ ܐܲܪܥܵܐ ܒܸܬ ܗܵܘܹܐ ܐܘܼܠܨܵܢܵܐ ܓܵܘ ܐܸܡܘܵܬܹ̈ܐ، ܫܓ݂ܘܼܫܝܵܐ ܘܙܕܘܼܥܬܵܐ ܡ̣ܢ ܓܲܪܓܲܡܬܵܐ ܕܝܵܡܵܐ ܘܠܲܦܹ̈ܐ.#ܝܘܐܝܠ 2:31 26”ܐ݇ܢܵܫܹ̈ܐ ܒܸܬ ܫܵܦܠܝܼ ܡ̣ܢ ܙܕܘܼܥܬܵܐ، ܒܝܼܕܵܥܵܐ ܡܘܿܕܝܼ ܒܸܬ ܩܲܘܸܡ ܥܲܠ ܐܲܪܥܵܐ، ܣܵܒܵܒ ܚܲܝܠܵܘܵܬܹ̈ܐ ܕܫܡܲܝܵܐ ܒܸܬ ܦܵܝܫܝܼ ܫܥܝܼܫܹܐ. 27”ܗ̇ܝܓܵܗ ܒܸܬ ܚܵܙܝܼ ܒܪܘܿܢܵܐ ܕܐ݇ܢܵܫܵܐ ܒܹܐܬܵܝܵܐ ܥܲܠ ܥܢܵܢܵܐ ܒܚܲܝܠܵܐ ܘܒܚܸܩܪܵܐ ܓܘܼܪܵܐ. 28”ܐܝܼܡܲܢ ܕܫܲܪܝܼ ܐܲܢܹܐ ܠܸܗܘܵܝܵܐ، ܟܠܹܝܡܘܼܢ ܘܡܲܪܡܘܼܢ ܪܹܫܵܘܟ݂ܘܿܢ، ܣܵܒܵܒ ܩܘܼܪܒܸܢܵܐ ܝܠܹܗ ܦܘܼܪܩܵܢܵܘܟ݂ܘܿܢ.“
ܡܲܬܠܵܐ ܕܐܝܼܠܵܢܵܐ ܕܬܹܐܢܹ̈ܐ
ܡܬܝ 24:32‐35؛ ܡܪܩܘܣ 13:28‐31
29ܘܐ݇ܡܝܼܪܹܗ ܐܸܠܲܝܗܝ ܡܲܬܠܵܐ، ”ܓܲܫܩܘܼܢ ܒܐܝܼܠܵܢܵܐ ܕܬܹܐܢܹ̈ܐ، ܘܒܟܠܲܝܗܝ ܐܝܼܠܵܢܹ̈ܐ، 30”ܐܝܼܡܲܢ ܕܒܲܪܛܸܢܝܼ، ܟܹܐ ܚܵܙܹܝܬܘܿܢ ܘܝܵܕܥܝܼܬܘܿܢ ܒܓܵܢܵܘܟ݂ܘܿܢ ܕܩܘܼܪܒܸܢܹܗ ܩܲܝܛܵܐ. 31”ܗܲܕܟ݂ܵܐ ܐܘܼܦ ܐܲܚܬܘܿܢ ܐܝܼܡܲܢ ܕܚܵܙܹܝܬܘܿܢ ܐܲܢܹܐ ܒܸܗܘܵܝܵܐ، ܝ݇ܕܸܥܡܘܼܢ ܕܩܘܼܪܒܸܢܵܗ̇ ܡܲܠܟܘܼܬܵܐ ܕܐܲܠܵܗܵܐ. 32”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܠܹܐ ܥܵܒܹܪ ܐܵܗܵܐ ܕܵܘܪܵܐ ܗܲܠ ܕܗܵܘܝܼ ܐܲܢܹܐ ܟܠܲܝܗܝ. 33”ܫܡܲܝܵܐ ܘܐܲܪܥܵܐ ܒܸܬ ܛܵܠܩܝܼ، ܐܝܼܢܵܐ ܗܹܡܸܙܡܵܢܝܼ̈ ܠܹܐ ܛܵܠܩܝܼ. 34”ܗܘܹܝܡܘܼܢ ܗܸܫܝܵܪ ܒܓܵܢܵܘܟ݂ܘܿܢ، ܘܠܵܐ ܡܵܠܝܼ ܠܸܒܵܘܵܬܵܘ̈ܟ݂ܘܿܢ ܒܐܵܣܘܿܛܘܼܬܵܐ ܘܪܵܘܵܝܘܼܬܵܐ ܘܪܸܢܝܵܐ ܒܘܼܬ ܐܲܢܹܐ ܚܲܝܹ̈ܐ، ܘܡܸܢܫܸܠܬܵܢܹܐ ܐܵܬܹܐ ܥܲܠܵܘܟ݂ܘܿܢ ܗ̇ܘ ܝܵܘܡܵܐ، 35”ܣܵܒܵܒ ܒܸܬ ܐܵܬܹܐ ܗ̇ܘ ܝܵܘܡܵܐ ܐܲܝܟ݂ ܢܸܫܒ݂ܵܐ ܥܲܠ ܟܠܲܝܗܝ ܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ. 36”ܗܘܹܝܡܘܼܢ ܗܲܕܟ݂ܵܐ ܪܥܝܼܫܹܐ ܘܨܲܠܘܼܝܹܐ ܒܟܠ ܥܕܵܢܵܐ، ܕܡܵܨܹܝܬܘܿܢ ܥܵܪܩܝܼܬܘܿܢ ܡ̣ܢ ܐܲܢܹܐ ܕܗܕܝܼܪܹܐ ܝܢܵܐ ܠܸܗܘܵܝܵܐ، ܘܕܟܵܠܹܝܬܘܿܢ ܩܵܕ݇ܡ ܒܪܘܿܢܵܐ ܕܐ݇ܢܵܫܵܐ.“
37ܒܝܵܘܡܵܐ ܟܹܐ ܡܲܠܸܦ ܗ݇ܘܵܐ ܝܼܫܘܿܥ ܓܵܘ ܗܲܝܟܠܵܐ، ܘܒܠܲܝܠܹܐ ܟܹܐ ܦܵܠܹܛ ܗ݇ܘܵܐ ܘܦܵܐܹܫ ܗ݇ܘܵܐ ܒܛܘܼܪܵܐ ܕܙܲܝ̈ܬܹܐ. 38ܘܟܠܹܗ ܥܲܡܵܐ ܟܹܐ ܐܵܬܝܼ ܗ݇ܘܵܘ ܠܟܸܣ ܠܹܗ ܓܵܘ ܗܲܝܟܠܵܐ ܩܵܝܕܲܡܬܵܐ ܓ̰ܲܠܕܹܐ ܕܫܵܡܥܝܼ ܗ݇ܘܵܘ ܠܹܗ.
Actualmente seleccionado:
ܠܘܩܐ 21: ABTAB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Aramaic Bible Translation Assyrian Bible © 2025 Aramaic Bible Translation
