ငဝ်ႈ 7
7
ၼမ်ႉထူမ်ႈလိၼ်မိူင်း
1 ထႃႇဝရႃႉၽြႃး၊လၢတ်ႈတီႈၼူဝ်းဢႃႇ၊လႄႈဝႃႈ၊ “ၼႂ်းၵူၼ်းၵႃႈမီးၼႂ်းၶိင်ႇၸူဝ်ႈပၢၼ်မိူဝ်ႈလဵဝ်ၼႆႉၵဝ်ႁုႁၼ်လွင်ႈဢၼ်မီးမႂ်းၵေႃႉလဵဝ်ၵူၺ်းသိုဝ်ႈတေႃႇဢေႃႈ။ မႂ်းႁွင်ႉဢဝ်ၵူၼ်းႁိူၼ်းၵူၼ်းယေးမႂ်းသေလႄႈၶဝ်ႈၵႃႈၼႂ်းႁိူဝ်းသၢင်းၽေႃးတႃႉ။- 2ၼင်ႇႁိုဝ်တူဝ်သတ်းၵူႈမဵဝ်းတင်းၼူၵ်ႉၵူႈမဵဝ်းတၵ်းတေဢသၢၵ်ႈလိပ်းယူႇလႄႈသိုပ်ႇၵႂႃႇမိူဝ်းၼႃႈၵႃႈတီႈလိၼ်မိူင်းၼၼ်ႉၸိုင်၊ဢဝ်တူဝ်သတ်းမဵဝ်းဢၼ်မူတ်းသႂ်တူဝ်ပေႃႈတူဝ်မႄႈ၊ယႄႈမဵဝ်းၸဵတ်းၵူႈ၊တူဝ်သတ်းမဵဝ်းဢၼ်ဢမ်ႇမူတ်းသႂ်ၸမ်ႉ၊ဢဝ်တူဝ်ပေႃႈတူဝ်မႄႈယႄႈမဵဝ်းယႄႈၵူႈၵူၺ်းလႄႈ၊- 3-4ၼူၵ်ႉလႂ်ၸိုင်၊ယႄႈမဵဝ်းၸဵတ်းၵူႈဢဝ်သိမ်းဝႆႉၵႃႈတီႈမႂ်းတႃႉ။ ဢဝ်မိူဝ်ႈၼႆႉၵႂႃႇထႅင်ႈၸဵတ်းဝၼ်းၵဝ်တၵ်းႁႂ်ႈၽူၼ်တူၵ်းသီႇသိပ်းဝၼ်းသီႇသိပ်းၶိုၼ်းပုၼ်ႈတႃႇတေယႃႉၽဵဝ်ႈသတ်ႉတဝႃႇၵႃႈၼိူဝ်လိၼ်မိူင်းၵႃႈဢၼ်ၵဝ်ႁဵတ်းပဵၼ်ဝႆႉတင်းမူတ်းပႅတ်ႈသေဢေႃႈ၊” ဝႃႈၼင်ႇၼႆဢေႃႈ။- 5ၼူဝ်းဢႃႇ၊ၵေႃႈႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃး၊သင်ႇလၢတ်ႈဝႆႉၼၼ်ႉဢေႃႈ။
6ယၢမ်းမိူဝ်ႈဢၼ်ၼမ်ႉထူမ်ႈမိူင်းၼၼ်ႉၼူဝ်းဢႃႇ၊ဢသၢၵ်ႈလႆႈႁူၵ်းပၢၵ်ႇပီဢေႃႈ။- 7မၼ်းဢိၵ်ႇတင်းမေးမၼ်းပႃးၸဵမ်လုၵ်ႈၸၢႆးမၼ်းတင်းလၢႆတင်းလုၵ်ႈပႂ်ႉမၼ်းၸိူဝ်းၼၼ်ႉၶဝ်ႈၵႃႈၼႂ်းႁိူဝ်းသၢင်းၽေႃးႁႂ်ႈလႆႈလွတ်ႈၽေးၼမ်ႉထူမ်ႈမိူင်းၼၼ်ႉဢေႃႈ။- 8ၸွမ်းၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉ၊ၵႃႈဢၼ်ပဵၼ်တူဝ်သတ်းဢၼ်မူတ်းသႂ်ဢၼ်ဢမ်ႇမူတ်းသႂ်လႂ်၊တင်းၼူၵ်ႉၵူႈမဵဝ်းလႂ်၊ဢိၵ်ႇတင်းတူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းတူဝ်ပေႃႈတူဝ်မႄႈပဵၼ်ၵူႈပဵၼ်ၵူႈ။- 9ဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးလူၺ်ႈၵၼ်တင်းၼူဝ်းဢႃႇ၊ဢေႃႈ။- 10ဝၢႆးသေၼၼ်ႉၸဵတ်းဝၼ်းၼမ်ႉထူမ်ႈမိူင်းပေႃႇပဵၼ်မႃးဢေႃႈ။
11မိူဝ်ႈဢၼ်ဢသၢၵ်ႈၼူဝ်းဢႃႇ၊တဵမ်ထူၼ်ႈႁူၵ်းပၢၵ်ႇပီၼႂ်းလိူၼ်တီႈသွင်လႆႈသိပ်းၸဵတ်းဝၼ်းၼၼ်ႉ၊ႁူးၼမ်ႉဢၼ်ယႂ်ႇဢၼ်ၵႂၢင်ႈတႅၵ်ႇဢွၵ်ႇသေၵႃႈၼႂ်းဢၼ်လိုၵ်ႉဢၼ်လမ်ႇလိၼ်မိူင်းမႃးလႄႈ၊ၽၵ်းတူႁူးၼမ်ႉၵၢင်ႁၢဝ်တင်းလၢႆၵေႃႈၽုၺ်ႇပိုတ်ႇသေယဝ်ႉ။- 12ၽူၼ်တူၵ်းၵႃႈၼိူဝ်လိၼ်မိူင်းသီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။- 13ၼႂ်းဝၼ်းၼၼ်ႉၼူဝ်းဢႃႇ၊လႄႈမေးမၼ်းၶဝ်ႈၵႃႈၼႂ်းႁိူဝ်းသၢင်းၽေႃးႁူမ်ႈလူၺ်ႈၵၼ်တင်းလုၵ်ႈၸၢႆးၶဝ်သၢမ်ၵေႃႉ၊သေႇမႃႉ၊ႁႃႇမႃႉ၊တင်းယႃႇၽႅတ်ႈ၊ဢိၵ်ႇလူၺ်ႈမေးၶဝ်ဢေႃႈ။- 14ၸႃႉၸဵမ်တူဝ်ထိူၼ်ႇမဵဝ်းလႂ်မဵဝ်းၼၼ်ႉ၊တူဝ်ဢၼ်ယဵၼ်ႇဢၼ်ငႄႈတူဝ်သတ်းဢၼ်လိူၼ်ႈဢၼ်ၵၢၼ်းၵူႈမဵဝ်းဢိၵ်ႇတင်းၼူၵ်ႉၵူႈမဵဝ်း။- 15သတ်ႉတဝႃႇဢၼ်ဢသၢၵ်ႈလိပ်းၵႃႈမီးတင်းသဵင်ႈတင်းလူင်တူဝ်ပေႃႈတူဝ်မႄႈပဵၼ်ၵူပ်ႉပဵၼ်ၵူႈဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးႁူမ်ႈလူၺ်ႈၵၼ်တင်းၼူဝ်းဢႃႇ၊ၶဝ်ပေႃႈမႄႈလုၵ်ႈ။- 16ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉဢေႃႈ။ ဝၢႆးၼၼ်ႉထႃႇဝရႃႉၽြႃး၊ဢိုတ်းႁပ်းၽၵ်းတူလႄႈႁႂ်ႈၼူဝ်းဢႃႇ၊ယူႇတၢင်းၼႂ်းသေဢေႃႈ။
17ၼမ်ႉၵေႃႈထူမ်ႈၶိုၼ်ႈယူႇၶိူဝ်းၶိူဝ်းသီႇသိပ်းဝၼ်းသီႇသိပ်းၶိုၼ်းတဵမ်တဵမ်လႄႈယွင်ႈႁိူဝ်းသၢင်းၽေႃးယူၵ်ႉၶိုၼ်ႈၽၢၵ်ႈလိၼ်ၵႂႃႇဢေႃႈ။- 18ၼမ်ႉၼၼ်ႉယဵင်ႈႁိုင်ယဵင်ႈလိုၵ်ႉမႃးၼႃႇလူင်လၢင်သေလႄႈႁိူဝ်းသၢင်းၽေႃးၵေႃႈၽူးလွင်ႈယူႇၵႃႈၼိူဝ်ၼမ်ႉဢေႃႈ။- 19-20ၼမ်ႉလိုၵ်ႉၼႃႇလူင်လၢင်ထၢၼ်ႈပေႃးထူမ်ႈလွႆလူင်တင်းလၢႆၵူၺ်းဢမ်ႇၵႃး၊ၼမ်ႉယင်းယူၵ်ႉၶိုၼ်ႈၼွင်းမႃးတေႃႇႁွတ်ႈထူမ်ႈပူၼ်ႉၸိၵ်းလွႆလႂ်သိပ်းႁႃႈသွၵ်ႇဢေႃႈ။- 21သတ်ႉတဝႃႇဢၼ်ဢသၢၵ်ႈလိပ်းၵူႈၸိူဝ်ႉၵူႈမဵဝ်းၸႃႉၸဵမ်ၼူၵ်ႉလႂ်၊တင်းတရိၵ်ႈသၢၼ်ႇၵူႈၸိူဝ်ႉၵူႈမဵဝ်းဢိၵ်ႇတင်းၵူၼ်းတင်းလၢႆတၢႆသဵင်ႈဢေႃႈ။- 22ၵႃႈဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇၵႃႈၼိူဝ်လိၼ်မိူင်းတၢႆသဵင်ႈဢေႃႈ။- 23ထႃႇဝရႃႉၽြႃး၊ယႃႉၽဵဝ်ႈသတ်ႉတဝႃႇၵႃႈဢၼ်ဢသၢၵ်ႈလိပ်းၵူႈၸိူဝ်ႉၵူႈမဵဝ်း၊ၸႃႉၸဵမ်မဵဝ်းၵူၼ်းလႄႈတရိၵ်ႈသၢၼ်ႇၵူႈမဵဝ်းဢိၵ်ႇတင်းၼူၵ်ႉတင်းလၢႆပႅတ်ႈသေၵႃႈတီႈလိၼ်မိူင်းလႄႈၵူၺ်းမီးၼူဝ်းဢႃႇ၊ဢိၵ်ႇတင်းၶဝ်ၸိူဝ်းဢၼ်မီးယူႇႁူမ်ႈလူၺ်ႈၵၼ်တင်းမၼ်းၸိူဝ်းၼၼ်ႉၵိုတ်းၵျၢၼ်ႇဝႆႉၵႃႈၼႂ်းႁိူဝ်းသၢင်းၽေႃးၼၼ်ႉဢေႃႈ။- 24ၼမ်ႉၵေႃႈယင်းဢမ်ႇယွမ်းၵႂႃႇသေဢိတ်းလႄႈထူမ်ႈဝႆႉယူႇပၢၵ်ႇႁႃႈသိပ်းဝၼ်းတဵမ်တဵမ်ဢေႃႈ။
Actualmente seleccionado:
ငဝ်ႈ 7: SHNCL
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
