लूकस 12
12
उतुरमाड़ना ही पत्त नू चेता ब'अना
(मत्ता 10:28-33; 12:32; 10:19,20)
1आ बारी हजारों आलर ही गोंहड़ा ख़ॊंड़रा केरा। इय्या गूटी गा आलारिन आलर तिरख़ा हेलरर। तहाँ येसुस मुन्द तंग्है चेलारिन बाचस, “फरिसीर ही उतुरमाड़ना लेक्खा अमा र'आ, लिन्डका गुन्डा नू बिदगी#12:1 येसुस इसन फरिसीर अरा हॆरॊदेर ही उत्तुरमाड़ू चलन अरा सिखाब'अनन ‘बिदगी’ ब'अदस। मत्ता 16:12 ती नाम इदन अख़'आ ओंग्दत। एकासे मेसर'ई अन्ने आर ही मलदौ कत्था बीन्ड्र'ई।#मत्ता 16:6; मर 8:15 2एन्ने आर ही एन्द्रा हूँ मलदौ नलख मल्ला कुलुरका का मल चलख़तार'ओ अरा एन्ने एन्द्रा हूँ मल्ला नूख़्रका का मल ऎरतार'ओ।#मर 4:22; लूक 8:17 3औंगे नीम ऊख़ा नू एकदन बाचका र'अदर आद बिल्ली नू मेन्तार'ओ, अरा नीम एकदन कुड़िया गुट्ठी ही भितरी कलेकसे बाचकादर आद ओर्मर ही ऎरना नू चिच्चियारनुम तेंगतार'ओ।
4अना एंग्है संगीरो, ऎन निमन ब'अदन, नॆ मॆदन पिटनर लिकिन अदही ख़ॊख़ा नू एन्देर हूँ नना पोलनर आर ती अमा एल्चा। 5ऎन निमन ब'अदन का निमा नॆकन एल्चना र'ई। नॆका पिटका ख़ॊख़ा नू नरक नू सजना ही सवंग र'ई आसिन एल्चा। हाँ, ऎन निमन ब'अदन आसीनिम एल्चा।
6एन्देर ऎंड़ ढिबा ती पाँच गोटंग चोरो मल बीसर'ई का? अन्नु हूँ धर्मेस अबड़ा ती ओन्टन हूँ मल मॊधरदस। 7निम्है कुक्कु ता चुट्टी हूँ उर्मी गनरकी र'ई। औंगे अमा एल्चा, धर्मेस निमन मल मॊधर'ओस, नीम बग्गे चोरो ती बग्गे मूल्ली ही र'अदर।
8ऎन निमन ब'अदन का, नॆ एंगन आलर ही मुन्दहारे अख़दन ब'अदस, आसिन मनवा ख़द्दन ऎन हूँ धर्मेसी पैकर ही मुन्दहारे आस एंग्है आलस ब'ओन। 9लिकिन नॆ एंगन आलर ही मुन्दहारे बलदन ब'अदस, आसिन ऎन हूँ धर्मेसी पैकर ही मुन्दहारे आस एंग्है आलस मलदस ब'ओन। 10नॆ मनवा ख़द्दन एंग्हा पत्त नू बिड़दो कत्था कछनख्र'ओस, आद आस गे अम्बतार'आ उंगी। लिकिन नॆ नेम्हा बॊलतासी बिड़दो हींड़'ओस, आद आस गे मल अम्बतार'ओ।#मत्ता 12:32; मर 3:29
11एकाबारी आलर निमन गोड़हा एड़पा अरा मुद्धर अरा आकुस उइय्युर ही मुन्दहारे हो'ओर, आ बारी एकासे अरा एन्देर आनाकिर्त'ओन अरा एन्देर ब'ओन ब'अरकी अमके सोच'आ। 12आ बारिम एन्देर ब'अना मनो अदिन नेम्हा बॊलतस निमन तेंगोस।”#मत्ता 10:19,20; मर 13:11; लूक 21:14,15
बोया उर्बासी जोक्खा ख़ीरी
13फिन गोंहड़ा ती ओर्तोस येसुसिन बाचस, “अना गुरु! एंग्है भईसिन एम्बासी खुर्जी ती एंग्है बटा चि'आ गे आना।” 14लिकिन येसुस आसिन बाचस, “अना आलायो! नॆ एंगन निम्है मइय्याँ नेंवई ननू महले बटा ख़ट्टू कमचकी र'ई।” 15अरा आस आरिन बाचस, “चिहुंक र'अके, ओर्मा मदहे चिबाख़ारना ती बछ्रका र'अके, एन्देरगेका एकअम ओर्तोस गुसन अजम कोड़हे खुर्जी र'ओ होले हूँ आद आस गे मानिम उज्जना मल मनो।”
16तहाँ आस आरिन ओन्टा जोक्खा ख़ीरी तिंगियस: “ओन्टा उरुब आलासी ख़ल्ल नू नगदे खुर्जी मंजा। 17ख़ने आस सोच'आ हेलरस, ऎन एन्देर ननोन? एंग्है खुर्जिन उइय्या गे अड्डा मल्ला। 18अरा आस बाचस, ऎन एन्ने ननोन, एंग्है कुट्ठी आबोन धस'ओन ती कोहाँ कम'ओन अरा अइय्यम ऎन एंग्है धन्नन अरा एंग्है नन्ना जिनिसन उइय्योन। 19अरा ऎन एंग्है जियन ब'ओन, ‘निंगा गे नगदे चान गुट्ठी गे बग्गे जिनिस उइरकी र'ई, नीन ख़न्न ऎख़य, ओनय, मॊख़य अरा रिझ्र'अय।’ 20लिकिन धर्मेस आसिन बाचस, ‘अना बोया! इन्ना माख़म नीन खे'ओय, होले निंग्है उर्मी ख़ॊंड़चका जिनिस नॆख'आ मनो?’ 21एन्नेम आ आलासी दसा हूँ मनो, नॆ तंगा गे लेका खुर्जी ख़ॊंड़रकी उइय्दस। आस धर्मेसी ऎरना नू उरुब मलकस।”
धर्मेस मइय्याँ असरा उइय्या
(मत्ता 6:25-34)
22तहाँ येसुस तंग्है चेलारिन बाचस, “इदगे ऎन निमन ब'अदन, एन्दरन ओनोम एन्ने निम्है उज्जना गे, महले एन्दरन अत्तोम एन्ने निम्है मॆद गे घोख अमा नना। 23एन्देरगेका उज्जना मंडी ती अरा मॆद किचरी ती कोहाँ र'ई। 24ऒड़ा ख़ाख़ा गुट्ठिन ऎरा, अबड़ा मल चाँख़'ई अरा मल ख़ु'ई अरा अबड़ा गे न खली अरा न कुट्ठी र'ई। अन्नु हूँ धर्मेस अबड़न ओन्त'अदस। निंग्है मूल्ली गा ऒड़ा गुट्ठी ती बग्गे र'ई। 25नीम घोख नन्ना ती निम्है उज्जनन ओन घड़ी हूँ बग्गे नना पोल्लोर। 26औंगे नीम ई सन्नी नलखन नना पोलदर होले, नन्ना कत्था ही घोख एन्देरगे नन्दर?
27पूंप गुट्ठी ही पत्त नू सोच'आ, अबड़ा एकासे परदी। अबड़ा नलख मल ननी अरा तमा गे किचरी मल कमत'ई। अन्नु हूँ ऎन निमन ब'अदन, सालोमॊन बॆलस एका कोहाँ उरुब आलस रहचस, लिकिन आस इबड़ा पूंपन ती ओन्टा बेसे हूँ फबना मल अत्तका रहचस।#1बॆल 10:4-7; 2इति 9:3-6 28इन्ना टोंका नू र'ऊ अरा नॆला चिच्ची नू च'ऊ लट्टी गे धर्मेस फबना ऎथ्रना चि'अदस होले, अना पत्त'अना नू पयहा आलारो, धर्मेस निमन मानिम नू ऎरोस ख़ॊजोस दने। 29औंगे नीम अमा घोख'आ का एन्द्रन मॊख़ोम अरा एन्द्रन ओनोम अरा अमा दोलख़ा। 30ई ख़ॆख़ेल ही मल पत्त'ऊ आलर इबड़ा ही तिहा नू र'अनर, लिकिन निम्है बंगस अख़दस का निमा गे इबड़ा आलॊ ही चाड़ र'ई। 31लिकिन धर्मेस निम्है उज्जना नू राजी नन्ना ही पत्त ता सोच नू र'आ, होले इबड़ा उर्मी आलॊ निमा चीतार'ओ।
खुर्जी मइय्याँ असरा अमा नना
(मत्ता 6:19-21)
32अनय सन्नी गोंहड़ा, अमय एल्चय। एन्देरगेका निम्बस निमा गे तंग्है गने मेर्ख़ा राजी नू राजी नना गे आकुस चि'आ गे मने नन्दस। 33औंगे निम्है खुर्जिन बीसा चि'आ अरा कीड़र गे चि'आ। अरा मल पच्चना ढिबा झोला अरा मल खंगर'ओ खुर्जी आबोन मेर्ख़ा नू बेन्द'आ। असन ख़लबर मल ख़ड़नर अरा सुरही मल मूख़ी। 34एन्देरगेका निम्है खुर्जी एक्सन र'ई असन निम्है जिया हूँ लक्की र'ओ।
उर्मी उल्ला एजरका र'आ
(मत्ता 24:45-51)
35निम्है कड़मा गुट्ठी भिड़चका अरा बिल्ली गुट्ठी लघरते र'अन नेकअन।#मत्ता 25:1-13 36अरा नीम अबड़ा आलर बेसे मना। नॆ तम्है उर्बासिन पाब ऎरते र'अनर का आस एकाबारी बेंजा मदी ती किर्रोस ती बलिन ठोकठोकमब'ओस होले आस गे लॆम तिसग'ओर।#मर 13:34-36 37इनाम ख़क्खू हिकनर अबड़ा जॊंख़र, नॆकन उर्बस बर'ओ बारी एजरका ख़क्खोस। ऎन मानिम ब'अदन का उर्बस कड़मन भिड़'ओस ती आरिन मंडी ओना गे ओकत'ओस, अरा हेद्दे बर'अरकी आरिन सुसर'ओस। 38अरा उर्बस अधरात माख़ा महले बिजबेड़ा नू बर'ओस ती हूँ अन्नेम एजरका ख़क्खोस होले अबड़ा जॊंख़र ती आस रिझ्र'ओस।
39लिकिन इदन अख़'आ का एड़पा उर्बस ख़लबर एकाबारी बर'ओर अदिन अख़'ओस होले एजरका र'ओस अरा तंग्है एड़पन उम्पा मल चि'ओस।#मत्ता 24:43,44 40औंगे नीम हूँ सपड़ारका र'आ, एन्देरगेका एकाबारी नीम सोच'आ हूँ मल सोचदर आ बेड़ा नू मनवा ख़द्दन ऎन बर'ओन।”
41ख़ने पतरस मेंजस, “अना उर्बायो, ई ख़ीरिन नीन एमा गे का महले ओर्मर गे तिंकय?” 42ख़ने उर्बस बाचस, “नॆ लूरगर अरा असरा जॊगे जॊंख़स र'अदस। उर्बस आसिन नन्ना जॊंख़र गे ठौका बेड़ा नू तम्है ओन्नन मॊख़नन चि'आ गे असरा नन्दस, फिन आस डहरे ऎका गे कादस। 43उर्बस बरदस ती आ जॊंख़ासिन एन्ने नन्ते ख़क्खदस होले उर्बस आस नू रिझ्र'ओस। 44ऎन निमन मानिम ब'अदन का उर्बस आसिन तंग्है उर्मी आलॊ मइय्याँ जिमा चि'ओस। 45लिकिन आ जॊंख़स तंग्है उर्बस दीरी ती बर'ओस ब'अरकी तंग्है जिया नू ब'ओस ती जॊंख़ारिन दरा जॊंख़-पोल्लोरिन लौना अरा ओना मॊख़ा दरा ऊंखनुम र'ओस होले, 46आ जॊंख़स इकला पाब मल ऎरोस अरा एका बेड़न बलदस आ बारिम आसी उर्बस बर'ओस ती आस गे कोड़हे दंडे चि'ओस अरा आसिन सज'ओस चि'ओस एसन मल पत्त'उर र'अनर।
47एका जॊंख़स तंग्है उर्बासी मनेन अक्खस, लिकिन आस सपड़ारका मल रहचस अरा आसी मने लेक्खा मल नंजस, आस बग्गे मार मॊख़ोस। 48लिकिन नॆ तंग्है उर्बासी मनेन बल्लना ती मार मॊख़ना ही जॊगे नलख नंजस, आस जुक्की मार मॊख़ोस। नॆका बग्गे चीरकी र'ई आर गुसते बग्गे नेर'ओ। अरा धर्मेस नॆका गे बग्गे सोंपचकादस आस गुसते बग्गे होर'ओस।
सान्ति अरा छिन्डरना
(मत्ता 10:34-36; 16:2,3; 5:25,26)
49ऎन ख़ॆख़ेल नू सस्ती ओन्द्र'आ गे बरचकादन, अरा ऎन मने नन्दन का आद ऒड़ मनो दने। 50एंगा सस्ती अरा खे'अना ही ओन्टा नॊड़रना हो'अना र'ई अरा अदही मन्ना गूटी ऎन खिलपत नू र'अदन।#मर 10:38 51नीम एन्देर सोचदर, ऎन ख़ॆख़ेल नू सान्ति चि'आ गे बरचकन का? ऎन निमन ब'अदन, ऎन एंगन पत्त'ऊ आलर अरा मल पत्त'ऊ आलारिन भिने नना गे बरचकादन। 52एकासे का अक्कु ती ओन्टा एड़पा नू पाँच झन तम्है ती छिन्डर'ओर। तीन झन दुई झन ही बिड़दो नू अरा दुई झन तीन झन ही बिड़दो नू छिन्डर'ओर।
53तम्बस तंग्दासी बिड़दो नू
अरा तंग्दस तम्बासी बिड़दो नू
अरा तंग्यो तंग्दा ही बिड़दो नू
अरा तंग्दा तंग्यो ही बिड़दो नू
अरा सास तंग्सेड़ो ही बिड़दो नू
अरा सेड़ो तंग्सास ही बिड़दो नू छिन्डर'ओर।”#मीका 7:6
54तहाँ येसुस गोंहड़ा नू इदन हूँ बाचस, “एकाबारी नीम बदालिन पच्छिम तरती अरगना कुलनन ऎरदर होले चाड़हेम ब'अदर, ‘चॆप बर'ओ’ अरा अन्नेम मनी। 55अरा एकाबारी नीम दखिन ताका तागरना ऎरदर होले ब'अदर, ‘बिड़'ओ’ अरा अन्नेम हूँ मनी। 56अना उतुरमाड़ू आलारो, नीम ख़ॆख़ेल दरा मेर्ख़ा ही मूठन चिन्ह'आ ओंग्दर, लिकिन ई बेड़न चिन्ह'आ पोलदर। 57अरा नीम नीमिन एन्देरगे नेवई नना पोलदर एन्द्रा मानिम र'ई? 58निंग्है बैरी निंगन कछेरी नू हो'अदस होले डहरेनुम आस ती मेसर नखर'आ गे चिहुट नना। मला होले आस निंगन नेंवई ननुस गुसन हो'ओस अरा नेंवई ननुस निंगन सैनस गे चि'ओस, अरा सैनस निंगन जेहेल एड़पा नू सज'ओस। 59ऎन निमन ब'अदन, एका गूटी नीन निंग्है उर्मी खुर्जिन चि'अरकी मुंज'ओय आ गूटी मल उरखोय।”
Actualmente seleccionado:
लूकस 12: KURUXBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
