लूकस 14
14
फरिसीर ही एड़पा नू येसुस
1ओन्टा ख़न्न ऎख़ना उल्ला नू येसुस फरिसीर ही मुद्धासी एड़पा नू मंडी ओना केरस, अरा आलर येसुसिन जोह'आलियर। 2ओन्टा आलस आसी मुन्दहारे रहचस, आस गे जलान्धर रोगे रहचा। 3ख़ने येसुस फरिसीरिन अरा नॆग सिखाब'उरिन बाचस, “एन्देर ख़न्न ऎख़ना उल्ला नू कोड़े नना गे नॆग छिक'ई का?” 4लिकिन आर कलेकसे रहचर। ख़ने आस आसिन ऎंसड़स ती कोड़े नंजस अरा तइय्यस चिच्चस। 5अरा आस आरिन बाचस, “निम्है ती नॆखअम गदहा महले अड्डो तूसा नू खत्तर'ओ होले, आ बारिम आस ख़न्न ऎख़ना उल्ला नू हूँ अदिन मल ओथ्र'ओस का? आद हूँ नलख दिम र'ई।”#मत्ता 12:11 6आर इदही पत्त नू एन्देर हूँ ब'आ पोल्लर।
येसुस सन्नी ऎदरना ही पत्त नू सिखाब'अदस
7पाहियर ओक्का गे मईन जॊगे अड्डा चाजनन येसुस ईरयस ख़ने ओन्टा जोक्खा ख़ीरी ती आरिन तिंगियस। 8“निंगन बेंजा मंडी ओना गे नीकईम एड़'ओर होले मईन जॊगे अड्डा नू अमके ओक्का, एन्देरगेका आस निंगन ती कोहाँ ओहमा जॊगे नॆकअनिम एड्डका र'ओस।#नीति 25:6,7 9होले निमन इरबारिन एड्डका आलस बर'ओस ती निंगन ब'ओस, ‘ईस गे अड्डा चि'आ।’ होले नीन लजर'ओय ती उर्मी ती किय्या अड्डा नू ओक्कना मनो। 10औंगे इकला निंगन एड्ड'ओर होले, कालके ती उर्मीन्ती किय्या अड्डा नू ओक्कके। होले एड्डका आलस बर'ओस ती निंगन ब'ओस, ‘अना संगी मइय्याँ ओक्का’, होले उक्कुर ही मुन्दहारे निंग्हा मईन मनो। 11अरा इदन सुरता नना का नॆ तमन कोहाँ ऎदनर आर सन्नी मन्तार'ओर, अरा नॆ तमन सन्नी ऎदनर आर कोहाँ मन्तार'ओर।”#मत्ता 23:12; लूक 18:14
12तहाँ येसुस तंगन एड्डका आलासिन बाचस, “इकलअम नीन उल्ला महले माख़ा ता मंडी चि'ओय होले, निंग्है संगियर महले भईर महले पाहियर महले उरुब अरबर-परबारिन अमके एड़'आ। एन्देरगेका इदही बदली नू आर हूँ निंगन एड़'ओर, अरा बदली किर्रत'ओर। 13लिकिन इकलअम नीन मदी चि'अदय होले, किड़ारिन, लूलारिन, लेंगड़ारिन अरा अन्धहारिन एड़के। 14एन्देरगेका आर निंगा गे मल किर्रत'ओर, होले नीन आसीस ख़क्खोय। लिकिन उजगो आलर ही उज्जा चो'अना उल्ला नू नीन आसीस ख़क्खोय अरा निंगा किर्रतार'ओ।”
कोहाँ मदी ही ख़ीरी
(मत्ता 22:1-10)
15येसुस गने मंडी ओना उक्का मदहेर ती ओर्तोस इबड़ा कत्थन मेंजस ती आसिन बाचस, “नॆ धर्मेसी राजी नू मंडी ओनोर आर कोड़हे आसीस ख़क्खू आलर हिकनर।” 16ख़ने येसुस आसिन बाचस, “ओर्त आलस कोहाँ मदी चिच्चस अरा बग्गे आलारिन एड्डस। 17अरा ओन्ना-मॊख़ना सरचा ख़ने तंग्है जॊंख़ासिन एड्डका आलारिन मॆख़ा गे तइय्यस ‘बरा, अक्कु उर्मी सरचकी र'ई।’ 18लिकिन आर ओर्मर छमा ने'आ हेलरर। मुन्द ता आलस बाचस, ‘ऎन ख़ल्ल ख़िन्दकादन, अरा अदिन एंगा ऎरा काना र'ई। ऎन निंगन गोहरारदन एंगन छमा ननके।’ 19अरा नन्नस बाचस, ‘ऎन पाँच गोहला अड्डो ख़िन्दकादन, अक्कुन अबड़न बिढ़'आ कादन, ऎन गोहरारदन एंगन छमा ननके।’ 20अरा अउर ओर्तोस बाचस, ‘ईपालीम एंग्है बेंजा मंजकी र'ई, औंगे ऎन बर'आ पोलदन।’ 21आ जॊंख़स किर्रियस ती तंग्है उर्बासिन तिंगियस। ख़ने एड़पा उर्बस ख़ीस मंजस ती तंग्है जॊंख़ासिन बाचस, ‘नगरे ही बजार अरा गली गुट्ठी नू चाँड़ेम कला ती कीड़ारिन, लूलारिन, लेंगड़ारिन अरा अन्धहारिन ओन्द्र'आ बरा।’ 22अरा जॊंख़स बाचस, ‘अना उर्बायो, नीन एकासे आनकय अन्नेम नंजकन अन्नु हूँ अड्डा र'ई।’ 23उर्बस जॊंख़ासिन बाचस, ‘सड़क गुट्ठी नू अरा ख़ल्ल डहरे गुट्ठी तरा कला ती आलारिन बड़पेलहा नना ओन्द्र'आ, एकत्रु एंग्है एड़पा निन्दन नेकअन।’ 24ऎन निमन ब'अदन, ‘धर्मेस एड्डका आलर ती जुक्किम यहूदी आलर दिम धर्मेसी मदिन ओंडे ऎरोर।’”
चेला मन्ना ही मूल्ली
(मत्ता 10:37,38)
25कोहाँ गोंहड़ा गुट्ठी येसुस गने कालालिया, अरा आस किर्रे ऎरर आरिन बाचस, 26“एकअम ओर्तस एंग्है गुसन बरदस, आस तंग्योन अरा तम्बासिन, मुक्कन अरा ख़द्द-ख़र्रा, भईरिन अरा बहिनरिन तंग्है जियन हूँ एंग्है ती कोड़हे चोन्हा नन्दस होले, आस एंग्है चेला मना पोलदस।#मत्ता 10:37 27अरा एकअम ओर्तस तंग्है क्रुसन चेड़'अरकी एंग्हा चड्डे सस्ती सार'आ गे मने मल नन्दस आस एंग्है चेला मना पोलदस।#मत्ता 10:38; 16:24; मर 8:34; लूक 9:23 28निम्है नू एकास एड़पा कम'आ बेद्ददस होले, आस ओक्कदस ती चिताबुता नन्दस, अदही खरचा ऎ बग्गे मनो अरा अत्रु ऎन कम'आ मुंजा ओंगोन का? 29मला होले आस नेव चॊदकादस अरा कम'आ मुंजा पोलदस होले, ईरु आलर ओर्मर आसिन अलखोर। 30अरा ब'ओर, ‘ईस कम'आ गा हेलरस लिकिन कम'आ मुंजा पोल्लस।’
31अन्ति एका बॆलस नन्ना बॆलस गने लड़ाई नना कादस होले, मुन्द आस ओक्कदस ती चिहुंक ती मल सोचदस का? एकास लड़ाई नना बरदस आस बीस हजार आलारिन ओन्द्रदस ती एंग्है गने लड़ाई नना बरदस। ऎन दस हजार हो'अरकी आसिन लड़ाई नू जित'आ ओंगोन का? 32महले आसी गेच्छा र'अनुम पैका तइय्योस अरा आसी गने मेसर'आ बेद्दोस। 33एन्नेम निमा हूँ एंग्है चेला मना गे उर्मीन मुरछ'आ गे सपड़'अना र'ई।
34नीम बॆक लेक्खा र'अदर। बॆक डउल हिके। लिकिन बॆक ही तीनना मेटर'ओ कालो होले, आद अउरिम बॆक मल कमर'ओ#मत्ता 5:13; मर 9:50 35होले आद ख़ॆख़ेल गे अरा सारे गे हूँ मल मनी। अदिन आलर हेबड़नर चि'अनर। ऎन एन्द्रा बाचकन अदिन नीन बुझुर'आ बेद्ददय होले, अदही पत्त नू चिहुंक लगाय सोच'आ।”
Actualmente seleccionado:
लूकस 14: KURUXBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
