Matt. 27
27
Judas no Pa Likhi Pa Tshüqhi Pìthíve
1Inaqhe itheno, achinetomiqo gholo kichimiqo kümtsü kumqo no kíshi püzü Jisü pìthíve nike no aküpüghü jeli shiae. 2Ike panongu no ayikichhe pesü Jisü tshüve, eno sawu püzü Angh Pilate u lo sǘvetsü.
3Judas khuu Jisü thechu shive keno, pa ye kughou Jisü shou küghathabeve keu ithive keno, pa no shipimive keu lo amlo kütakihive eno tsandiyi shighi pesü wu no achinetomi eno kichimiqo lau pechilesü ighi. 4Pa no pi, “Ni ye axiné shivae, kughengu ni ye akipimí küha keu timi pesü thechu shivea ke.”
Panongu no khochile, “Tiye ningu vilo kiu shilo pi kea? Tiye O likhi O vehua thono!”
5Ike Judas ye pisa hu pesü achineki lo vesüve no cheve. Tisheno pa ye wu püzü pa likhi pa tshüqhi pìthíve.
6Achinetomiqo no ghükayiqo kicheluve püzü ishi pi, “Hipau pesü achinekiw akiníbo lo sǘ nikeu ye ayeza kiqi lo achipi kumoe, kughengu hiye ajì no qhüve keu pisa ke.” 7Tighenguno panongu no küptsave no, pisa hipau pesü inamiqo sükumo qhokeu-a shini ke ghenguno ayeghi lì kümlamìw alu lakhi qhüve. 8Tighenguno ishi kutólo hipau pesü, “Ajì no qhü keu yeghi,” ipi cheni. 9Tishi keu vechewo tungkupu Jeremiah no ishi piqhipüa keu shikupuve, “Panongu no ghükayi shighi luve tsü, tiye Israel timiqo no pa shou ame kihithape qhitsü ke, 10eno tiye Ampeu no azah I tsü keu toi, panongu no tipau pesü ayeghi lì kümlamìw alu qhüve keu lo peithave ke.”#27:10 Zech 11:12,13; Jere 19:1-13; 32:6-9
Jisü no Pilate Zülo Puthugho
11Tishi akelo Jisü ye angh zülo puthughoe, eno angh no pa vilo iniju, “No ye Jewmiqo kükau keshea?”
Jisü no khochile, “Nono ti pivae.”
12Kughou achinetomiqo eno kichimiqo no pa nguku ghi iniju keno, Jisü ye kiumu khochilemoe. 13Ikelo Pilate no iniju, “Panongu no O lachile akeu shepe pesü pi ighi akeu no ye chilu anima?” 14Ikemu Jisü ye akipimí pa tsü akeu lo lakhimu khochilemoe, ikelo angh ye shishe akichiqhive.
15Ike tiqhitini#27:15 Tiqhitini ye hechekulu ghulhu piani ghuloki lo alhoaye lono angh ye aqokitikhi pulou lono akughumi dolo lakhi kuqhopheve tsüche. 16Tipau tüqhüdo lo alhoküsa lo ajekipimi lakhi Barabbas ipikeu akughu shiae. 17Ikehu kughou aqokitikhi no hekütsüluve keno, Pilate no panongu vilo iniju, “Nongu ye I pelo khikhiu xaphe pesü nongu tsüpe nishi ani kea: Barabbas keo, Jisü, Messiah ipi chekeu kea?” 18Kughengu panongu no panonguw lüthü lá ghenguno Jisü pesü pa u lo phesü püakeu pa ye ithi ake.
19Kughou Pilate no xakütha lakhü lo iqa akeno, pa nipu no asütsa hitoi pa lau pi puwu, “Akipimí küha keu timi tipau shou kiumu shikepu kumoe, kughengu ìji I samou ni ye pa ghenguno aloqhi ime püani ke.”
20Ikemu achinetomi eno kichimiqo no aqokitikhi xukutho püzü Barabbas xapheve no Jisü pìthíve penike Pilate vilo khue.
21Angh no ishi iniju, “Nongu ye I vilo hi pama dolo khiu nongu ghenguno xapheve tsülo pi kea?”
“Barabbas,” ipi panongu no khochile.
22“Imaye, Messiah ipi ku chekeu Jisü pesü I vilo kiu shivelo pi kea?” ipi Pilate no iniju.
Ikelo panongu kümtsü no khochile, “Pa yedavelo!”
23Pilate no iniju, “Kushiye kea? Pa ye ayeza heküxá kümlà kiu shipüani kea?”
Ikemu panongu no alau shi, “Pa yedavelo!” ipi igha kithe auve.
24Kughou timiqo no muqhumüza thuve niye auve eno Pilate ye kiumu shimlava ipi ithive keno, pa no aqokitikhi zülo no azü pesü pa u mütsüve eno ishi pi, “Timi hipau pìthíve akeu lo I kipimí kiumu kühae, hiye nongu makho ke.”
25Ikelo timi kümtsü no khochile, “Pa kithí makho ye ningu shou eno ningu tianuli shou ikughi pelo.”
26Tisheno panongu lau pa no Barabbas khaqhiphe pe tsüve. Ikemu Jisü ye akighikipili pesü heqhi no yeda pìthíve penike ikhiphe pe tsüve.
Ghüshimiqo no Jisü Junu
27Tisheno angh’w ghüshimiqo no Jisü sailo angh kikhala lo qhi, eno ghüshimi lojiqo kümtsü hekütsü no pa sühope kumqoluve. 28Panongu no pa phì xave tsü eno huchuhuyi keu chijeboboi-phi lakhi pesü pa pu-ue, 29eno asahu ghoküna pe akütsükuqho mülà no pa pipe. Panongu no pa u ajeu aküsǘ lakhi ikhisü tsü. Tisheno panongu no pa gizülo qhoqhünhe no pa junu ghi pi, “Jewmiqo kükau sheqhelo!” 30Panongu no Jisü gi lo müsüte puku tsü, eno aküsǘ pesü pa kütsü lo ide-ide hepuku tsüe. 31Panongu no pa junuqhi tave kethiu, chijeboboi-phi xave tsü püzü paw tiphimini pesü pa pu-uve. Tisheno pa yedave nike sasü wuve.
Jisü Yedave Keu
32Panongu no khalau wuche kelo, Cyrenemi lakhi Simon ipikeu sholu, ikelo ghüshimiqo no anguka lono pa pelo Jisü’w kros xapu pe. 33Panongu no Golgotha ipikeu-a lakhi lo ighi, tipau kiqi ye “Akütsü boghe-a.” 34Tilehi ghüshimiqo no Jisü pelo ye peniye atsaiji gholo khumtsai keu kiteve no pesü pa tsü, ikemu pa no ti micheju no tithiu ye yètsümove. 35Kughou Jisü yedave keno, panongu no asaqhi no paw tiphimini kijéluve. 36Eno panongu ye tilehi iqa ghi Jisü khekuto auve. 37Jisü kütsü shou panongu no akipimí pa tsü keu yepìthi tsa hitoi yèpeqhie:
Hiye Jisü, Jewmiqo Kükau ke.
38Jisü gholo hekibidemi kini yeda pe püake, tiye lakhi no pa u ajeu eno lakhi no pa u piyiu. 39Tipau vechesü wukemiqo no Jisü thaigha keu tsa pa shou pipuku eno panongu kütsü küngü 40ghi ishi pi, “No ye achineki kuboleve no atsala küthü lono shiqhepukuve niye kutò anike kumo? O likhi O xalulo! Tsalá nono Alhou Nu shi aghí aye, kros lono iqighive julo!” 41Titoi, achinetomi, ayeza kükütsümi eno kichimiqo ghí Jisü junuqhie. 42Panongu no ishi pi, “Pa ye kütami xalu kemu pa likhi pa xalu amoe. Pa ye Israelmi kükau ke! Pa pelo itehi no kros lono iqighive pelo eno ningu no pa pülünie. 43Pa ye Alhou shou pükhü achenie. Alhou no pa xalunishi aghí aye, itehi no pa xaluve pelo, kughengu pa no ishi pi acheni, ‘Ni ye Alhou nu ke.’ ” 44Titoi pa gholo yedapüa keu hekibidemi pama ghí kütami gholo Jisü thaigha keu tsa pie.
Jisü Kithí
45Puchomta lono avelau ayì küthü kutólo àküzǘ no ayeghiqha kümtsü küzüpholuve. 46Avelau ayì küthü kihe ghuloki lo, Jisü no ighamuku no ishi pi, “Eli, Eli,#27:46 Kaku hami lo ye Eloi, Eloi ipi yèpüani lema sabachthani?” Hipau kiqi ye, “I Lhou, I Lhou, no ye kushiye I qhivea kea?”#27:46 Leshe 22:1
47Tilehi puthugho akemiqo dolo khami no ti chilu kelo, panongu no ishi pi, “Pa ye Elijah ku anie.”
48Tishi kemtsa panongu dolo milakhi no powu püzü aghüshi lakhi peighi. Pa no aghüshi lo akiqhizü pütsüve püzü Jisü pelo müsüye penike asǜ lakhi lono jì pesü chhopuku tsüe. 49Ikemu kütami no pi, “Itehi ye palokutove aghílo. Elijah no ighi püzü pa xalu nani keo xamla keno ningu juni nolo.”
50Eno kughou Jisü no itaghi asütsa kuloghi shi igha keno, pa ye süthahuve.
51Tishi kemtsa, achineki lo nhaqhiphi hu no atsǜqo lono abò kutólo ixü kütüta kini shive. Ayeghi no itha, atuqo no amta lono ipokütüta shive 52eno akumokiqo ipove no lhapheve. Akimthemi thive no akeqo phimpi kutomo xüputhuve. 53Eno Jisü no xülethuve kethiu, panongu no akumoki lono ipeghive püzü akimthe mishighüna lo ilo no timi kutomo lau ipeghi pìye.
54Kughou aqhe shou zatsüu eno pa gholo Jisü khe akemiqo no ayeghi küghütha eno kiu shi akeno ti kümtsü ithulu keno, panongu ye kichi-mamaive no akichiqhi ghi ishi pi, “Pa ye kuchou no Alhou nue!”
55Tilehi totimi kutomo putosü lono chhejua. Panongu ye Jisü vehupuqo jukuto tsü niye Galilee lono pa papesü ighi kemiqo ke. 56Panongu dolo Mary Magdalene, James ngò Joseph pazá Mary eno Zebedee nu pama pazá ishi ae.
Jisü Sükumo Kükütsü
57Avelau shive kelo, Arimathea lono ighi kemi kiními lakhi Joseph ipikeu ighi. Pa ghí Jisü papeluve kemi lakhi ke. 58Pa no Pilate lau wu no Jisü sükumo khu, ikelo Pilate no asükumo pa tsüve penike azah tsüve. 59Ike Joseph no asükumo luve püzü phephei keu phì akimthe pesü küzüve, 60eno tipau pesü pa no atu chhupho no akumoki akithé shi mülàpüa keu lo sǘve. Pa no atu kijè tukulo pewo akumoki hukikha khave eno wuve. 61Mary Magdalene eno Mary lakhiu pama ye akumoki ghüngü lo iqa ae.
Akumoki lo Ghükhemiqo
62Tishiwo thoghiu, tiye Sabbath tsalà thiu aghili kutò chekeu tsalà lo, achinetomi ngò Phariseemiqo Pilate lau wue. 63Panongu no pi, “Akijeu, ningu no kümsülu akeu ye, timi pishikiqhiu hupau no xüakelo, ‘atsala küthü thiu ni ye xülethuve nani,’ ipi ake. 64Tighenguno nono azah tsüve no atsala aküthüu kutólo akumoki akivishi kheluve pelo. Tishimo aye, pa khopemiqo no ighi püzü asükumo püka pesü wuve no timiqo vilo pa ye xüputhuve ipi nosake. Hi ashekhau no atüghiu nguno alau pishikiqhi alhoküsau shive nanie.”
65Pilate no panongu vilo pi, “Ghükhemiqo sawu lo, eno kíshi asükumo akivishi kheluve moayesa keno nongu no ithi ake toi tishive lo.” 66Ike panongu no wu püzü atu mekha chekeu pesü akumoki mekhave eno ghükhemiqo pelo akivishi kheluvepe.
Actualmente seleccionado:
Matt. 27: STB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
