Luka 7
7
Romu Kɛlɛ-Den-Kun-Tigila Wɔli-Kɛlɛ Lakɛndɛya-Koe
(Matiyu 8.5-13)
1Yisa banta kɛ bɛɛ fɔla mɔgɛnu ye tumɛ min, a tara Kapereniyam soe burɔ. 2Romu kɛlɛ-den-kun-tigi do ye nyɔ, wola wɔli-kɛlɛ kirɛ, ado wɔli-kɛlɛ wo di a ye kati! A tora doni, ko a si faga. 3Kun-tigi wo ya Yisa wara-koe lamɔɛn tumɛ min, a ya Yahudiyanuna kun-tigi donu nata Yisa wara ka a madiya ko a ni na ala wɔli-kɛlɛ dandan. 4Anu nara Yisa madiya bɛrɛkɛ, anu ko, “A bɛnnɛ i ni kei kɛ dɛnbɛ 5bawo mala mɔgɛnu di a ye kati! A kelen pe le ya mala dina-bɔn sɔ ma ye.”
6Yisa bilara anu fɛ. A gbɛrɛnta bɔn ma tumɛ min, kun-tigi wo ya a diyana-mɔgɛ donu nata a wara ka a fɔ a ye ko, “N fa, ma diyana-mɔgɛ ko i kana i nyɛrɛ tɔrɔ. A ko a ma bɛn, ile ni i salɛ ladon ale sufala bɔn la. 7A ko ale ma sɛninya ka na ke i ma. Hali i kumara le dɔrɔn, ala wɔli-kɛlɛ si kɛndɛya! 8Ale fanan bi kun-tigi donuna sɛnbɛ kɔrɔ. Kɛlɛ-dan donu bi ale kɔrɔ. A ko a wa a fɔ do ye ko, ‘Ta!’ A si ta. A wa a fɔ do ye ko, ‘Na!’ A si na. A wa a fɔ ala yɔɔn do ye ko, ‘Kɛ ma!’ A si wo ma.”
9Yisa ya kɛ lamɔɛn tumɛ min, a kawara. A ya a yɛ lamunun a gba-fɛ-bilalɛnu na ko, “Wo ni wo hɛnkili to kɛ ko! N ma kɛ-nyɔgɔ-dɛnkɛninyɛ yen mɔgɔ-wo-mɔgɔ bolo Isirɛla mɔgɛnu tɛma.”
10Kilayɛnu sɛgira kun-tigi wola bɔn la. Anu ya a taran, ala wɔli-kɛlɛ ara kɛndɛya.
Kɛɛ-Musila Dan Lawuli-Koe
11Wo banda kɛ, Yisa tara soe do rɔ min tɔgɔ Nen. Ala karan-dannu anubɛ nyama-ba bilara a fɛ. 12Anu kera so-tarɛ-don-dɛ la tumɛ min, anu ya a taran, mɔgɛnu bi tala furi do la a togon tinɛ, ado kɛɛ-musila den-kei kelen pe, wo le fagara. Nyɔ-mɔgɔ siyaman bilanɛ musi wo fɛ. 13Mari ya musi wo yen tumɛ min, a kinikinita a ma bɛrɛkɛ! A ya a fɔ musi wo ye ko, “I kana di.” 14A tara ka a bole tugu sangbagɛ la. Furu-dununɛ wonu ya anu sɔ. Yisa ko, “Keminɛ! N bi ile le ma, i lasɔ!” 15Furi wo ya a lasɔ ka wuli kumala. Yisa ya a don a na bolo tun.
16Mɔgɛ bɛɛ kilanta bɛrɛkɛ! Anu ya Alla tanto ko, “Nɛbi-ba ara bɔ gbɛ rɔ ma tɛma! Alla ara na ala mɔgɛnu kisi tinɛ!”
17A mankan nyɛnsɛnta Yudiya tonke bɛɛ rɔ anubɛ nyɔla foolɛ bɛɛ.
Yɔni-Batasi-Kɛlɛla Kilayɛnu
(Matiyu 11.2-19)
18Yɔnila karan-dannu ya koe kɛ bɛɛ rakaran a ye. Yɔni ya mɔgɔ fila kele anu tɔ 19ko anu ni ta Mari manyinika ni a ya minna na-koe fɔ, ni ale le wo la, ka, ma ni dogbɛrɛ makɔni?
20Anu nara Yisa wara tumɛ min, anu ko, “Yɔni-Batasi-Kɛlɛ le ya ma sɔ ko ma ni i manyinika ko a ya minna na-koe fɔ, ni ile le wo la, ka, ma ni dogbɛrɛ makɔni?”
21Wo wati, Yisa ye mɔgɔ siyaman dandanna ka kirayatoenu anubɛ nyina-yogoma-tiginu nakɛndɛya. A ya fiyɔn siyaman yɛ laka. 22#Aiseya 35.5-6; 61.1 A ya Yɔnila kilayɛnu yabi ko, “Wo ye min namɔɛnna ka min tayen wo nyɛrɛ yɛ la, wo sɛgi ka wo dantɛgɛ Yɔni ye. Fiyɔnnu bi fen yenna. Namarɛnu bi tagamana. Fɛrɛma-kirayatoenu bara kɛndɛya. Tolo-gberenu bi ko lamɔɛnna. Furinu na ara wuli. Kibara-nyimɛ ara bɔ bolo-kolɔnnu ye. 23Sika sa min tɔ ndela ko la, duwa-dan le wo tigi la!”
24Kilayɛnu sɛgira tumɛ min, Yisa wulita Yɔnila koe fɔla nyama ye. A ko, “Wo tara Yɔni wara wulɛ rɔ tumɛ min, wo miriya ye nfen yen-koe ma nun? Fɔnyɔ ye kalɛ min namagala nun, ba? Wo dɔrɔn? 25Wo tara nfen yen-koe la worɔ? Kei min fɛrɛya bɔnɛ kura-nyimɛ la, wa? Ade, mɔgɔ fɛrɛya bɔnɛ sufa wonu bi mansɛla bolɔnnu na! 26Wo ni a fɔ n ye, wo miriya ye nfen yen-koe ma nun? Nɛbi, wa? Ɔnde kɔnɔ n bi a fɔla wo ye, wo ara min yen, wo tenbira nɛbi la, 27#Malakayi 3.1 ado a sɛbɛnɛ Allata kitabu rɔ Yɔni lela ko la nun ko ala kilayɛ le Yɔni kɛ la. A ko, ‘N bi nna kilayɛ latala i yarɔ ka kilɛ laka i ye.’ ” 28Yisa ya a fɔ tun ko, “N ni kɛ fɔ wo ye. Yɔni makawanɛ ka tenbi mɔgɛ bɛɛ la nun. Kɔnɔ min dɔgɔ Allala mansayɛ rɔ, wo makawara Yɔni ko.”
29Mɔgɛ bɛɛ ya kɛ lamɔɛn hali duti-makelelɛnu. Wonu ya Yisala kumɛ lamɔɛn tumɛ min, anu ya a lɔn ko Allala kilɛ telenta bawo anu bara sɔn nun ko Yɔni ni anu batasi. 30#Matiyu 21.32; Luka 3.12 Kɔnɔ Farisinu anubɛ tɔn-karan-mɔgɛnu ya anu ban Allala ko-latɛgɛnɛ ma min tabɛnnɛ anu ye bawo anu denu ma sɔn nun ko Yɔni ni anu batasi.
31Yisa ko, “N si bi-tele-kɛ-mɔgɛnu sanka nfen ma, wa? Anu bi kama? 32Anu mani de iko dennɛ minnu bi tolonna barɛ rɔ. Dennɛnu bi anu kan nabɔla anu ta-nyɔgɛnu ma. Anu bi a fɔla ko, ‘Ma ara kɔnyɔ-masɔ-sigi sa wo ye kɔnɔ wo ma wo dɔn! Ma ara saya-sigi sa wo ye kɔnɔ wo ma di!’ 33Yɔni-Batasi-Kɛlɛ nara tumɛ min, a ya sunyɛ don, a ma gbɛɛ min. Wo ko, ‘Nyinatoe le!’ 34Nde, Hadama-dan nara tumɛ min, n ya fen-dɔn-kɛ ka n min. Wo ko, ‘Kei kɛ mafɛlɛn! Nugulamɛ anubɛ gbɛɛ-minnɛ le. Duti-makelelɛnu anubɛ hakɛ-tiginu diyana-mɔgɛ le!’ 35Hali wo, Allata hɛnkilimayɛ si lɔn tonyɛ la ka a tɛgɛ a gba-fɛ-bilalɛnu kɛ-nyanu fɛ.”
Yisa Ta-Koe Saimon Farisi Warɛ
36Farisi do ya Yisa kele fen dɔn tinɛ a warɛ. Yisa tara kɛ wola bɔn la. A ya a mayigi#7.36 Mayigi: Anu si fen dɔn nun, anu gbɔnkunnɛ tebulu-mayiginɛ dafɛ. Anu kiannu sa tebulu kɔrɔ. fen dɔn tinɛ. 37Musi do ye nyɔ nun, hakɛ-tigi-wɛ le wo la. A ya a lamɔɛn ko Yisa ye fen dɔnla Farisila bɔn la. Nba, kuru-dagɛ min tɔgɛ alabasita, a nara sɛnti-sɔnkɔ-da-gbɛlɛ la wo rɔ. 38#Matiyu 26.7; Maraka 14.3; Yɔni 12.3 A sɔra Yisa kɔma a kian tɔgɔfɛ. A dira. A ya-yi yigira biribiri, ka Yisa kian kimɛ. Wo kɔma, a ya a kian mafiran a kun-sigi la. A ya a kian sunbu ka sɛnti kɛ anu ma. 39Ale Farisi kei min ya Yisa kele, wo ya kɛ yen tumɛ min, a miriya tara ko, “Ni nɛbi-bɛrɛ le kei kɛ la nun, musi kɛ min tugura a la, a si musi kɛ wara-koe lɔn nun. A si musi kɛ su lɔn nun bawo hakɛ-tigi le wo la!”
40Yisa ya a fɔ a ye ko, “Saimon, a sɔgɛ ye n na ka kumɛ do fɔ i ye.”
A ko, “Karan-mɔgɔ, awa, a fɔ n ye.”
41Yisa ya a fɔ a ye ko, “Kei do ye nyɔ nun min ya mɔgɔ fila dɔndɔ wodi la. Kelen ya wodi-gbɛ kɛmɛ loli bi a bolo, doi ya wodi-gbɛ bi-loli bi. 42Anu filɛ fenfen ma ke a sarala, woletɔ a ya anu filɛ bɛɛ to nyɔ. Filɛ wonu tɔ, yon si yili-makelelɛ keni ka tenbi a ta-nyɔgɛ la?”
43Saimon ya a yabi ko, “N lanɛ a la ko minta yili kolo a bɔtɛ ko.”
Yisa ko, “I wara n yabi a kilɛ fɛ.” 44Wo kɔma, Yisa ya a yɛ lamunun musi wo la ka a fɔ Saimon ye ko, “I ma musi kɛ yen? N bara na ila bɔn la, i ma n kin-maku-yi di n ma kɔnɔ ale ara n kian maku a ya-yi la ka a mafiran a kun-sigi la. 45N nara tumɛ min, i ma n sunbu kɔnɔ kebi n nara, ale ma n kin-sunbɛ boloka. 46I ma tuli di n ma n si n kunyɛ mamun min na kɔnɔ ale ara n kian mamun sɛnti la. 47N bi a fɔla i ye ko musi kɛ ara keninteyɛ min yira, wo ara bɔ gbɛ rɔ ko ala hakɛ siyamɛnu ma ara koto. Kɔnɔ minna hakɛ-nɛ makotora, wo si keninteyɛ dɔgɔmanɛ yira.”
48Wo kɔma, Yisa ya a fɔ musi ye ko, “Ila hakɛnu ma ara koto.”
49Doi minnu siginɛ tebulu fɛ, wonu wulita a fɔla anu nyɔgɔn ye ko, “Nfen mɔgɛ sifa kɛ la min bi mɔgɛnu hakɛnu makotola?”
50Kɔnɔ Yisa ya a fɔ musi wo ye ko, “Ila dɛnkɛninyɛ ara i kisi. Ta yisi-kimɛ rɔ.”
Actualmente seleccionado:
Luka 7: KCLB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Kuranko Common Language Bible © The Bible Society in Sierra Leone, 2006.
