Baseriŋ Bithɔɔkɔ beŋ 1
1
Yisɔs ni lahiri ba ŋinda Yina wo ka Masaala woŋ
1Buku woŋ baŋ gbalo ba yi, Thiyafilɔsi. Ka buku niŋ womayoŋ woŋ,#Luku 1:1-4 yaŋ thanki tɔŋina bɛyiniŋ fooma ba ni Yisɔs iŋ ba thanani wundɛ there ka lɔkɔ ba thɛrɛŋ ndɛ ba niya wali, 2haaŋ ka lɔkɔ ba ŋatito wundɛ ka ariana. Saanuŋ wundɛ ba ŋatito ka ariana, wundɛ ni yamari maŋaye ka sɛmbɛ ba ka Yina wo ka Masaala woŋ baŋ ka bindɛ bi thanki wundɛ yɛtha beŋ ba niyɔ baseriŋ bithɔɔkɔ bikɛnama. 3Naa daŋande nambarɛŋ ba ka tuka nama haŋ baŋ, wundɛ tɔŋinɔkɔy kɛnamɛŋ lɔkɔiŋ babɔyɛ iŋ ka gboŋɛŋ bahakuwande. Wundɛ ni wuŋ bɛrɛ ba mandɛni kɔnthɔ kanaŋ haliko ba tɔŋina nagberekethe ba wundɛ niyɔ wohɛmɛ. Wundɛ gbonkoy iŋ bindɛ ba Hugbakine hu ka Masaala haŋ. 4Naa hintiŋ wundɛ iŋ bindɛ, e bindɛ kɔmande ka tha banthe, wundɛ ni bindɛ yamari woŋ baŋ, na “Baŋ hɛ fuŋ ka mɛti ba ka Yɛrusalɛmi baŋ, kɛrɛ yumbaŋ ba munkii mu tepe nde yaŋ bena muŋ, munkii mu ni Fandaŋ woŋ lahiri muŋ.#Luku 24:49 5Yɔni biye biye hu ka Masaala haŋ iŋ mandi, kɛrɛ wuŋ pɛyɛ malɔkɔ makɔndande Masaala kɔŋ bena biiye iŋ Yina nama woŋ.”#Math 3:11; Maki 1:8; Luku 3:16; Yɔni 1:33
Yisɔs ŋatito ka ariana
6Naa kɔmande baseriŋ bithɔɔkɔ beŋ iŋ Yisɔs ka tha banthe, bindɛ thɔnthɔŋɔŋ niŋ, na “Mariki, e yi kɔŋ nda duutu Hugbakine haŋ ka biya bi ka Isirɛli beŋ ka lɔkɔ baŋ baŋ?”
7Yisɔs tepe bindɛ, na “Malɔkɔiŋ ma bohe bɛyiniŋ baŋ baŋ ba niiye thanki deŋo iŋ Fandaŋ woŋ awa beŋ ka ba kɔthɔ ti bɛŋ niiye. 8Kɛrɛ naa Yina wo ka Masaala woŋ see kendeŋ, beŋ kɔŋ thiŋa iŋ sɛmbɛ, awa beŋ kɔŋ ni maseri ba yaŋ ka Yɛrusalɛmi, mɛnɛ ka kuyɛkɛŋ ku ka Yudiya fooma iŋ ku ka Sameriya, mɛnɛ ka mapeye ma kafaydo maŋ fooma.”#Math 28:19; Maki 16:15; Luku 24:47-48 9Naa thanki wundɛ gbonkiya bɛyiniŋ baŋ baŋ fooma, wundɛ ŋatito ka thinthi ka ariana, awa naa bindɛ niŋ dethi, wuruma haŋ piriŋite niŋ.#Maki 16:19; Luku 24:50-51
10Naa kooye bindɛ thuŋ ka detha ka thinthi ka kuthahinɛ koŋ naa Yisɔs ŋati, ka wuthurɔy wubɛina kɛna see biya biye bi thɔɔyɛ muhuhɛ e bindɛ si kɔɔ kuwaŋ. 11Awa kɛna dome bindɛ, na “Bendo biya bi ka Kalili, mbɛ ba kooye beŋ e beŋ kɔ detha ka thinthi ka kuthahinɛ koŋ? Yisɔs woŋ baŋ, wo sekitho woŋ maŋaye kendeŋ e wundɛ kɔ kaa ka ariana, wundɛ kɔŋ hɛlɛŋ see nɔŋ na kute nthɔŋ beŋ niŋ wundɛ si key ka ariana na.”
Wɔ yetho ba sɛkitha makooye ma ka Yudasi maŋ
12Kɛna duu baseriŋ bithɔɔkɔ beŋ ka Yɛrusalɛmi ŋaye ka kusɛri ku dɔma na Ɔlifisi, bɛrɛ ba kuragba kuthurɔy makey ka mɛti bamandiŋ baŋ. 13Bindɛ biyande ka mɛti ka e bindɛ kaa ka makonko ma ka banka baŋ ka thinthi maŋ, kɛna niyɔy bindɛ: Pita, Yɔni, Yemisi, mɛnɛ Anduru, Filipi, mɛnɛ Thɔmɔsi, Batholomiyu, mɛnɛ Mathiyu, Yemisi hati ka Alifiyɔsi, Saimɔŋ wo nde kurugba woŋ, mɛnɛ Yudasi hati ka Yemisi woŋ.#Math 10:2-4; Maki 3:16-19; Luku 6:14-16 14Bi kɔŋ kɔ kɔmande ka tha banthe timo tima ba ka niya kuraminɛ iŋ yɛrɛmɛŋ beŋ, mɛnɛ Mariyama nanda ka Yisɔs woŋ, mɛnɛ mbɛnda bi ka Yisɔs bibiyɛthɛŋ beŋ.
15Naa daŋande wuŋ mandɛni makɔndande, bi niyɛ lanɛya beŋ kɔmande ka tha banthe. Bi kiŋ nde bɛrɛ ba biya kɛmɛ wunthe e kɔnthɔ kaye ka fooma nama. Awa kɛna ŋaye Pita ka kɔɔ e gbonkiya. 16Wundɛ tepe, na “Mbɛndaŋ beŋ, yɔkɔŋ magbali maŋ niyɔy nɔndi ka tepe nde Yina wo ka Masaala woŋ maŋaye ka Dauda, wo tɛpɛ nde ba Yudasi, nɔŋ na wundɛ kotiyeke biya bi bɔhɛ Yisɔs na beŋ. 17Yudasi kiŋ nde wunthe ka mateete makɛntuŋ, baa wundɛ thanki nde nda yetho ba niyɔ ka wali bakɛntuŋ baŋ.”
18Kɔbiri wo kute Yudasi woŋ ka bɛyi ba ni wundɛ banɛnɔy baŋ, wundɛ boye niŋ kay ka ŋote wundɛ ka e wundɛ tuka, e kotho nama haŋ thiŋa e thɛthɔ awa mukaake muŋ fooma fuŋa. 19Biya beŋ fooma bi ka Yɛrusalɛmi thanki yuyɛ ba huŋ, awa bɛna ka huyuŋ hukɛnamɛŋ haŋ, bindɛ thunde kay haŋ haŋ baŋ keŋ ku dɔma na Akɛdama, wu thalintando na “Kay hu ka wasi baŋ haŋ.”#Math 27:3-8
20Pita key ka kɔtɔkɔy ba tɛpa, na “Wuŋ gbalo ka buku wo Ŋaiŋa ŋaŋ woŋ, na
‘Haliko banka nama baŋ ba pɛyɛnɔkɔ,
haliko wɔ yo wɔ be tha kɛndɛ niyɔ.’#Ŋaiŋa 69:25
Wuŋ gbalo hɛlɛŋ,
‘Halisa wɔ hɛna be thɔɔ yɔkɔŋ bakɛnama ka wali baŋ.’#Ŋaiŋa 109:8
21-22“Wuna biyɛ, yɔkɔŋ wɔ hɛna be thɔɔtɔ mina wundɛ be niyɔ maseri ba ŋaye hu ka Mariki woŋ Yisɔs haŋ ka tuka haŋ. Wɔ bɛina kiŋ ba niyɔ wo nde iŋ miŋ ka malɔkɔ ma nde Mariki woŋ Yisɔs kandiyande iŋ miŋ maŋ, there ka lɔkɔ ba nde Yɔni biye biye hu ka Masaala haŋ,#Math 3:16; Maki 1:9; Luku 3:21 haaŋ saŋ ka lɔkɔ ba ŋatito Yisɔs maŋaye kɛntuŋ ba kaa ka ariana.”#Maki 16:19; Luku 24:51
23Awa kɛna tɔŋɔŋ bindɛ biya biye, Yusufu wo dɔma woŋ na Basabasi, kɔŋ nde hɛlɛŋ nɛŋ dɔma na Yɔsɔtɔsi, mɛnɛ Mathaiyasi. 24Bindɛ ni kuraminɛ e tɛpa, na “Mariki, yi kɔthɛŋ masiyi ma ka wɔ yo wɔ, bɛna toŋine mina wo thanki yi yɛtha woŋ ka biya bibiye beŋ beŋ baŋ 25ba wundɛ be ni wali nɔŋ baseri wothɔɔkɔ ba thɔɔ yɔkɔŋ ba ka Yudasi, baa Yudasi pɛyi mina e yema gboŋa nama.” 26Kɛna yele bindɛ makoro ba yɛtha wunthe ka bibiye beŋ beŋ baŋ, awa kɛna yetho Mathaiyasi, awa wundɛ ndintɔy baseriŋ bithɔɔkɔ bikɔhi iŋ wunthe beŋ.
Actualmente seleccionado:
Baseriŋ Bithɔɔkɔ beŋ 1: LMBNT
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© The Bible Society of Sierra Leone, 2011
