Matio 11

Ngàŋ ntúm Jâŋ Mbabtis

1Yěsô la gɔɔn yɔ̀ɔn nò mbwó *ngàŋa kwò yé ntsɔ̀b pʉ́a nê legém tà ńtsẅé jʉ’, éfo jʉ’ó ńgʉa, ńgiŋe ńzí’i pʉ̀a mmó ḿbiŋe ńtsẅì nkʉ̀ mbòŋo tsɛ̀ɛ metÿǒsoŋ na yɛ̌ pàga ngwòŋ.

2Á gwɔ́ fʉ̀’o, Jâŋ Mbabtis gwɔ́ ndá ntsǎŋ, ńjú’ mé ne shwóŋó á na menò mie Yěsô gẅie aa Kristo ne ńgÿo. Á túm tsɔ́ *ngàŋa kwò yé ngie pɔ́ gʉa ńzɛ́te yé ngie, 3aa *Nzà’nkÿo gẅie mé ne ńzẅí’te yé lá ka pɔ́ gíŋ ńzẅí’te pɔ́ tsɔ́ nyìŋ ndyɛ̀’ɛ wɔ́? 4Pɔ́ gʉa ńgyá Yěsô, á tsɔ́’ɔ mbwó pɔ́b ngie: Pi gʉa ḿbíte mmó gie pi jǔ’ mbɔɔ gie pi gyǎ éshwóŋó Jâŋ, 5éshwóŋó yé ngie: Mefʉ̀ menÿɔ́g ne ńgyá jʉ’, pà pwɔ́’te mekwò ne ńgiŋe mbóŋo, megàŋ nkà’ ne ńzeŋe, pà mbǔ’ metuŋó ne ńjú’u jʉ’, mepfó ne ńzyeen, mé ne sá’a nkʉ̀ mbòŋo nò Ssé mbwó mefÿɔ́g 6Àshÿó mbòŋo aa nyìŋ gẅie à tè kwɔɔnte ná *Míŋ Nyìŋ gwe ssé wɔ́!

7Megàŋ ntúm Jâŋ gʉa, Yěsô cʉ́’ ńgɔɔn nò ńtí Jâŋ, á mbwó lá’ gie aa jʉ’ó, ńzɛ́te wɔ́b ngie: Á kaa fʉ̀’e Jâŋ pi gʉa nkwòŋo tsẅɛ ńgyá kɔ́? Á kekà’a gie fefà ne ńcʉ’te lá? Ngǎŋ. 8Tà pi kɔ̌ɔn ńgee pɔ́ ńgyá kɔ́? Ányìŋ gẅie à ma’ menzsǒ nkáb lá? Tá pà ma’ yɛ̌ ntí menzsǒ ńnéŋe pɔ́ nɔ’? 9Tà pi kɔ̌ɔn ńgee ńgyá pɔ́ wɔ́? Á *ntsẅì nkʉ̀ Ssé lá? Oon tà mèŋ n ké shwóŋó gẅí, à kaa wɛ̌, tà ńcʉa mbɔɔ *ntsẅì nkʉ̀ Ssé. 10Jâŋ ŋwɛ́ zɔɔn ńgwɔ́ nyìŋ gẅie Ssé la cʉ́’ʉ le gɔɔn nò ná yé, ńtsẅi mé ŋwe’e ngie: Jú’u

«mèŋ n ge túmo mântúm wɔ̀ɔn à vɔg ńtó,

ńne ńnyɛte mánzsè gù tá ɔ̀ tó».

11Yěsô gíŋe ńkẅi’i ńgɔɔn ngie: Mèŋ shwóŋó gẅí, kwà’ nénʉ́, àtsɔ̌ nyìŋ laa zɔɔn ńgwɔ́ wó tà ńtɔ́gɔ Jâŋ Mbabtis wɔ́. Tá á ké yɔ̀ɔn, mbà nyìŋ gẅie à pú ńkɔ́gɔ nà nò *lefùɔ Ssé, mbà á pú fáŋ ńcʉa Jâŋ. 12Tà fó nà fʉ̀’e Jâŋ Mbabtis, ńkú fʉ̀’ɔɔn, mé ne ńjwoŋo ńkúu nà nò *lefùɔ Ssé. Pʉ̀a pie é lɔgɔ pɔ́ tʉ̀ ńgÿo menò mɔ́b ne fa’a lekàŋ *lefùɔ Ssé ŋwɛ́ 13Aa pá’ɔɔn, mélà’mie Mǒsê pâ pà Ntsẅì Nkʉ̀ Ssé metsèm la gɔɔn nò tà ńkúu ná fʉ̀’ yé Jâŋ. 14Pi lɔɔn ḿbiŋ ne ńkwoŋo lézsé nyìŋ gẅie Jâŋ aa wɛ̌, mbà mèŋ n ge ké shwóŋó gẅi ngie à lɔgɔ ńgwɔ́ *Elîɛ gẅie à lɔ̌ɔn ńge gíŋe tó 15Nyìŋ lɔɔn ńgẅiin metuŋó lélɔg ńjú’u nò á jú’.

16Yěsô gíŋe ńgɔɔn ngie: Tà mèŋ n ge lɔgɔ kɔ́ pí fʉ̀’ nà pʉ̀a pie ee tsɛ̀ɛ njÿó fʉ’ɔɔn? Pɔ́ leen ńgwá’a gubé gie pɔ́ ńnéŋe ndùmo gÿɛ̌, ńně ńzɔbɔ tsetsɛ̀ɛ pɔ́b, ńtúu ńkẅé ngie: 17Peg ka pú’ leluŋó pi tè zíŋ, ńtú legwé pi tè lʉa. 18Wɛ̂ kwà’ pá’ pɔ́ la gÿo nà Jâŋ. À la tó à tè mmó pfɛ́, à tè melù’ ńnú, pɔ́ gɔɔn ngie aa pʉ̀a. 19*Míŋ Nyìŋ keen ńtó yé fʉ̀’ɔɔn, ńne ḿpfɛ́ɛ mmó ḿbiŋe ńnúu melù’, pɔ́ gɔɔn ngie mé líe yé tà ńgyá, nyìŋ wɛ̂ à gwɔ́ pɔ́ mpfɛɛ mmó, ńgwɔ́ nú melù’, ńgwɔ́ sǒ pà kẅé ncùb pà *Roma mbɔɔ we petsɔ́ pʉ̀a tepòŋ. Tá mé ké ne ńgyá ngie: Sɔ̀ɔn ee kwà’ legye Ssé ńcʉa pɔ́ nà mefà’ mie yɔ̀ɔn nò ne fa’a.

Metÿǒsoŋ mie e lʉ’ʉ́ lé jú’u nò Ssé

(Lukase 10.12-15)

20Yěsô gɔɔn pú’u, ńzye léla’ pʉ̀a metÿǒsoŋ mie à la gʉa wó, ńgÿo menò mmɔɔn mmɔɔn tà é gyɔ́ɔn, pʉ̀a ŋwɛ́ ké tè sele nnɛ́ ńcʉ́me nzèm Ssé wɔ́. 21Á gɔɔn né pɔ́b ngie: Ndoon ee twó pi pʉ̀a Kolazîŋ, mbɔɔ twó pi pʉ̀a Mbetsayida, menò mɔ̀ɔn mie mé la gÿo tsetsɛ̀ɛ pi, é laa pé’e ńgwɔ́ pɔ́ tsɛ̀ɛ tÿǒsoŋ Tir pɔ́ Sidoŋ, mbà pɔ́ leen ńdá’ ńkúbe mà, ḿmÿɔ́g, éshʉa mepɔ́ɔn ḿma’, ńzɔ́’ɔ pfó ńdɔg ńdúŋ 22Aa mmó gie á gÿo mèŋ n gɔɔn ngie: Á ge lá’ gwɔ́ lyɛ̌’ gie e Ssé ŋaga pʉ̀a mesoŋ, egi ngʉ̀gʉ̀ cʉa yé pʉ̀a Tir lâ yé pʉ̀a Sidoŋ, 23ńgʉ́a nà pi pʉ̀a Kapernawúm, pi kwǎŋ ngie Ssé ge kwé’e gẅi kwé’e tà pi kúu lefaŋ káa? Éshwóŋó gẅi ngie: Ngǎŋ, à ge sẅé’e gẅi sẅé’e pi gʉa tà ńkúu lá’ mepfó ssé. Á nue menò mmɔɔn mmɔɔn mie mé la gÿo lá’ pi, à laa pé’e ńgÿo pɔ́ Sodom, mbà Sodom aa yé pɔ́ wó tà ńkú lyɛ̌’ɔɔn 24Aa mmó gie á gÿo mèŋ n gɔɔn ngie: Á ge lá’ gwɔ́ lyɛ̌’ gie e Ssé ŋaga pʉ̀a mesoŋ, égi ngʉ̀ngʉ̀ cʉa yé pʉ̀a Sodom.

Àpi’i Yěsô zéŋe zeŋe

(Lukase 10.21-22)

25Yěsô gÿo ńgɔɔn ngie: Tá wɔ̀ɔn, Cʉ̀apʉ̀a, gù gẅie ɔ̀ sá’a tÿǒ lepwó mbɔɔ tsetsá’, mèŋ sǐe gú pá’ ɔ̀ keen ńnyɛ mɔɔn menò á mbwó mecʉ̀cʉ̀ŋ, ńdÿoon mbwó mengye pâ pʉ̀a pie é la zí’i. 26Oon me Tá wɔ̀ɔn, ɔ̀ la gyá ngie ɔ̀ ge gÿo yɔ̀ɔn nò pɔ́ pú’u. 27Yěsô gíŋe ńgɔɔn ngie: Tá wɔ̀ɔn leen ńnyé kɔ́ɔkɔ́ nà mbwó mɔ́ɔn, ńgwɔ́ tsɔ̌ nyìŋ le zsé múɔ wɔ́, ndà’ Tá zɔ zsé yé. Nyìŋ ké le zsé Tá wɔ́, ndà’ míŋ we zɔ zsé yé, ḿbiŋ ńgÿo nyìŋ gẅie múɔ kwoŋó lényɛɛ Tá we á mbwó yé 28Pi metsèm pie pi kǎ pì’ á zɛɛ gẅi tà pi kʉ́a, pi tó ńtsɛ́ɛ wɔ̀ɔn, n gÿo pi zẅɛte. 29Pi píi *kɔ̌’ yɔ́ɔn ńjÿɔ́gɔ lóŋ pi, ḿbiŋ ńzẅíŋ ngie mèŋ n zí’i gẅi pá’ pi ge gÿo, á nue m bʉlé, ntʉ́m wɔ̀ɔn piŋ ńké tè cÿɔ́gte. Mèŋ n ge náa jʉ’ gie pi ge sẅéte ntʉ́m gẅi wó 30Àyɔ́ɔn *kɔ̌’ pʉ́le, àpì’ gie mèŋ n gee gÿo pi kaa, á zéŋe zeŋe lékaa.

Actualmente seleccionado:

Matio 11: NGBM

Destacar

Copiar