KEJADIN 13
13
Abram sirang ras Lut
1Abram nadingken Mesir; lawes ku Utara, nuju kempak Selatan Kanaan radu ras ndeharana ras kerina erta-ertana. Lut pe ikut. 2Abram bayak namura; melala biri-birina, kambingna, lembuna, pirakna bage pe emasna. 3Kenca bage itadingkenna ingan e, lawes ia i bas sada ingan ku ingan si deban, nuju kempak Betel. Seh ia ku daerah kelang-kelang Betel ras Ai, inganna erkemah mbarenda. 4I je ipajekkenna sada batar-batar ingan ersembah man TUHAN.
5Lut pe lit keluargana, suruh-suruhenna, biri-birina, kambingna ras lembuna. 6Erkiteken si e lanai cukup mbalmbal man bana duana, perban buena asuh-asuhenna. 7E maka rubati permakan Abram ras permakan Lut. (Tupung e kalak Kanaan ras Peris denga ngiani negeri e.)
8Nina Abram man Lut, “Setangke denga kap kita, la mehuli adi rubati suruh-suruhenku ras suruh-suruhenndu. 9Si mehulina siranglah kita. Pilih mbalmbal si arah apai kin atendu. Adi kam kempak kawes aku kempak kemuhen. Adi kam kempak kemuhen aku kempak kawes”
10Itatap Lut kelewet, janah iidahna maka kerina Baluren Lau Jordan seh kempak kuta Soar melala launa, bali ras peken TUHAN ntah pe taneh Mesir. Si enda ope denga TUHAN ngkernepken kuta Sodom ras Gomora. #Kej 2:10 11E maka ipilih Lut kerina Baluren Lau Jordan jadi sikerajangenna jenari lawes ia kempak Timur. Bagenda me persirang-sirangen kalak enda duana. 12Abram ringan i negeri Kanaan, Lut erkemah i kuta-kuta baluren deher Sodom. 13Kalak Sodom jahat dingen erdosa man TUHAN.
Abram miser ku Hebron
14Kenca lawes Lut nina TUHAN man Abram, “I bas inganndu tedis enda nari tataplah kelewet. 15Kubereken ateKu man bandu ras man sinursurndu kerina taneh si idahndu e jadi sikerajangenndu seh rasa lalap. #Perb 7:5 16Kubereken me man bandu kesusuren si seh kal teremna, seh maka ise pe la ngasup meligaisa. Bagi gebuk taneh la terbeligai, bage me pe kesusurenndu la terbeligai. 17Genduari, siarilah kerina negeri e, sabap Kubereken me e kerina man bandu.” 18E maka ipiser Abram kemahna dingen ringan deher Kayu Kramat Mamre i Hebron. I je ipajekkenna batar-batar man TUHAN.
Actualmente seleccionado:
KEJADIN 13: BTX
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Batak Karo Bible © Indonesian Bible Society, 2003.
