लुका 16
16
बाठो ब्यबस्थापको उखान
1इसुले आफना सिस्यानलाइ भुन्यो, “कसइ धनि मान्सको एक जनो ब्यबस्थापक थ्यो। तइले आफना मालिकको धनसम्पति उडाउन्ना छ भन्न्या अरोप तइका बिरुद्मि लाग्याथ्यो। 2तबइ मालिकले तइलाइ बोलाइबर भुन्यो, ‘मु तेरा बिसयमि यो कि सुन्ना छु? तेरो सप्पइ हिसाब किताब मुलाइ बुजा। आबबटहइ तु ब्यबस्थापक हुन्या आथिनि।’ 3तबइ ब्यबस्थापकले आफना मनइनि भुन्यो, ‘आब मु कि अरु? क्यालाइकि मेरा मालिकले मुबटहइ ब्यबस्थापकको काम खोस्साछन्। खन्या जोत्या मेरो ताकत आथिन्, भिक माग्द् मुलाइ सरम लागन्छ। 4आब मुइले कि अद्दु पड्या हो मु सोच्चा छु। ब्यबस्थापकको काम बटहइ निकाल्दियापाछा मान्सनले मुलाइ तिनुनका घरमि कसेरि स्वागत अद्या छन् मुइले निस्चय अर्या छु।’ 5तइपाछा तइले मालिकका रिणिनलाइ एक एक अरिबर बोलायो, रे पल्लिकालाइ सोध्यो, ‘तमलाइ मालिकको रिण कति छ?’ 6उइले भुन्यो, ‘तिन हजार लिटर जइतुनको तेल।’ तबइ ब्यबस्थापकले उइलाइ भुन्यो, ‘तमरो तमसुक ल्यास, रे छिट्टाइ बसिबर पन्नर सया लिटर लेख।’ 7तइपाछा तइले अर्खालाइ सोध्यो, ‘तमरो रिण कति छ?’ उइले भुन्यो, ‘तिन सय पचास कुन्डल गउँ।’ तइलाइ भुन्यो, ‘तमरो तमसुक ल्यास, रे तिन सया कुन्डल लेख।’ 8आब तइका मालिकले तइ अधर्मि ब्यबस्थापकको चलाखिपनको बडाइ अर्यो। क्यालाइकि यइ सन्सारका मान्सनले आफनाइ पुस्ताका अउर मान्ससित व्यवहार अरन्ज्या ज्योतिका सन्तान भन्ना बर्ता चलाख हुनाहान।”
9“मु तमखि भुन्नउ, आफनि निउति सन्सारका धनले सङिन बना, रे जब त्यो धन सकिन्छ, तमुलाइ अनन्त ठउँरमि स्वागत अरिन्या छ। 10जो थोक्काइ कुरामि इमान्दार हुन्छ, त्यो बर्ताइमि लइ इमान्दार हुन्छ, रे जो थोक्काइ कुरामि बेमान हुन्छ, त्यो कद्बइ कुरामि बेइमानि हुन्छ। 11तबइलाइ तमु सन्सारका धनमि इमान्दार भयानु भन्या तमुलाइ साँचो धनको जिम्मा कइले देलो? 12रे तमु अर्खाका धनमि इमान्दार भयानु भन्या, तमुले पाउन्या धन तमुलाइ कइले देलो रे?
13“कसइ नउकरले दुइ मालिकको सेबा अदद् सक्दइन, क्यालाइकि तइले एकलाइ घुणा अरन्छ, अर्खालाइ निको माणन्छ, या त्यो एकको भक्त भइबर अर्खालाइ निको मान्नइन्। तमु परमेस्वर रे धन दुयेइको सेबा अद्दसक्दानु।”
इसुका अउर सिछ्या
(मत्ति ११:१२-१३; ५:३१-३२)
14धनका लोबि फरिसिले इन सप्पइ कुरा सुनिबर इसुको खिसि काट्यो। 15तबइ उनुले तिनुनलाइ भुन्यो, “मान्सनका आगाडि आफुलाइ धर्मि धेकाउन खोजन्छउ, रे परमेस्वरले तमरो ह्रिदय जान्नाहान, क्यालाइकि मान्सका बिचमि जो उच्चो गणिरइ छ, परमेस्वरका नजरमि त्यो तुछ्छ ठहरिन्या छ।
16“बप्तिस्मा दिन्या युहन्नाका बेलासम्म ब्यबस्था रे अगमबक्ताका सिछ्या प्रचार अरिया। तइ बेलाबटहइ परमेस्वरका राज्यकि असल रइबार प्रचार अरिया छ, रे सप्पइ जना तइ राज्य भित्र जानाइलाइ जोडतोड अद्दाछन्। 17रे परमेस्वरका निएम बटहइ एक मात्तरइ बिन्दु मेटिन भन्ना त स्वर्ग रे धर्ति हराइबर जान सजि छ।
18“जइले आफ्नि स्वानिलाइ छाडिबर अर्खिलाइ ब्या अरन्छ, तइले ब्यबिचार अरन्छ, रे बइकानले छाणेइ स्वानिलाइ ब्या अद्या मान्सले लइ ब्यबिचार अरन्छ।”
धनि मान्स रे लाजरस
19“एक जनो धनि मान्स थ्यो, जो महङगा मलमलका लत्ता लाइबर दिनदिनि मोजमज्जा अरन्थ्यो। 20उइका देलिखि लाजरस नाउँको एक जनो गरिब मान्सलाइ ल्याइबर राखिदिन्थ्या। तइको सरिल घाइघाले भरिया थ्यो। 21त्यो धनि मान्सका टेबुलबटहइ झड्या टुक्ररा खाइबर लाजरसले आफनो पेट भद्या इछ्या अरन्थ्यो। कुकुर आइबर तइका घाँ चाटन्थ्या। 22एक दिन त्यो गरिब मान्स मर्यो, रे स्वर्गदुतनले तइलाइ लइजाइबर अब्राहामका सङ राख्यो। त्यो धनि मान्स लइ मर्यो रे तइलइ खडड्यो। 23तइ धनि मान्सले नरकमि भउत दुःख पाउन्याबेला उइले हेर्यो रे दुरमि अब्राहाम रे उनरा सङमि लाजरसलाइ धेक्यो। 24रे उइले डाको छाडिबर भुन्यो, ‘हे पिता अब्राहाम, मु मि दयाअरिबर। लाजरसलाइ याँ पठाइदिय रे तइले आफना अउलाका टुप्पा पानिमि चोपिबर मेरा जिबणालाइ ठन्नो पाडिदिय, क्यालाइकि मु यइ आगामि भउत दुःख पाउन्नाछु।’ 25रे अब्राहामले भुन्यो ‘चेलो, याद अर, तुइले आफना जिबनमि निका निका कुरा भोग अरि रे यइ लाजरसले दुःख भोग्यो। त्यो आब या आराममि छ, रे तु दुःखमि छइ। 26इन सप्पइ कुराबाहेक याँ बटहइ तेरा वाँ पारि जान खोज्या जान नसकुन रे ताँ बटहइ याँ हामरा वाँ वारि आउन लइ नसकुन भनिबर हामरा रे तमरा बिचमि एक गइलो खाड्डो छ।’ 27उइले भुन्यो, ‘पिता, तबइलाइ मु तमरि खुसामत अद्उ, तमले तइलाइ मेरा बाका घरमि पठाइदिय, 28क्यालाइकि मेरा पाँच भाइ छन्, रे तइले जाइबर तिनुनलाइ चेतावनि दियाले हुनेइथ्यो नति तिनुन लइ इसइ दुःखका ठउँरमि आउन्याछन्।’ 29रे अब्राहामले भुन्यो, ‘तिनुनसित मोसा रे अगमबक्ताका किताब छन्। तिनुनले सुणुन।’ 30रे उइले भुन्यो, ‘नाइ, पिता अब्राहाम, मर्याकाबटहइ कोइ एक जनो तिनुनका वाँ गयो भन्या त तिनुनले पस्याताप अद्या छन्।’ 31अब्राहामले उइलाइ भुन्यो, ‘मोसा रे अगमबक्तानका कुरा तिनुनले सुन्नाइनन् भन्या, मर्याबटहइ कोइ मान्स जिउनो भइबर लइ गयाले तिनुनले बिस्वास अद्या आथिनन्।’”
Actualmente seleccionado:
लुका 16: DOTY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.
