मती 1
1
ईसु ने वंसावली
(लूका 3:23–38)
1ईसु मसी अबराहम ने सन्तान हे नी दाऊद ने सन्तान हे, ईसु मसी ने वंसावली अणी तरह हे। 2अबराहम ने सुरो इसाक तो, नी इसाक ने सुरो थाजो याकूब, नी याकूब हू यहुदा नी विने पाई पेदा थाजा। 3यहुदा हू फिरिस नी जोरह पेदा थाजा ता। वणनी आई ने नाम तामार तु। फिरिस हू हिसरोन पेदा थाजो, नी हिसरोन हू एराम पेदा थाजो। 4एराम हू अमीनादाब पेदा थाजो, नी अमीनादाब हू नहसोन, नी नहसोन हू सलमोन पेदा थाजो। 5नी सलमोन हू बोअज पेदा थाजो नी विने आई राहाब ती। नी बोअज हू ओबेद पेदा थाजो नी विने आई रूत ती। नी ओबेद हू यिसे पेदा थाजो। 6नी यिसे हू दाऊद राजो पेदा थाजो। नी दाऊद हू सुलेमान वणी बयीरी हू पेदा थाजो जिए पेले उरियाह ने बयीरी ती। 7सुलेमान हू रहबाम पेदा थाजो, नी रहबाम हू अबिया पेदा थाजो, नी अबिया हू आसा पेदा थाजो। 8नी आसा हू यहोसाफात पेदा थाजो, नी यहोसाफात हू योराम पेदा थाजो, नी योराम हू उजियाह पेदा थाजो। 9नी उजियाह हू योताम, नी योताम हू आहाज, नी आहाज हू हिजकियाह पेदा थाजो। 10नी हिजकियाह हू मनसिह, नी मनसिह हू आमोन पेदा थाजो, नी आमोन हू योसीयाह पेदा थाजो। 11बन्दी थाईनी बेबीलोन जावा ने समय मा योसीयाह हू यकुनयाह नी विने पाई पेदा थाजा।
12बेबीलोन मा पुगवा बाद मा यकुनयाह हू सालतियेल पेदा थाजो, नी सालतियेल हू जरुबाबेल पेदा थाजो। 13नी जरुबाबेल हू अबीहूद, नी अबीहूद हू इलियाकीम, नी इलियाकीम हू अजोर पेदा थाजो। 14अजोर हू सदोक, नी सदोक हू अखीम, नी अखीम हू इलीहुद पेदा थाजो। 15इलीहुद हू इलियाजर, नी इलियाजर हू मतान, नी मतान हू याकूब पेदा थाजो। 16नी याकूब हू यूसुफ पेदा थाजो, जीयो मरियम ने आदमी तो नी मरियम हू ईसु पेदा थाजो जीयो मसी केवाय हे।
17अणी तरह अबराहम हू दाऊद लगण सऊदा पीढ़ी थाजी। दाऊद हू बेबीलोन लगण बन्दी बणावीनी लई जावा ने समय लगण सऊदा पीढ़ी थाजी। नी बेबीलोन पोसवा बाद ईसु मसी लगण सऊदा पीढ़ी थाजी।
ईसु ने जनम
(लूका 2:1–7)
18 #
लूका 1:27
ईसु मसी ने जनम अणी तरह हू थाजू, जेरे विने आई मरियम ने हगाई यूसुफ ने हाते थाजी ती नी विवा थावा हू पेले पतो लागो के, विने पवितर आतमा ने तागत हू पेट मईना थाजा। 19पण विने आदमी जी यूसुफ दरमी तो, तणी वी वणजी बदनाम करवा नीं साहतो तो, तणी वणाय ये वात काठी किदी के, सुपके हू हगाई तुड़ी दियू।
20पण जेरे वी अणा बारामा हुसी रेजो तो, ते परबू ने हरगदुत हपना मा परगट थाईनी केवा लागो, “हे यूसुफ दाऊद ने सुरा, तु आपड़े हगाई किदी थकण मरियमे तारे निय लावणा हू नकी बिये, केमके जी विने पेटमा हे वु पवितर आतमा ने हाड़े हू हे। 21#लूका 1:31वे एक सुरो जणहीं नी तु विने नाम ईसु राकजे, केमके वी आपड़े मनका ने वणने पाप हू वसावहीं।”
22यू हेतु तणी थाजू के, जी कई परमेसवर ने हाड़े हू बुलवा वालाय केजू तु, वु पुरू थाए, 23“हबलो, एक कुआरी सुरी हाऊ थाईनी एक सुराय जनम आलहीं नी विने नाम इमानुएल राकजू जाहीं।” जिने मतलब हे, “परमेसवर अमारे हाते हे।”
24जेरे यूसुफ ऊग हू जागजो ते, वणाय वुस किदू जी परबू ने हरगदुते हुकम आलजो तो। वी मरियम हू विवा करीनी आपड़े घेर लई गियो। 25#लूका 2:21पण जेरे लगण वणजी सुराय जनम नीं आलजू, तेरे लगण वी वणी कनी नीं हुतो। यूसुफे सुरा ने नाम ईसु राकजू।
Actualmente seleccionado:
मती 1: WBR
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023 NLCI
CC BY-NC-ND 4.0
