प्रेरित.कामी 28
28
मेलीटा रेनअः टापु
1जब आले बंचाव उडुंग नले, दो फहाम लआले ची नोःआँ मेलीटा नुमू रेनअः टापु हेके। 2होनाःड़े रिनकु बसिनदा कु, आले के मुरुक बढ़ियाँ लेलेआकु। दाअः हिजोअ केना लःअय ठांड़ ताही नेना, हिना लःअय हुंकू सेंगेल जुल केते आले के सोवागत लेलेआकु। 3पौलुस मि बोझा सहान के हालांग केते, सेंगेल जुल लआ रे दोहोय केनाय, दो बिंङ सेंगेल रआ आँच रे, होना तरअः उडुंग केते, पौलुस आला तीः रे मेरहाव नाय। 4टापु रिनकु बसिनदा कु हुनी आला तीः रे बिंङ मेरहाव नेल केते, “साथेगी नुई होड़, होड़ गोगोएगी हेके, नुई समुदर तरअः दो बंचाव नाय, सेरे होः नेयाय देवता जिवीःड काय ताहिः चिलिया” मेन केते आकु-आकु कंहड़ी केनाकु 5बकिर पौलुस हुनी बिंङ के सेंगेल रे झटकाव लियाय, आउर हुनी के एतान हानी होः का हुयाव नेना। 6बकिर हुंकू पौलुस के ढिगुंर लकान मो-कोआय, चाहे अचाका नुर केते गोएःग कोआय, मेन केते ढेर दिरी जगुत नेल असराई केनाकु, तेकर हुनी के एतान हानी होः का हुयाअः ताना, दो अपन मन बदलाव केते, नुई दो देवता हेके मेन केते कंहड़ीः दाकु।
7होना ठाँव आस-पास पुब्लियुस नुमू रिनी टापु रिनी मुखिया आला ओत ताही नेना, हुनी आले के अपन ओड़ाअ इदी लेलेआय आउर पे रोज जगुत आले के सेवा-सुसार लेलेआय। 8हिना बेरा पुब्लियुस आली आपाते जाईड़रा आउर लाहीःग सेन रे खटिया रे गितीःग ताही नेनाय, पौलुस हुनी दुबाःड़े सेन केते, हुनी तेङ रे तीः दोहो केते बिनती लःअय तेकर हुनी के बेस आमीन लियाय। 9नोःआँ तयोम टापु रिनकु एटाअ बेमराहाकु होः हीःग नेनाकु आउर बेस आमीन नाकु। 10हिना लःअय होड़कु आले के मुरुक बेस लेलेआकु, आउर जब आले होनाःड़े तरअः सेन एहेबोः केनाले दो, जे कुछ आले के दरकार ताही नेना, हुंकू होना जामा जिनीस जहाज रे दोहोऊ लेलेआकु।
मेलीटा टापु तरअः रोम पखा
11पे महिना तयोम सिकन्दरिया सहर तरअः हिजोअ वाला मियांड जहाज रे रकाःब केते उडुंग नले। होना जहाज राबांग भाईर टापु रे तिंगु ताही नेना, जहाज रे जावा देवता रेनअः चिनहा लिखा लेनअ ताही नेना। 12फिन आले सुरकुसा सेन सोदोर नेनाले, होनाःड़े आले पे रोज ठहराव नेनाले। 13आले होनाःड़े तरअः दौंड़ी-दौंड़ी सेन केते, रेजियम सहर हीःग नेनाले। दोसरा हिला दखिन होय चलाव नेना, हिना लःअय आले मि-रोज तयोम पुतिओली सहर सोदोर नेनाले। 14होनाःड़े बोकोकु लोः भेंट हुयाव नेना, आउर हुंकू आले के होनाःड़े सात रोज ठहराअ लःअय गोहराव नेनाकु। आउर नोःआँ लकान आले रोम हीःग सोदोर नेनाले। 15रोम सहर रिनकु बोको बोयहा कु आले आला हिजोअ खभाईर के आयुम केते, हुंकू अप्पियुस रेनअः बजार आउर “पे सराय” नुमू रेनअः ठाँव जगुत आले लोः भेटोः लःअय उडुंग हीःग नाकु। हुंकू के नेल केते पौलुस परमेसर के धन्यवाद एमा लियाय, आउर ढाढ़स लःअय।
16जब आले रोम सोदोर नेनाले दो, पौलुस के छुट भेटाव नेना ची जे दुबाःड़े चहाआय, ताही दड़ियोआय बकिर पहरा एमोई सिपाही लोः ताहिनोआय।
रोम रे पौलुस
17पे रोज तयोम पौलुस जाहुदी नेताकु के राअः लिकुआय, आउर हुंकू जवार नाकु, दो हुनी हुंकू के बेता लिकुआय, “ए बोकोकु ईङ अपन होड़कु बिरोध चाहे पुरखाकु आला चाईल-चाकर रआ बिरोध एतान होः काईङ एतान तदा, सेरे होः जिरोसलेम रे, ईङ के बंदी बनाव केते, रोमी रिनकु आला तीः रे सोंपाव लिङाकु। 18रोमीकु ईङ के जाँच पड़ताल केते, ईङ के बाबाई नाम केनाकु, एता लःअय ची ईङ एड़े एतान होः गुनाह काकु नाम लआ जेकर से ची ईङ के गुजिङकु। 19#प्रे.कामी 25:11बकिर जब जाहुदीकु नोःआँ रअः बिरोध रे कंहड़ीः दाकु दो, ईङ के रोमी महाराजा कैसर तरअः गोहराअ पड़ाव नेना। नोःआँ लःअय कोवान ची ईङ अपन जाईतकु रेगी, एतान दोस होः ललगाव काईङ चहाअ केना। 20हिना लःअय ईङ आपे लोः भेटोईङ आउर बतियायिङ मेन केते आपे तरअः गोहराव नेनिङ, एता लःअय ची इसराइल रेनअः आसरा रअः चलते ईङ सिक्काड़ रे तोल तानिङ।”
21हुंकू पौलुस के बेता लियाकु, आले के जाहुदिया तरअः आम रअः बारे एतान चिठी होः का भेटाव नेना, आउर ना होनाःड़े तरअः सेन केते हीःग उनकु, जाहें बोकोकु आम आला जहान खभाईर एम लअकु आउर ना आम रअः बारे का बेस खभाईर उदूः लअकु। 22बकिर आले आम पखा तरअः, आम आला एतान बिचार एदनाआ सेके आ-आयुम चहाअ तनाले, एता लःअय ची आले पाड़ी तनाले ची नोःआँ होरा रअः बिरोध रे गोटाते कंहड़ी याकु।
23हिना लःअय हुंकू पौलुस लोः मियांड दिन ठहराव लअकु, आउर हेन हिला ढेर होड़कु, जे ओड़ाअ पौलुस ठहराव ताही लःअय, होनाःड़े जवार नेनाकु। तब पौलुस निदवा तरअः आयुःब जगुत, आउर परमेसर आला राईज रअः बारे रे चेताव केते समझाव कु केनाय, आउर मुसा आला कनहुन हेतरअ आगमजानीकु आला पुथी तरअः ईसु रअः बारे रे हुंकू के मा-मनाव ची लःअय कुरनीस लःअय। 24तब हुनी, जे कुछ कंहड़ी थिलाआय होना के थोड़ेक होड़ मनाव नाकु, आउर थोड़ेक काकु बिसवास लआ। 25जब हुंकू आकु-आकु आला बिचार का जुमाव नेना, तेकर बिदायोअ तानाकु दो, पौलुस हुंकू के नोःआँ आखरी बात कंहड़ीओ लिकुआय, पबितर आतमा आगमजानी इसायस आला आहा तरअः, आपे आलकु पुरखाकु के ठीके कंहड़ी लःअय ची,
26 #
जसा 6:9,10 “‘नुकू होड़कु दुबाःड़े सेन केते, नोकान कंहड़ी पे,
आपे आयुम एका केआपे, बकिर एरपे समझाआ,
आपे नेल एका केआपे, बकिर आपे के एरे सुझाआ,
27एता लःअय ची नुकू होड़ आला मन अरमोट ना,
नुकू लुतूर तरअः आ-आयुम काकु नामा, नुकू अपन मेःड जापिःड केदाकु,
नोकान आलु हुयाव कोअ ची नुकू मेःड तरअः नेलेकु,
आउर लुतूर तरअः आयुम केते, आउर मन रे समझअकु,
आउर ईङ पखा फिराअकु,
आउर ईङ हुंकू के चंगा कुईंग।’”
28हिना लःअय आपे के पाड़ी जुनोः चाही ची, परमेसर आला नोःआँ उधार रअः खभाईर एटाअ जाईतकु दुबाःड़े कुलगोःड लआ एदनाअ, आउर हुंकू आयुम केआकु। 29(आउर जब पौलुस नोकान बात कंहड़ी लःअय दो, जाहुदीकु आकु-आकु मुरुक कंहड़ी उपड़ीङ केते, होनाःड़े तरअः सेनोः नाकु।)
30पौलुस पुरा बार बरीस जगुत अपन भाड़ा ओड़ाअ रे ताही नेनाय। आउर जाहें होः हुनी लोः भेटोः हिजोअ केनाकु, हुंकू के हुनी सोवागत कु केनाय। 31हुनी बेगार रोक टोकते, बेगार लाज-बोरते परचारे केनाय। आउर हुनी परमेसर आला राईज रअः बारे परचारे केनाय, आउर परभु ईसु ख्रीस्त रअः बारे उपदेसे केनाय।
Actualmente seleccionado:
प्रेरित.कामी 28: ASR
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023 NLCI CC BY-NC-ND 4.0
