Gn 4
4
Nak Caín c'al nak Abel
1Lajwi tu', max junanej ba Adán yetok Eva, max oc ix yobixal. Lajwi tu xin max jay yune' ix, max yik Caín.*fn* Axa yalon ix tu': Mayal jay jun in winak unin. A Jehová max ak'on ayin, ẍi ix. 2Max lajwi tu' max alji c'apax nak Abel, yuẍtak Caín. A nak Abel tu', joboj calnel max yun nak, axa pax nak Caín tu xin, max oc nak yin mulnajil sat tx'otx' tx'otx'.
3Max ec'c'al tiempo xin, ay jun c'ual max yitok Caín xajanbal bay Jehová, a ton tzet chi yi' yin is mulnajil. 4Axa Abel xin, max yion c'apaxtok nak jun is xajanbal bay satak Cham, a ton no' babel yune' calnel, no' caw wal bak'ech. Max cha c'ul Cham nak Abel yetok is xajanbal. 5Axa pax nak Caín xin, maj cha c'ul Cham nak, yetok is xajanbal. Yuj wal tu' max chichon aj c'ul nak, owxac'al max yut sat. 6Axa yalon Jehová bay nak tu' axca ti': ¿Tzet yuj xan chi chichon aj a c'ul cax owxac'al chot a sat? 7Ta watx' tzet cha watx'nej, tzalojc'ulal mi ayach chach eq'ui, palta yob tzet max onej, xan a a yobtakil tu' t'ananxac'al oc en yet chach ayc'ay yuj, palta xin, chito je' ach chak' ayc'ay jun yobtakil tu', ẍi Cham.
8Ay jun c'ual max yawtej Caín nak Abel is yuẍtak tu' yet chi toj eb ec'jabok, axa yet ayic' eb bay max toj eb ec'jab tu xin, max meltzoj oc nak Caín yin yuẍtak tu', cax max mak'on camok. 9Lajwi tu', max k'anlen Jehová bay nak Caín tu' axca ti':
—¿Baytal ay nak oẍtak Abel? ẍi Cham bay.
Axa tak'wi nak tu':
—Man wojtakok. Tokwal yilomal in nak, ẍi bay Cham.
10Max yalon pax Cham bay nak:
—¿Tzet xan caytu' max onej? A is chiq'uil nak oẍtak max pulcantok sat tx'otx' tx'otx' oj tu', a' chi yal ba ayin yet chin watx'nen elok. 11A tinani' xin, catabnebil choncanok, cax chi wioncan el ekbej yin tx'otx' tx'otx' max uq'uen aytok chiq'uil nak oẍtak max a mak'cam tu'. 12Caxc'al ok ach mulnaj sat tx'otx', c'am wal tzet ok e' yin, cax c'am xewilal et yak'ban ayach ec' yulyibank'inal ti', ẍi Cham bay nak.
13Axa tak'wi Caín tu' bay Cham:
—Caw wal miman yailal jun chi titcan wiban ti', caw wal maj techaj wuj. 14Ilab tol checan el wikbej yin sat tx'otx' tx'otx' ti', cax chin a k'okonxac'al el a satak, toxac'al ok in ec'jabtok. Yalxac'al mac ok in chaloj yuj, ok in is mak'on camok, ẍi nak.
15Axa max tak'wi Jehová:
—C'amak. Ta ay mac ok ach mak'on camok, a jun mactxel tu' ukel ok ec' pak bay, ẍi Cham.
Axa yaon oc Cham jun yechel nak Caín tu', yet watx' ta ay mac chi chaloj nak yuj, c'am chi mak'lay cam nak. 16Lajwi tu' max el Caín bay max k'anjab yetok Jehová tu', cax toj cajay bay jun lugar chi yik Nod, yetc'ulal yichcanil Edén.
Eb yinatil Caín
17Cax max junanen ba Caín yetok yistzil, max oc ix yobixal. Lajwi tu xin max jay yune' ix, max yik Enoc. Max watx'nen aj Caín tu' jun conob cax max yaon oc bi is c'ajol tu' is biok. 18A Enoc is mam Irad; axa Irad is mam Mehujael, axa Mehujael is mam Metusael, axa Metusael is mam Lamec. 19Axa Lamec tu' cawan max yut nak yistzil. A jun ix chi yik Ada, axa junxa ix xin, chi yik Zila. 20A Ada tu', max jay jun is winak unin, Jabal max yak' yika'. A ton nak tu' babel jobom calnel tol max ayji ec' yulak mantiado yet chi ec'jabtok yetok no'. 21Axa Jabal tu', ay jun yuẍtak chi yik Jubal. A nak tu' a wal max babji txalon arpa c'al xuon flauta. 22Axa pax ix Zila tu', max jay c'apax jun is winak unin, Tubal-caín max yak' yika'. A nak tu xin, chac'om ch'en max elocok, max watx'nej tzetak yetal yin ch'en bronce c'al yin ch'en hierro. Ay c'apax jun yanab chi yik Naama.
23A yet junel max yalon Lamec tu' bay eb ix yistzil tu' axca ti':
Ex wetbi, ach Ada c'al ach Zila, abek tzet ok wala': Max in mak' cam jun nak ach'ej yuj max in is mak' yasjok nak.
24Ta ukel chi paktzelay yet Caín, akxam wal ayin ti' 77 el ok paktzelay bay eb chin tx'emoni, ẍi nak.
Nak is c'ajol Adán is q'uexel nak Abel
25Axa cham Adán max yilon pax junxa c'ajol yetok Eva. Set*fn* max yik nak unin tu' yuj xal. Max yalon xal axca ti': A Dios max ak'on junxa wune' ti', is q'uexel nak Abel mak'bil cam yuj Caín, ẍi xal.
26Axa nak Set tu', max jay jun is c'ajol, cax max yak'on yik Enós. Atax yet jun tiempoal tu' max chalay el yich yoc eb anima yin ayilal bay Jehová.
Actualmente seleccionado:
Gn 4: ATBYK89
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Kanjobal (Q’anjob’al) © Sociedad Bíblica de Guatemala 1989
