Text: © B.F.B.S. 1971 Audio: ℗ 2011 Hosanna

Lorma - 1971 Edition (NT)

Loma New Testament © British and Foreign Bible Society, 1971.

Tei sa te lɔtɔni Yɛlusulɛɛ va te va Bɛfaji lai zu Aale ɣizii ma, Ziizɛ é kala dopo felegɔ leveni yíɛ ɣɛ te ma, “A li tai zu é wo ɣeeɣi daavɛ. Wa wɛlɛ soo ʋaale ba ga maa ʋilea dáa ƃulogɛi máyuwu vɛi bá. A te laa ʋũi wo va ga tiɛ pɔ̀. Ani nu ta nɛpɛ ka faa wo na wiɛ, wa ɣɛ tea, ‘Máƃala ɣa de maliɣii ma.’ Manui ɣa sa a te leve ga maa ʋilea.” Nii ɣɛɛni ga fai nii leve ma Gala daa woo‐wo nui boni yíɛ ɣɛ tea,
“A bo Zaayã veaitiɛ ma wo ɣɛ te ma,
‘A wɛlɛ! Wa masagi ɣa vaazu
kóloai é zeini soo‐ʋaale kɔma ta mayuwu.’ ”
Kala dopoitiɛ te liini te kɛ ga velei nɔ Ziizɛ te leʋeni la. Te vaani ga soo‐ʋaalegi é vɛɛ mayuwui va te ta zeɣeitiɛ vɛɛ pulu Ziizɛ zei kɔma. Kpɔgi bɔɔlɔ‐zu ná seɣe vɛɛni pelei ma, zɔitiɛ te gulu yifega leve te pɛɛ pelei ma. Na ɣa ɣɛɛ na kpɔgi niitiɛ te ɣɛni ga túo vele ta niitiɛ te ɣɛni ga púlu vele te ɣɛni lobasu tiɛ ɣɛ tea,
“Hosana, Deeve dui!
Tuuyiɛ ɣa ɣɛ nui nii ma é vaazu
de maliɣii Gala na daa‐zeigi zu!
Ƃe ba daa‐maa‐lɛɛ wo ga Gala!”
Tei Ziizɛ lɛɛni Yɛlusulɛɛ lai zu, ná vea ɣaazɔ yii wu ziɣini tiɛ ɣɛ tea, “Ƃɛ ɣa ga nii?” Kpɔgitiɛ te ɣɛni tea, “Gala daa woo‐wo nui Ziizɛ ɣaa é wuloa Nazɔi lai zu Geealali yui zu.”

Ziizɛ lɛɛni Gala‐feli wɔta walai wu é numaitiɛ ɣaazɔ ƃɛ na te ɣɛni ŋɛni zɔ̃wɔ wulozu na ta niitiɛ te ɣɛni ŋɛni ɣeeazu na. Na ɣa ɣɛɛ na é naʋolo‐maa‐ʋeli beaitiɛ ta leeveitiɛ lɔɔ vilini é vɛɛ wopo‐sɔ̃wɔ‐wulo veaitiɛ te zei‐ma ŋɛniitiɛ va. É ɣɛni te ma, “Ponɛvɛ Gala kɔlɔi zu Gala giɛ ɣɛ tea,
‘Nà pɛlɛi laa ɣa ɣɛ ga fèli vɛlɛ.’
Kɛ̀ wa pɛlɛi nii ɣɛɛzu ga wũmɔ vea zei‐zu.”
Gaazu wele vea vɛɛ mɛlɛ‐ŋɛlɛ bea va te vaani pɔ́ Gala‐feli wɔta walai wu é zɛba é te valo. Kɛ̀ tei laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ te wɛlɛni faa maa‐wɔlɔ‐wɔlɔ kpaazagitiɛ va é te ɣɛɛni, te wɛlɛ ná va wɔnɔ ga lopaitiɛ te ɣɛni lobasu tiɛ ɣɛ tea, “Hosana, Deeve dui!”, te yii ɣaa wãlani. Te ɣɛni ma, “Fai niitiɛ te bosu, yà mɛnisu?” Ziizɛ wɔ ge ɣɛ te ma, “Ooi.? Wɛ lɛ dɛ nii lodoni Gala kɔlɔi zu? Na ɣa ga nii mawoi ga
‘Ŋini‐ƃoalega laa vele zu ɣa Gala ge kɛɛ
woo wulo ná ga dáa‐maa‐lɛɛ woo.’ ”
Tei sa é ziɣini te woba, é wuloni tai va é li Bɛtani é ŋii na.

Tei sa é ɣɛni liizu wulu tai zu ga subu, pulu ɣɛni má. É wɛlɛni “fi” wului va pelei woba é li bu. Tɔwɔ ɛ́ lɛ wɛlɛni ŋɛni ta nɛpɛ ba gá, kɛni nɔ malaitiɛ. Ziizɛ ɣɛ sa gului ma, “È mavaa nɛpɛ gɛ lɛ sa zɔlɔ woga è ɣa fãa!” Gului na woto‐woto ƃɔɔ sa nɔ gaama. Tei ná kala dopoitiɛ te wɛlɛni ba, é wuloni ga tiɛ ga kpakpaa tiɛ ɣɛ tea, “Gului leveni ɣɛ le yíɛ za ƃɔɔ nɔ gaama?” Ziizɛ te woi ɣaa woteni é ɣɛ te ma, “Gè bo wiɛ ga gaama, ani zee‐la‐ma ɣa ɣɛ na wo ya sakpe gɛ lɛ wɔlɔ‐wɔlɔ wo yii zu, nii é ɣɛɛ ga gului nii wɛ lɛ nɔ na ɣɛɛ ɔ́ wɛ̃ɛ na va. Kɛ̀ wa zoo ƃalaa wo bo gizi gwalai nii ma ga ‘Ƃekpe è vili yuwu wu,’ tɔwɔ é ɣɛ ŋɛ na. Na ɣa ɣɛɛ na ŋɛnii nɛpɛ wa maa ʋeli Gala‐felia zu, ani zee‐la‐ma ɣa wo ya, wa sɔlɔ wo.”

Tei Ziizɛ lɛɛni Gala‐feli wɔta walai wu, laa‐ʋaale gwalaitiɛ ƃɔga zuu wũgitiɛ te vaani pɔ́ nà ɣɛi ma kala‐bogi wosu. Te ɣɛni ma, “Gaa‐ƃaa zɛƃɛ ɣa è fai niitiɛ ɣɛɛzu la? Na ɣa ɣɛɛ na ƃɛ ɣa é gaa‐ƃai nii ʋeea è ya?” Ziizɛ wɔ ge te woi ɣaa woteni é ɣɛ te ma, “Nà ƃalaa gà gaa‐zaɣa‐kɛɛ wosu ga wiɛ. Ani wa gaa wote na, gaa‐ƃai gè fai niitiɛ ɣɛɛzu la gà sa gà daa wo wiɛ. Minɛ ɣa Jɔ̃ na bataize‐ɣɛɛ ʋai wuloni na? ?É wuloni Gala ta ƃaa é wuloni nu ƃuse ya?” Te vɛɛni sa ga daaza lɔɔ ɣiini da tiɛ tea, “A da bo na má ga kulovɛ Gala ta, towaa ɣɛ tea, ‘Zeƃɛi é kɛ wɛ lɛ máʋai ziɣini ga gaama?’ Kɛ̀ ani da bo na ga kúlovɛ nu ƃuse ya, da luozu kpɔgi va. Toku ge zei ga te pɛ te laavɛ la ga Jɔ̃ ɣɛni ga Gala daa woo‐wo nu.” Na ma te Ziizɛ woi ɣaa woteni te ɣɛ ma, “Gɛ́ lɛ kwɛ̃ni.” Nà wɔ ge ɣɛ te ma, “Nà ƃalaa gaa‐ƃai gè fai niitiɛ ɣɛɛzu la gɛ̀ lɛ daa woga wo ma.”

Ziizɛ ɣɛni tea, “Wa ɣi‐gaa‐ziɛi ɣa ga zɛƃɛ é vile fai nii va? Zunu ta ɣɛni na déa zinaa te fele. É liini mamaa wũgi wɔ é ɣɛ má, ‘Dùu, li è tii ɣɛ ŋasa ƃalagi zu za.’ Nà gói ɣaa wote é ɣɛ má, ‘Gɛ̀ lɛ kɛɛ!’ Kɛ̀ ná ta wolo kɛɛni é ɣigi maa ʋeli é li. É li kɔnɔ dúi zɔi wɔ vɛ é faa zii ɣilagi nɔ wo má. Nà ɣɛ má, ‘Kèea, gà li.’ Tɔwɔ ɛ́ lɛ liini.” Ziizɛ ɣɛni sa te ma, “Te felegɔitiɛ zu, ƃɛ ɣa é kéea yii‐mai ɣɛɛni?” Te ɣɛ ma, “Mamaa wũgi ve.” Ziizɛ ɣɛ te ma, “Gè bo wiɛ ga gaama, gɔmɛti naʋolo‐wulo veaitiɛ ƃɔga ŋazaitiɛ te ƃɔɔ ɣɛɛ ga yaawo ta li Gala na masadai zu wo luo. Toku ge zei ga Jɔ̃ vaani wo wɔ tele‐bo tuoi zu. Kɛ̀ wɛ lɛ máʋaa ziɣini ga gaama. Niitiɛ mugi te ga gɔmɛti naʋolo‐wulo veaitiɛ ta ŋazaitiɛ te ƃɔɔ ɣɛɛ ga yaawoa te máʋaa ziɣini ga gaama. Tei ƃalaa wɔnɔ wo wɛlɛni fai nii va, wɛ lɛ wulu ɣaa ʋeni wɔ máʋai ziɣi ga gaama.”

Ziizɛ ɣɛni tea, “A wui to sakpegi ta ƃɔnɔ ma. Pɛlɛ wũda nu ta ɣɛni na é ŋasa ƃala daa leve, é kpaki tite ma, é zɛba é ŋasa vai ziɣe wɔɔwɔi lo kpalagi zu. Na ɣa ɣɛɛ na é taka gaa wooza loni é kpalagi yɛ sa yiiti‐wulo veaitiɛ ya é li zuu ƃɔnɔ su. Tei ŋasa vaa ziɛgi maa ƃuoni, é ná tii‐ɣɛɛ veaitiɛ leveni yiiti‐wulo veaitiɛ wɔ vɛ ga é ná ŋasa vai maa zɔlɔ wo. Tɔwɔ yiiti‐wulo veaitiɛ te ná tii‐ɣɛɛ veaitiɛ zoni te gila dowa te gila paa te gilagi vaa ga sɔɔ ga kwɔti. É zɛba wɔnɔ é tii‐ɣɛɛ veai zɔitiɛ leve. Natiɛ te levegɛi ɣɛ mamaa wũgitiɛ va. Te faa zii ɣilagi ɣɛ nɔ ga tiɛ. Tei sa na wuloni ba, é duu zunui leveni é ɣɛ tea, ‘Ta wũfe dùi ma.’ Kɛ̀ tei yiiti‐wulo veaitiɛ te dúi vɛteni, te ɣɛni ɣii ma, ‘Po ŋɛni keea nu ɣa é vaazu ɣɛɛzu do. A de paa kɛɛ ʋaa ma kweligi ɣɛ ga de wo.’ Te soni sa te pili ga ŋasa ƃalagi wulu vele te paa.” Ziizɛ ɣɛni tea, “Ani ŋasa ƃalagi keea nu ɣa vaa na nà mavele ma, zɛbɛ ɣa yá kɛ ga yiiti‐wulo veai niitiɛ?” Te ɣɛni ma, “Towaa ŋada‐ŋala‐ŋala beai natiɛ vaa é kɛ ƃɔɔ ga daa‐nɔwɔ‐wo paa‐woga ga tiɛ, é zɛba é ŋasa ƃalagi leve yiiti‐wulo veai zɔitiɛ wɔ ta ɣɛ ná ŋasa vai levesu pɔ́ mawui ma.”
Ziizɛ ɣɛni te ma,“? Wɛ lɛ dɛ wɔlɔ‐wɔlɔ fai nii lodoni Gala kɔlɔi zu? Na ɣa ga nii mawoi ga
‘Kwɔti ƃɔɔƃɔɔgi nɔ pɛlɛ‐lo beaitiɛ te ɣɛlɛɛ ba,
towa é ɣɛɛ ga kwɔtii máʋaa wɔɔlɔɔ
baa pɛ ba.
Nii ɣa ga de maliɣii ɣɛɛ ʋaa.
Tɔwɔ máʋai wala wulovɛ ga diɛ.’
Na ma gè bo wiɛ, Gala na masadai ɣa wulo wo ya é ʋe zii niitiɛ ya malɔnɔ ɣa ɣɛ ba te ya. [ Tɔwɔ nui yá loo kwɔtii nii ma, manui maa ɣa ɣale su kpulu‐kpulu. Kɛ̀ ani a loo na nu nɛpɛ ma, towaa kpɔlɔ‐wɔnɔ.”]
Tei laa‐ʋaale gwalaitiɛ ƃɔga Favilesiitiɛ te ná sakpegitiɛ mɛnini, te gaa ɣaani ga é ɣɛni ʋaazu te ma. Kɛ̀ tei te ɣaa ƃaani ga te só, te ɣɛni luozu kpɔgi va. Ƃɔvɛlaale natiɛ te síɣini ga nui é ga Gala daa woo‐wo nu.

بشنويد MAFIYU 21