Ɨkàanə̀ ghù shwuə̀

Nkwùə̀ nɨ Yěsû à lə̀ furə̀nə a àtwuə̀ mbarə̀ gha nshwuʼə̀, ɨ̀pùŋə̀ pə̀ənə̀ pɨ̀noʼnə lə̀ zùŋə̀ e. Lenəla ngàŋə̀ àkɨ̀kẅinə ɨ̀tse a tô ntsirə̀ e, nkẅiʼtə̀ a mbyə̀ ze nshwəŋə̀ lo, “Ndòʼnə̀mbyə̂, wə̀ tə mbəla nkòŋə̀, wə̀ ghɨ̀rə̀ mbɨ̀ŋmə̀ mə̀ ɨ̀ laanə̀.”
Yěsû à lə̀ shwùumə̀ àpô e mbètə̀ e nshwəŋə̀ ambo ze lo, “Ǹkòŋə̀, mbɨ̀ŋmə̀ o ɨ̂ laanə̀.” Àkɨ̀kẅinə za a lə̀ zùŋə̀ mmyə̀, mbɨ̀ŋmə̀ e ɨ̀ laanə̀. Yěsû à lə̀ tyiʼə̀ nshwəŋə̀ ambo ze lo, “Zəənə̀ lo wə̀ ghə̀ kò wə̀ shwəŋə̀ ànwùə̀ àtse ambo ŋwùə̀, la ghə̀ nèrə̀ mbɨ̀ŋmə̀ o ambo ngàŋə̀ màʼà Nẅùə̀ nkɨ ŋŋâ àzwuumə̀ nɨ Mǔsî à lə̀ shwəŋə̀nə la, mbə̀ʼə kɨ nèrə̀ ambo pànə̀ lo mbɨ̀ŋmə̀ o ɨ̀ laanə̀.”


Nkwùə̀ nɨ Yěsû à lə̀ tônə nkwuunə̀ a Kàpenòmə̀, àtwuə̀ pɨ̀soyì nkɨrə̀ a lə̀ tô ntsirə̀ e, mbuʼù mbô ambo ze lo â yèmpə̀ e. Nshwəŋə̀ lo, “Nɨ̀ghòonə̀ à wə̀ nnyàŋə̀ a ngàŋə̀ àfàʼà mə̀, a nwùunə̀ a ndâ amwuə ngəʼə̀ nɨ ɨ̀ tsàarə̀nə mbô.”
Yěsû a tyiʼə̀ nshwəŋə̀ ambo ze lo, “Mbɨ tô parə̀ e.”
Àtwuə̀ pɨ̀soyì za a shwəŋə̀ lo, “Ndòʼnə̀mbyə̂, ka ǹkùʼnə̀ mə̀ lo mbə̀ʼə wə̀ tô nkwuunə̀ a ndâ mɨ̀ŋə̀, la kɨ shwəŋə̀ o tyìʼə̀ a taʼà àshwəŋnə̀ ngàŋə̀ àfàʼà mə̀ wə̀ â tɨ̀ŋnə̀. Mbə̀ʼnə m̀bənə ŋwùə̀ nkɨ mbə nɨ pànə̀ nɨ pɨ pənə àtwuə̀ mɨ̀ŋə̀ mmə nsaʼà mə̀, ǹkɨ mbə nɨ ɨ̀tɨ̀ŋnə̀ àtwuə̀ pɨ̀soyì nɨ ngwa nsaʼà la. M̀mə nshwəŋə̀ ambo ghùtse lo, ‘Lèrə̀!’ a lèrə̀; nkɨ nshwəŋə̀ ambo ghùtse lo, ‘Tô’ a kɨ ntô. Ǹtô nkɨ nshwəŋə̀ ambo ngàŋə̀ àfàʼà mə̀ lo, ‘Ghɨ̀rə̀ lə!’ a ghɨ̀rə̀.”
Nkwùə̀ nɨ Yěsû à lə̀ zuʼnə ànwùə̀ nɨ à lə̀ shwəŋə̀nə, à lə̀ yerə̀ ntyiʼə̀ nshwəŋə̀ ambo pànə̀ pa nɨ pɨ lə̀ zùŋə̀nə e la lo, “Nshwəŋə̀ ambo pɨghə tyìʼə̀ nkǔŋə nkuŋə lo tyìʼə̀ amwuə àlaʼà Israel m̀birə̀ mə̀ a ŋwùə̀ nɨ zə mbuurə̀ àpyiimə̀ ntɨŋmə̀ tɨ zəənə̀. Ǹshwəŋə̀ ambo pɨghə lo pànə̀ pɨ̀noʼnə ghǎ furə̀ a saʼà nẅùumə̀ pobə ngẅènə̀ nẅùumə̀ tô nwuunə̀ àtwuə̀ tepèrə̀ pobə pɨ Abràhamə̀ pobə Isàkə̀ nɨ Yàkobə̀ amwuə nɨ̀ghaʼà ànwùə̀ Nɨ̀fò nɨ̀pwuurə̀. La pɨ̌ tyiʼə̀ waʼà pànə̀ nɨ pobə pyə̀nə mbə amwuə ànwùə̀ Nɨ̀fò Nẅùə̀ amwuə ndzùmə̀ àpyìinə, a alyiʼə nɨ pobə̌ tyiʼə̀ kwurə̀ mɨsoŋə ɨ̀mobə ghu.” Yěsû a tyiʼə̀ nshwəŋə̀ ambo àtwuə̀ pɨ̀soyì za lo, “Lèrə̀ o a ndâ ghò. Ànwùə̀ za nɨ wə̀ nùŋə̀nə ntɨŋmə̀ o aŋunə la a pɨ ghɨ̀rə̀ a ngàŋə̀ àfàʼà o wa.”
Lenəla ngàŋə̀ àfàʼà e wa à lə̀ zùŋə̀ ntɨ̀ŋnə̀ tyìʼə̀ nkwùə̀ ghu.


Nkwùə̀ nɨ Yěsû à lə̀ ghə̀nə nkwuunə̀ a ndâ Pità, à lə̀ zəənə̀ a ngùmə Pità a nwùunə̀ mmə ngòonə̀ fibà. Yěsû à lə̀ pètə̀ àpô e, fibà wa a zùŋə̀ mmyàʼtə̀ e a tyiʼə̀ ndòo a ɨ̀shyə̂ ntsùŋə̀ mɨ̀zɨghə̀ ŋŋâ ambo ze.
A lə̀ pə a nkwə̌, pɨ lòo pànə̀ pɨ̀noʼnə nɨ pobə lə̀ pənə nɨ ɨ̀zhyə̂ ntô ambo Yěsû. Yěsû a shwəŋə̀ tyìʼə̀ a taʼà àshwəŋnə̀ nkantə̀ ɨ̀zhyə̂ pa, nkɨ mbarə̀ a ŋwùə̀ ntsùmə̀ nɨ à lə̀ mənə ngòonə̀. À lə̀ ghɨ̀rə̀ ànwùə̀ zèrə zə la a nɨ lẅenə̀ ànwùə̀ nɨ ngàŋə̀ ntwuumə̀ Nẅùə̀ Ìsayà à lə̀ shwəŋə̀nə lo, “A lə̀ parə̀ ɨ̀lòʼo nkɨ mbarə̀ ɨghoonə ɨ̀pə̀ənə̀.”


Tsaʼnə Yěsû à lə̀ zəənə̀ àpùŋə̀ pə̀ənə̀ a kamnə̀ e la, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo pobə̂ twuumə̀ atəŋə za ndèrə̀ a ghobə amwuə zhyə̀ ndzìnə. Ɨ̀nèrə̀ mbòomə ghùtse à lə̀ tô nshwəŋə̀ ambo ze lo, “Ɨ̀nèrə̀ ɨ̀nwùə̀, mbɨ zùŋə̀ o a alyiʼə àtsùmə̀ za nɨ wə̀ mənə ndèrə̀ la.” Yěsû a kẅùə̀ ambo ze lo, “Pəntsobə chyə̂ nɨ mɨ̀mbwùʼə̀ ɨ̀mobə, pɨ̀mɨsɨŋə pə nɨ mɨ̀nkàanə̀ ɨ̀mobə, la ka Moonə̀ Ŋwùə̀ a pə e nɨ alyiʼə nɨ mbə̀ʼə a nùŋə̀ àtwuə̀ e ghu nzhwùutə̀.”
Àzùŋə̀ ndzùmə̀ e za yètse a shwəŋə̀ ambo ze lo, “Ndòʼnə̀mbyə̂, tyiʼə̀ n̂gə̀ ntẅəŋə̀ a tǎ ɨwəə zaʼà.”
La Yěsû à lə̀ kẅùə̀ e lo, “Tô ndzùŋə̀ mə̀ mmyàʼtə̀ pə̀ənə̀ nɨ pɨ pənə tsaʼa ɨ̀kwuə̀ pə̀ənə̀ pobə̂ tẅəŋə̀ ɨ̀kwuə̀ ɨ̀pobə.”


Ɨ̀zùŋə̀ ndzùmə̀ Yěsû lə̀ zùŋə̀ e pobə pɨ pobə kwuunə̀ amwuə àkànwuʼə a nɨ twuumə̀ ndèrə̀ amwuə zhyə̀ ndzìnə. Nkɨ wùutə̀ àghə̀ʼtə̀ tɨ̀ŋnə̀ a tô, nchyə tyiʼə̀ mmə mbə̀grə̀ nzhaʼà nkwuunə̀ amwuə àkànwuʼə za tə a tyiʼə̀ mmə ntàʼà ẅènə̀ amwuə nchyə. La Yěsû a pə ndyə̂ e. Pobə lə̀ ghə̀ nzhyòmnə̀ e nshwəŋə̀ ambo ze lo, “Chwarə̀ wəə, Ndòʼnə̀mbyə̂! Pəə pə ntyiʼə̀ a ntswùə̀ nɨ̀wɨghə̀.” Yěsû à lə̀ kẅùə̀ ambo pobə lo, “Àpyiimə̀ ntɨŋmə̀ àzɨghə a kɨ̂! A ghɨ̀rə̀ àkə àkẅàrə̀ a pə amwuə pɨghə tyìʼə̀ lə?” Lenəla, à lə̀ lòo a ɨ̀shyə̂ nsaʼà àghə̀ʼtə̀ za pobə nchyə ghù pə̀grə̀nə wa lo pèrə̂ təəmə̀, pèrə zùŋə̀ mborə̀, ɨlyiʼə zhwemnə̀. Pànə̀ pɨ̀tsùmə̀ lə̀ yerə̀, ntyiʼə̀ nshwəŋə̀ lo, “Lə̌ zèrə mbuurə̀ ŋwùə̀? Mbaa pə àghə̀ʼtə̀ pobə nchyə ghù pə̀grə̀nə mmə ndzuʼnə̀ e!”


Nkwùə̀ nɨ Yěsû à lə̀ twuumə̀nə a atəŋə za mbə a ndzìnə, à lə̀ kwuunə̀ amwuə àlaʼà Gadara, mbyàŋnə̀ ɨ̀tse ɨpaa nɨ lə̀ pənə nɨ ɨ̀zhyə̂ a nɨ̀pùmə̀ pobə lə̀ furə̀ àtwuə̀ mɨ̀shyə̀ ntô ntsirə̀ e. Pànə̀ pèrə pə lə̀ fèrə̀ tə mbə̀ʼə ka ŋwùə̀ a lopə̀ e a nɨ làŋə̀ amwuə àlàŋə ghu. Tsaʼnə pobə lə̀ zəənə̀nə a Yěsû, pobə lə̀ zùŋə̀ nkyiinə̀ nshwəŋə̀ lo, “Pə̀ənə̀ chyə̂ nɨ àkə Moonə̀ Nẅùə̀? Wə̀ tô lə a nɨ chyâ ngəʼə̀ aŋunə pəə tɨghu ngotə nkwùə̀ ɨ̀ kùʼù?”
Àpùŋə̀ pə̀kuŋə a lə̀ pə a nɨ̀pwùnə alyiʼə ghu mmə ndzɨghə̀. Ɨ̀zhyə̂ pa puʼù mbô ambo Yěsû lo, “Wə̀ pə fuukə̀ a wəə, wə̀ tsàa a wəə pəə ghə̀ nkwuunə̀ amwuə pə̀kuŋə pyə̀.” Yěsû a shwəŋə̀ ambo pobə lo, “Nɨ̀ lèrə̀!” Lenəla, pobə furə̀ ngə̀ nkwuunə̀ amwuə pə̀kuŋə pa pɨ̀tsùmə̀. Pə̀kuŋə pɨ̀ghu tyiʼə̀ nkẅìnə̀ nshwuʼə̀ a mbɨ̀ŋmə̀ mbarə̀ nkunə̀ amwuə nchyə ghu nɨŋnə̀nə mmìnə̀ amwuə. Pànə̀ pa nɨ pobə lə̀ pənə mbyabə̀ pə̀kuŋə pa lə̀ furə̀ nkɨ̀ɨrə̀ ndèrə̀ amwuə mbòmpə àlaʼà ngẅùunə ntyiʼə̀ nshwəŋə̀ ànwùə̀ àtsùmə̀, farə ànwùə̀ nɨ a lə̀ furə̀nə aŋunə mbyàŋnə̀ za ɨpaa la. Pànə̀ pɨ̀tsùmə̀ lə̀ furə̀ a mbòmpə àlaʼà gha ntô a nɨ tsirə̀ a Yěsû. Nkwùə̀ nɨ pobə lə̀ zəənə̀nə e, pobə lə̀ puʼù mbô ambo ze lo â myàʼtə̀ a pàa àlaʼà ɨghobə ndèrə̀ e a ndyə̌ sàa.

بشنويد Matyù 8