This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS- Dhamma Mate Swe Association.

Lahta

This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

မငြီးဆောက်တေတာအငြီးကုအွယ့် ကိုယ်တော်ယေရှုဒီ့ အီဆုံတအန်တာ လေးလေ ဖာရိရှဲခေါင်းဆောင်ယွမ်ခါ့ ပလူးကားကအိုအွယ့် အိုပွိုင်းဟွိုင့်ဘို့လိုကာ ကိုယ်တော်။ အွယ့်ခါ့အွယ့် ပလူးအိုခံစာဘာ တယိုးရောဂါစာ အပလားဒီ့ အိုကိုယ်တော်မေငါ့။ ကိုယ်တော်အွယ့် "မငြီးဆောက်တေးတာငြီးကု မေကုဖီ တစာ့ရောဂါဖုန်းအွယ့် နောင်တရာတော်ဒွို ညီနောဝ် ညီဟနောဝ်" တစီ့လေးဖာရိရှဲဖုန်းနောင် ကျမ်ဒါဆရာဖုန်း။ ဒေါင့်မာလဲ့ ပလူးအွယ့်ဟိုအွယ့် ဒေါင်ပလန်းချာကာဟ။ အွယ့်ကြားမဲ့ ကိုယ်တော်အွယ့် ခင်းပလူးအွယ့်ပလားနောင်ကျွော့်ထွို့မဲ့ ကုဖီထွို့ ကြွကျိန်းချာဒါအာ။ ထွို့မဲ့ ကိုယ်တော်ယေရှုအွယ့် " နားက့ဖုခုယောဝ်း၊ ပူယောဝ်း၊ မေလင်တေး သျှီအုံးကုအွယ့် မငြီးဆောက်တေးတာငြီးကုခယောဝ်း နားက့ အီထွိုးထန်ကားတိုအလိုင်း ခြိုင်မေဟနောဝ်" အမိန်ပလူးအွယ့်ဟိုဖုန်းနိန်းအွယ့်။ ဒေါင့်မာလဲ့ ပလူးအွယ်ဟိုးအွယ့် ပြန်ဖရေကားချားဟ တစွို့စွို့။ ထွို့မဲ့ ကိုယ်တော်သျှီ ပလူးခံဘာပလားပင်းစာဖုန်းအွယ့် အီအန်တာတာ လွိုက်လိုကာခမ်းလန်အခိုစွက်ကုဖုန်းခါ့ မိန့်ပလူးအွယ့်ဟို တတွိုက်တွိုင်အဘာအွယ့် ပလူးအပလားပလား မေပင်နားမင်္ဂလာပွဲခါ့ ကျန်အိုနန်းမာ ခမ်းလန်အခိုစွက်ကုမာ၊ ကွက်တဟနာ မေဒေါင့်အွယ့် ပလူးအရေပါထိုင်နားစာအွယ့် မေပင့်လဲ့ ပင့်စေကန်းဒါ အွယ့်ဟနေ။ ပလူးအွယ့်ပလား မေလေးတွို့အွယ့် ပလူးကပင်းစေးကန်းဒါ နားစာဒီ "နားခမ်းလန်နုဲင့် ဖီကေ့ဘို့ဒွိုးပလားလုဲင်" နားခံဒေါင့်ဘာနိန်းအွယ့်ထွို့ နားလတကာတ့ထွို့ နားအီအိုနန်းဘာတာ ခမ်းလန်ကန်စာ့စွက်ကု။ ဒေါင့်မာလဲ့ လေးမင်္ဂလာပွဲကုထွို့ နားက့မေအိုနန်း ခမ်းလန်ကန်စာ့စွက်ကုအွယ့် ပလူးကပင်းဒါနားစာဒီ လေးနားဆောင့်ထွို့ "ဖောဝ်၊ လေအိုနန်းခမ်းလန်ခိုထိုင်ဒွိုးကုပါလုဲင်" ဟောင့်နိန်းအွယ့်မဲ့ ကန်ဆျန်လငါ့မေငါ့ကု ပျန့်တအန်ဖရာခရာ။ ပလူးအန်ဖရားတိုး နန်တိုးစာကားကအိုဒွို အီခံအောက်ဘာထွို့ ပလူးခံအောက်တိုး နန်တိုးစာဒွို အီခံဘာ တအန်းဖရား" မိန့်နိန်းအွယ့်။ ထွို့မဲ့ ကိုယ်တော်အွယ့် "နားမေမိုးပွဲခံဆျန်အွယ့် ကျန်ပင့်ဘို့မာ နားဖောဝ်းဖုန်း၊ ပလူးယွမ်ကုစာဖုန်း၊ ပွော်ဝေဖုန်းနောင် ပလူးယွမ်တီးသဌေစာဖုန်းဟို့မာ။ နားမေမိုးနိန်းအွယ့်အွယ့် ပလူးအွယ့်ဟိုဖုန်းလဲ့ အီပင်းချာနားထွို့ အန်လွူချာဒါ့နား။ ခရားနိန်းအွယ့် နားမေမိုးပွဲခံဆျန်ခါ့ ပင်းပလူးဖရန့်ဖုန်း၊ ပလူးလီခရွိုင်းတာအစွိုစွိုဖုန်း၊ လေဖြတ်စာဖုန်း၊ မေသျှီ့စာဖုန်းလုဲင်။ ပလူးအွယ့်ဟိုဆောင့်အွယ့် အီပြန်ဖီချာဒါနားခရာ လီအိုဟ။ ဒေါင့်မာလဲ့ ဗွယ်ဖရာဒွို အီဖီတိုနား တခိုမင်္ဂလာ။ ဆူတော်ကောင်ဖုန်း အိုတစီ့ကုထွို့ မေပြန်ထွိုင်ချာခါ့ ဗွယ်ဖရာဒွို အီမိုဖီနားကပြန်ခံစာဘာချာဒါ တကေဇူဖုန်း" မိန့်နိန်းအွယ့်။ ကန်ဆျန်းဖုန်း အိုနန်းထွို့ အန်ကိုနောင်ကိုယ်တော်ခုံကုစာ အပလားအွယ့် "ဗွယ်ဖရာသာသနာတော်ကု ပလူးအိုနန်းထွို့ အန်ခွင်လစာဒွို ပျန့်တို ပလူးအီခံစာဘာ တခိုမင်္ဂလာဒူ" ဒေါင့်နိန်းအွယ့်။ ကိုယ်တော်အွယ့် "ပလူးအပလားဒီ့ အီမိုးပွဲခံဆျန်တာထွို့မဲ့ ပင်းပလူးဖုန်းဟေတန်။ ပွဲခံဆျန်ခိန်းထွိုင်တွိုခါ့ ကြွလေးအစွမ်းအပလား ပလူးအာကပင့်စေးကန်းစာဖုန်းဆောင့်ထွို့ "ကားကအို ရျန်စေကန်းထွို့လိ။ ကြွလေးကာချန်းလုဲင်" အန်ချန့်ဒေါင့်နိန်းအွယ့်။ ကန်ဆျန်းဖုန်းအွယ့် အပလားထွို့အပလား နေ့ကာ အကြောင်အမျိုမျိုထွို့ ငြင်းလိုကာ။ အကီစွက်ပလားအွယ့် "ငါးအန်ပလီးစေကန်း လုဲင်အကွက်အွယ့်မဲ့ ငါးအိုလူလေဟွိုင့်။ခွင့်ဖီငါး" ဒေါင့်နိန်းအွယ့်။ ဒါ့အပလားအွယ့် "ငါးအန်ပလီးစေကန်း ပူအန်းငေတွဲအွယ့်မဲ့ ငါးအိုလူးလေဟွိုင့်တုဲင်း။ခွင့်ဖီငါး" ဒေါင့်နိန်းအွယ့်။ ဒါ့အပလားအွယ့်လဲ့ "ငါးကျက် တေးယွမ်းတေးပါ ဒွိုးဟို့မဲ့ ငါးလေးဒါဟ" ငြင်းပဲင်းဒါနိန်းအွယ့်။ စွမ်းစေအွယ့်ပလားလဲ့ ဒေါင့်နေချားဒါ့အ​ဗွယ် တပျန့်အွယ့်ဟိုးထွို့ အဗွယ်အွယ့်အပလားလဲ့ သဒွိုင်ယွမ်ထန်တွို့ထွို့ " လေးမွိုင့်မွိုင့် ဝိန်းကလေ့ခါးကု ကအိုဒါ ဆင်ရဲစာဖုန်း၊ ပလူးနန်လီခရွိုင်ဟတာတစွိုစွိုစာဖုန်း၊ လေဖြတ်စာဖုန်း၊ မေသျှီ့စာဖုန်း ဆောင့်ထွို့ ပင့်အာကာလုဲင်"အန်ချန့်နိန်းအွယ့်။ စွမ်းအွယ့်ပလား ကျိန်းတွိုထွို့ "မိုးထွို့လိနောင် ဗွယ်အန်ချန့် ။ဒေါင့်မာလဲ့ ပလူးဟေတာ ခမ်းလန်လွတ်အိုဟေတုဲင်း" ဒေါင့်နိန်းအွယ့်။ အာဗွယ်အွယ့် "လေးကလေ့ဒူ နောင် ကလေ့ပီးကုထွို့ ပလူးကအိုဒါ အွယ့်ကုပါးကာကအိုအွယ့်ဟောင့်လေယွမ်းကုလုဲင်။ နိန်းအွယ့်မဲ့ ငါးယွမ်ကု ပလူးဖုန်းအီဝေ့။ ငါးအီဒေါင့်နား။ ပလူးကပင်ကီစာဖုန်း မေတွိုအွယ့် ငါးကအန်လွူဒါ တအန်းဖုန်း အစီ့ငါးလဲ့ အန်းကျန်ခွင့်လီလဟာ" ဒေါင့်စွမ်းနိန်းအွယ့်" မိန့်လင်နိန်းအွယ့်။ ထွို့မဲ့ လူထုပရိသတ်ဖုန်းအွယ့် တွယ်လေးလိုကာကိုယ်တော်အွယ့်မဲ့ ကိုယ်တော်အွယ့် လှည့်ဟွိုင့်ထွို့ "နားက့နုဲင့် နားကမွိုဖ၊ ဖု ၊ မာ့၊ ပွော်ဝေဖုန်းကာဟ လွိုထိုင်နားကနန်ချာတိုး နားက့မေလီအန်ဒင်လွို့ထိုင်ဒါဟ မေတ္တာငါးလောင်အွယ့် လီပျန့်ဒါဟ ငါးတပည့်ဟာ။ ယိုးနားက့ ကျွော့်အျန်ထွမ်းထွို့ မေလီတွယ်ဒါဟငါးလဲ့ လီပျန့်ဒါဟာ ငါးတပည့်ဟာ။ နားက့မေအီစူ့ တစင်အဘာ အကီစွက်အွယ့် ဖီကစူ့ထွို့တစင်တာ ကွမ့်လွမ်နောဝ် လွမ်ဟနောဝ် ဖီကသိတာ အိုနန်းထွို့ တွက်ကီဟ လီအိုဟာ။ မေလီတွက်ဟနိန်းအွယ့်ထွို့ မေစူ့ကီတစင်းအွယ့် လီစူ့ထွို့ဒါဟာ။ မေသျှီတပျန့်နိန်းအွယ့်အွယ့် ပလူးဖုန်းဒွို အီတငါးပလာကာနား။ ပလူးအွယ့်ဟိုအွယ့် "ပလူးဒွိုးပလား တေးစူ့ဒါတစင်လဲ့ လီမိုးထွိုဒါဟ" အီဒေါင့်အန်းစွမ့်လိုကားနားနိန်းအွယ့်။ ထွို့ဒါ့ ခွမ့်ခမ်းအပါးကုအွယ့် ကျေ့စာအို အဆောင်ထွို့ ခွမ့်ခမ်းကျေ့စာအို အန်ငြီ့ဆောင်စာ မေလေတွိုက်အွယ့် အာဒီ အကီစွက် အာအီအိုနန်းထွို့ တွိုင်းပင်ဟနောင် ပလူးဖီးအကြံစာ လီအိုဟာ။ အာကာအွယ့် နောင်ကျေ့စာ အဆောင်ဟို့ထွို့ အီတွိုက်ဘာ ခွမ့်ခမ်းလငါ့ ကျေ့စာအိုအန်ငြီ့ဆောင်းစာနိန်းမာ အာကာအီစဉ်စာထွို့ ဆုံဖြတ်လိုကာဘာ။ မေယူတွိုက့်လီပေးဒါဟအွယ့် ခွမ့်ခမ်းအွယ့်ပါးအွယ့် အီကြွလေအာကိုယ်စားလှယ်ဖုန်း ထျက်ခွမ့်ခမ်းလငါ့ပါးအိုယားတုဲင်းခါ့ အီလေဒေါင့်စေးကန်းဘာ ငိုတတွိုက်ပွဲငင်ငဲ့ရေး။ ဗွမ့်နောင့်အွယ့် ပလူးလီဖီးကြွဒါဟ အာကပွိုင်းဆိုင်ဒါတာ ကားကအိုဖုန်းဒီ့ လီပျန့်ထွိုက်ဟာ ငါ့တပည့်ဟာ။" "သီသာဒွို အိုခိုတို။ ဒေါင့်မာလဲ့ အဆွမ့်ဓာတ် မေတမာအွယ့် သီသာအွယ့်ဘာ အဆွမ့်ဓာတ်ဖီကအိုချာဒါ့အွယ့် အီမိုဒါနိန်းမာ။ သီသာအွယ့်ဘားအွယ့် ဟန်ယာတာခယောဝ်း၊ ဟန်ဩဇာတာခယောဝ်၊ စုံလီဒါဟအွယ့်မဲ့ အီခံဘာ ဖီဝိန့်ထန်ခုနောင့်။ ကနာမိုဒါ နာအိုစာဖုန်း နားကြိုင်ကြိုင်ကားလုဲင်" မိန့်နိန်းအွယ့်။

بشنويد Luke 14