If you would like a copy of this version please contact info@davaraudiobibles.org

Birjia Bible New Testament, CC BY-NC-ND 4.0, New Life Literature (NLL), 2023. (Text)
Birjia New Testament Audio Bible, CC BY-NC-ND 4.0, Davar Partners International, 2025. (Audio)

Birjia New Testament (NLL)

तीसरा हिला गलील रआ काना नगर रे, बियाह दोहोलेना, ईसु रेनि एंगाते हों होंडे दोहोलेनय। ईसु जोटोः हुँनि रेनकु चेला हों होना बियाह रे, नेवता दोहोलिड्कुआ। होंडे जब अँगुर रास चबायना, दो ईसु रेनि एंगाते हुँकूइ कथावा लआ, “नुकु एडे अब अँगुर रास चबायना।” ईसु हुँनि कथा रुवड़वा लअय, “ओय लंञी! नोआँ रे इञः एतेन अमः रआ तन काम?, नहाः इञः रआ बेरा का वेज्‌तना।” फिन हुँनि रेनि एंगाते ओड़ाः रेनकु धँगड़कु कथावा लअय, “चितानहों जे आपे एडे कथायय हिनापे करावे।” होंडे जहुदीकु रीती मोताबिक सुधोः तआ टुकु रआ कछरा छो गोटङ दोहोलआ दोहोलेना। जेकर रे लगे-भगे ब-बार, पे-पे भर दाअ् सहोबोन दोहोलेना। ईसु धँगड़कु कथावा लअय, “गोटा कछरा रे दाअ् पेरेजेपे।” हेनते धँगड़कु गोटा कछरा रे छलछलाव पेरेज् केदाकु, हेनते ईसु हुँकू कथावा लअय, “अब उडुङ केते बियाह रेनि कोटवँड़ एडे इदीपे।” जोटोः हुँकू होना इदी लअकु। जब कोटवँड़ होना अटकर लअय, जे अँगुर रास पड़ी दोहोना, हुँनि काय ठुवालआ चि होना अँगुर रास ओका एतेन वेज्‌तना, बदे जे धँगड़कु दाअ् पेरेज् दोहोलअकु हुँकू नोआँ ठुवायते दोहोनाकु, फिन कोटवँड़ दुलहा राअ् लिदियय। जोटोः हुँनिए कथावा लआ, “गोटे झन सुरु बढ़ियाँ अँगुर रास पोरसायकु जोटोः जब मसाः एंडायोओकु दो फिन सोर-सोरोआ पोरसायकु। बकिन अमः दो नहाः हमाः बढ़ियाँ अँगुर रास बंचाव तड्अम।” ईसु गलील रआ काना नगर रे पहिल चिन-चमतकर काम एरञेल केते, अपन बड़ाइ दिसतार लअय, जोटोः हुँनि रेनकु चेला हुँनि एडे सारी लेनाकु।
हिना तयोम ईसु जोटोः हुँनि रेनि एंगाते जोटोः बोयहातेतिकु जोटोः चेलाते-तिकु तुली कफरनहूम सेन लेनाकु, जोटोः होंडे थोड़ेक रोज हमाः ही दोहोलेनाकु।


जहुदीकु रआ पसका परब ठँव रे सोदोर दोहोलेना, हिनाते ईसु परब मनाव तआ जेरुसलेम सेनोः लेनय। ईसु होंडे सेंड़ा बिनती ओड़ाः रे हडाकु, भीडीकु, जोटोः पेरवाँ केजाकु जोटोः ठड़रा टका बदली अवला होड़कु अपन चवकी रे दुड़ूः ञेल लिड्कुअय। हुँनि बवेर रआ मियड् कोड़रा बनाव केते भीडीकु, जोटोः हडाकु सहित गोटे सेंड़ा बिनती ओड़ाः एतेन बहरा उडुङ किड्कुआ। जोटोः ब-बदलीकु रआ टका उझलाव एंडालअय, जोटोः हुँकू रआ चौकी उलटाव एंडालअय। हुँनि पेरवाँ केजा कुइ कथावा लआ, “नुकु नोंडे एतेन बहरा उडुङ कुपे। इञः रेनि बबा रआ ओड़ाः, बाजार अलोपे बनावे!” तब हुँनि रेनकु चेलाकु तआ पहम वेज्‌ना चि, परमेसर रआ बचन रे ओल तड्आ “अमः रआ ओड़ाः रआ जुरजुट इञः जोम एंडाञय।”
जहुदी नेताकु ईसु एडे कथा लआकु, “अमः आले चिलकाना चिन एरञेल बेजा वालेअम, जेकर से आले नोआले ठुवाय चि, अमः नोंका करेक तआ अधिकार इदानआँ।” ईसु हुँकू कथा रुवड़वा लअय, “नोआँ सेंड़ा बिनती ओड़ाः धसाव एंडायपे, जोटोः इञः नोआँ पे रोज रे फिन तींगु एंडायइञ।” जहुदी नेताकु कथा लआ, “नोआँ सेंड़ा बिनती ओड़ाः ब-बनाव रे छेयालीस बरीस लगाव तना, जोटोः तना अमः नोआँ पे रोज रेम तींगु एंडाया?” नोआँ सेंड़ा बिनती ओड़ाः रआ माने, ईसु अनेज् रआ होड़ो रआ बारे कथा दोहोलअय। जब हुँनि गोज् कोते जीवेड् बिरीड्नय दो, हुँनि रेनकु चेलाकु तआ पहम वेज्‌ना चि, ईसु नोआय कथा दोहोलआ, परमेसर रआ बचन रे, जोटोः जे बचन ईसु कथा लआ होना रेकु सारी लेना।

जब ईसु जेरुसलेम रे पसका परब रे दोहोलेनय, दो अगम होड़ हुँनि रआ चिन-चमतकर काम ञेल केते हुँनि रआ ञुमुन रेकु सारी लेना। बदे ईसु अपन अप हुँकू रआ सारी रे काय दोहोलेना, चितानतआचि हुँनि गोटे होड़कु ठुवायतकु दोहोनय। जोटोः हुँनि तआ चितान दरकार का दोहोलेना चि होड़कु रआ बारे रे ओके वेज् कोते गोवाहीकु एमे, चितानतआचि हुँनि दो खुद ठुवायते दोहोनय चि होड़कु रआ मन रे चिताना इदानआँ।

بشنويد जोहन 2