آیات محبوب کتاب مقدس از ꤛꤥ꤭ꤟꤢ꤬ 10

به اشتراک گذاشتن

ꤖꤚꤢꤩ꤬ꤢꤩ꤬ꤟꤥ꤬ꤔꤣꤧ꤬ ꤢ꤬ ꤟꤢꤧ꤭ꤗꤢꤩ꤬ꤒꤢꤩ꤭ ꤟꤢꤩꤔꤣꤧ꤬ꤗꤢ꤬, ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤟꤢꤧ꤭ ꤢꤩ꤬ꤟꤥ꤬ꤢꤩ꤬ꤟꤤ ꤔ꤫ꤤ꤬, ꤢ꤬ ꤊ꤫ꤢꤦ꤬ ꤟꤢꤧ꤭ ꤗꤢꤩ꤬ꤞꤣꤧ꤭ꤔ꤫ꤤ꤬ ꤢꤨ꤭, ꤢ꤬ ꤊ꤫ꤢꤦ꤬ ꤟꤢꤧ꤭ ꤗꤢꤩ꤬ꤕꤛꤢꤗꤢꤩ꤬ꤜ꤫ꤢꤨ꤬ ꤢꤨ꤭ ꤢ꤬ꤑꤢꤩ꤭ꤖꤢꤧ꤯ ꤠꤢꤧ꤭ ꤚꤣꤧ꤬ ꤞꤢꤧꤟꤢꤨ ꤢꤨ꤭ ꤊ꤫ꤢꤦ꤬ ꤔ꤫ꤤ꤬ ꤒꤢꤩ꤬ꤞꤣꤧ꤭ꤖꤚꤢꤩ꤬ ꤓꤥ꤭ꤒꤥ꤬ ꤞꤢꤧꤟꤢꤨ ꤢꤨ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤊ꤫ꤢꤦ꤬ ꤜꤣꤙꤢ꤭ ꤒꤢ꤭ꤕꤢꤪ꤬ꤒꤢ꤭ꤕꤢꤩ꤭ ꤢ꤬ꤑꤢꤩ꤭ ꤔꤣꤧ꤬ꤚꤣꤧ꤬ ꤠꤢꤧ꤭ ꤟꤢꤧ꤭ ꤖꤢꤧ꤯

“ꤠꤢꤧ꤭ ꤗꤢ꤬ ꤖꤚꤢꤩ꤬ꤊꤢꤩ꤭ꤞꤤꤗꤤ꤬ ꤘꤣ ꤢ꤬ꤚꤢꤧ ꤒꤣ꤬ꤖꤚꤢꤩ꤬꤯ ꤖꤚꤢꤩ꤬ꤊꤢꤩ꤭ꤞꤤꤗꤤ꤬ ꤘꤣ ꤢ꤬ꤚꤢꤧ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤘꤣꤧꤜꤢꤧ꤬ꤊꤢꤧ꤭ ꤢ꤬ꤞꤤꤕꤜꤢꤪ꤬ꤞꤣꤧ꤭ꤖꤚꤢꤩ꤬ ꤘꤣ ꤞꤤꤗꤤ꤬ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭꤯

ꤠꤢꤧ꤭ ꤞꤤꤗꤤ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤔ꤫ꤤ꤬ꤘꤢ꤭ ꤠꤢꤧ꤭ꤍ꤫ꤥ꤬꤯ ꤠꤢꤧ꤭ ꤞꤤꤑꤢꤩ꤭ ꤛꤢꤩ꤬ꤞꤤ꤭, ꤚꤣꤧ꤬ ꤛꤢꤩ꤬ꤞꤤ꤭ ꤋꤚꤝꤢ꤭ ꤠꤢꤧ꤭ꤋꤛꤢ꤭꤯

ꤠꤢꤧ꤭ ꤘꤣꤧ ꤛꤢꤩ꤬ꤞꤤ꤭ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬꤯ ꤢ꤬ ꤊ꤫ꤢꤦ꤬ ꤞꤣꤧ꤭ ꤕꤢ꤬ ꤒꤣ꤬ꤖꤥ꤮ ꤒꤥ꤬꤯ ꤢꤨ꤭ ꤟꤢꤧ꤭ ꤡꤝꤤ꤬ꤓꤢꤩ꤬ ꤡ꤫ꤢꤧ꤬ ꤕꤢ꤬ ꤛꤢꤩ꤬ꤞꤤ꤭ ꤘꤣ ꤠꤢꤧ꤭ ꤊꤢꤨꤛꤢ꤭ꤊꤢꤨ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯

ꤠꤢꤧ꤭ ꤗꤢ꤬ ꤊꤣꤧ꤬ꤘꤢ꤭ꤊꤢꤨ꤭ ꤟꤣꤧ꤯ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤟꤢꤧ꤭ꤔꤥ꤭ ꤘꤤ꤭ꤒ꤫ꤢꤦ꤬ ꤔꤢꤧ ꤠꤢꤧ꤭ ꤘꤣ ꤢ꤬ ꤗ꤫ꤢ꤬ꤘꤢꤦ꤬ ꤊꤣꤧ꤬ꤘꤢ꤭ꤊꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬, ꤢ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤒꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤕꤢ꤭꤯ ꤢ꤬ ꤊ꤫ꤢꤦ꤬ ꤟꤢꤧ꤭ꤓꤢꤩ꤬ ꤟꤢꤧ꤭ꤔꤥ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤢ꤬ ꤜ꤫ꤢꤩ꤬ꤢꤩ꤬ꤏꤢꤩ꤬ ꤢ꤬ꤜ꤫ꤢꤩ꤬ꤥ꤬ ꤕꤢ꤭꤯

“ꤠꤢꤧ꤭ ꤗꤢ꤬ ꤖꤚꤢꤩ꤬ꤊꤢꤩ꤭ꤞꤤꤗꤤ꤬ ꤘꤣ ꤢ꤬ꤚꤢꤧ ꤒꤣ꤬ꤖꤚꤢꤩ꤬꤯ ꤠꤢꤧ꤭ ꤞꤤꤑꤢꤩ꤭ ꤠꤢꤧ꤭ ꤞꤤꤗꤤ꤬ ꤚꤣꤧ꤬ ꤠꤢꤧ꤭ ꤞꤤꤗꤤ꤬ ꤞꤤꤑꤢꤩ꤭ ꤠꤢꤧ꤭꤯

ꤠꤢꤧ꤭ꤖꤢꤩ꤭ ꤣꤧ꤭ꤔꤣꤧ꤬ ꤢ꤬ꤘꤢꤨ꤬ꤜꤣ ꤡꤣꤧ ꤔꤢꤧ ꤢꤨ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬꤯ ꤞꤤꤗꤤ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤘꤣꤧ ꤠꤢꤧ꤭ ꤚꤣꤧ꤬ ꤢꤨ꤭ ꤟꤢꤧ꤭ ꤡꤝꤤ꤬ꤓꤢꤩ꤬ꤊꤢꤧ꤭ ꤡ꤫ꤢꤧ꤬ ꤕꤢ꤭ ꤛꤢꤩ꤬ꤞꤤ꤭ ꤘꤣ ꤠꤢꤧ꤭ꤖꤢꤩ꤭ ꤢ꤬ ꤊꤢꤨꤛꤢ꤭ꤊꤢꤨ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤠꤢꤧ꤭ ꤔꤢꤧ ꤠꤢꤧ꤭ꤖꤢꤩ꤭ ꤗꤢ꤬ ꤒꤣ꤬ꤖꤚꤢꤩ꤬ꤡꤢꤦ꤭ ꤖꤢꤧ꤯”

ꤢ꤬ꤞꤢꤧꤔꤢꤧ ꤔꤣꤧ꤬ꤟꤣꤧ, ꤠꤢꤧ꤭ꤖꤢꤩ꤭ ꤞꤤꤑꤢꤩ꤭ ꤠꤢꤧ꤭ ꤚꤣꤧ꤬ ꤠꤢꤧ꤭ ꤞꤤꤑꤢꤩ꤭ ꤠꤢꤧ꤭ꤖꤢꤩ꤭, ꤚꤣꤧ꤬ ꤠꤢꤧ꤭ ꤘꤣꤧꤜꤢꤧ꤬ꤊꤢꤧ꤭ ꤠꤢꤧ꤭ ꤞꤤꤕꤜꤢꤪ꤬ ꤘꤣ ꤠꤢꤧ꤭ ꤞꤤꤗꤤ꤬ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭꤯

ꤠꤢꤧ꤭ ꤊꤢꤩ꤬ ꤔꤢꤪ꤭ꤗꤢꤩ꤬ꤞꤣꤧ꤭ ꤢꤨ꤭ ꤔꤢꤧ ꤠꤢꤧ꤭ꤔ꤫ꤢꤩ꤬ ꤒꤥ꤬ ꤟꤢꤩꤔꤣꤧ꤬, ꤢꤨ꤭ ꤗꤢꤩ꤬ꤞꤣꤧ꤭ ꤡ꤫ꤢꤧ꤬ ꤠꤢꤧ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤠꤢꤧ꤭ ꤘꤣꤧꤜꤢꤧ꤬ꤊꤢꤧ꤭ ꤠꤢꤧ꤭ ꤞꤤꤕꤜꤢꤪ꤬ ꤣꤧ꤭ꤔꤣꤧ꤬ꤗꤢ꤬, ꤢꤨ꤭ ꤔꤢꤪ꤭ꤏꤝꤢ꤬ ꤠꤢꤧ꤭ ꤒꤣ꤬ꤖꤚꤢꤩ꤬꤮ ꤒꤥ꤬, ꤠꤢꤧ꤭ ꤞꤤꤕꤜꤢꤪ꤬ ꤔꤢꤧ ꤠꤢꤧ꤭ ꤞꤤꤕꤜꤢꤪ꤬ ꤘꤣꤧꤜꤢꤧ꤬ ꤚꤣꤧꤘꤢꤦ꤬ ꤖꤢꤧ꤯ ꤠꤢꤧ꤭ ꤥ꤬ ꤔꤢꤧ ꤠꤢꤧ꤭ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤘꤣ ꤠꤢꤧ꤭ ꤞꤤꤛ꤫ꤢꤦ꤬ ꤘꤣꤧꤜꤢꤧ꤬ꤊꤢꤧ꤭ ꤠꤢꤧ꤭ꤞꤤꤕꤜꤢꤪ꤬ ꤗꤢ꤬ ꤢ꤬ ꤔ꤫ꤤ꤬ꤔ꤫ꤤ꤬, ꤠꤢꤧ꤭ ꤞꤤꤛ꤫ꤢꤦ꤬ ꤖꤛꤢꤘꤝꤢꤋꤛꤢ꤭ ꤢ꤬ ꤗꤢ꤬꤮ ꤢ꤬ ꤔ꤫ꤤ꤬ꤔ꤫ꤤ꤬ ꤖꤢꤧ꤯ ꤠꤢꤧ꤭ꤖꤢꤩ꤭ ꤗ꤫ꤢ꤬ꤟꤢꤧ꤭ꤚꤣꤧ ꤠꤢꤧ꤭ꤍ꤫ꤥ꤬ ꤔꤢꤧ ꤠꤢꤧ꤭ ꤙꤢꤩ꤬ꤗꤢꤩ꤬ ꤟꤢꤨꤣꤧ꤭,” ꤢ꤬ ꤟꤢꤩ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬꤯

ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤛꤢꤩ꤬ꤏꤛꤢꤨ ꤟꤢꤩ ꤋꤛꤢ꤭ꤞꤢꤧ ꤔꤢꤧ, “ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭, ꤠꤢꤧ꤭ ꤗꤢ꤬ ꤞꤤꤗꤤ꤬ꤕꤥ꤬ ꤢ꤬ ꤊꤣꤧ꤬ꤘꤢ꤭ꤊꤢꤨ꤭ ꤟꤣꤧ꤯

ꤊꤢꤩ꤬ ꤘꤢꤧ꤬ꤊꤢꤩ꤬ꤊꤢꤩ꤭ꤢꤩ꤬ ꤞꤤꤗꤤ꤬ ꤔꤢꤧ ꤢꤨ꤭ ꤟꤢꤩꤔꤣꤧ꤬ꤗꤢ꤬, ꤞꤤꤗꤤ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ꤒꤢꤩ꤬ ꤗ꤫ꤢ꤬ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤙꤣꤧ ꤢ꤬ ꤗꤢꤧꤓ꤫ꤣꤧ꤬ ꤓꤝꤤ꤬ꤗꤤ꤬ ꤟꤢꤧ꤭ ꤢ꤬ꤋꤢꤩ꤭, ꤢ꤬ ꤘꤢꤧ꤬ꤊꤢꤧ꤭ ꤞꤤꤗꤤ꤬ ꤚꤣꤧ꤬ ꤢ꤬ ꤓꤢꤩ꤬ꤊꤜꤢꤧ꤬ꤊꤢꤧ꤭ ꤖꤢꤧ꤯ ꤚꤣꤧ꤬ ꤓꤝꤤ꤬ꤗꤤ꤬ꤣꤧ꤭ ꤊ꤫ꤢꤦ꤬ ꤟꤢꤧ꤭ ꤢ꤫ꤢ꤬ꤞꤣꤧ꤭ ꤕ꤫ꤢꤦ꤬ꤢꤩ꤬ꤊꤢꤧ꤭ ꤞꤤꤗꤤ꤬ ꤕꤢ꤭, ꤚꤣꤧ꤬ ꤢ꤬ ꤟꤢꤧ꤭ ꤗꤢꤩ꤬ ꤊꤜꤢꤧ꤬ꤖꤚꤥ ꤊꤜꤢꤧ꤬ꤖꤚꤢꤧ꤭ꤊꤢꤧ꤭ ꤜꤢꤪ꤭ ꤞꤤꤗꤤ꤬ ꤕꤢ꤭꤯

ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤋꤥ꤬ꤍ꤫ꤥ꤬ ꤔꤢꤧ, “ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤟꤢꤧ꤭ꤔꤥ꤭ꤒꤥ꤭ ꤘꤣ ꤞꤤꤗꤤ꤬ꤕꤥ꤬ ꤢ꤬ ꤊꤣꤧ꤬ꤘꤢ꤭ꤊꤢꤨ꤭ ꤒꤥ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬, ꤚꤣꤧ꤬ ꤢ꤬ ꤊꤢꤩ꤬ ꤟꤢꤧ꤭ꤓꤢꤧ꤬ ꤔꤥ꤭ꤙꤢꤩ ꤘꤣ ꤢ꤬ꤚꤥ꤬ ꤒꤣ꤬ꤖꤥ꤬ꤖꤥ꤬ ꤟꤢꤩꤔꤣꤧ꤬ꤗꤢ꤬, ꤖꤚꤢꤩ꤬ꤢꤩ꤬ꤟꤥ꤬ꤢꤩ꤬ꤟꤤ, ꤖꤚꤢꤩ꤬ꤕ꤫ꤢꤦ꤬ꤖꤢꤩ꤬ꤛꤢꤩꤕꤜꤢꤩꤢꤩ꤬ ꤢꤨ꤭ ꤖꤢꤧ꤯