آیات محبوب کتاب مقدس از 1 Korin 9

به اشتراک گذاشتن

Yoba ta muku digwa mo kigle kane kane baiglkwa i, ye yoko wan moglsre, u kigle baglkrikwa. Ye ogono nagino sugl mogl, ere wakai ere, kogon podo yegl ersre, okuo kigle baiglkwa. Ye erikwa i, makandigle topo ibi, bugl kide erabuka pre erikwa ba nono God kogonmo ersre, topo okuo ta inamga i, aimadi kamin yenabuka. Yegl pre na yoko ta wan moglkrika. Na God kogonmo erika i, ake giglede ere, yoba muku di ede okna enamnedi erimere yegl, na ama muku di ede okna enagledi erika. Te, yoba ogono tu pagl beglkwa, kamga i, ye ogono noko, si yar edekrikwa. Ye yoba ta bogl beglkwa i, kaima borabedi noko mogl, simere yegl, na God kogonmo erika i, giglede yegl erika.

Te, yoba muku di, ira ede okna enabedi erikwa i, ye ogono nagino sugl wakai meglmere mere yegl, na ama ogona nagna sugl wakai moglsre, mabuno kide kane kane ta pogglau boglkwa i, mane di teiga. I siragl pre na God kamo yoba di tenaglka ba okuo God topo ta inaiglme dugwa i, ta ikribo, kide panabedi prika. God kogonmo ake giglede ere pai moglsre, okuo topo inagledi prika.

Ana yoba mere muku didre, ira ede okna enabedi erikwa i, nono kamga. Yoba tau mere kide muku digwa ba yoba swara keme ede okna pidre, topo ta padiglkwa i, yugwa. Kuno yegl mere ene God nono topo wakai okuo norabedi prisre, ene ye kogonmo eraiglkwa i, ake giglede ere pai molo.

Te, yoba tau pre mediglkwa ba ye mabuno siragl mere eraiglkwa wakai panabuka i kinano suo yogo, mie ta nekrimo mo mabuno siragl mere ta erikwa i, na ye bogl akie munga igne, ye erimere yegl sika si, erika. I siragl pre na ye ake ple di tebo, ye pre pogl sidre, kinano suo yekrabedi erika. Na yoba kane kane, mabunono siragl mere paugwa i bogl akie munga igne, ye agre i ede suna unagledi prisre, ye ebrie mabuno siragl mere erimere kuno yegl na erika.