LUK 1
1
1Isa bolung dünjikhi thrütpü ahihkhühnü mürang. 2Atankih chingnü harü ngübah isa ki ha yusheak zhiyukrünü ju thrüt. 3Jumonü atankihnü inü lüpdükhi düshihde yimakheahkhi nangde, nüsa atsüdak Theophila#Thrünpuhnü muzhodakkhi. dünkheak akhinashunü athrütpü lümdo, 4junangde nüsa ki thsangyukhi adüngakhi nüsanü amükheahbah.
Johan Baptijihbuh Zübepü Thajungkhi
5Judea ching Herod kiulongthsürü lachoki, Abija amükeamrü chamnak lung lakhi amükeamrü khülang amung Zakaria lakheah; aniube ju Aron tsühsoniuso, amung Elizabeth lakheah. 6Ane chido Thrünpuh miki alungki, Atungpuh yukhüm tüsho thiyuzüngbo yande jakreak mükihde alakheah. 7Tüshe ane tsührü müla, tümütüsho Elizabeth ju bünkeangberü tüsho ane chido khide shina lakheah.
8Junangde api chamnak yande Thrünpuh miki amükeamrü thsüde atankihchoki, 9amükeamrü jipüyakli yande, Atungpuh arüngyam ching yübah jinjinlak takde kingaünpü api azankhit. 10Tüsho jinjinlak takkhi kim ching mihtsürü boto alala wungdo tamkhüntamnüde alakheah.
11Judüki jinjinlak kingaün sadam tsülim Atungpuh yunirü khülang zhipde api ki akhiuk. 12Tüsho küyimki Zakarianü api ngükhea, api müyinnim tüsho trede alakheah. 13Tüshe yunirünü api ki tha, “Zakaria dütre, tümüde nü tamkhüntamnü sojihdo; nü niube Elizabethnü nü kilim tsührü khülang zübejihbah tüsho nünü api mung Johan de ajibah. 14Nü khide asühbah, tüsho api zübechoki ahihkhühnü asühachihbah. 15Tümüde api ju Atungpuh miki ato labah, tüsho yukhu yungsho amüshangbe muyung. Api ju abe nuyam chingnü Amüsüh Menü mide alabah. 16Tüsho apinü Israel tsührübo ahihkhüh Atungpuh arü Thrünpuh kilim rholoshihbah. 17Apinü bebuhrü mulong tsührübo kilim, tüsho mihyumanirü thiyuro lümlung lim rholoshihde Atungpuh thsungkheak mihtsürübonü athsakhamshihpü Elija me tüsho wu chingnü Atungpuh müngüh yübah.”
18Zakarianü yunirü ki tha, “Ha inü küde amükheahba? Tümüde I lel niube khide shina lah.”
19Tüsho yunirünü api ki alojihde tha, “l Gabriel, Thrünpuh miki zhipbuh, tüsho ha thiyusheak atsü hanbah thiyia arüshihkhi ah. 20Tüshe kheahang, harü müdünjiyi nimung khiungde nü masukkhukpü thsüde aduh-a labah, tümütüsho kim ching dünjipü lakhi I yubo nünü akin müla.” 21Mihtsürübonü Zakaria aleang, tüsho api arüngyam ching khide ruhde alakhi müyinsah. 22Tüshe küyimki api akhiukkhea, apinü arü ki masukkhuk; tüshe apinü arüngyam ching michih khülang ngüa lah de mükheah, tümüde apinü arü ki akhah hita huh tüsho thiyu müthakhukde alakheah.
23Küyimki api kingaünpü kim arün thsükhea, apinü thüyam lim yülo. 24Ha dunglim aniube Elizabeth mübünkeangde kam tüsho khinu phüngü muwukhiukde thüyam ching la. 25Alibenü tha, “Kheakü akheam ching Atungpuhnü I rungdo tüsho mihtsürü bolung I mungchih hande tsodo.”
Jisu Zübepü Thajungkhi
26Kheakü khinu thurukpü ching Galilee yo kiuto khülang Nazareth de ajikhi lim Thrünpuhnü Gabriel arüshih, 27#Mt 1.18ju David tsühsoniuso Josep ki rhangpü lakhi atsangkhitkhi kilim lakheah. Atsangkhitkhi mung Mari lakheah. 28Yunirünü arübah alibe ki tha, “Nü lung mungtsü laang! Atungpuh nü lung lah tüsho nü tode müngühjihdo!” 29Tüshe küyimki alibenü api ngükhea, apinü athakhinü küpkhukde kam tüsho ha salüm tümüaki de müyinsah. 30Yunirünü alibe ki tha, “ Mari dütre, tümüde Thrünpuh kilimnü nü mihmuzho ngüdo. 31#Mt 1.21Kheahang, nü mübünkeangde akambah, tüsho tsührü khülang zübebah, tüsho api mung Jisu de ajibah. 32Api ato labah tüsho Khide Achang tsührü de ajibah; tüsho Atungpuh Thrünpuhnü api kilim apü David kiulongthsübinkiu jihbah. 33Apinü Jakob yamkhün kurungkheak lünnü kiulongthsübah, tüsho api kiulongthsü akheam mülade alabah.”
34Judüki Marinü yunirü ki tha, “I atsangkhit anünürü a le ha küde alapü?”
35Tüsho yunirünü alibe ki alojihde tha, “Amüsüh Me nü kheak arübah tüsho Achangbe wunü nü alamdobah; jumonü shepü Amüsüh Khülang zübepü lanü Thrünpuh tsührü de ajibah. 36Kheakü nüsa betsührü Elizabeth she anihbe ashinshu tsührü khülang lah; tüsho shepü bünkeangberü lakheanü kheakü khinu thuruk thsüchoh. 37Tümüde Thrünpuh kilim tümü amukukpü müla.” 38Judüki Marinü tha, “Atungpuh yamlaberü kheahang! Nü yu yande ju lashang.” Tüsho yunirü ju alibe kinü chamachih.
Marinü Elizabeth Rhuakheahkhi
39Tüsho ju kim ching Marinü tsahmusubah awung lomi Judea kiuto ching niokheamde yü, 40tüsho Zakaria yam ching yüzahbah Elizabeth ki salüm jih. 41Tüsho küyimki Marinü salüm jihkhi Elizabethnü asokhea, khungarünü abe nuyam chingnü juk; tüsho Elizabeth ju Amüsüh Menü mide kam. 42Judüki alibenü düsheak achangnü tha, “Aliberü bolung nü müngühmühi, tüsho nü nuyam aso müngühmühi! 43Tüshe I Tungpuh abenü I kilim arüpü thsüde ha I ki küde mülüjihkhea? 44Tümüde nünü salüm jihkhi düsheak I nükhünnü soakede, I nuyam ching khungarünü asühde juk. 45Alibe shepünü akin lachonü müngühmühi, tümüde Atungpuh kilimnü anihbe ki thakhibo adünjibah.”
Mari Mungshi Khün
46Tüsho Marinü tha,
“I menü Atungpuh shichoh;
47I menü I khümkhitbuh Thrünpuh lung asühchoh,
48tümüde apinü ayamlaberü kuhi lümkhitjih;
kheahang, kheakünü ründe lün alalanü I ki müngühmühi de ajibah.
49Tümütüsho shepü wutoanü apinü I thsungkheak ato rhimodo tüsho api mung amüsüh lah.
50Tüsho api amüthsüm lün chingnü lün api trerü kheak lah.
51Apinü anihbuh binnü sühmüh huhdo;
apinü arü mulong ching lülüshishide alümkhi hiumüzütshih.
52Apinü wuto ju arü kiulongthsü-binkiu kheaknü akishih,
tüsho akheamkhibe shuhkih.
53Apinü khümde alarü atsübonü bukthsüshih,
tüsho alarü khah keangkeang tsoshih.
54Apinü nihbuh mihmüthsüm lümkhitde api yamlarü Israel rungdo.
55Apinü isa jipürübo Abraham tüsho api müjih ki
lünnü asukkhi nangde lah.”
56Tüsho Marinü anihbe lung khinu mahsam bande la, tüsho nihbe yam lim yü.
Johan Baptijihbuh Zübekhi
57Küyimki Elizabeth khungarü zübepü kim khiungkhea, alibenü tsührü khülang zübe. 58Alibe yamhingrübonü anihbe ki Atungpuhnü amüthsüm huhkhi sochoki arünü anihbe lung asühachih. 59Tüsho atizheah nipü arünü khungarü ju tsütabahpü arü; tüsho arünü api mung ju abuh müshide Zakaria de ajipü thsü, 60Tüshe abenü tha, “Yung; api mung Johan de ajibah.” 61Arünü alibe ki tha, “Nüsa betsührü bolung ha mungnü ajirü she müla.” 62Jumonü api mung küde ajibeanü arünü abuh ki amütsan thsüa huh. 63Apinü athrütbe lungbeak khülang kheangbah thrütde tha, “Api mung Johan ah.” Tüsho arü alalanü müyinsah. 64Zukleangnü api mün khimshuhde amulo kikkhi tsüabah, tüsho Thrünpuh shide thiyu tha. 65Judüki arü mühi larü alala kheak atrepü arü; tüsho Judea lomi alala ching mihtsürübonü ha dünkheak thaachih 66tüsho ha sorü alalanü müyinsahde tha, “Ha khungarü küdürü labea ki du?” Tüsho Atungpuh khah api kheak lakheah.
Zakarianü Müchitkhi
67Tüsho abuh Zakaria Amüsüh Menü mide kambah müchitde tha,
68“Atungpuh Israel Thrünpuh shiang,
tümüde apinü rhuakheahdo tüsho api mihtsürü rhokhit,
69tüsho api yamlarü David yam ching apinü isa thsungkheak akhümkhit juh shuhkih,
70adüsonü alakhi api yo amüsüh wukihrübo mün hode apinü asukkhi nangde,
71junangde isa riribo tüsho isa thraneanrü alala khah chingnü isa khümkhit;
72isa bebuhrü ki amüthsüm alokhikhi rhimopü,
tüsho api amüsüh tangzüng lümkhitpü,
73apinü isa jipürü Abraham ki thiyuchihchimkhi:
74isa riribo khah chingnü isa bekhitpü,
tüsho mütrede isanü api tankihkhukshihpü,
75isa nimungbo alala ching api miki amüsüh
tüsho thiyuro-lungki ching lapü.
76Tüsho nü khungarü, Khide Achang yo wukihrü de ajibah;
tümüde nünü api limrobo thsakhampü Atungpuh müngüh yübah,
77api mihtsürübo kilim arü neak bahkhi ching akhümkhit mükheahmudu jihpü,
78isa Thrünpuh mihmüthsüm lakhinü,
küpü hode yinmi chingnü isa kheak ani akhiukba,
79amiting ching larü yinshihpü tüsho ashe alamme ching larü kheak yinshihpü,
isa jingdükü mungtsü limro ching bepü lah.”
80Azübuh ju zode arü tüsho me ching düküngde kam; api Israel boto miki muhuhyi khiungde sunglo ching lakheah.
انتخاب شده:
LUK 1: YIMCBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
LUK 1
1
1Isa bolung dünjikhi thrütpü ahihkhühnü mürang. 2Atankih chingnü harü ngübah isa ki ha yusheak zhiyukrünü ju thrüt. 3Jumonü atankihnü inü lüpdükhi düshihde yimakheahkhi nangde, nüsa atsüdak Theophila#Thrünpuhnü muzhodakkhi. dünkheak akhinashunü athrütpü lümdo, 4junangde nüsa ki thsangyukhi adüngakhi nüsanü amükheahbah.
Johan Baptijihbuh Zübepü Thajungkhi
5Judea ching Herod kiulongthsürü lachoki, Abija amükeamrü chamnak lung lakhi amükeamrü khülang amung Zakaria lakheah; aniube ju Aron tsühsoniuso, amung Elizabeth lakheah. 6Ane chido Thrünpuh miki alungki, Atungpuh yukhüm tüsho thiyuzüngbo yande jakreak mükihde alakheah. 7Tüshe ane tsührü müla, tümütüsho Elizabeth ju bünkeangberü tüsho ane chido khide shina lakheah.
8Junangde api chamnak yande Thrünpuh miki amükeamrü thsüde atankihchoki, 9amükeamrü jipüyakli yande, Atungpuh arüngyam ching yübah jinjinlak takde kingaünpü api azankhit. 10Tüsho jinjinlak takkhi kim ching mihtsürü boto alala wungdo tamkhüntamnüde alakheah.
11Judüki jinjinlak kingaün sadam tsülim Atungpuh yunirü khülang zhipde api ki akhiuk. 12Tüsho küyimki Zakarianü api ngükhea, api müyinnim tüsho trede alakheah. 13Tüshe yunirünü api ki tha, “Zakaria dütre, tümüde nü tamkhüntamnü sojihdo; nü niube Elizabethnü nü kilim tsührü khülang zübejihbah tüsho nünü api mung Johan de ajibah. 14Nü khide asühbah, tüsho api zübechoki ahihkhühnü asühachihbah. 15Tümüde api ju Atungpuh miki ato labah, tüsho yukhu yungsho amüshangbe muyung. Api ju abe nuyam chingnü Amüsüh Menü mide alabah. 16Tüsho apinü Israel tsührübo ahihkhüh Atungpuh arü Thrünpuh kilim rholoshihbah. 17Apinü bebuhrü mulong tsührübo kilim, tüsho mihyumanirü thiyuro lümlung lim rholoshihde Atungpuh thsungkheak mihtsürübonü athsakhamshihpü Elija me tüsho wu chingnü Atungpuh müngüh yübah.”
18Zakarianü yunirü ki tha, “Ha inü küde amükheahba? Tümüde I lel niube khide shina lah.”
19Tüsho yunirünü api ki alojihde tha, “l Gabriel, Thrünpuh miki zhipbuh, tüsho ha thiyusheak atsü hanbah thiyia arüshihkhi ah. 20Tüshe kheahang, harü müdünjiyi nimung khiungde nü masukkhukpü thsüde aduh-a labah, tümütüsho kim ching dünjipü lakhi I yubo nünü akin müla.” 21Mihtsürübonü Zakaria aleang, tüsho api arüngyam ching khide ruhde alakhi müyinsah. 22Tüshe küyimki api akhiukkhea, apinü arü ki masukkhuk; tüshe apinü arüngyam ching michih khülang ngüa lah de mükheah, tümüde apinü arü ki akhah hita huh tüsho thiyu müthakhukde alakheah.
23Küyimki api kingaünpü kim arün thsükhea, apinü thüyam lim yülo. 24Ha dunglim aniube Elizabeth mübünkeangde kam tüsho khinu phüngü muwukhiukde thüyam ching la. 25Alibenü tha, “Kheakü akheam ching Atungpuhnü I rungdo tüsho mihtsürü bolung I mungchih hande tsodo.”
Jisu Zübepü Thajungkhi
26Kheakü khinu thurukpü ching Galilee yo kiuto khülang Nazareth de ajikhi lim Thrünpuhnü Gabriel arüshih, 27#Mt 1.18ju David tsühsoniuso Josep ki rhangpü lakhi atsangkhitkhi kilim lakheah. Atsangkhitkhi mung Mari lakheah. 28Yunirünü arübah alibe ki tha, “Nü lung mungtsü laang! Atungpuh nü lung lah tüsho nü tode müngühjihdo!” 29Tüshe küyimki alibenü api ngükhea, apinü athakhinü küpkhukde kam tüsho ha salüm tümüaki de müyinsah. 30Yunirünü alibe ki tha, “ Mari dütre, tümüde Thrünpuh kilimnü nü mihmuzho ngüdo. 31#Mt 1.21Kheahang, nü mübünkeangde akambah, tüsho tsührü khülang zübebah, tüsho api mung Jisu de ajibah. 32Api ato labah tüsho Khide Achang tsührü de ajibah; tüsho Atungpuh Thrünpuhnü api kilim apü David kiulongthsübinkiu jihbah. 33Apinü Jakob yamkhün kurungkheak lünnü kiulongthsübah, tüsho api kiulongthsü akheam mülade alabah.”
34Judüki Marinü yunirü ki tha, “I atsangkhit anünürü a le ha küde alapü?”
35Tüsho yunirünü alibe ki alojihde tha, “Amüsüh Me nü kheak arübah tüsho Achangbe wunü nü alamdobah; jumonü shepü Amüsüh Khülang zübepü lanü Thrünpuh tsührü de ajibah. 36Kheakü nüsa betsührü Elizabeth she anihbe ashinshu tsührü khülang lah; tüsho shepü bünkeangberü lakheanü kheakü khinu thuruk thsüchoh. 37Tümüde Thrünpuh kilim tümü amukukpü müla.” 38Judüki Marinü tha, “Atungpuh yamlaberü kheahang! Nü yu yande ju lashang.” Tüsho yunirü ju alibe kinü chamachih.
Marinü Elizabeth Rhuakheahkhi
39Tüsho ju kim ching Marinü tsahmusubah awung lomi Judea kiuto ching niokheamde yü, 40tüsho Zakaria yam ching yüzahbah Elizabeth ki salüm jih. 41Tüsho küyimki Marinü salüm jihkhi Elizabethnü asokhea, khungarünü abe nuyam chingnü juk; tüsho Elizabeth ju Amüsüh Menü mide kam. 42Judüki alibenü düsheak achangnü tha, “Aliberü bolung nü müngühmühi, tüsho nü nuyam aso müngühmühi! 43Tüshe I Tungpuh abenü I kilim arüpü thsüde ha I ki küde mülüjihkhea? 44Tümüde nünü salüm jihkhi düsheak I nükhünnü soakede, I nuyam ching khungarünü asühde juk. 45Alibe shepünü akin lachonü müngühmühi, tümüde Atungpuh kilimnü anihbe ki thakhibo adünjibah.”
Mari Mungshi Khün
46Tüsho Marinü tha,
“I menü Atungpuh shichoh;
47I menü I khümkhitbuh Thrünpuh lung asühchoh,
48tümüde apinü ayamlaberü kuhi lümkhitjih;
kheahang, kheakünü ründe lün alalanü I ki müngühmühi de ajibah.
49Tümütüsho shepü wutoanü apinü I thsungkheak ato rhimodo tüsho api mung amüsüh lah.
50Tüsho api amüthsüm lün chingnü lün api trerü kheak lah.
51Apinü anihbuh binnü sühmüh huhdo;
apinü arü mulong ching lülüshishide alümkhi hiumüzütshih.
52Apinü wuto ju arü kiulongthsü-binkiu kheaknü akishih,
tüsho akheamkhibe shuhkih.
53Apinü khümde alarü atsübonü bukthsüshih,
tüsho alarü khah keangkeang tsoshih.
54Apinü nihbuh mihmüthsüm lümkhitde api yamlarü Israel rungdo.
55Apinü isa jipürübo Abraham tüsho api müjih ki
lünnü asukkhi nangde lah.”
56Tüsho Marinü anihbe lung khinu mahsam bande la, tüsho nihbe yam lim yü.
Johan Baptijihbuh Zübekhi
57Küyimki Elizabeth khungarü zübepü kim khiungkhea, alibenü tsührü khülang zübe. 58Alibe yamhingrübonü anihbe ki Atungpuhnü amüthsüm huhkhi sochoki arünü anihbe lung asühachih. 59Tüsho atizheah nipü arünü khungarü ju tsütabahpü arü; tüsho arünü api mung ju abuh müshide Zakaria de ajipü thsü, 60Tüshe abenü tha, “Yung; api mung Johan de ajibah.” 61Arünü alibe ki tha, “Nüsa betsührü bolung ha mungnü ajirü she müla.” 62Jumonü api mung küde ajibeanü arünü abuh ki amütsan thsüa huh. 63Apinü athrütbe lungbeak khülang kheangbah thrütde tha, “Api mung Johan ah.” Tüsho arü alalanü müyinsah. 64Zukleangnü api mün khimshuhde amulo kikkhi tsüabah, tüsho Thrünpuh shide thiyu tha. 65Judüki arü mühi larü alala kheak atrepü arü; tüsho Judea lomi alala ching mihtsürübonü ha dünkheak thaachih 66tüsho ha sorü alalanü müyinsahde tha, “Ha khungarü küdürü labea ki du?” Tüsho Atungpuh khah api kheak lakheah.
Zakarianü Müchitkhi
67Tüsho abuh Zakaria Amüsüh Menü mide kambah müchitde tha,
68“Atungpuh Israel Thrünpuh shiang,
tümüde apinü rhuakheahdo tüsho api mihtsürü rhokhit,
69tüsho api yamlarü David yam ching apinü isa thsungkheak akhümkhit juh shuhkih,
70adüsonü alakhi api yo amüsüh wukihrübo mün hode apinü asukkhi nangde,
71junangde isa riribo tüsho isa thraneanrü alala khah chingnü isa khümkhit;
72isa bebuhrü ki amüthsüm alokhikhi rhimopü,
tüsho api amüsüh tangzüng lümkhitpü,
73apinü isa jipürü Abraham ki thiyuchihchimkhi:
74isa riribo khah chingnü isa bekhitpü,
tüsho mütrede isanü api tankihkhukshihpü,
75isa nimungbo alala ching api miki amüsüh
tüsho thiyuro-lungki ching lapü.
76Tüsho nü khungarü, Khide Achang yo wukihrü de ajibah;
tümüde nünü api limrobo thsakhampü Atungpuh müngüh yübah,
77api mihtsürübo kilim arü neak bahkhi ching akhümkhit mükheahmudu jihpü,
78isa Thrünpuh mihmüthsüm lakhinü,
küpü hode yinmi chingnü isa kheak ani akhiukba,
79amiting ching larü yinshihpü tüsho ashe alamme ching larü kheak yinshihpü,
isa jingdükü mungtsü limro ching bepü lah.”
80Azübuh ju zode arü tüsho me ching düküngde kam; api Israel boto miki muhuhyi khiungde sunglo ching lakheah.
انتخاب شده:
:
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.