Yoni 6
6
Yesuʼa neʼyaʼmo faefu tauseniʼa vayaʼmo apamiʼniya gemae
(Mt 14:13-21; Mk 6:30-44; Lu 9:10-17)
1Henagaʼamo Yesuʼa ani kotuʼmo agiʼamo Galeliya ani kotuʼmo lakaeno mugagayaga faligamo uʼniye. Ani ani kotuʼmo alu agiʼamo Taipiliyasi ani kotune. 2Agaemo alagena kavaʼmo huno kaita hapauʼniya vayaʼaina alino hapageno apateʼnigeʼa ageʼnayaʼmofeʼmo asole vayaʼmo akame huʼa uʼnae. 3Yesuʼe geʼamo neʼafiya vayaʼeʼmo mago aise avefiʼmo uʼa haiʼa maiʼnae. 4#Yo 2:13Pasova hopa afinaʼmo ago alagi hogo huʼniye. 5Yesuʼa alino maku huno apakeyana asole vayaʼmo agaetegamo eʼnageno apaketeno Filipifeʼmo hunoʼaeʼmo, mani asole vayaʼmo eʼnagi neʼyaʼmo nesaya yaʼmo haiyatetiʼmo miya faigune, huno afi geʼniye. 6Agaiʼamo ani hisiya kavaʼmo ago ageʼniyana Filipifeʼmo na agufa gemo hisifi, huno amalageka huno ge huno afi geʼniye. 7Filipiʼa hunoʼaeʼmo, tu hataleti kinaletiʼmo neʼyaʼmo miya faigunana mani asole vayaʼmogimo nesaya agufa kavaʼmo osugiye, huno ha paiʼniye. 8Mago vekamo geʼamo neʼafiya vekamo agiʼamo Eʼnaluʼa Saimoni Pita aganaʼamoʼa, 9mago manile maiʼniya mafaʼnemoʼa faefuʼa mali peleti mayaʼe lole noyamelaʼeʼmo aliʼniye. Aliʼniyaʼmonanafa asole vayapiʼmogeno mani neʼyaʼatomoʼa kanale osugiye, huno ha paiʼniye. 10Yesuʼa hunoʼaeʼmo, etapa kahauleʼmo itopaleʼmo maiyo, huta hapa paiyo, huno hapa paiʼnigeʼapaeʼmo muki vayaʼaifeʼmo hapa paiʼnageʼa kahauleʼmo eʼa itopaleʼmo maiʼnae. Ani vayaʼmo faefu tauseniʼa vayaʼmo maiʼnae. 11Yesuʼa peleti mayamo aliʼneno Gotifeʼmo hao ke heteno maiʼnaya vayaʼmo alino fako huno apamiteno noyameʼeʼmo ani kava huno alino apakaiʼapimo hapauʼniya agufa kavaʼmo huno apamiʼnigeʼa neʼnae. 12Neʼyaʼmo neʼa apamu hutagenoʼaeʼmo Yesuʼa geʼamo neʼafiya vayaʼaifeʼmo hunoʼaeʼmo, fiku yanageno neʼyaʼmo atupaʼamo lageso hugiyanagi alita anupa hiyo, huno hapa paiʼnigeʼa 13faefuʼa peleti mayafatiʼmo neʼa apamu huteʼa ataleʼnaya atupamo aliʼa tuolofuʼa hona yuvapafiʼmo maleʼa havai teʼnae. 14#Loa 18:15; Yo 5:46Apakaemo ageʼnayana Yesuʼa noʼagaya agufa aune kavaʼmo huno alino apave liʼnigeʼa ageteʼapaeʼmo, Gotitegati gemo alinineno aeno hakalo huno hapa paisiya vekamo ma mopafiʼmo afole aigiye, huʼa huʼnaya vekamo agaekeʼmae, huʼa huʼnae. 15#Yo 18:36; Mt 14:23Ani vayaʼmogimo eʼa Yesuʼmo atafauʼa yagaino apatesiya kini vekamo aliʼa hamaleʼa atesayafeʼmo huʼnagenoʼaeʼmo Yesuʼa apakeʼniyaʼmofeʼmo apataleno agaiʼageʼmo avefiʼmo uno haiʼniye.
Yesuʼa ani agotofuleʼmo eʼniya gemae
(Mt 14:22-33; Mk 6:45-52)
16-17Yegemo uno lamino faleʼnigeʼapaeʼmo Yesu geʼamo neʼafiya vayaʼmo ani kotutegamo uʼa lamiʼa sipifiʼmo uʼa haiʼa maiteʼa mugagayaga faliga Kapeneyamu taonifilagamo aniʼmo lakaeʼa visayafeʼmo neʼvagenoʼaeʼmo hani huʼniyana Yesuʼa apakaetegamo oʼmeʼniye. 18Lusi kava huno yasimo alinineno aniʼmo aino holakau holakau huʼnigeʼapaeʼmo 19apakaemo latapa kayotetiʼmo aniʼmo avaleʼa ataleme ataleme aise afagiʼaleʼmo neʼuʼapaeʼmo agayana Yesuʼa ani agotofuleʼmo sipi haopaleʼmo eʼnigeʼa ageteʼapaeʼmo koli nehagenoʼaeʼmo 20Yesuʼa hunoʼaeʼmo, nagaemo neʼovanagi koli osiyo, huno hapa paiʼnigeʼapaeʼmo 21hapauʼnigeʼa sipifiʼmo avaleʼa ateteʼapaeʼmo malage huʼa uʼa ani agiʼnaleʼmo avaʼyi huʼnae.
Yesufeʼmo kahauya huʼnaya gemae
22Egaʼamo mugagayaga faliga vayaʼmogi agayana egamo haneʼnigeʼa ageʼnaya sipigeʼmo magokeʼageʼmo haneʼnigeno Yesuʼa ani sipifiʼmo oʼuʼnigeʼa geʼamo neʼafiya vayaʼageʼmo uʼnageʼa apakeʼnae. 23#Yo 6:11Magoʼe sipimo Taipiliyasi kotegatiʼmo eʼa Yesuʼa neʼyaʼmo Gotifeʼmo hao ke heteno apamiʼnigeʼa neʼnayategamo eʼnae. 24Asole vayaʼmogi apakayana Yesuʼe geʼamo neʼafiya vayaʼeʼmo anileʼmo oʼmaiʼnageʼa apaketeʼapaeʼmo mago sipigopiʼmo uʼa haiʼa maiteʼa Yesufeʼmo kahauya huʼa agesayafeʼmo aniʼmo lakaeʼa uʼnae.
Yesuʼa afaʼa maisaya yaʼmo neʼapamiya peleti mayagana huno maiʼniya gemae
25Ani kotuʼmo mugagaya faligamo lakaeʼuʼa avaʼyi huteʼa Yesuʼmo maiʼnigeʼa ageteʼapaeʼmo, Tisao, huʼa, hainu afinaʼmo manileʼmo eka maiʼnane, huʼa afi geʼnagenoʼaeʼmo 26#Yo 6:11-12Yesuʼa hunoʼaeʼmo, alagi lama gemo lapa nepauve, huno, noʼagaya agufa aune kavaʼmo agetapa aeto huʼnayaʼmofeʼmo nagesayafeʼmo oʼmeʼnafa peleti mayamo lapamiʼnogetapa netapa lapamu huʼnayaʼmofeʼmo nagesayafeʼmo eʼnae. 27#Yo 4:14; 6:48-58Lapakaemo kasalisiya neʼyaʼmo alisayafekeʼmo aliʼyaʼmo oʼalitapa hanege hanege huno hanesiya neʼyaʼmo lapamisigetapa alagepa hutapa maige maige hutapa maisaya yaʼmo alisayafekeʼmo aliʼyaʼmo aliyo. Vemo Mafaʼnemoʼmo ani agufa neʼyaʼmo lapamigiye. Muki yaʼmo Afoʼamoʼmo Gotiʼa lekana paiʼna ateʼnove, huno alino apave lisiyafeʼmo himamuʼamo amiʼniye, huno hapa paiʼnigeʼapaeʼmo, 28Gotiʼa hauʼniya kavaʼmo hisunafeʼmo na agufa aliʼya na agufa aliʼyaʼmo aligune, huʼa ge huʼa afi geʼnagenoʼaeʼmo, 29#1 Yo 3:23Gotiʼa hauʼniya kavaʼmo magokeʼageʼmo haneʼniyana alino ateʼnigeno emineʼniya vekaeʼmo lapakesamo afita fatago hisaya kavakeʼmo aliʼyaʼamo haneʼniye, huno hapa paiʼnigeʼapaeʼmo, 30#Mt 16:1; Yo 2:18Lama gemo nehane, huta hisunafeʼmo haiya agufa noʼagona kaune kavaʼmo huka lave ligane. Na agufa kavaʼmo hugane. 31#Hat 16:14-15; Nap 11:7-9; Sam 78:24Laginago vayaʼmogi kaʼme kotega mana neʼyaʼmo neʼnae. Ani kavatefeʼmo Goti mukufi gemoʼmo hunoʼaeʼmo, agaemo kokuʼnapatiʼmo peleti mayamo apamiʼnigeʼa neʼnae, huno huʼniye, huʼa ha paiʼnagenoʼaeʼmo 32Alagi lama gemo lapa nepauve, huno, Moseseʼa kokuʼnapati lama ge peleti mayamo oʼapamiʼnifa Afoʼnimokeʼmo kokuʼnapatiʼmo lama ge peleti mayamo nelapamiye. 33Gotiʼa neʼapamiya peleti mayamo kokuʼnapatiʼmo emineno ma mopafi vayaʼmo afaʼa maisaya yaʼmo neʼapamiya vekamo maiʼniye, huno hapa paiʼnigeʼapaeʼmo, 34#Yo 4:15Ala kava nene, huʼa, muki afinaʼmo ani peleti mayamo lamigeta neno, huʼa ha paiʼnagenoʼaeʼmo, 35#Yo 4:14; 6:48-58nagaemo afaʼa maisaya yaʼmo neʼapamiya peleti mayagana huʼna maiʼnove. Nagaetegamo esaya vayaʼmo apaka otegaiye. Nagaefeʼmo apakesamo afiʼa fatago nehisaya vayaʼmo anifeʼmo alagi ohapaugiye. 36#Yo 20:29Ago lapa paiʼnaeʼmo, nageʼnayaʼmonanafa lapakesamo afita fatago nosae, huʼna ago lapa paiʼnove. 37#Yo 17:6-8; Mt 11:28Muki vayaʼamo muki yaʼmo Afoʼamoʼmo apavaleno neʼnamiya vayaʼamo nagaetegamo egae. Nagaetegamo eʼa maiʼnisaya vayaʼmo alagi aliʼna hapafaiʼna oʼapatalegauve. 38#Mt 26:39; Yo 4:34Ani kavatefeʼmo nagaiʼni nahauʼnisiya kavaʼmo hisuvafeʼmo emiʼnoʼmeʼnofa alino nateʼnigeʼna emiʼneʼnova vekamoʼa hauʼniya kavaʼmo hisuvafeʼmo emiʼneʼnove. 39#Yo 10:28-29; 17:12Muki yaʼmo Afoʼamoʼmo alino nateʼnigeʼna emiʼneʼnova vekamoʼa hauʼniyanageʼna muki apavaleno namiʼniya vayapatiʼmo magoke vekamo alagi afaʼa atalesugeno afela hesiyafeʼmo ohauʼniyanageʼna ma mopamo hano hisiya afinaʼmo muki vayaʼamo aliʼna he tiʼna apatesuvafekeʼmo hauʼniye. 40#Yo 11:24Alino nateʼnigeʼna emiʼneʼnova vekamoʼa hauʼniyanageʼa muki vayaʼamogi Mafaʼneʼamo ageʼa aeto huteʼapaeʼmo agaefeʼmo apakesamo afiʼa fatago nehisaya vayaʼmo afaʼa maige maige huʼa maisaya yaʼmo aligae. Aliʼnisageʼna ma mopamo hano hisiya afinaʼmo aliʼna he tiʼna apategauve, huno hapa paiʼniye.
41Yesuʼa hunoʼaeʼmo, kokuʼnapatiʼmo emiʼneʼniya peleti mayagana huʼna maiʼnove, huno hapa paiʼniyaʼmofeʼmo aepa faiʼa hagalu hagalu huʼa ge hauʼnae. 42#Mt 13:55; Yo 6:65Ge hauʼapaeʼmo, ani kanomo Yesuʼa Yosefe mafaʼnemo oʼmaiʼnifiye. He, ani kanomo maiʼnigeta itaʼafoʼalaʼmoganimo ago anakeʼnone. Na kava higenoʼaeʼmo, nagaemo kokuʼnapati emiʼneʼnove, huno nehiye, huʼa huteʼa huʼa faipa huʼa ateteʼa ge hauʼnae. 43Yesuʼa geʼapileʼmo aeno atagaina huno hapa painoʼaeʼmo, lapakaitapimo hagalu hagalu gemo osiyo. 44Magoke vekamoʼa agaiʼamo nagaetegamo afaʼa oʼmegaiyaʼmonanafa Afoʼnimoʼmo alino nateʼnigeʼna emiʼneʼnova vekamokeʼmo ayate heno avayu hulino esigenoʼaekeʼmo nagaetegamo egaiye. Nagaetegamo esigeʼnaeʼmo ma mopamo hano hisiya afinaʼmo aliʼna he tiʼna ategauve. 45#Aiy 54:13Gotitegati gemo alini eʼa aeʼa hakalo huʼa hapa nepaiya vayaʼmogimo Goti mukufiʼmo avoʼmo kaeʼapaeʼmo, Gotiʼa muki vayaʼaina alino apaya malegaiye, huʼa avoʼmo kae maleʼnae. Ani gemo huʼnayaʼmofeʼmo muki yaʼmo Afoʼamoʼmo huʼniya gemo afiteʼa ageʼnaya vayaʼmo mukiʼamo nagaetegamo ete ete nehae. 46#Yo 1:18Ani gemo huvaʼmonanafa magoke vekamoʼa Afoʼnimoʼmo oʼageʼniye. Gotitegatiʼmo magoke vekamo emineʼniya vekamokeʼmo muki yaʼmo Afoʼamoʼmo ageʼniye. 47#Yo 3:15-16Alagi lama ge lapa nepauve, huno, Apakesamo afiʼa fatago nehaya vayaʼmo afaʼa maige maige huʼa maisaya yaʼmo ago aliʼnae. 48#Yo 6:31,58Nagaemo afaʼa maisaya yaʼmo neʼapamiya peleti mayagana huʼna maiʼnove. 49Lapakinago vayaʼmo kaʼme kotega maiʼneʼapaeʼmo mana peleti mayamo aliʼa neʼnayaʼmonanafa ago faliʼnae. 50Kokuʼnapati emineʼniya peleti mayamo aeto agufa kanale peleti mayamo haneʼniyanageʼa neʼnisaya vayaʼmo alagi ofaligae. 51Nagaemo afaʼa maisaya yaʼmo neʼapamiya peleti mayamo kokuʼnapatiʼmo emineʼniya peleti mayagana huʼna maiʼnove. Ina lagimo ani peleti mayamo neʼnisafigeʼa muki afinaʼmo afaʼa maige maige huʼa maigae. Apamisuva peleti mayamo nagufafati nameʼanimo haneʼniye. Ma mopafi vayaʼmo afaʼa maige maige huʼa maisayafeʼmo nameʼanimo apamiguve, huno hapa paiʼniye. 52Hapa paiʼnigeʼa afiteʼapaeʼmo apakaiʼapimo ge vaiteʼapaeʼmo, Ani vekamo ameʼamo nesunafeʼmo haiya kava huno lagauno lamigiye, huʼa huʼnae. 53Yesuʼa hunoʼaeʼmo, alagi lama gemo lapa nepauve, huno, lapakaemo Vemo Mafaʼnemo ameʼaʼe kolaʼaʼeʼmo oʼneʼnisayana afaʼa maisaya yaʼmo alagi oʼaliʼnae. 54Ina lagimo nameʼniʼe kolaʼniʼeʼmo neʼnisafigeʼa afaʼa maige maige huʼa maisaya yaʼmo ago aliʼnayanageʼna ma mopamo hano hisiya afinaʼmo aliʼna he tiʼna apategauve. 55Nameʼanimo lama ge neʼyaʼmo haneʼnigeno kolaʼnimo lama ge aniʼmo haneʼniye. 56Ina lagimo nameʼniʼe kolaʼniʼeʼmo neʼnisafigeʼa nagaepiʼmo maiʼnageʼna apakaepiʼmo maiʼnove. 57#Yo 15:4-5; 1 Yo 3:24Muki yaʼmo Afoʼamoʼmo afaʼa maisaya yaʼmo aepa vekamoʼa alino nateʼnigeʼna emineʼnove. Agaemo afaʼa maisuva yaʼmo aepa vekamo maiʼnigeʼna nagufafati nameʼanimo neʼnaya vayaʼmo afaʼa maisaya yaʼmo aepa vekaʼapimo maiʼnove. 58Manimona kokuʼnapatiʼmo emineʼniya peleti mayamo haneʼniye. Lapakinago vayaʼmogi neʼnaya peleti mayagana huno ohaneʼnifa aeto agufa kanale peleti mayamo haneʼniye. Lapakinago vayaʼmogi neteʼapaeʼmo ago faliʼnayaʼmonanafa mani peleti mayamo neʼnisaya vayaʼmo muki afinaʼmo afaʼa maige maige huʼa maigae. 59Yesuʼa mani gemo Kapeneyamu taonifiʼmo mono nopiʼmo alino apaya maleʼniye.
Geʼamo neʼafiya vayapatiʼmo mago vayaʼamo ago ataleʼa uʼnaya gemae
60Asole vayaʼmo geʼamo neʼafiya vayapatiʼmo mago vayaʼamo ani gemo afiteʼapaeʼmo, ani gemoʼmo kana huʼniyaʼmofeʼmo ina lagimo ani gemo afiʼa aeto hugae, huʼa huʼnae. 61Yesuʼa agaiʼa aipafiʼmo agesa afinoʼaeʼmo geʼnimo neʼafiya vayaʼmogi huʼnova geeʼmo hagalu hagalu gemo nehae, huno apaketenoʼaeʼmo, mani huva gemoʼmo aneʼaifiʼmo hegekana huno lapatafauʼnifiye. 62#Yo 3:13; Ap 1:9-11Agesayana Vemo Mafaʼnemo atagi neno uno haino maisigetapaeʼmo, na agufa yane hutapa lapakesamo afigae. 63#2 Ko 3:6Nauneʼnameʼmoʼa afaʼa maisaya yaʼmo neʼapamiye. Nagufafati nameʼamoʼmo lapa oʼmaegaiye. Lapa nepauva gefiʼmo aunemeʼamo haneʼniyanageno afaʼa maisaya yaʼmo neʼapamiya gemo haneʼniye. 64#Yo 13:11; Yo 6:44Haneʼniyaʼmonanafa lapakaepatiʼmo mago vayaʼmo apakesamo afiʼa fatago nosae, huno hapa paiʼniye. Yesuʼa aliʼyaʼamo aepa faino aliʼniya afinatetiʼmo apakesamo afiʼa fatago osisaya vayaʼe kutulu yaʼmo alisiya vekaʼeʼmo ago apakeʼniye. 65Huno hapa paitenoʼaeʼmo, ani kavatefeʼmo, mago vekamoʼa nagaetegamo agaiʼamo afaʼa oʼmegaiyaʼmonanafa Afoʼnimoʼa fiku ha maeno amisigeno egaiye, huʼna ago lapa paiʼnove, huno hapa paiʼniye.
66Ani gemo huno hapa paiʼniyaʼmofeʼmo asole vayaʼmo geʼamo afiʼnaya vayapatiʼmo agaeʼeʼmo magoʼe huʼa lokaeʼa umenitata osuʼa ago ataleʼa uʼeʼa huʼnae. 67Ataleʼa uʼnagenoʼaeʼmo Yesuʼa tuolofuʼa vayaʼmo geʼamo neʼafiya vayaʼaifeʼmo hunoʼaeʼmo, lapakaeʼeʼmo nataletapa ugefe nehafiye, huno ge huno apafi geʼnigenoʼaeʼmo 68Saimoni Pitaʼa hunoʼaeʼmo, Ala kava nene, huno, ina lategamo ugune. Kagae gemoʼa afaʼa maisaya yaʼmo neʼapamiya gemo haneʼniye. 69#Mt 14:33; 16:16; Mk 1:24; Yo 1:49Hemenimo lagaemo lagesamo afita fatago huteta kageʼnonana aeto agufa vekamo Gotitegatiʼmo emikeʼnana vekamo maiʼnanageta kageʼnone, huno ha paiʼnigeno 70Yesuʼa hunoʼaeʼmo, nagaemo lekana paiʼna lapateʼnovaʼmonanafa lapakaepatiʼmo mago vekamo aipafiʼmo hosu aune vekamo maiʼniye, huno hapa paiʼniye. 71Agaemo Yutasiʼa Isakaliyoti kotega vekamo Saimoni mafaʼneeʼmo huʼniye. Yutasiʼa ani tuolofuʼa vayapati vekamoʼa kutulu yaʼmo aliteno Yesuʼmo avaleno apamisigeʼa amagisaya vekamo maiʼniye.
اکنون انتخاب شده:
Yoni 6: kyg2013
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2013, Wycliffe Bible Translators, Inc. All rights reserved.