Gen 2
2
1Ma vaghina, nakanani God iberai da kunuma ma dobu ma bera kudubina iyamoni.
2Mara miikovimasago na bigana iberaberai da ivi koviya. Mara kana vimiikovimaruwa na ivi yakam. 3Tuna kubiine mara kana vimiikovimaruwa ivi biibiini ma ivinei da vovokaravina.
Eden vaona.
4Kunuma ma dobu varagutugutuna ma ikikava Bada God iyamoni na weni. Kunuma ma dobu iyamoyamoni, 5na garewa ke ita vonatawei, karakava. Tuna kubiine ke sago kii bo inamona bo pei tano tepanai ita gogo. Ma kesago wawaya da tano ita wayowei. 6Ma vusira tano kamonai igheghae da dowa kudubina ivivi nubanubai.
7Vaghina ma, Bada God tano iviiya ma tomowa ivopasipasiya, yana itawe ku giyabonaghina da tomowina irupapara da yawayawana.
8Ma dobu sago ku maramatana imakamakai kana vava Eden. Eden kamonai na Bada God vao sago iberai ma nani tomowina ivopasipasiya na nake iterei. 9Ma iberai da kii bogii ma bogiiyai tano kamonai igogo ighae. Viya kitasi biibiisi ma nuwaviiviinisi ma viya amesi na vavai. Ma vao basunai na kii ivi ruwa imiimiiri. Sago na Yawasa Kiina ma sago na Akova Kiina. Iyavo kava Akova Kiina amena ina kani na akova biibiina ma bade akova berona ina veresi.
10Ma Eden kamonai okowa sago iveraverau da vao ivivi nubanubai ma nani dobunai okowina ivi ruragharagha da okowa ruwamaruwa. 11Okowa sago kana vava Pison na dobu kana vava Havila kamonai iveruriwariwa da dobuna ine yavui. Nani dobunai gold imakamakai 12ma nani gold na ghamana ma biibiina, ma bade kii ipana ghabughabusi ma wakima vovokeyakeyusi imakamakai. 13Okowa kana viruwa na kana vava Gihon ma dobu kana vava Kus kamonai iveruriwariwa da dobuna ine yavui. 14Okowa kana viaroba na kana vava Taigris ma tuna iveraverau ku maramatana Asiriya nevanai. Ma okowa kana viruwamaruwa na kana vava Yuperetis.
15Vaghina ma, Bada God tomowina ivopasiya ikovi na Eden kamonai iterei da ita wayowa ma vao ita koyaghi. 16Ma ina sisiya bagibagina iterei, ivonei bo, “Weni vona kamonai kii amame peyarina kuna kani, 17ma kii sago kava na amena ke kuna kani. Tuna na Akova Kiina. Wawaya ina kani na akova ina veresi da nuwanuwasi kamonai inakovi da meni berana na biibiina ma meni berana na berona. Kuna kani na vonavaghata da kuna rabobo.”
18Ma bade ivona bo, “Ke ita biibai da tomowina ina kina kava ina makai. Kana neva ana yamoni da ini vitei.”
19 Bada God namada dowa iviini da ghamoghamo ma kiu peyarina ivopasipasisi. Ma ineyesi tomowina kurina da ita kitai ikikava iti vavesi. Ivi vaghinei da tomowina ina kayowanai sago sago duma kii vava iveresi. 20Ma vaghina, ghamoghamo manamisi ma kiu kiidamowai ma ghamoghamo dipa kii vava iveresi ikovi, ma nani kamonai na ‘Adam’ ke kana neva kiimatana da iti vitei.
21Tuna kubiine Bada God iberai da tomowina ikena irabobo. Ma nani kamonai tuwirina sago ghabaghabanai ivotawei ma tarabogina na viyonai ivopotai. 22Ma tuwirinai wavine iyamoni ma irutinaneyei tomowina kurina.
23Ma tomowina ivona bo,
“Vaghina, ibiibii kirakai! Weni na taku maghimaghighiku!
Tuwirina, tuwirikuwai iviiya ma viyona, viyokuwai iviiya.
Tuna kubiine kana vava ‘wavine,’ ina karena taku tomowa gwabikuwai iviiya.”
24Weni berana kubiine tomowa ina mamai ma ina maduwa ina voteresi da kawana yavata ini kiikapu da sago.
25Ma tomowina wavinena yavata imakamakai ma ivi ruwa na iyusi kava ma ke iti nimaya.
اکنون انتخاب شده:
Gen 2: pwgB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009, Wycliffe Bible Translators, Inc. All rights reserved.