創世記 1
1
上帝个創造
1太初,上帝創造天地。 2地還係空空,吂有成形;烏暗遮等深淵;上帝个靈在水面上運行。 3上帝講:「愛有光。」就有光。 4上帝看光係好个,就將光㧯暗分開。 5上帝將光安到「日時頭」,將暗安到「暗晡頭」。有暗晡,有朝晨;這係頭一日。
6上帝講:「這兜水个中間愛有天空,將水上下分開。」 7上帝就造天空,將天空以下个水㧯天空以上个水分開。事就恁樣完成。 8上帝將天空安到「天」。有暗晡,有朝晨;這係第二日。
9上帝講:「天下个水愛集在一個所在,俾燥地出現。」事就恁樣完成。 10上帝將燥地安到「地」,將集水个所在安到「海」。上帝看這係好个。 11上帝講:「地愛生出各種各類个植物:有兜出產五榖、有兜結果子,果子底背有核。」事就恁樣完成。 12地就生出各種各類个植物:有兜出產五榖、有兜結果子,果子底背有核。上帝看這係好个。 13有暗晡,有朝晨;這係第三日。
14上帝講:「天頂愛有光體,分別日夜,來做節期㧯年日个記號, 15並愛在天頂發光,照亮大地。」事就恁樣完成。 16上帝就造出兩個大光體,大个管日時頭,細个管暗晡頭。佢又造盡多星仔。 17上帝將光體安在天空,來照亮大地, 18管理日夜,分別明暗。上帝看這係好个。 19有暗晡,有朝晨;這係第四日。
20上帝講:「水中愛繁殖多種動物;天空中愛有多種飛鳥。」 21上帝就創造盡大个海獸,水中各種各類有生命个動物,㧯天空各種各類个飛鳥。上帝看這係好个。 22上帝賜福給這兜動物講:「魚類愛在海中繁殖,飛鳥也愛在地上增加。」 23有暗晡,有朝晨;這係第五日。
24上帝講:「大地愛繁殖各種各類有生命个動物:頭牲、爬蟲㧯野獸。」事就恁樣完成。 25上帝就造出地上各種各類个野獸、頭牲㧯爬蟲。上帝看這係好个。
26上帝講:「𠊎等愛照𠊎等个形像、𠊎等个樣式造人,俾佢等管理海肚个魚、空中个飛鳥、地上个頭牲、各種地上个爬蟲,㧯全地。」 27上帝就照自家个形像創造人,佢照上帝个形像創造男人㧯女人。 28上帝就賜福佢等,又對佢等講:「愛𫱔多多子女,遍滿世界,來治理大地,也愛管理海肚个魚、空中个飛鳥㧯地上各種動物。」 29上帝講:「看啊!𠊎將全地个五榖㧯各種果子賜給你等做食物。 30總係,地上个走獸㧯空中个飛鳥,並地上各種動物,𠊎將青个植物賜給它兜做食物。」事就恁樣完成。 31上帝看佢一切所造个係非常好。有暗晡,有朝晨;這係第六日。
اکنون انتخاب شده:
創世記 1: THV12Hdb
هایلایت
به اشتراک گذاشتن
کپی
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Ffa.png&w=128&q=75)
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012