創世記 28
28
雅各去倚靠拉班
1 以撒喊雅各到面前來，祝福佢，又吩咐佢講：「你毋好㧯迦南个細妹仔結婚。 2你愛去美索不達米亞，到若姐公彼土利个家，對若舅拉班个妹仔當中討一個做𡜵娘。 3願全能个上帝賜福你，俾你𫱔多多子女，成做盡多民族个祖先！ 4願佢賜福給你㧯你个子孫，像賜福亞伯拉罕一樣。願你會得到你這下做旅客所住个地方，就係上帝賜福給亞伯拉罕个土地。」 5恁樣，以撒喊雅各去美索不達米亞，到厥姐公亞蘭人彼土利个孻仔拉班該位。拉班係麗百加个阿哥，雅各㧯以掃个母舅。
以掃另外討一個𡜵娘
6 以掃聽到以撒祝福雅各，送佢到美索不達米亞討𡜵娘，也知以撒祝福佢个時吩咐佢毋好㧯迦南个細妹仔結婚， 7又看到雅各聽從爺𡟓到美索不達米亞去。 8以掃正知厥爸以撒無歡喜佢對迦南討个𡜵娘。 9所以，佢到亞伯拉罕个孻仔以實瑪利該位，㧯厥妹仔瑪哈拉結婚；瑪哈拉就係尼拜約个老妹。
雅各在伯特利發夢
10 雅各離開別是巴，愛去哈蘭。 11日頭落山个時，佢來到一個地方 #28:11 「一個地方」抑係譯做「一個聖所」。，在該位過夜；佢搬一隻石頭做枕頭，在該位睡目。 12佢發夢看到一支梯仔對地上通到天頂，梯仔頂高有上帝个使者上上下下。 13佢又看到上主企在佢堘頭 #28:13 「在佢堘頭」抑係譯做「在梯仔頂高」。，對佢講：「𠊎係上主，係若公亞伯拉罕个上帝㧯若爸以撒个上帝；𠊎愛將你這下睡个土地賜給你㧯你个後代。 14佢等愛像地上个沙仔恁多，向東西南北發展。𠊎愛因為你㧯你个後代賜福給世界各國。 15𠊎愛㧯你共下；無論你到㖠位，𠊎愛保護你，也愛帶領你轉到這地方。𠊎絕對毋會離開你，一定會實現對你个應許。」
16 雅各睡一覺醒，講：「上主確實在這地方，𠊎樣毋知！」 17佢就著驚，又講：「這地方神聖可畏，一定係上帝个殿，通到天庭个門。」
18第二日打早，雅各䟘起來，將佢做枕頭該隻石頭頓起來做紀念碑，在石頭頂淋油獻給上帝。 19佢將該地方安到伯特利#28:19 「伯特利」意思係「上帝个殿」。。 (這個城以前喊做路斯。) 20雅各許願講：「若係上帝㧯𠊎共下，在路途中保護𠊎，賜給𠊎食个、著个， 21俾𠊎平安轉到故鄉，上主確實就係𠊎个上帝。 22這隻做紀念碑个石頭，愛成做敬拜上帝个聖所。𠊎愛將你賜給𠊎个一切獻十分之一給你。」
اکنون انتخاب شده:
創世記 28: THV12Hdb
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012