路加 14
14
耶穌醫好水腫病人
1有一個安息日，耶穌去到一個法利賽人領袖个屋下食飯；有兜人在塍頭看等佢。 2堵好，在佢面前有一個發水腫病个人。 3耶穌就問該兜法律教師㧯法利賽人講：「𠊎等个法律准人在安息日醫病麼？」
4佢等攏總恬恬毋出聲。耶穌就扶等該人，醫好佢，喊佢走。 5然後，佢對大家講：「你等當中有麼人，孻仔抑係牛在安息日跌落井肚去，毋係黏時將佢拉上來呢？」
6佢等對耶穌所問个話全部無話好應。
教人謙卑
7耶穌注意到有兜人客為自家選筵席中个大位，就用比喻對大家講： 8「你被人請去參加婚姻筵席个時，毋好坐大位，驚怕所請个人客有比你較受尊重个。 9請你兩儕个主人會行前來對你講：『拜託讓位給這個人！』該時，你會感覺盡無面子，退到壁角去坐。 10你被人請个時，愛坐細位，恁樣，主人來對你講：『朋友，請坐大位。』該時，你在人客面前就盡有體面。 11因為上帝愛將自高个人降做卑微，也愛高升甘心謙卑个人。」
愛請麼人做人客
12耶穌又對請佢个主人講：「你請人食晝抑係食夜个時，毋好請你个朋友、兄弟姊妹、親戚、抑係有錢个鄰舍，驚怕佢等後來也請你，你个人情就得到報答了。 13你愛請人客，就愛請該兜窮苦个、殘障个、跛腳个、瞙目个； 14恁樣，你就有福氣了，因為該兜人無麼介好報答你。在義人復活个時，上帝會親自報答你。」
婚姻筵席个比喻
(馬太 22:1-14)
15共桌有一個人聽到這兜話，就對耶穌講：「有好在上帝个國享受筵席个人係樣般有福氣啊！」
16耶穌對佢講：「有人大擺筵席，請盡多人客。 17會到開桌个時，佢派僕人去對所請个人客講：『請你等來，逐項準備好勢囉！』 18總係佢等開始一個一個推辭。頭一個講：『𠊎有買一坵田，無去看做毋得。請原諒，𠊎去毋得。』 19另外一個講：『𠊎有買五對牛，愛去試看仔；請原諒𠊎，失禮。』 20又有一個講：『𠊎正結婚，實在無法度去。』 21該僕人倒轉去，將這情形報告主人。這家个主人大發譴，就對僕人講：『遽遽出去，到城內个大街小巷，帶該兜窮苦个、殘障个、瞙目个、跛腳个全部來。』 22無幾久，僕人倒轉來，講：『頭家，你所吩咐个已經辦好了，總係還係有盡多空位！』 23主人就對僕人講：『你到街路㧯籬笆堘个巷肚去，勉強請人入來，坐滿𠊎个屋。 24𠊎㧯你等講，該兜先前所請个人，一個也毋使想愛食𠊎个筵席！』」
做學生个代價
(馬太 10:37-38)
25非常多个人跈等耶穌共下行。耶穌轉身對佢等講： 26「到𠊎這位來个人，若毋係敬愛𠊎贏過自家个爺𡟓，抑係贏過惜𡜵娘、子女、兄弟、姊妹、甚至自家，佢就無法度做𠊎个學生。 27毋肯擎自家个十字架來跈𠊎个人，也無法度做𠊎个學生。 28你等中間有麼人想愛起大樓，敢毋係先坐下來好好計算一下，看有完成全部工程个費用麼？ 29若毋係恁樣，驚怕地基打好，大樓卻無法度完工，看到个人全部會笑佢， 30講：『這個人開工，總係無法度完工！』 31假使有一個國王，帶一萬人个軍隊，愛去㧯另外一個帶兩萬人軍隊个國王相㓾，佢敢毋係先坐下來愐看仔，有可能打贏麼？ 32若係無可能，佢就會趕緊在敵人還盡遠个時，派使者去談和平个條件。 33共樣，你等無論麼人，若無放掉自家所有个一切，就無法度做𠊎个學生。
無用个鹽
(馬太 5:13；馬可 9:50)
34「鹽係好个，總係鹽若失掉鹹味，愛樣般使它再鹹呢？ 35委落園肚抑係摻在肥料中，攏總無合，只有㧒掉。有耳公好聽个人，就愛聽！」
اکنون انتخاب شده:
路加 14: THV12Hdb
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012