Joyn 15
15
Yesò ə gàʼ la ghə̀ diʼ to no nkàyntə̀ fèkoʼ
1Yesò be gaʼa la, “Ma diʼ nkàyntə̀ fèkoʼ fə ashɨ nkoʼ, Tìʼ ghom diʼ tì ə sɨm, 2chwaynə maʼ tətam titə a tə ko kumə ashɨ a mo wèn, tsùʼtə fo fa tətam a tyi a tə ko kumə ashɨ, ndiʼ tə tuʼ kumə. 3Ghə̀ŋ sə diʼ nə̀ laynə byìʼì əziʼi yì a mà ziʼi a ghə̀ŋ. 4Ghə̀ŋ faŋ a mò ndi mà be faŋ a ghə̀ŋ. Ando ntam ə fəkoʼ zizi ko ghə̀ lu kumə ashɨ fa ngeŋ, ghə̀ diʼ ə ndiʼ a fəkoʼ mibu ghə̀ a kumə ashɨ. Kə le diʼ to ndə̀ŋndəŋ ando ghə̀ŋ zizi ko ghə̀ŋ lu kumə ashɨ, a bwen la ghə̀ŋ fàŋ a mo wen.
5“Ma diʼ fəkòʼ, ghə̀ŋ diʼ tətam. Wìʼ sətsen faŋ a mo wen, ma be a faŋ a wen, ghə̀ a kumə ashɨ, to kədə̀ŋ. A bwèn fa mo, ghə̀ŋ zizi ko ghə̀ŋ lu nè kənyʉ̀. 6A tyen no ndò la ghə̀ ko a faŋə a mo wen, və a təmə wen ə maʼa, to nə̀ ətam yi a və nə̀ chwaynə mòʼ, ghə̀ zɨm. Və nè bwensə boŋtə tətam a tentə ə nyuʼ azhiʼ. 7Ghə̀ŋ sətsen faŋ a mo wen, əziʼi ə ghomə a faŋ a ghə̀ŋ kətʉ, ghə̀ŋ bèm no tèbe ghò a ghə̀ŋ kòŋ fa Tìʼ ghom, ghə̀ a ku a ghə̀ŋ. 8A ndiʼ a azhʉ̀ a ghə̀ŋ kumə ashɨ to kədə̀ŋ, diʼi la ghə̀ŋ diʼ ndzɨ̀mtə̀sə bàm ə mo, no mbyi ə tsèm yen kədyòʼ kə Tìʼ ghom. 9Ma kòŋ ghə̀ŋ ndə̀ŋndəŋ ando Tìʼ ghom əkòŋ mò. Ghə̀ŋ faŋ a mò kòŋ. 10Ghə̀ŋ ghʉ̀ təsoʼ ə tyomtə, ghə̀ŋ faŋ a mo kòŋ ndə̀ŋndəŋ ando mà fàŋ a kòŋ Tìʼ ghom byìʼàndo ma ghʉ̀ təsoʼ tə wen.
11“Mà shə̀ʼtə̀ nyʉ̀ venə a ghə̀ŋ ndi ghə̀ŋ kɨ saŋlə yì a ma kiʼi, a diʼ saŋlə mu ghə̀ lwin li kwʉ̀ʼ. 12Kènkə diʼ əsoʼ ə ghomə la, ghə̀ŋ kòŋ təwen ə təŋtə to ando mà kòŋ ghə̀ŋ. 13Wìʼ zizi ko ghə̀ lu be diʼi kòŋ, ghə̀ chò ando wìʼ ə kòŋ ndoŋsə wen ə pfʉ a vəwenə. 14Ghə̀ŋ nè to ando əsoʼ ə ghomə əgàʼa, ghə̀ŋ ne ndiʼ doŋ shomsə. 15Mà ko be toŋtə tebè ghə̀ŋ luwen la viʼi ə shyèʼ byìʼàndo wu ə shwèʼ ko nə̀ kɨ kənyʉ̀ kì a tì shyèʼ wen nə̀ nè. Ma toŋtə ghə̀ŋ luwen la doŋ shomsə byìʼàndo mà shə̀ʼtə li nyʉ̀ vyi a mà zhʉ fa Tìʼ ghom a ghə̀ŋ no ətsèm. 16A ko tə tsuʼ ghə̀ŋ tsuʼ mo. A tə lù mò tsuʼ ghə̀ŋ ə tɨm la ghə̀ŋ dyʉ̀ ə kumə ashɨ, a diʼ a yi a ghə̀ zizi ghə̀ tsi faŋ. Ghə̀ŋ nè ali, Tìʼ ghom a ku no tèbe ghò yi a ghə̀ŋ bèmə fa wen chò fa mo azhiʼ. 17Kènkə diʼ əsoʼ ə ghomə la, ghə̀ŋ kòŋ təwen ə təŋtə.
Yesò ə shə̀ʼtə̀ la viʼi ə ne baynə ndzɨ̀mtə̀sə wen
18“Viʼi mbyi ne bayn ghə̀ŋ, ghə̀ŋ kwoʼtə ando və tə ə baynə mò fa ambì. 19Ghə̀ŋ tə ndiʼ viʼi mbyi mu vəwenə kòŋ ghə̀ŋ to nə̀ viʼi vəwenə. Luwen ə diʼ mù ma tə ə tsùʼtə shisə ghə̀ŋ fa mbyi, ghə̀ŋ ko diʼ viʼi mbyi. A le kənyʉ̀ ki a viʼi mbyi bàynə̀ ghə̀ŋ tsu. 20Kə ghə̀ŋ lyesə kənyʉ̀ ki a mà tə ziʼi a ghə̀ŋ la, ‘wù ə shwèʼ ko tɨmə chò tìʼ shyèʼ wen.’ Vəwenə sətsen ə ndi mu vəwenə ə ntsuʼ li kəghʉ ə kòmkə, vəwenə be a ntsuʼ kənkə to ndə̀ŋndəŋ. Vəwenə sətsen ə ndiʼ mu vəwenə ə zhʉtə əziʼi ə ghomə, vəwenə be a zhʉtə əziʼi ghəŋə to alì. 21Və a nè nyʉ̀ venə a ghə̀ŋ alə̀ no ətsèm, byìʼì mò byìʼàndo vəwenə ko kɨ wìʼ yì a ghə̀ tɨmə mo. 22Ma tə faŋ ke vì ə gàʼ a vəwenə kumə mbyɨsə vəwenə mu kə ko diʼi tebè la vəwenə nè li mbyɨ ando kə diʼi luwen. Vəwenə ko kiʼi kənyʉ̀ kə tsen kə luwen ə gàʼ kumə mbyɨsə vəwenə. 23A bayn no ndò bayn mo, kə diʼi la ghə̀ bàynə̀ Tìʼ ghom. 24A tə ndiʼ la mà ko ə nè nyʉ̀ a vəwenə a ghə̀ŋ ntìntìn, ko andiʼ la wìʼ ə tɨmə nè, mu kə diʼi la vəwenə nè li mbyɨ ando kə diʼi luwen. Luwen ə sə diʼ mù vəwenə yen li nyʉ̀ ə kaynə və venə ali be bàynə̀ mò to bàynə̀ boʼsə nə̀ Tìʼ ghom. 25Nò tèbe ali, kə tə ə diʼ ə fʉ to ji na ghèn ndiʼ kənyʉ̀ ki a və nyoʼo a vəwenə a soʼ la, ‘Ghə̀ŋ tə ə bàynə̀ mò to kədyàŋ,’ kwʉʼ.
26“Ngyàmtə̀ ne vì, a mà tɨmə ə gaʼa nəmwèʼè kumə mò. Ghə̀ na lu fa ben Tìʼ, a diʼ Kəzhwì kə wen kì a kə gàʼà to nəmwèʼè. 27Ghə̀ŋ be na ngàʼà to nəmwèʼè a viʼi kumə mò byìʼàndo ghə̀ŋ tə ə ndiʼ vəghəŋ amuʼ, fa kənzìtə.
انتخاب شده:
Joyn 15: bbkDBLnt
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید