Piligu 3
3
Ninsal’ zaɣisi Naawuni noli
1 #
Kah 12.9; 20.2 Wahu daa nyɛla yɛmbimbiɛrilana n-gari Yawɛ ŋun nyɛ Naawuni ŋɔ ni daa nam mɔɣu ni biŋkɔb’ shɛb’ zaa. Ka wahu daa ti bɔhi paɣ’ maa, “Naawuni yɛliya ni yi miri ka yi di puu ŋɔ ni ti’ shɛli wala?”
2Ka paɣ’ maa yɛli wahu maa, “Ti ni tooi di ti’ shɛŋa din be puu ŋɔ ni wala; 3amaa Naawuni yɛl’ ti, ‘Miriya ka yi di ti’ shɛli din be puu ŋɔ sunsuuni ŋɔ wala bee n-shihi li gba, yi yi niŋ lala, yi ni kpi.’ ”
4Amaa ka wahu maa yɛli paɣ’ maa, “Yi ku kpi. 5Dama Naawuni mi ni yi yi di li, yi nini ni neei, ka yi be kaman ŋun’ Naawuni, ka mi zaɣ’ suŋ ni zaɣ’ biɛɣu.”
6Dinzuɣu paɣ’ maa ni daa nya ka tia maa wala lihibu mali kɔre, ka viɛl’ ni dibu, ka lan nyɛ ti’ shɛli din ni ti nir’ baŋsim maa, ka o pɔhigi li di, ka zaŋ di shɛli ti ti o yidana, ka o gba di. 7Di saha maa ka bɛ niriba ayi maa zaa nini daa shiri neei, ka bɛ nya ka bɛ bela bɛ zaɣim, ka bɛ daa ŋahi fiig tia vari she n-zaŋ so.
8Ka Yawɛ ŋun nyɛ Naawuni ŋɔ daa ti be puu maa ni zaawun’ mahili saha n-chani ginda, ka doo maa min’ o paɣ’ maa wum o damli, ka zo nti sɔɣi puu maa ni tihi ni ni Yawɛ ŋun nyɛ Naawuni ŋɔ di nya ba. 9Amaa ka Yawɛ ŋun nyɛ Naawuni ŋɔ daa boli doo maa m-bɔh’ o, “Ya polo ka a lee be?”
10Ka o garigi yɛli, “N wumla a damli puu ŋɔ ni ka dabiɛm gbaai ma, dama m bela n zaɣim, dina n-chɛ ka n sɔɣi maa.” 11Ka Naawuni bɔh’ o, “Ŋuni n-lee yɛl’ a ni a bela a zaɣim? A dila ti’ shɛli n ni yɛl’ a ni a miri ka a di la?”
12Ka doo maa yɛli, “A ni zaŋ paɣ’ so ti ma ni o be n san’ la, ŋuna n-zaŋ tia maa walli maa ti ma ka n di.”
13 #
2 Kɔr 11.3; 1 Tim 2.14 Ka Yawɛ ŋun nyɛ Naawuni ŋɔ bɔhi paɣ’ maa, “Bɔ n-niŋ ka a niŋ lala?”
Ka paɣ’ maa yɛli, “Wahu n-yɔhim ma ka n di li.”
Naawuni darigi alahichinim’ tibili
14Ka Yawɛ ŋun nyɛ Naawuni ŋɔ daa yɛli wahu, “A ni niŋ shɛm ŋɔ zuɣu, n ni yɛli noli ti a n-gari yiŋ’ biŋkɔbiri mini mɔɣu ni biŋkɔbiri zaa; a ni nyɛritila a puli zuɣu, ka diri taŋkpaɣu hal ni a nyɛvil’ tariga. 15#Kah 12.17 Ka n ni zaŋ dimdi niŋ a mini paɣ’ sunsuuni ni a zuliya min’ o zuliya sunsuuni, ka paɣ’ zuliya maa ni ti ŋme m-bɔr’ a zuɣu, ka a mi zuliya ti dim o zuliya napɔŋkpaa.”
16Ka Naawuni daa yɛli paɣ’ maa, “N ni chɛ ka a nya biɛrim pam bihi dɔɣibu ni; a shiri ni nya biɛrim bihi dɔɣibu ni; amaa di zaa yoli, a kɔre kul ni be a yidan’ ni, ka o ni su a.”
17 #
Hib 6.8
Ka Naawuni daa ŋmaligi yɛli Adam mi, “A ni deeg’ a paɣ’ noli, ka di ti’ shɛli n ni yɛl’ a ni a miri ka a di la zuɣu, n yɛli noli niŋ tiŋgban’ ni a zuɣu; a yɛn tumdila tuun’ kpɛma di ni n-nyari bindirigu diri hal ni a nyɛvil’ tariga. 18Ka gɔhi mini tutu’ shɛŋa din mali gɔhi ni bili tiŋgban’ ni a zuɣu; ka a ni diri tiŋgban’ ni tihi wala. 19A ni tum tuun’ kpɛma ka woligu yiri a ni ka a nyari bindirigu diri hal ti lab’ tiŋgbani maa ni, dama di ni ka a daa yina. Taŋkpaɣu n-nyɛ a, ka a ni ti lan lab’ taŋkpaɣu maa ni yaha.”
20Adam#3.20 ADAM: Hiburuli ni Adam gbinni nyɛla daadam bee ninsalinima. daa bol’ o paɣ’ maa yul’ la Awa, dama ŋuna n-daa nyɛ ninsalinim’ zaa ma. 21Ka Yawɛ ŋun nyɛ Naawuni ŋɔ daa zaŋ biŋkɔbiri gbana n-she n-ti Adam min’ o paɣ’ maa ka bɛ so.
Naawuni yihi Adam mini Awa Idɛn puu ni
22 #
Kah 22.14
Ka Yawɛ ŋun nyɛ Naawuni ŋɔ daa yɛli, “Nyama, pumpɔŋɔ ninsal’ bemi kaman ti ni be shɛm, ka mi zaɣ’ suŋ ni zaɣ’ biɛɣu, ka di pa shɛli ka o ti pɔhigi nyɛvili tia la walli di m-be hal ni saha din ka bahigu.” 23Dinzuɣu ka Yawɛ ŋun nyɛ Naawuni ŋɔ daa kar’ o yihi Idɛn puu maa ni ni o ti kɔr’ o ni daa yi tiŋgban’ shɛli ni na maa. 24O ni daa kari ninsal’ yihi Idɛn puu maa ni maa, o daa zaŋla chɛrubinim’ mini takɔbi din nyɛ buɣim niɛm ka ŋmaligiri luɣilikam zali Idɛn puu maa wulimpuhili polo ni bɛ gu so’ shɛli din chani ti’ shɛli din tiri nyɛvil’ maa gbini.
اکنون انتخاب شده:
Piligu 3: DBwDB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Dagbani Bible with Deuterocanonical Books © Bible Society of Ghana, 2011.