Yʉanes 6
6
Yesʉs lé edwe bʉr otɔɔyin otɛn mode
(Mataos 14.13; Markus 6.30; Lʉkas 9.10)
1Jɔʼ ze laa ba, Yesʉs ze ntaa maŋ mo Galɨle, to é l'ebʉm e maŋ e nkɔm-nkɛɛ. (Bé ejebe maŋ maa nteme ó, maŋ mo Tiberias.) 2Buobuo bʉr, bé a be ó lé edu nye, ebe, bé a be ó lé ebee bɨdweʼle bɨ nkul we nye a sa-sa lé etiʼ mɨsyoblʉ ɨ. 3Yesʉs ze to bere é l'ecwɨʼ, bé e l'ompʉn be, ze diŋɔ si. 4Paska, ebʉʼ le oYʉden, yé a be ó, yé mu kunokuno le epyal. 5Ngbaa le eka be nɛʼɛ, Yesʉs, nyi syɛm mih, bee ó mpampaʼ bʉr lé eze boo nye. Nye ze dî e Filip ó: «Bɨna bé óbwam ga mode mo edwe bʉr baʼ bɨbɛh nko?» 6(Nye a dî no ó, lé eboblo Filip, ebe, nye a be ó si bɛa gʉa sa nye muno ze sa ɛ.)
7Filip, nye e nye ó: «Zê go agʉa ó, mode mé ójala e bim bʉr yiʼ ɨ, mé etwe mɨsaŋ mɨ odenie mɨnter mɨmba ɛ?»
8Nuu mpʉn we, die Andreas, ncyom mo Simɔn Pyɛr, nye e nye ó: 9«Nuu mancyom, nye ó wâʼ e bɨbler bɨ orge bɨtɛn e l'ofu oba. Bim yaa, yé ógul yé é bim bʉr ba?»
10Yesʉs, nye e be ó: «Dilɨ ga bʉr bɨbɛh si.» Yé a be ó e bwaʼbwaʼ jahla, e bwa bɨka é lyoʼ-lyoʼ, ajaa kʉ. Ebe no ó bɨbɛh, bé a di si ɨ. É bʉr baa, bʉrʉm, bé a be ó kwoʼ be otɔɔyin otɛn. 11Yesʉs ze nʉa bɨbler byaa. É jɔʼ nye a be si dwe Zyɛm ekiba é lɔb bɨbler byaa ɛ, nye ntɔʼ ze kab bʉr bɨbɛh bé a be ondindil ɨ. Nye ze dwe be nteme ofu, bim yiyɛh bé a gwɨm de e. 12É jɔʼ bɨbɛh, bé a be si de é de de, díle e, Yesʉs, nye e l'ompʉn be ó: «Syɛŋɨ ga mompubuʼo mode ndɨ si kur si ɨ, é mbi ndɨ ó, sɔʼɔ, yé l'ayi dwè ntuʼ ɨ.» 13Ebe no ó bé a syɛŋ bɨpeh bɨbler byé a buʼo é bɨbler bɨ orge bɨtɛn ɨ. Bibyɛh ze loŋlo bɨkar ewʉm e bɨba!
14Ebe no, é jɔʼ bʉr, bé a bee dweʼle nkul Yesʉs a sa ɛ, bé ntɔʼ lɛɔ ó: «E! Mʉr nwa, nye ó bana kʉ be ngwiha mɨlɔb cyecye, waa a jala le eze kaʼ é si nwaʼ ɛ!» 15Yesʉs ntɔʼ gʉa ó, bé a be ó lé egwɨm ze mɛr nye, lé eto cyelɔ nye njwɨɨbʉr lal wɔɔ. Nye ze bâʼle dulo nyʉl we, to é l'ecwɨʼ nye ome.
Yesʉs lé ekœʼ é modibe kʉ
(Mataos 14.22; Markus 6.45)
16É jɔʼ bii kʉʼ, yé a pyal ɨ, ompʉn be, ze to nkpah maŋ. 17Bé ze kable é byɛl. Bé mu lé entaa maŋ, lé etoŋɔ nkana Kapernaʉm, é l'ebʉm e maŋ e nkɔm-nkɛɛ nɛʼɛ, edurʉ, lé ze mara be, bé dina teme maŋ! Tina, yé ó, Yesʉs a be ó, nye l'apa kœb be. 18Bé ka bee nɛʼɛ, oboʼo o maŋ mu lé emuna, ebe, pubo, wé a be ó lé ekʉ kuulo e nkul. 19Bé a be ó, bé osi duʼo, kwoʼ be okilmɨra otɛn, bé ka bee ó, Yesʉs lé eze kunokuno e byɛl, nyɛɛ lé ekœʼ é modibe kʉ! Bé ntɔʼ joʼo bʉa. 20Nye e be ó: «Yé ó me! Ajoʼo ga bʉa.» 21Ebe no ó bé a mɛʼle lé ekɛl nye é byɛl ɨ. Le nye a kʉ bere ɨ byɛl, le byɛl mu bɛa be syela é pɨn, bé mu é l'ebʉm bé a be lé eto e!
Yesʉs, nye ó mode mo tiʼ
22É mɛn tɨ, ntuntuma bʉr yé a liʼ é l'ebʉm e maŋ e nkɔm-nkɛɛ ɛ, bɨ ze bee ó, yé a be ó, njɨ byɛl ngwar é l'ebʉm, waa ompʉn mo Yesʉs, bé a to tɨʼ ɨ. Bé a be lé egʉa nteme ó, Yesʉs a baakable é byɛl waa; ompʉn be, bé a kable tɨʼ ó, bé ome. 23Mʉʉ mɛl ntɔʼ pyal, duho nkana Tiberias. Mɨ ze pyal kunokuno e gumo bé a de bler pie jɔʼ Da Yesʉs a dwe Zyɛm ekiba ɛ. 24É jɔʼ ntuntuma bʉr, yé a bee ó, taare é Yesʉs, to pyal é l'ompʉn bɨbɛh, bé aka be tɨʼ ɨ, bé ze kable é mɛl maa, ze toŋɔ Kapernaʉm, to le esaŋɔ nye gʉ, 25ze kœbɔ Yesʉs é l'ebʉm e maŋ laa. Bé e nye ó: «Yeʼle, go ka ze kaʼ é yáa jɔʼ?»
26Nye ze bɨha e be ó: «Me elɛɛ bɨn cyecye ó nɛɛ: bɨn bé esaa me ó, ebe, bɨn bé a si de bler, díle. Bɨn bé asaa me ebe bɨdweʼle bɨ nkul wam bɨn bé a bee e. 27Asea ga ebe mode lé elɨra ɛ. Sea ga ebe maa lé edi njʉmdia e njʉmdia ɛ. Mɛɛ, mé ó maa Mwan mo Mʉr ódwe bɨn ɨ, ebe, nye ó waa Zyɛm Sɔŋ a gba ejwɨʼ le e.»
28Bé ze dî e nye ó: «A bɨh saʼ nyá, ó bɨh loŋla mɨmpaŋ bɨsyɛɛla Zyɛm lé egwɨm ɨ?»
29Yesʉs, nye e be ó: «Mpaŋ syɛɛla Zyɛm lé egwɨm e bɨn ɨ, yé ó, bɨn jyɛʼɛ taa buʼo yin boo mʉr nye a ntɨh bɨn ɨ.»
30Bé e nye ó: «Yé be no nɛʼɛ, yáa dweʼle nkul go ndɨ si pa lɛʼle bɨh, ó bɨh beŋɨ, bɨh nkʉʼ jyɛʼ taa buʼo yih boo go ɛ? Yé go ndɨ si pa sa ɛ? 31Bɨmpam ga bina, byé a si de manne é feha si. Yé ó tila é Kalara Zyɛm ó: “Nye a si dwe be mode, bler yé a duho é jobo kʉ ɨ.”»
32Yesʉs, nye e be ó: «Me elɛɛ bɨn cyecye ó nɛɛ: ntʉʼ Moyiz a dwe bɨn mpaŋ mode mé a duho é jobo kʉ ɨ. Sɔŋ wam ó lé entɨh mpaŋ mode lé eduho é jobo kʉ ɨ, 33ebe, mode Zyɛm lé entɨh ɨ, mé ó mʉr a duho é jobo kʉ, ze é si nwaʼ ɛ. Nye ó mʉr lé etiʼ bʉr bɨbɛh ɛ.»
34Bé e nye ó: «Da, yé be no nɛʼɛ, dɨʼe dwe bɨh mode maa molu mɨmɛh!»
35Yesʉs, nye e be ó: «Me ó ndɨ mode lé etiʼ bʉr ɨ. Mʉr nyiwɛh lé eze boo me e, nye abe e nkul eka joʼo za. Mʉr nyiwɛh lé ejyɛʼ taa buʼo ye boo me e, nye abe e nkul eka joʼo dweh modibe. 36Me a si lɛɛ e bɨn ó, bɨn bɨ bee me. Bɨn bɛɛ bé ajyɛʼ taa buʼo yin boo me. 37Mʉr nyiwɛh Sɔŋ wam lé elomlo me e, nye óze boo me. Ndwe nteme, me abe e nkul ekubra waa nyiwɛh lé eze boo me e. 38Me a baaduho é jobo kʉ, lé eze sa gwɨma yam, njɨ gwɨma mo mʉr a ntɨh me e. 39To kœb ó, mʉr a ntɨh me e, nye egwɨm ó, me l'ayi dimle mʉr ngwar é sama bʉr nye a ntɨh me e. Nye egwɨm ó, me pɛ̀hɛ be é mofoo é moho epihe, ntible-bɨkaŋa, 40ebe, Sɔŋ wam, nye egwɨm ó, bʉr bɨbɛh bé óbee Mwan mo Zyɛm, jyɛʼ taa buʼo yɔɔ boo nye e, bé biʼe tiʼ molu mo mpoʼ mɨmɛh. Mɛm, me ópɛ̀h be é mofoo é moho epihe, ntible-bɨkaŋa.»
41OYʉden ze taare lé etʉʼra é lʉ mo Yesʉs, ebe, nye a lɛɛ ó, nye ó ndɨ mode, maa mé a duho é jobo kʉ ɨ. 42Bé ntɔʼ dîila ó: «Ntʉʼ Yesʉs, mwan mo Yoseb nwaʼ ɛ? Bɨna bé ekʉ gʉa ga sɔŋ we bé e nyɔŋ we. Wáa mbi nye lé elɛɛ e bɨna ga bananaʼ ó, nye a duho ó kʉ ɨ?»
43Yesʉs ze bɨha e be ó: «Daʼ to le etʉʼra ga paʼra win. 44ǃƗ Sɔŋ wam, mʉr a lomo me e, si bene lé edulo mʉr nɛʼɛ, mʉr waa l'aze boo me. To kœb ó, waa ódulɔ ɛ, me ópɛ̀h nye é foo é moho epihe, ntible-bɨkaŋa. 45Ogwiha o mɨlɔb, bé a tile é Kalara Zyɛm ó: “Zyɛm ó ngo yeʼle bɨbɛh.” Me elɛɛ ó, mʉr nyiwɛh ójoʼo Zyɛm Sɔŋ, le ejwɨʼ sikʉlʉ nye lé edwe e, nye óze boo me. 46Yé alɛʼle ó, nuu mʉr a be ó si bee Zyɛm Sɔŋ. Njɨ waa ndɨ waa mo Zyɛm ɨ, ó b'a bee Zyɛm Sɔŋ. 47Me elɛɛ bɨn cyecye ó nɛɛ: mʉr lé ejyɛʼ taa buʼo ye boo me e, nyi bi tiʼ molu mo mpoʼ mɨmɛh. 48Mɛm ó ndɨ mode mo tiʼ! 49Bɨmpam bin, bʉr o b'a de manne é feha si ɨ, bɨbɛh, bé a si sie lé edwè é feha si waa tʉŋlʉ. 50Sa gwar, mode lé eduho é jobo kʉ ɨ, mɛɛ, mé ó mbi monyɔmlʉ ndɨ: ǃɨ mʉr si de me nɛʼɛ, nye ákwoʼ ka dwè. 51Me ó ndɨ kublakubla mode, maa mé a duho é jobo kʉ, ze kaʼ é si nwaʼ ɛ. ǃƗ mʉr si de mode maa nɛʼɛ, gʉŋa ó, nyi bi tiʼ molu mo mpoʼ mɨmɛh. Mode me ódwe nye e, mé ó bɨpuno byam! Me edwe bʉr bɨbɛh bya ó, é l'efu ó, bé biʼe tiʼ molu mo mpoʼ mɨmɛh.»
52É jɔʼ oYʉden bé a joʼo no e, kʉ ze taarɔ lé etʉʼra paʼra wɔɔ. Bé ó: «Mʉr nwa, nye e nkul edwe bɨna ga bɨpuno bye ó, bɨna deʼ ga bye nyá ɛ?»
53Yesʉs, nye e be ó: «Me elɛɛ bɨn cyecye ó nɛɛ: ǃɨ mʉr baade bɨpuno bɨ Mwan mo Mʉr le ebɛble motié me nɛʼɛ, gʉŋa ó, nyiha mʉr, nyi fib tiʼ molu mo mpoʼ mɨmɛh. 54Mʉr nyiwɛh lé ede bɨpuno byam le ebɛble motié mam ɨ, nye ó ndɨ ebi tiʼ molu mo mpoʼ mɨmɛh. Me ópɛ̀h nye é foo é moho epihe, ntible-bɨkaŋa, 55ebe, bɨpuno byam, byé ó mpaŋ nyɔmlʉ; motié mam, mé ó mpaŋ monyʉla. 56Mʉr nyiwɛh lé ede bɨpuno byam le ebɛble motié mam ɨ, nye etiʼe ó, é zyɛŋa wina boo nɔɔ. Me ódɨ kœʼ e nye. 57Sɔŋ wam, mʉr a ntɨh me e, nye ó ndɨ kublakubla. Me etiʼe ó ebe nye. Jwɨʼ gwar yaa, mʉr nyiwɛh lé ede me e, nye ó ndɨ ebi tiʼ molu mo mpoʼ mɨmɛh é zi wam. 58Mode ma, mé ó mode mé a duho é jobo kʉ ɨ. Mé anwɨɨla e maa bɨmpam bin, byé a de, bibyɛh sie lé edwè e. Mʉr nyiwɛh óde mode maʼ ɛ, nyi bi tiʼ molu mo mpoʼ mɨmɛh.» 59Yesʉs a dwe be sikʉlʉ é lɔb nɨ ó, é mpah mɨnjwɨʼla tʉŋlʉ, waa nkana Kapernaʉm.
60É jɔʼ ompʉn be, bé a joʼo sikʉlʉ Yesʉs a dwe be e, buobuo ompʉn be, bé ze lɛɛla paʼra wɔɔ ó: «É ka bul kɔbla yɛɛ sikʉlʉ yiʼ lé ejoʼo. Zé nyɛɛ ndɨ e nkul ejoʼo ye ɛ?»
61Mpʉ Yesʉs a gʉa ó, ompʉn be, bé a be ó lé eto le etʉʼra paʼra wɔɔ é lʉ we e, nye ze dî e be ó: «Zê sikʉlʉ me dwe bɨn nɨ, yé ó bɨn ebɔʼ é mɨleme? 62A yé óka sa bɨn nyá é jɔʼ bɨn bé óbee Mwan mo Mʉr lé ebula, fiʼ, to nko nye a taare be e#6.62 É mbea mo Yesʉs, jɔʼ bé óbee nye lé efiʼ, to é jobo kʉ ɨ, sa yaa, yé e nkul esa ó, bé bâʼle kʉ lɨŋa, jyɛl ɨ diʼ.? 63Mbɨambɨa Sisim ó ndɨ edwe bʉr tiʼ molu mo mpoʼ mɨmɛh. Mʉr ákwoʼ dira nyɔm e bɨsyɛɛla bɨ nyʉl bɨpuno. Bɨlwib me lé elwib e bɨn bi, byé eduho ó boo Mbɨambɨa Sisim. Byé nteme, byé ó lé edwe bɨn tiʼ molu mo mpoʼ mɨmɛh. 64Sa gwar, bʉʉ bʉr o sama yin, bé ajyɛʼ taa buʼo yɔɔ boo me.» (Yesʉs a lɛɛ no ó, ebe, nye a be ó lé ebɛa gʉa, duho é l'etɔɔrʉ, baa b'a baajyɛʼ taa buʼo yɔɔ boo nye e, ndwe e waa a be ó, nye ókɛha nye e.) 65Nye ntɔʼ bâʼle lɛɛ e be ó: «Ebe no, me elɛɛ e bɨn ó nɛɛ: mʉr, nye abe e nkul eze boo me, nyɛɛ l'apa bi nkul boo Sɔŋ wam.»
66Dobo laa ó buobuo ompʉn be, bé a taare lé ebula é gœʼra-gœʼra e mocyɛʼ mo nyʉl, aka duŋɔ nye e. 67Yesʉs ze dî e l'Esama le ompʉn ewʉm e l'oba ó: «Zê bɨn bɛɛ nteme muno ze bula pihe ɛ?» 68Simɔn Pyɛr, nye e nye ó: «Da, bɨh bé óka to boo zé fih? Go ó ndɨ e motɨɨ lé edwe bɨh tiʼ molu mo mpoʼ mɨmɛh ɛ. 69Banana, bɨh bɨ buʼla le egʉa é kpɛhla ó, go ó ndɨ Mʉr mo Zyɛm ndɨ ti ɨ!» 70Yesʉs, nye e be ó: «Ntʉʼ mɛm mʉr tɨʼ a pɛh bɨn, Esama le ompʉn ewʉm e l'oba ɛ? Dam be no, nuu mʉr é l'esama lɨn, nye ó waa mo Njwɨɨ moleme!» 71Nye a lwib no ó, tiibe e Yʉdas, mwan mo Simɔn Iskariot. Dam be mpʉ Yʉdas a be é l'Esama le ompʉn ewʉm e l'oba ɛ, nye ó b'a be nteme mʉr a be ó, nye ókɛha nye e.
اکنون انتخاب شده:
Yʉanes 6: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.