ᒐᓂᓯᔅ 18
18
ᑲ ᓂᔅᑎᒡ ᒪᓐᑕᐅᒡ
Genesis 18.1-15 (Proper-6 Year A)
Genesis 18.1-10a (Proper-11 Year C)
1ᑎᐸᔨᒋᒐᓱᐤ ᒥᓐ ᒋ ᓄᑯᓯᔅᑐᐛᐤ ᐊᑉᕋᐊᒪ ᐊᓐᑕ ᒪᒻᕋ ᒥᒋᒪ ᒥᔅᑯᐛᐤ ᒥᔅᑎᒂ ᐊ ᑕᔨᒋ᙮ ᒋᐱᔎᒡ ᒋ ᐊᐳᐤ ᐅᐱᒍᐎᔭᓂᒋᐛᐱᒡ ᒪᒂᒡ ᐊ ᒋᓯᑕᔨᒡ᙮ 2ᐊᑉᕋᐊᒻ ᒋ ᐅᐸᐳᐤ ᑭᔭ ᒋ ᐛᐱᒪᐤ ᓂᔅᑐ ᐊᓐᒋᓇ ᒥᒋᒪ ᑲ ᓂᐳᔨᒋ᙮ ᐃᔅᐱ ᐎᔭᐱᒪᑦ, ᒋ ᓂᑭᑎᒻ ᐅᐱᒍᐎᔭᓂᒋᐛᑉ ᑭᔭ ᒂ ᒋᒋᓇᑦ ᒐᒋ ᓂᒋᔅᑯᐛᑦ᙮ ᒂ ᓂᐱᔅᑯᐱᔅᑐᐛᑦ ᐊ ᒋᔅᑕᔨᒪᑦ᙮
3ᒂ ᐃᑕᑦ ᐊᓂᔭ ᐸᐃᒄ, “ᓂᑎᐸᔨᒋᒐᓯᒻ, ᐊᑕᔨᒧᐅᓇ ᐊ ᒋᔅᑕᔨᑕᑯᓯᔭᓐ, ᐊᑲ ᓴᐳᑐᐛᔅᑯᐤ ᒋᑦ ᐊᐱᒋᐊᑭᓐ᙮ 4ᓂᑭ ᓂᑐᐛᔨᑕᓐ ᓂᐱᔾ ᒐ ᐸᑥᑯᐅᔭᒄ ᒐᒋ ᒋᔅᑕᐸᐅᑕᔭᒄ ᒋᓯᑐᐛᐛ, ᐊᐱᒄ ᑭᔭ ᐊ ᐊᔅᑕᔭᔅᑯᐃᑎᓱᒄ ᐊ ᐊᒋᑲᔅᑕᓯᒧᔭᒄ ᐅᑕ ᒥᔅᑎᑯᒡ᙮ 5ᓂᑭ ᐸᑕᓐ ᒥᒋᒻ ᒐ ᒥᒋᔭᒄ ᒐᒋ ᓴᐱᓯᔅᑲᑯᔭᒄ, ᐊᑯ ᐸᑐᔅ ᒐ ᒪᒋᔭᒄ᙮ ᓂ ᒥᔽᔨᑕᓐ ᒐᒋ ᐃᑐᑕᑎᑯ ᐊᓄᒡ ᐱᔭᑐᑕᔭᒄ ᐅᑕ ᓂᒋᒡ᙮” ᒂ ᓂᔎᐅᓯᐃᑯᑦ ᐊ ᐃᑎᑯᑦ, “ᐊᑯᓐ ᒧᔭᒻ, ᑐᑕ ᐊ ᐃᔅᒋᔄᔨᓐ᙮”
6ᐊᑉᕋᐊᒻ ᒋ ᑭᒐᐃᐱᔪᐤ ᑲ ᐃᑐᑕᑦ ᐅᐱᒍᐎᔭᓂᒋᐛᐱᒡ ᑭᔭ ᒋ ᐃᑕᐤ ᓴᕋᔨᒋ, “ᒋᐱᔾ, ᐅᑎᓂᒡ ᐱᔅᒐ ᐊ ᒥᔪᓯᒡ ᔪᔎᐛᓂᒡ ᑭᔭ ᒐ ᐱᒥᓄᐛᔨᓐ ᐸᒂᓯᑭᓐ᙮”
7ᐊᑯ ᐊᑉᕋᐊᒻ ᒂ ᐃᔅᐸᑕᑦ ᐊᓐᑕ ᒥᒋᑎᒂ ᐊ ᑕᔨᒋ, ᒋ ᐅᑎᓇᐤ ᐸᐃᒄ ᐊ ᐎᔪᐎᔨᒋ ᒥᒋᑎᐧᑯᓴ ᑭᔭ ᒋ ᒥᔭᐤ ᐅᑦ ᐊᐱᒋᐊᑭᓇ ᒐᒋ ᓂᐸᐃᔨᒋ ᑭᔭ ᐱᒥᓄᐛᔨᒋ᙮ 8ᒋ ᐸᑐᑐᐛᐤ ᒋᒋᓇᐳᔭ, ᑲ ᒥᔅᑯᐛᔨᒡ ᑭᔭ ᐎᔭᓯᔪᐤ, ᒂ ᒥᔭᑦ ᐊᓂᔭ ᐊ ᓂᔅᑎᔨᒋ ᐊᓐᒋᓇ᙮ ᒪᒂᒡ ᑲ ᒥᒋᓱᔨᒋ, ᐊᑉᕋᐊᒻ ᒥᒋᒪ ᓯᐸᔭᒋᔅᑎᑯᒡ ᒋ ᐅᒋᑲᐳᔅᑐᐛᐤ᙮
9ᐊᑯ ᑲ ᑯᒂᒋᒥᑯᑦ, “ᑕᓐᑕ ᐊ ᑕᑦ ᒋᐅ ᓴᕋ ?”
ᐊᑉᕋᐊᒻ ᒋ ᐎᑎᒧᐛᐤ, “ᐊᓐᑕ ᐱᒍᐎᔭᓂᒋᐛᐱᒡ ᑕᐤ᙮”
10ᑎᐸᔨᒋᒐᓱᐤ ᒂ ᐃᑕᑦ ᐊᑉᕋᐊᒪ, “ᒋ ᐸᐃᑯᔅᑕᐤ ᑕᑐᐤ ᐱᓯᒺᔭᒐ, ᑲᐤ ᐅᑕ ᓂᑭ ᑎᑯᓯᓐ ᑭᔭ ᓴᕋ ᒋᑭ ᐅᑯᓱᐤ᙮”
ᓴᕋ ᐅᑕᒡ ᒋ ᐅᒋᑲᐳᔅᑐᐛᐤ, ᒋᐱᔎᒡ ᐅᒡ ᐅᐱᒍᐎᔭᓂᒋᐛᐳᐛᒡ ᐛᒋ ᓂᑐᑐᐛᑦ᙮ 11ᑕᐱᔅᑯᓐ ᐊᑉᕋᐊᒻ ᑭᔭ ᓴᕋ ᓴᔅ ᒋ ᒋᓴᐃᔪᐎᒡ᙮ ᓴᕋ ᓇᒪ ᐅᒋ ᐅᑦ ᐊᐛᓯᒧᐤ ᐊ ᒋᓴᐃᔎᐅᑦ᙮ 12ᐊᑯ ᓴᕋ ᒂ ᐸᐱᑦ ᐊ ᐃᑕᔨᑕᐧᒃ, “ᑕᐱᔅᑯᓐ ᐊᑉᕋᐊᒻ ᑭᔭ ᓂᔾ ᓂ ᒋᓴᐃᔪᐅᓇᓐ᙮ ᓴᔅ ᐎᒪᐱᔪᐤ ᒐᒋ ᑭᓄᐛᔨᑎᒪᓐ ᒥᔽᔨᑎᒧᐅᓐ ᐊ ᐅᑦ ᐊᐛᓯᒥᓇᓄᐅᒡ᙮”
13ᐊᑯ ᑎᐸᔨᒋᒐᓱᐤ ᐊᑕᑦ ᐊᑉᕋᐊᒪ, “ᒐᒂᓐ ᒪᒃ ᐛᒋ ᐸᐱᑦ ᓴᕋ ᐊᓂᔭ ᑲ ᐃᔅᒋᔄᐅᒡ ? ᒐᒂᓂᔪᐤ ᐛᒋ ᐊᓏᑕᐧᒃ ᒐ ᐅᑦ ᐊᐛᓯᒥᑦ ᐊ ᒋᓴᐃᔎᐅᑦ ? 14ᓇᒪ ᑎᑯᓂᔪᐤ ᒐᒂᓂᔪᐤ ᒐ ᐊᑲ ᒋ ᐃᑐᑕᐧᒃ ᑎᐸᔨᒋᒐᓱᐤ᙮ ᒧᔭᒻ ᑲ ᐃᔅᒋᔄᔭᓐ, ᒋ ᐸᐃᑯᔅᑕᐤ ᑕᑐᐤ ᐱᓯᒺᔭᒐ ᑲᐤ ᐅᑕ ᓂᑭ ᑎᑯᓯᓐ ᑭᔭ ᓴᕋ ᒋᑭ ᐅᑯᓱᐤ᙮”
15ᓴᕋ ᒋ ᑯᔅᑕᒍᐤ, ᐊᑯ ᒂ ᐎ ᑭᑭᒋᔭᑦ ᑭᔭ ᒂ ᐃᔅᒋᔄᑦ, “ᓇᒪ ᓂ ᐅᒋ ᐸᐱᓐ᙮”
ᑎᐸᔨᒋᒐᓱᐛ ᒂ ᐃᑎᑯᑦ, “ᓂᐦᐃ, ᔅᒋ ᐸᐱᓐ᙮”
ᑲ ᓂᑐᑎᒪᔅᑎᒧᐛᑦ ᐊᑉᕋᐊᒻ ᑲ ᒥᔽᑎᓯᔨᒋ
16ᑲᒋ ᒋᓯᒥᒋᓱᒡ, ᒂ ᔅᑐᑕᒡ ᐊ ᓂᔅᑎᒡ ᐊᓐᒋᓐᒡ ᑭᔭ ᒂ ᐃᑐᑕᒡ ᐊᓐᑕ ᒐ ᐅᒋ ᐛᐸᑕᒡ ᓱᑕᒻ ᐅᑕᓇᔪᐤ᙮ ᐊᑉᕋᐊᒻ ᒋ ᐊᑎ ᐎᒐᐛᐤ ᒐᒋ ᐛᒋᔭᒪᑦ᙮ 17ᐊᑯ ᑎᐸᔨᒋᒐᓱᐤ ᒂ ᐃᑎᓱᑦ, “ᓇᒪ ᓂᑭ ᒋ ᑲᑐᐛᐤ ᐊᑉᕋᐊᒻ ᒐᒂᓂᔪᐤ ᐛ ᑐᑕᒧᒡ᙮ 18ᐛᔅ ᐊᑉᕋᐊᒻ ᐅᑦ ᐊᓂᔅᑯᑕᐸᓇ ᒋᑭ ᒥᒐᑐᔅᑲᓇᓯᔨᐛ ᑭᔭ ᒋᑭ ᓱᐧᑲᑎᓯᔨᐛ ᑭᔭ ᐎᔾ ᐅᒡ ᓂᑭ ᐅᒋ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐅᑕ ᐊᔅᒋᒡ᙮ 19ᐛᔅ ᐎᔾ ᓂᒋ ᐛᔭᐱᒪᐤ ᒐᒋ ᒋᔅᑯᑎᒧᐛᑦ ᐅᑦ ᐊᐛᓯᒪ ᑭᔭ ᒐ ᐊᓂᔅᒐ ᐱᒪᑎᓯᔨᒋ ᐅᑦ ᐊᓂᔅᑯᑕᐸᓇ ᒐᒋ ᓇᐊᔨᑎᒥᔨᒋ ᓂᑦ ᐃᑎᓱᐛᐅᓇ ᑭᔭ ᐃᑐᑎᒥᔨᒋ ᑯᐃᔅᑯᑐᑎᒧᐅᓂᔪᐤ ᑭᔭ ᑎᐸᔅᑯᓂᒐᐅᓂᔪᐤ ᑭᔭ ᐊᑯ ᒪᒃ ᒐ ᒥᔨᒃ ᐊᑉᕋᐊᒻ ᒥᓯᐛ ᒐᒂᔪᐤ ᑲ ᐃᓯ ᐊᓱᑎᒧᐅᒃ᙮”
Genesis 18.20-32 (Proper-12 Year C)
20ᐊᑯ ᑎᐸᔨᒋᒐᓱᐤ ᐊᑕᑦ ᐊᑉᕋᐊᒪ, “ᓂᒋ ᐸᑎᒺᓐ ᐊ ᑕᑈᓯᒡ ᐊᓐᒡ ᐊ ᐊᑲ ᒥᔪᑐᑕᑯᒡ ᓱᑕᒻ ᑭᔭ ᑯᒧᕋ ᐃᔪᐛ᙮ ᒪᔭᑎᓂᔪᐤ ᐊ ᑐᑕᒡ ᐊᓐᒡ ᐃᔪᒡ᙮ 21ᓂᑭ ᐃᑐᑕᓐ ᒐᒋ ᐛᐸᑎᒧᒡ ᒐᒂᓂᔪᐤ ᑲ ᐃᓯ ᑐᑕᒡ᙮ ᐊᑯ ᒐᔅᒐᔨᑎᒧᒡ ᑎᔭᑈᓄᐎᒂ᙮”
22ᐊᑯ ᓂᓱ ᐊᓐᒋᓐᒡ ᒋ ᓂᑭᑕᐅᒡ ᐊᑉᕋᐊᒪ ᑭᔭ ᒂ ᐃᑐᑕᒡ ᐊᓐᑕ ᓱᑕᒻ ᐅᑕᓇᔪᐤ, ᒥᒄ ᑎᐸᔨᒋᒐᓱᐤ ᒋ ᑕᐤ ᐊ ᐎᒋᑲᐳᔅᑐᐛᑦ ᐊᑉᕋᐊᒪ᙮ 23ᐊᑉᕋᐊᒻ ᒥᒋᒪ ᒋ ᓇᑕᐤ ᑎᐸᔨᒋᒐᓱᐛ ᑭᔭ ᒋ ᐃᑕᐤ, “ᒋᑭ ᓂᓱᐅᓇᒋᐊᐅᒡ ᐊ ᒪᒧᐤ ᐊᓐᒡ ᑯᐃᔅᒄ ᑲ ᑐᑕᒡ ᒋᒡ ᐊᓐᒡ ᐊ ᒪᔭᑎᓂᔨᒡ ᑲ ᑐᑕᒡ ? 24ᒥᒄ ᒪ ᐱᑕᑕᒡ ᑕᑐᔪᐤ ᑕᑎᓯᑥᐛ ᑲ ᑯᐃᔅᑯᑕᑎᓯᒡ ᐃᔪᒡ ᐊᓐᑕ ᐅᑕᓇᒡ, ᒋᑭ ᓂᓱᐅᓇᒋᑕᓐ ᐊ ? ᒋᑭ ᐱᒪᒋᑕᓐ ᐊ ᐊᑯ ᒪᒃ ᒐ ᐊᑲ ᐳᓂᐱᒪᑎᓯᒡ ᐊᓐᒡ ᐱᑕᑕᒡ ᑕᑐᔪᐤ ᑲ ᑯᐃᔅᑯᑕᑎᓯᒡ ᐃᔪᒡ ? 25ᓂ ᒋᔅᒐᔨᑕᓐ ᒐ ᐊᑲ ᓂᓱᐅᓇᒋᐃᑥᐤ ᑲ ᑯᐃᔅᑯᑕᑎᓯᒡ ᐃᔪᒡ ᐊᓯᒡ ᐊᓐᒡ ᑲ ᒥᒐᑎᓯᒡ ᐃᔪᒡ᙮ ᒋᔾ ᐅ ᐅᑎᐸᔅᑯᓂᒐᐤ ᐅᑕ ᒥᓯᐛ ᐊᔅᒋᒡ ᑭᔭ ᒋᑦ ᐃᑐᑕᓐ ᒐᒂᓐ ᐊ ᒥᔽᒡ᙮”
26ᑎᐸᔨᒋᒐᓱᐤ ᒋ ᐃᑕᐤ, “ᒥᔅᑯᒂᐛ ᐱᑕᑕᒡ ᑕᑐᔪᐤ ᑲ ᑯᐃᔅᑯᑕᑎᓯᒡ ᐃᔪᒡ ᐊᓐᑕ ᓱᑕᒻ ᐅᑕᓇᒡ, ᓇᒪ ᓂᑭ ᒋ ᓂᓱᐅᓇᒋᑕᓐ ᐅᑕᓇᐤ ᐎᔨᐛᐤ ᐅᒋ᙮”
27ᐊᑯ ᐊᑉᕋᐊᒻ ᒥᓐ ᐊ ᐃᔨᒥᑦ, “ᑎᐸᔨᒋᒐᓱᐤ, ᓂᑭ ᒥᔅᑲᓐ ᓱᒋᑕᐅᓐ ᑭᔭ ᒥᓐ ᒐᒋ ᐃᔨᒥᑕᓐ, ᐛᔅ ᐅ ᓂᔾ ᒥᒄ ᓇᐸᐤ, ᓇᒪ ᑭᔭ ᓂ ᑎᐸᒐᔨᑕᑯᓯᓐ ᒐᒋ ᐃᔨᒥᑕᓐ, 28ᒂᔄᓐ ᒥᒄ ᓇᐎᔪᐤ ᐊᓱ ᐱᑕᑕᒡ ᐊᑎᓯᐛᐛᒂ, ᒋᑭ ᓂᓱᐅᓇᒋᑕᓐ ᐊ ᓄᑎᒻ ᐅᑕᓇᐤ ᐅᓴᒻ ᐊᓐᒡ ᐱᑕᑕᒡ ᑲ ᑯᐃᔅᑯᑕᑎᓯᒡ ᐃᔪᒡ ?”
ᑎᐸᔨᒋᒐᓱᐤ ᒋ ᐃᑕᐤ, “ᒥᔅᑯᒂᐛ ᓇᐎᔪᐤ ᐊᓱ ᐱᑕᑕᒡ ᑲ ᑯᐃᔅᑯᑕᑎᓯᒡ ᐃᔪᒡ, ᓇᒪ ᓂᑭ ᒋ ᓇᓱᐅᓇᒋᑕᓐ᙮”
29ᐊᑉᕋᐊᒻ ᒥᓐ ᐸᐃᒂᐤ ᐊ ᐃᔨᒪᐊᑦ, “ᒂᔄᓐ ᒪ ᓇᐎᔪᐤ ᒥᒄ ᒥᔅᑯᐛᑭᓄᑥᐛ ᑲ ᑯᐃᔅᑯᑕᑎᓯᒡ ᐃᔪᒡ ᐊᓐᑕ ?” ᑎᐸᔨᒋᒐᓱᐤ ᒂ ᐃᑕᑦ, “ᐊᑎ ᒥᒄ ᓇᐎᔪᐤ ᑕᑥᐛ ᑲ ᑯᐃᔅᑯᑕᑎᓯᒡ ᐃᔪᒡ, ᓇᒪ ᓂᑭ ᒋ ᓂᓱᐅᓇᒋᑕᓐ ᐊᓐ ᐅᑕᓇᐤ᙮”
30ᐊᑯ ᐊᑉᕋᐊᒻ ᐊᑕᑦ, “ᑎᐸᔨᒋᒐᓱᐤ, ᒋ ᐱᑯᓴᔨᒥᑎᓐ ᒐ ᐊᑲ ᒋᔄᐱᔅᑐᐎᓐ, ᒥᒄ ᓇᐃᒥᔾ ᒐᒋ ᒥᓐ ᑯᒂᒋᒥᑕᓐ, ᒐᒂᓐ ᒐ ᐃᑐᑎᒥᓐ ᒥᒄ ᓂᔅᑐᔪᐤ ᑕᑎᓯᑥᐛ ᑲ ᑯᐃᔅᑯᑕᑎᓯᒡ ᐃᔪᒡ ᐊᓐᑕ ᐅᑕᓇᒡ ?”
ᑎᐸᔨᒋᒐᓱᐤ ᒋ ᐃᑕᐤ, “ᓂᑭ ᐱᒪᒋᐊᐅᒡ ᒥᓯᐛ ᑯᑎᑭᒡ, ᒋᒡ ᐊᓐᒡ ᓂᔅᑐᔪᐤ ᐃᔪᒡ ᑲ ᑯᐃᔅᑯᑕᑎᓯᒡ᙮”
31ᐊᑯ ᐊᑉᕋᐊᒻ ᐊᑕᑦ, “ᑎᐸᔨᒋᒐᓱᐤ, ᐛᐸᔨᑎᒧᐎ ᐊᓐ ᐊᓱᒋᑕᔭᓐ ᒐᒋ ᒥᓐ ᑯᒂᒋᒥᑕᓐ, ᒥᒄ ᒐᒂᓐ ᒐ ᐃᑐᑎᒥᓐ ᒥᒄ ᓂᓱᔪᐤ ᑲ ᑯᐃᔅᑯᑕᑎᓯᒡ ᐃᔪᒡ ᒥᔅᑯᑥᐛ ?”
ᑎᐸᔨᒋᒐᓱᐤ ᒋ ᐃᑕᐤ, “ᐊᑎ ᒥᒄ ᓂᓱᔪᐤ ᑕᑥᐛ ᑲ ᑯᐃᔅᑯᑕᑎᓯᒡ ᐃᔪᒡ, ᓇᒪ ᓂᑭ ᒋ ᓂᓱᐅᓇᒋᑕᓐ ᐊᓐ ᐅᑕᓇᐤ᙮”
32ᐊᑉᕋᐊᒻ ᒥᓐ ᑲ ᑯᒂᒋᒪᑦ, “ᑎᐸᔨᒋᒐᓱᐤ, ᒋ ᐱᑯᓴᔨᒥᑎᓐ ᒐ ᐊᑲ ᒋᔄᐱᔅᑐᐎᓐ, ᐊᐅᑯᐤ ᒪᔅᑕᔾ ᒐ ᐃᔨᒥᔭᓐ, ᒐᒂᓐ ᒐ ᐃᑐᑎᒥᓐ ᒥᒄ ᐸᐃᑯᔪᐤ ᑲ ᑯᐃᔅᑯᑕᑎᓯᒡ ᐃᔪᒡ ᒥᔅᑯᑥᐛ ?”
ᑎᐸᔨᒋᒐᓱᐤ ᐃᑕᐤ, “ᐊᑎ ᒥᒄ ᐸᐃᑯᔪᐤ ᑕᑥᐛ ᑲ ᑯᐃᔅᑯᑕᑎᓯᒡ ᐃᔪᒡ, ᓇᒪ ᓂᑭ ᒋ ᓂᓱᐅᓇᒋᑕᓐ ᐊᓐ ᐅᑕᓇᐤ᙮”
33ᐃᔅᐱ ᑎᐸᔨᒋᒐᓱᐤ ᑲᒋ ᐃᓯ ᐃᔨᒪᐊᑦ ᐊᑉᕋᐊᒪ, ᒋ ᔅᑐᑕᐤ ᑭᔭ ᐎᔾ ᐊᑉᕋᐊᒻ ᒂ ᒋᐛᑦ᙮
انتخاب شده:
ᒐᓂᓯᔅ 18: ᓇᔅᑲᐱ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada