ᒠᓐ 16
16
1“ᒥᓯᐛ ᐅ ᑲ ᐃᓯ ᐎᑎᒪᑎᑯᒡ ᔅᒋ ᐎᑎᒪᑎᓇᐛᐤ ᒐ ᐊᑲ ᒋ ᐃᓯᓇᑯᓯᔭᒄ ᒐᒋ ᐎ ᐊᑎ ᐳᓂᔭᒄ ᐊ ᑕᑈᔭᔨᒥᔭᒄ᙮ 2ᐅᒡ ᒍᐤ ᐃᔪᒡ ᒋᑭ ᐎᐎᑎᓴᐅᑯᐛᐅᒡ ᐅᑦ ᐊᔭᒥᐊᐅᒋᐛᐳᐛᒡ᙮ ᓂᐦᐃ, ᒐᒃ ᑕᑈ ᒋᑭ ᐅᑎᒋᐱᔪᐤ ᐊᐛᓐ ᓂᐸᐃᑕᒂ ᒐ ᐃᑕᔨᑕᐧᒃ ᒋᓴᒪᓂᑐᐛ ᐊ ᐎᒋᐊᑦ᙮ 3ᐊᐅᒄ ᐅᔭ ᒐ ᐃᑐᑕᑕᑯᒡ ᐛᔅ ᓇᒪ ᓂᑕ ᐅᒋ ᒋᔅᒐᔨᒪᐅᒡ ᐅᑕᐎᒪᐛ ᑭᔭ ᓂᔾ ᓇᒪ ᓂ ᐅᒋ ᒋᔅᒐᔨᒥᑯᒡ᙮”
John 15.26-27; 16.4b-15 (Pentecost Year B)
4“ᒥᒄ ᒪᒃ ᒋ ᐎ ᐎᑎᒪᑎᓇᐛᐤ ᐅ ᒐᒋ ᒋᔅᒋᓯᔭᒄ ᑕᓐ ᑲ ᐃᓯ ᐊᔨᒧᒥᒂᐤ ᐃᔅᐱ ᐅᑎᒋᐱᔨᒐ ᐅᔭ ᒐᒂᔪᐛ ᒐᒋ ᐃᑐᑕᑕᑯᒡ᙮ ᓇᒪ ᒋ ᐅᒋ ᐎᑎᒪᑎᓇᐛᐤ ᐅᔭ ᐅᔅᑭᒡ ᐊᓐᑕ ᑲ ᐸᒋ ᒋᔅᑯᑎᒪᑎᑯᒡ ᐛᔅ ᐊᑯᑕ ᑲ ᑕᔭᓐ ᐊᓐᑕ ᐊ ᑕᔭᒄ᙮”
ᑕᓐ ᐊ ᐃᑕᐱᑎᓯᑦ ᑲ ᐸᔭᒋᓯᑦ ᐊᒐᐧᒄ
5“ᐊᓄᒡ ᒪᒃ ᐎ ᐊᑯ ᒐ ᓂᑐᐛᐱᒥᒃ ᐊᓐ ᑲ ᐸᒋ ᐃᑎᓴᐅᑦ᙮ ᓇᒪ ᒪᒃ ᐛᐛᒡ ᐸᐃᒄ ᐊ ᑎᓯᔭᒄ ᒋ ᑯᒂᒋᒥᓇᐛᐤ ᑕᓐᑕ ᐊ ᐃᑐᑕᔭᓐ᙮ 6ᐊᓄᒡ ᒪᒃ ᐊᒋ ᐎᑎᒪᑎᑯᒡ ᐊᑯ ᓇᔅᒡ ᐊ ᒥᓯᒪᔨᑎᒪᒄ᙮ 7ᒥᒄ ᒪᒃ ᑯᐃᔅᒄ ᐊ ᐎᑎᒪᑎᑯᒡ ᐃᐛᒃ ᐛᔅ ᐊᓐ ᒋᑭ ᐎᒋᐃᑯᓇᐛᐤ ᐊ ᔅᑐᑕᔭᓐ, ᐛᔅ ᐊᑲ ᔅᑐᑕᔭᓇ ᓇᒪ ᒋᑭ ᐅᒋ ᐸᒋ ᓂᑐᐛᐱᒥᑯᐛᐤ ᐊᓐ ᒐ ᐎᒋᐃᑕᒄ, ᔅᑐᑕᔭᓇ ᒪᒃ ᐊᐅᑯᓐ ᐊᓐ ᒐ ᐸᒋ ᐃᑎᓴᐊᒪᑎᑯᒡ᙮ 8ᑎᑯᓯᒐ ᒪᒃ ᒋᑭ ᐃᑐᑐᐛᐤ ᐊᐛᔪᐛ ᒐᒋ ᓂᔅᑐᑎᒥᔨᒋ ᐊ ᐅᓂᐱᔨᒋ ᑕᓐ ᐊ ᐃᓯ ᑭᓄᐛᐸᑎᒥᔨᒋ ᒥᒋᑥᐅᓂᔪᐤ, ᑯᐃᔅᑯᑕᑎᓯᐅᓂᔪᐤ ᑭᔭ ᒋᓴᒪᓂᑐᐛ ᐅᑎᐸᔅᑯᓂᒐᐅᓂᔪᐤ᙮ 9ᐎᓂᐱᔪᒡ ᑕᓐ ᐊ ᐃᓯ ᑭᓄᐛᐸᑕᒡ ᒥᒋᑥᐅᓂᔪᐤ ᐛᔅ ᓇᒪ ᓂ ᑕᑈᔭᔨᒥᑯᒡ᙮ 10ᐎᓂᐱᔪᒡ ᑕᓐ ᐊ ᐃᓯ ᑭᓄᐛᐸᑕᒡ ᑯᐃᔅᑯᑕᑎᓯᐅᓂᔪᐤ, ᐛᔅ ᐅᑕᐎᒪᐤ ᐊ ᑕᑦ ᐊᑯᑕ ᐊ ᐃᑐᑕᔭᓐ, ᓇᒪ ᒪᒃ ᒥᓐ ᒋᑭ ᐅᒋ ᐛᐱᒥᓇᐛᐤ᙮ 11ᐎᓂᐱᔪᒡ ᑕᓐ ᐊ ᐃᓯ ᑭᓄᐛᐸᑕᒡ ᒋᓴᒪᓂᑐᐛ ᐅᑎᐸᔅᑯᓂᒐᐅᓂᔪᐤ ᐛᔅ ᒥᒋᒥᓂᑐᐤ ᓴᔅ ᒋ ᑎᐸᔅᑯᓂᑯᐤ ᒋᓴᒪᓂᑐᐛ᙮”
John 16.12-15 (Trinity Year C)
12“ᐊᔅᒄ ᐊᑐᐎᔅ ᒥᔅᑎ ᑎᑯᓐ ᒐᒋ ᐃᑎᑎᑯᒡ ᒥᒄ ᒪᒃ ᓇᒪ ᒋᑭ ᐅᒋ ᓂᔅᑐᑕᓇᐛᐤ ᐊᓄᒡ᙮ 13ᒥᒄ ᒪᒃ ᐃᔅᐱ ᑎᑯᓯᒐ ᐅ ᐊᒐᐧᒄ ᑲ ᒋᔅᒐᔨᑎᒥᐃᐛᑦ ᑕᑈᐅᓂᔪᐤ, ᐊᐅᒄ ᒐ ᒋᔅᒐᔨᑎᒥᐃᑕᒄ ᒥᓯᐛ ᑕᑈᐅᓂᔪᐤ ᒋᓴᒪᓂᑐᐛ ᐊ ᑕᔨᒋ ᐛᒋᐱᔨᒡ᙮ ᓇᒪ ᒋᑭ ᐅᒋ ᐃᔅᒋᔄᐤ ᒐᒂᔪᐤ ᐸᑐᔅ ᒋᓴᒪᓂᑐᐛ ᐃᑎᓱᒥᑯᒐ ᒐᒋ ᐃᔅᒋᔄᑦ᙮ ᐊᓂᔭ ᒪᒃ ᑕᓐ ᒐ ᐃᓯ ᐸᑐᐛᑦ ᐊ ᐃᔅᒋᔄᔨᒋ ᐊᔪᐅᒄ ᐅᔭ ᒐ ᐃᓯ ᐛᐎᑕᐧᒃ᙮ ᒋᑭ ᐛᐎᑎᒪᑯᐛᐤ ᐊᓂᔭᔪᐛ ᒐᒂᔪᐛ ᒐ ᐊᑎ ᐃᔅᐱᔨᒋ᙮ 14ᓂᑭ ᒋᔅᑕᔨᑕᑯᐃᒄ ᐛᔅ ᑕᓐ ᒐ ᐃᓯ ᐊᔨᒧᑎᒧᒡ ᐊᐅᒄ ᐅᔭ ᒐ ᐃᓯ ᐊᓱᐤ ᐛᐎᑎᒪᑕᒄ᙮ 15ᒥᓯᐛ ᑕᓐ ᑲ ᐃᓯ ᒥᔨᑦ ᐅᑕᐎᒪᐤ ᓂ ᑎᐱᔨᐛᐅᓯᓐ᙮ ᐊᐅᑯᓐ ᐛᒋ ᐃᑎᑎᑯᒡ ᒐ ᐊᓱᐤ ᐛᐎᑎᒪᑕᒄ ᐅ ᐊᒐᐧᒄ ᑕᓐ ᐊᓂᔭᔪᐛ ᑲ ᐃᓯ ᐊᔨᒧᑎᒧᒡ᙮”
ᐊᓐᑕ ᒐ ᒥᔽᔨᑕᒡ ᑭᔭ ᐊᓐᑕ ᒐ ᒥᒐᔨᑕᒡ ᒋᔅᒋᓄᐊᒧᐛᑭᓐᒡ
16“ᐛᐃᐱᔅᒋᔅ ᒪᒃ ᓇᒪ ᒋᑭ ᐅᒋ ᐛᐱᒥᓇᐛᐤ᙮ ᒥᓐ ᒪᒃ ᐛᐃᐱᔅᒋᔅ ᐊᑯ ᒥᓐ ᒐ ᐛᐱᒥᔭᒄ᙮”
17ᐊᑯ ᐱᔅᒐ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᒂ ᐃᑎᑐᔨᒋ, “ᒐᒂᔪᐤ ᐅᔭ ᑲ ᐃᑎᑕᒄ ᐊᔅᒄ ᒥᓐ ᐛᐃᐱᔅᒋᔅ ᒐ ᐎᒐᐛᐧᒄ ᐊᑯ ᒥᓐ ᒐ ᐊᑲ ᐅᒋ ᐛᐱᒪᐧᒄ ᑭᔭ ᐊᓂᔭ ᑲ ᐃᔅᒋᔄᑦ ᒥᓐ ᐛᐃᐱᔅᒋᔅ ᐊᑯ ᒐ ᐛᐱᒪᐧᒄ ? ᑭᔭ ᐊᓂᔭ ᐊ ᐃᔅᒋᔄᑦ, ‘ᐅᑕᐎᒪᐛ ᐊ ᓂᑐᐛᐱᒪᑦ’ ? 18ᒐᒂᔪᐤ ᐅᔭ ᐛᐃᐱᔅᒋᔅ ᑲ ᐃᔅᒋᔄᑦ ? ᓇᒪ ᒋ ᒋᔅᒐᔨᑎᒺᓇᓄᐤ ᒐᒂᔪᐤ ᐊᓂᔭ ᐛᒋ ᐃᔅᒋᔄᑦ, ‘ᐛᐃᐱᔅᒋᔅ᙮’ ”
19ᒋᓴᔅ ᒋ ᒋᔅᒐᔨᒪᐤ ᐊ ᐎ ᑯᒂᒋᒥᑯᑦ ᐅᔭ᙮ ᐊᑯ ᒂ ᐃᑕᑦ, “ᐊᓐ ᑲ ᐃᔅᒋᔄᔭᓐ, ᓴᔅ ᐎᐱᒡ ᓇᒪ ᒋᑭ ᐅᒋ ᐎᒐᐅᑎᓇᐛᐤ᙮ ᒥᓐ ᒪᒃ ᐛᐃᐱᔅᒋᔅ ᐊᑯ ᒥᓐ ᒐ ᐛᐱᒥᔭᒄ᙮ ᐅ ᐛ ᓂᑐ ᒋᔅᒐᔨᑎᒪᒄ ᒐᒂᓐ ᐊᓐ ᑲ ᐊᔨᒧᑎᒪᓐ ? 20ᑯᐃᔅᒄ ᐊ ᐎᑎᒪᑎᑯᒡ ᒋᑭ ᒪᓇᐛᐤ ᑭᔭ ᒋᑭ ᓂᓇᐧᑲᑕᔨᒧᓇᐛᐤ᙮ ᐊᐅᑯᓐᒡ ᐅᒡ ᐅᑕ ᐊᔅᒋᒡ ᑲ ᑕᒡ ᐊᑲ ᓂᓇᑭᑐᐛᔨᒪᒡ ᒋᓴᒪᓂᑐᐛ ᐅᐱᒪᑎᓯᐅᓄᐛᒡ ᒋᑭ ᓯᒋᔭᓱᐅᒡ᙮ ᒋᑭ ᒥᓯᒪᔨᑕᓇᐛᐤ ᒋᔨᐛᐤ᙮ ᒥᒄ ᒪᒃ ᐊᓐ ᐊ ᒥᓯᒪᔨᑎᒪᒄ ᒋᑭ ᒂᔅᒋᐱᔪᐤ ᐃᔭᐱᒡ ᒐᒋ ᒧᒋᒐᔨᑎᒪᒄ᙮ 21ᐃᔅᐱ ᒐ ᐛᐱᒪᐅᓱᑦ ᐃᔎᐤ ᒥᓯᒪᔨᑎᒻ ᐛᔅ ᐅᑎᒋᐱᔪᐤ ᐊᑯ ᒐ ᐎᓯᒐᔨᑕᐧᒃ᙮ ᐃᔅᐱ ᒪᒃ ᑲ ᐱᒪᑎᓯᔨᒋ ᐊᓂᔭᔪᐛ ᐅᑦ ᐊᐛᓯᒪ ᐅᓂᒋᔅᒋᓯᑐᑎᒻ ᑕᓐ ᑲ ᐃᓯ ᐎᓯᒐᔨᑕᐧᒃ ᐛᔅ ᓇᔅᒡ ᑕᑈ ᒥᔽᔨᑎᒻ ᐊ ᒋᔅᒐᔨᑕᐧᒃ ᐊᐛᓴ ᐊᒋ ᐱᒪᑎᓯᔨᒋ ᐅᑕ ᐊᔅᒋᒡ᙮ 22ᐊᐅᑯᓐ ᒪᒃ ᒧᔭᒻ ᑭᔭ ᒋᔨᐛᐤ, ᐊᓄᒡ ᒋ ᒥᓯᒪᔨᑕᓇᐛᐤ᙮ ᒥᒄ ᒪᒃ ᐃᔅᐱᔅ ᒥᓐ ᐛᐱᒥᑎᑯᒐ ᓇᔅᒡ ᑕᑈ ᒋᑭ ᒥᔽᔨᑕᓇᐛᐤ᙮ ᓇᒪ ᒪᒃ ᐊᐛᓐ ᒋᑭ ᐅᒋ ᐃᑐᑕᑯᐛᐤ ᒐᒋ ᒥᔅᑭᒥᑕᒄ ᒋᒧᒋᒐᔨᑎᒧᐅᓄᐛᔪᐤ᙮”
23“ᐅᑎᒋᐱᔨᒐ ᒪᒃ ᐅ ᑲ ᐃᓯ ᐊᔨᒧᑎᒪᑎᑯᒡ ᓇᒪ ᒐᒂᓐ ᒋᑭ ᐅᒋ ᓂᑐᑎᒧᓇᐛᐤ᙮ ᑯᐃᔅᒄ ᐊ ᐎᑎᒪᑎᑯᒡ ᒥᒄ ᑕᓐ ᒐ ᐃᓯ ᓂᑐᐛᔨᑎᒧᐛᒄ ᐅᑕᐎᒪᐤ ᓂᑦ ᐃᓯᓂᐧᑲᓱᐅᓐ ᐊ ᐊᐱᒋᑕᔭᒄ ᒋᑭ ᒥᔨᑯᐛᐤ᙮ 24ᓇᒪ ᐊᔅᒄ ᒋ ᐅᒋ ᓂᑐᑎᒧᓇᐛᐤ ᒐᒂᓐ ᓂᑦ ᐃᓯᓂᐧᑲᓱᐅᓂᒡ ᐅᒡ᙮ ᓂᑐᑎᒪᒄ ᑭᔭ ᒐ ᒥᔨᑯᐅᔭᒄ, ᑭᔭ ᓇᔅᒡ ᒐ ᒥᔽᔨᑎᒪᒄ᙮”
ᒋᓴᔅ ᑲ ᐊᔨᒧᑕᐧᒃ ᐊ ᓴᐧᑯᒋᑕᑭᓄᐎᒡ ᐊᔅᒋᔪᐤ
25“ᐅᔭ ᒐᒂᔪᐛ ᑲ ᐎᑎᒪᑎᑯᒡ ᓇᔅᒡ ᑕᑈ ᐊᔨᒥᓐ ᒐᒋ ᓂᔅᑐᑕᒂᒋ᙮ ᒪᒃ ᒋᑭ ᐅᑎᒋᐱᔪᐤ ᒐᒃ ᐊᓐᑕ ᒐ ᐱᔭᑭᔅᒡ ᓂᔅᑐᑎᒪᒄ ᐊᔨᒧᑎᒪᑎᑯᒐ ᐅᑕᐎᒪᐤ᙮ 26ᐅᑎᒋᐱᔨᒐ ᒪᒃ ᐊᓐ, ᒋᔨᐛᐤ ᐊᑯ ᒐ ᓂᑐᑎᒧᐛᒄ ᒋᓴᒪᓂᑐᐤ ᓂᑦ ᐃᓯᓂᐧᑲᓱᐅᓂᒡ ᐅᒡ᙮ ᒋᑦ ᐃᑎᓇᐛᐤ ᒪᒃ, ᓇᒪ ᒋᑭ ᐅᒋ ᓂᑐᐛᔨᑕᑯᓐ ᒐᒋ ᐊᔭᒥᐊᔭᓐ ᐊ ᓂᑐᑎᒧᒃ ᒋᓴᒪᓂᑐᐤ ᒐᒋ ᒥᔨᑕᒄ ᑕᓐ ᐊ ᐃᓯ ᓂᑐᐛᔨᑎᒪᒄ᙮ 27ᐛᔅ ᒋᓴᒋᐃᑯᐛᐤ ᐅᑕᐎᒪᐤ ᐊᒋ ᓴᒋᐃᔭᒄ ᑭᔭ ᐊᒋ ᑕᑈᑎᒪᒄ ᐅᑕᐎᒪᐤ ᐊ ᑕᑦ ᐊᒋ ᐅᑐᑕᔭᓐ᙮ 28ᑕᑈ ᒪᒃ ᐅᑕᐎᒪᐤ ᐊ ᑕᑦ ᓂᒋ ᐅᑐᑕᓐ ᑲ ᐸᒋ ᑎᑯᓯᓂᔭᓐ ᐅᑕ ᐊᔅᒋᒡ ᒥᓐ ᒪᒃ ᑲᐤ ᓂᑭ ᔅᑐᑕᓐ ᓄᑕᐎᔾ ᐊ ᑕᑦ ᓂᑭ ᐃᑐᑕᓐ᙮”
29ᐊᑯ ᒂ ᐃᑎᑯᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᐊᑯ ᒪᒃ ᐃᔭᒄ ᓇᔅᑐᑕᑯᓯᔨᓐ ᑕᓐ ᐊ ᐃᔅᒋᔄᔨᓐ᙮ ᓇᒪ ᐊᔨᒥᓐ ᒐᒋ ᓂᔅᑐᑕᒂᒡ ᑕᓐ ᐊ ᐃᓯ ᐊᔨᒧᑎᒥᓐ᙮ 30ᓂ ᒋᔅᒐᔨᑕᓇᓐ ᒪᒃ ᒥᓯᐛ ᒐᒂᓐ ᐊ ᒋᔅᒐᔨᑎᒥᓐ, ᓇᒪ ᓂᑐᐛᔨᑕᑯᓱᐤ ᐊᐛᓐ ᒐᒋ ᑯᒂᒋᒥᔅᒃ ᒐᒂᔪᐤ, ᐊᐅᒄ ᒪᒃ ᐅ ᐛᒋ ᑕᑈᑎᒪᒡ ᒋᓴᒪᓂᑐᐤ ᐊ ᑕᑦ ᐊᒋ ᐅᑐᑕᔨᓐ᙮”
31ᐊᑯ ᒋᓴᔅ ᒂ ᐃᑕᑦ, “ᒋ ᑕᑈᑕᓇᐛᐤ ᐊ ᐊᓄᒡ ? 32ᒋᑭ ᐅᑎᒋᐱᔪᐤ, ᓴᔅ ᒪᒃ ᑕᑈ ᐅᑎᒋᐱᔪᐤ ᐊᓐᑕ ᒥᓯᐛ ᐸᐸᐃᒄ ᒐ ᑕᔭᒄ, ᑕᑎᐸᓐ ᒐ ᑕᔭᒄ ᑎᐱᔨᐛ ᒋᒋᐛᐛᒡ᙮ ᐊᑯ ᓂᔾ ᒐ ᐸᐃᑯᓯᔭᓐ ᐊᑲ ᐊᐱᑕᔨᒥᔭᒄ᙮ ᓇᒪ ᒥᒄ ᒋᒋᐛ ᓂᑭ ᐅᒋ ᐸᐃᑯᓯᓐ ᐛᔅ ᓄᑕᐎᔾ ᑕᐤ ᐅᑕ ᐊ ᑕᔭᓐ᙮ 33ᔅᒋ ᐎᑎᒪᑎᓇᐛᐤ ᐅ ᒐᒋ ᐅᒋ ᐊᔭᔭᒄ ᒋᔭᒪᔨᑎᒧᐅᓐ ᐊᓐᑕ ᓂᔾ ᐊ ᑕᔭᓐ᙮ ᒋᑭ ᓂᓇᐧᑲᑕᔨᒧᐃᑯᓇᐛᐤ ᐅᑕ ᐊᔅᒋᒡ᙮ ᓱᒃ ᐎ ᓱᒋᑕᐊᒄ, ᐛᔅ ᓴᔅ ᓂᒋ ᓴᐧᑯᒋᐊᐤ ᐊᓐ ᑲ ᑎᐸᔨᒪᑦ ᐊᓂᔭ ᐊᐛᔪᐛ ᐊᑲ ᐊᐱᑕᔨᒪᔨᒋ ᒋᓴᒪᓂᑐᐛ᙮”
انتخاب شده:
ᒠᓐ 16: ᓇᔅᑲᐱ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada