ᒠᓐ 4
4
ᒋᓴᔅ ᑲ ᐃᔨᒪᐊᑦ ᐃᔎᐛ ᓴᒪᕆᔭᐃᒡ ᑲ ᐅᒋᔨᒋ
1ᐸᕆᓯᔨᒡ ᒋ ᐸᑎᒧᒡ ᐊᑐᐎᔅ ᐊ ᒥᒐᑎᔨᒋ ᐊᐛᔪᐛ ᐊ ᓇᓴᐛᔨᒋ ᒋᓴᓴ ᐊᔪᐤ ᒪᒃ ᐊᑐᐎᔅ ᐎᔾ ᐊ ᒥᒐᑎᔨᒋ ᐊᐛᔪᐛ ᐊ ᓯᑲᐃᑐᐛᑦ ᐃᔅᐱᔅ ᒠᓇ᙮ 2ᒥᒄ ᒪᒃ ᓇᒪᔭᐤ ᐎᔾ ᒋᓴᔅ ᑲ ᓯᑲᐃᑕᒐᑦ, ᐅᒋᔅᒋᓄᐊᒧᐛᑭᓇ ᐊᓂᔭ ᒋ ᓯᑲᐃᑕᒐᔪᐛ᙮ 3ᐃᔅᐱ ᐱᔭᑕᐧᒃ ᒋᓴᔅ ᐊ ᐊᔨᒧᒪᑭᓄᐅᑦ, ᒋ ᓂᑭᑎᒻ ᒍᑎᔭ ᐊᔅᒋᔪᐤ ᐊᑯ ᑲᓕᓕ ᐊᔅᒋᒡ ᒥᓐ ᒂ ᐃᑐᑕᑦ᙮
4ᒋᐸ ᓴᐳᑐᐛᔅᑭᒻ ᒪᒃ ᓴᒪᕆᔭ ᐊᔅᒋᔪᐤ ᐊᓐᑕ ᑲᓕᓕᒡ ᐊ ᐎ ᐃᑐᑕᑦ᙮
5ᐃᔅᐱ ᒪᒃ ᐊᓐᑕ ᓴᒪᕆᔭ ᐊᔅᒋᒡ ᐊ ᑕᑦ, ᒋ ᐅᑎᑎᒻ ᐅᑕᓇᔪᐤ ᓴᐃᑲᕐ ᐊ ᐃᓯᓂᐧᑲᑕᔨᒡ᙮ ᒥᒋᒪ ᒪᒃ ᐅᑕ ᐅᔭ ᐅᑕᓇᔪᐤ ᐊᑯᑕ ᑲ ᑎᑯᓂᔨᒡ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᐊᓂᔭ ᒐᑭᑉ ᑲ ᒥᔭᑦ ᐅᑯᓴ ᒍᓯᐸ᙮ 6ᒋ ᑎᑯᓐ ᐊᓐᑕ ᐅᑕᐃᐸᓐ, ᒐᑭᑉ ᐅᑕᐃᐸᓐ ᒋ ᐃᓯᓂᐧᑲᑕᐤ᙮ ᓇᔅᒡ ᒪᒃ ᒋ ᐊᔭᔅᑯᑕᐤ ᒋᓴᔅ, ᒂ ᐊᑎ ᐛᐛᔨᐱᑦ ᒥᒋᒪ ᐊᓐᑕ ᐅᑕᐃᐸᓂᒡ᙮ ᓴᓯᑲᓐ ᒋ ᐊᐱᑕᒋᓯᑲᔨᒐ᙮
7ᓇᓇᒐᓯᔅ ᒪᒃ, ᐃᔎᐤ, ᓴᒪᕆᔭ ᐊᔅᒋᒡ ᐊ ᐅᒋᑦ ᒋ ᐸᒋ ᒂᐱᒐᐤ᙮ ᒋᓴᔅ ᒂ ᐃᑕᑦ ᐊᓂᔭ ᐃᔎᐛ, “ᐸᒋ ᒥᔾ ᒪ ᓂᐱᔾ ᒐᒋ ᒥᓂᔭᓐ᙮” 8ᓇᒪ ᒪᒂᒡ ᐅᒋ ᑕᔪᐛ ᒋᓴᔅ ᐅᒋᔅᒋᓄᐊᒧᐛᑭᓇ ᐊᓂᔭ ᐛᔅ ᐊᓐᑕ ᐅᑕᓇᒡ ᒋ ᐃᑐᑕᔪᐛ ᒥᒋᒥᔪᐤ ᒐᒋ ᐅᑎᓂᒥᔨᒋ᙮
9ᓇᔅᒡ ᒪᒃ ᒋ ᑯᔅᑯᐱᔪᐤ ᐊᓐ ᐃᔎᐤ ᐊᓂᔭ ᑲ ᐃᑎᑯᑦ ᒋᓴᓴ ᐊᑯ ᒂ ᐃᑕᑦ, “ᒍᐤ ᓇᐸᐤ ᒋᔾ᙮ ᓂᔾ ᒪᒃ ᓴᒪᕆᔭ ᐃᔎᐤ᙮ ᒐᒂᓐ ᐛᒋ ᓂᑐᐛᔨᑎᒥᓐ ᒐᒋ ᒥᓇᐃᑕᓐ ?” ᓇᒪ ᓇᔅᒡ ᐅᒋ ᐅᑐᑕᒥᑐᐛᐅᒡ ᒍᐤ ᐃᔪᒡ ᐊᓂᔭ ᐃᔪᐛ ᐊᓐᑕ ᓴᒪᕆᔭ ᐊᔅᒋᒡ ᑲ ᐅᒋᔨᒋ, ᐊᐅᒄ ᐅᔭ ᐛᒋ ᐃᔅᒋᔄᑦ ᐅᔭ ᐊᓐ ᐃᔎᐤ᙮
10ᒋ ᐃᑕᐤ ᒪᒃ ᒋᓴᔅ ᐊᓂᔭᔪᐛ ᐃᔎᐛ, “ᒋᔅᒐᔨᑎᒧᐱᓇ ᒐᒂᔪᐤ ᐊ ᐎ ᒥᔨᐛᑦ ᒋᓴᒪᓂᑐᐤ ᑭᔭ ᒋᔅᒐᔨᒥᔨᓐ ᐊᐛᓐ ᐊ ᐊᐎᔭᓐ, ᒋᔾ ᒋᐸ ᑯᒂᒋᒥᓐ ᒐᒋ ᒥᓇᐃᑕᓐ᙮ ᐊᓐ ᒪᒃ ᑲ ᐱᒪᒋᐃᐛᒥᑲᒡ ᓂᐱᔾ ᐊᐅᑯᓐ ᐊᓐ ᒋᐸ ᒥᓇᐃᑎᓐ᙮”
11ᐊᑯ ᐊᓐ ᐃᔎᐤ ᒂ ᐃᔅᒋᔄᑦ, “ᓇᒪ ᒋ ᑭᓄᐛᔨᑕᓐ ᐊᔅᒋᐧᒄ ᒐᒋ ᒂᐸᐃᑲᒐᔨᓐ ᑭᔭ ᐊᓐ ᓂᐱᔾ ᒥᔅᑎ ᔭᐅᓇᑯᓐ ᐊᓐᑕ ᓂᑕᒡ, ᑕᓐᑕ ᒪᒃ ᒐ ᐅᒋ ᒂᐸᐊᒥᓐ ᐊᓐ ᓂᐱᔾ ᑲ ᐱᒪᒋᐃᐛᒥᑲᒡ ? 12ᐛᔅᑭᒡ ᐊᓐᑕ ᐅᑕᒡ ᒋᑦ ᐊᓂᔅᒐ ᐛᐧᑯᒪᑭᓄᐤ ᒐᑭᑉ ᔅᒋ ᒥᔨᑯᓄᐤ ᐅᔭ ᐅᑕᐃᐸᓂᔪᐤ᙮ ᒋ ᒥᓄᐤ ᐅᔭ ᓂᐱᔪᐤ ᑭᔭ ᐅᑯᓴ ᑭᔭ ᐅᒪᔭᑕᓂᓯᒪ ᐊᑯᑕ ᑲ ᐅᒋ ᒥᓂᔨᒋ᙮ ᐃᐛᒃ ᐊ ᒋᔾ ᒋᑦ ᐃᑕᔨᒥᓱᓐ ᐃᔅᐱᔅ ᐎᔾ ᐊᓂᔭ ᒋᑦ ᐊᓂᔅᒐ ᐛᐧᑯᒪᑭᓄᐤ ᒐᑭᑉ ?”
13ᒋᓴᔅ ᒪᒃ ᒋ ᐃᑕᐤ, “ᐊᐛᓐ ᑲ ᒥᓐᑦ ᐅᑕ ᐅᔭ ᓂᐱᔪᐤ, ᒥᓐ ᒋᑭ ᐸᐧᑯᑕᑎᒻ᙮ 14ᐊᐛᓐ ᒪᒃ ᒐ ᒥᓐᑦ ᐊᓂᔭ ᓂᐱᔪᐤ ᒐ ᒥᔨᒃ ᒐᒋ ᒥᓐᑦ, ᓇᒪ ᓂᑕ ᒥᓐ ᒋᑭ ᐅᒋ ᐸᐧᑯᑕᑎᒻ᙮ ᐛᔅ ᐊᓂᔭ ᓂᐱᔪᐤ ᒐ ᒥᔨᒃ ᒋᑭ ᐱᒋᔅᑲᑯᐤ ᒧᔭᒻ ᐊ ᐅᒋ ᒧᔅᒋᒍᐅᓂᔨᒡ ᒋᑭ ᐃᓯᓇᑯᓂᔪᐤ, ᐊᐅᒄ ᒪᒃ ᐅ ᑲ ᐱᒪᒋᐃᐛᒥᑲᒡ ᓂᐱᔾ ᐊᓐᑕ ᒐᒋ ᐅᒋ ᐊᔭᑦ ᐊᐛᓐ ᑲᒋᒡ ᐱᒪᑎᓯᐅᓂᔪᐤ ᒥᓂᒐ᙮”
15ᒂ ᐃᑕᑦ ᐊᓐ ᐃᔎᐤ, “ᐸᒋ ᒥᔾ ᐅ ᓂᐱᔾ, ᑭᔭ ᓇᒪ ᒥᓐ ᓂᑕ ᓂᑭ ᐅᒋ ᐸᒂᑕᑕᓐ ᑭᔭ ᓇᒪ ᒥᓐ ᓂᑕ ᓂᑭ ᐅᒋ ᐸᒋ ᑎᑯᓯᓐ ᐅᑕ ᒐᒋ ᐸᒋ ᒂᐱᒐᔭᓐ᙮”
16ᒋᓴᔅ ᒂ ᐃᑕᑦ ᐊᓂᔭ ᐃᔎᐛ, “ᒪᒋ, ᓂᑐᐛᐱᒻ ᒋᓇᐸᒻ᙮ ᐸᓱᐤ ᐅᑕ᙮”
17ᒂ ᐃᔅᒋᔄᑦ ᐊᓐ ᐃᔎᐤ, “ᓇᒪ ᓄᓇᐸᒥᓐ᙮” ᐊᑯ ᒋᓴᔅ ᒂ ᐃᑕᑦ, “ᒋ ᑕᑈᓐ ᐊᓐ ᑲ ᐃᔅᒋᔄᔨᓐ ᐊᑲ ᐅᓇᐸᒥᔨᓐ᙮ 18ᐱᑕᑕᒡ ᓇᐸᐅᒡ ᓴᔅ ᔅᒋ ᐎᒋᒪᐅᒡ ᑭᔭ ᐊᓐ ᓇᐸᐤ ᐊᓄᒡ ᑲ ᐎᒋᒥᑦ, ᐃᔭᐱᒡ ᓇᒪᔭᐤ ᐊᓐ ᒋᓇᐸᒻ᙮ ᑯᐃᔅᒄ ᒋᑦ ᐃᔅᒋᔄᓐ ᐊᓐ ᑲ ᐃᔅᒋᔄᔨᓐ᙮”
19ᐊᑯ ᐊᓐ ᐃᔎᐤ ᒂ ᐃᑕᑦ, “ᒧᔭᒻ ᒋᔾ ᐅᒋᔅᒋᐛᐃᒐᓱᐤ ᐊᐅᑯᓐ ᐊ ᐃᑕᔨᒥᑕᓐ᙮ 20ᐊᓂᔅᒐ ᒋ ᐛᐧᑯᒪᐊᑭᓄᐅᒡ ᒋ ᑎᑯᓯᓄᐅᒡ ᐊ ᐸᒋ ᐊᔭᒥᐊᔅᑐᐛᒡ ᒋᓴᒪᓂᑐᐛ ᐅᑕ ᐱᔅᑯᑎᓇᒡ᙮ ᒋᔨᐛᐤ ᒪᒃ ᒍᐤ ᐃᔪᒡ ᒧᔅ ᐊᐅᑯᓐ ᐊ ᐃᔅᒋᔄᔭᒄ, ᒥᒄ ᐊᓐᑕ ᒋᕈᓯᓕᒥᒡ ᐊᑯᑕ ᒐᒋ ᐊᔭᒥᐊᔅᑐᐛᑭᓄᐅᑦ ᒋᓴᒪᓂᑐᐤ᙮”
21ᒋᓴᔅ ᒂ ᐃᑕᑦ, “ᑕᑈᑐᐎ, ᒋᑭ ᐃᔅᐱᔪᐤ ᐊᔅᒄ ᒍᑕᐎᓄᐤ ᒐ ᐊᑲ ᐅᒋ ᐊᔭᒥᐊᔅᑐᐛᑭᓄᐅᑦ ᐅᑕ ᐱᔅᑯᑎᓇᒡ ᑭᔭ ᒪᒃ ᐊᓐᑕ ᒋᕈᓯᓕᒥᒡ᙮ 22ᒋᔨᐛᐤ ᓴᒪᕆᔭ ᑲ ᐅᒋᔭᒄ, ᒋ ᓄᒋᔅᑐᐛᐛᐤ ᒋᓴᒪᓂᑐᐤ ᐊᑎ ᒪᒃ ᐊᑲ ᒋᔅᒐᔨᒪᒄ᙮ ᓂᔭᓐ ᒍᐤ ᐃᔪᒡ, ᓂ ᒋᔅᒐᔨᒪᓇᓐ ᒋᓴᒪᓂᑐᐤ ᐊᓐ ᑲ ᐊᔭᒥᐊᔅᑐᐎᒋᑦ᙮ ᐛᔅ ᐊᓐᑕ ᒍᐤ ᐃᔪᒡ ᐊᑯᑕ ᒐ ᐅᒋᐱᔨᒡ ᒥᓯᐛ ᐊᐛᓐ ᒐᒋ ᐱᒪᒋᐊᑭᓄᐅᑦ᙮ 23ᐛᔅ ᓴᔅ ᐸᓱᓇᑯᓐ, ᑭᔭ ᐊᐅᑯᓐ ᓴᔅ ᐊ ᐃᔅᐱᔨᒡ, ᐊᓐᒡ ᒋᒋᐛ ᑲ ᐊᔭᒥᐊᔅᑐᐛᒡ ᐅᑕᐎᒪᐛ, ᐊᒐᐧᑯᒡ ᑭᔭ ᑕᑈᐅᓂᒡ ᐃᓯ ᐊᔭᒥᐊᔅᑐᐛᐅᒡ᙮ ᐊᐅᒄ ᐅᔭ ᐊ ᐃᓯ ᓂᑐᐛᔨᒪᑦ ᐊᐛᔪᐛ ᒐᒋ ᐃᓯ ᐊᔭᒥᐊᔅᑕᑯᑦ ᒍᑕᐎᓄᐤ᙮ 24ᐊᒐᐧᑯᐤ ᒋᓴᒪᓂᑐᐤ ᐊᑯ ᐊᓐᒡ ᑲ ᐊᔭᒥᐊᔅᑐᐛᒡ ᔭᐃᑕᔾ ᐊᒐᐧᑯᒡ ᑭᔭ ᑕᑈᐅᓂᒡ ᒋᐸ ᐃᓯ ᐊᔭᒥᐊᔅᑐᐛᐅᒡ᙮”
25ᐊᑯ ᐊᓐ ᐃᔎᐤ ᒂ ᐃᑕᑦ ᐊᓂᔭᔪᐛ ᒋᓴᓴ, “ᓂ ᒋᔅᒐᔨᑕᓐ ᐊᓂᔭᔪᐛ ᒋᓴᒪᓂᑐᐤ ᒐ ᐸᒋ ᐃᑎᓴᐛᑦ ᑎᑯᓯᓂᔨᒐ᙮ ᙭ ᐃᓯᓂᐧᑲᓱᔪᐛ᙮ ᑎᑯᓯᓂᔨᒐ ᒪᒃ ᒥᓯᐛ ᒐᒂᔪᐤ ᒋᑭ ᐎᑎᒪᑭᓄᐤ᙮”
26ᐊᑯ ᒋᓴᔅ ᒂ ᐃᓯ ᐎᑎᒧᐛᑦ, “ᐊᐅᑯᓐ ᓂᔾ, ᓂᔾ ᑲ ᐃᔨᒥᐃᑕᓐ᙮”
27ᐊᑯᑕ ᒂ ᐅᒋ ᑎᑯᓯᓂᔨᒋ ᒋᓴᔅ ᐅᒋᔅᒋᓄᐊᒧᐛᑭᓇ, ᓇᔅᒡ ᒪᒃ ᒋ ᓯᔅᒋᑯᒋᐃᑯᐅᒡ ᐊ ᐛᐱᒪᒡ ᒋᓴᓴ ᐊ ᐃᔨᒪᐊᔨᒋ ᐊᓂᔭ ᐃᔎᐛ᙮ ᐃᔭᐱᒡ ᒪᒃ ᓇᒪ ᐛᐛᒡ ᐸᐃᒄ ᐅᒋ ᑯᒂᒋᒪᐅᒡ ᒐᒂᔪᐤ ᐛᒋ ᐃᔨᒪᐊᔨᒋ ᐊᓂᔭ ᐃᔎᐛ ᑭᔭ ᓇᒪ ᐅᒋ ᑯᒂᒋᒪᐅᒡ ᒐᒂᔪᐤ ᑲ ᐊᔨᒧᑎᒥᔨᒋ᙮
28ᐊᑯ ᐊᓐ ᐃᔎᐤ ᒂ ᓂᑭᑕᐧᒃ ᐊᓂᔭ ᐅᒂᐱᑲᑭᓐ, ᒂ ᒋᐛᑦ ᐊᓐᑕ ᐅᑦ ᐃᑕᐅᓂᒡ ᐊᑯ ᒂ ᐃᑕᑦ ᐊᓂᔭ ᐃᔪᐛ ᐊᓐᑕ ᐊ ᑕᔨᒋ᙮ 29“ᐊᔅᑎᒧᒄ᙮ ᒐ ᐛᐱᒪᒄ ᐊᓐ ᓇᐸᐤ ᑲ ᐸᒋ ᐎᑎᒧᐅᑦ ᒥᓯᐛ ᑕᓐ ᑲ ᐃᑐᐅᒡ᙮ ᓇᒪᔭᐤ ᑲᑭᔭ ᐊᐅᒄ ᙭ ᐊᓂᔭ ᒋᐸ ᐸᒋ ᐃᑎᓴᐛᐤ ᒋᓴᒪᓂᑐᐤ ?” 30ᐊᑯ ᐊᓐᒡ ᐃᔪᒡ ᒂ ᐎᐎᒡ ᐊᓐᑕ ᐅᑕᓇᒡ ᒂ ᓂᑐᐛᐱᒪᒡ ᒋᓴᓴ᙮
31ᒪᒂᒡ ᒪᒃ ᐅ, ᒋᓴᔅ ᐅᒋᔅᒋᓄᐊᒧᐛᑭᓇ ᒋ ᐎ ᐊᔨᐧᑭᒥᐃᑯᐤ, “ᒋᔅᑯᑎᒪᒐᓱᐤ, ᒥᒋᓱᐤ,” ᐊ ᐃᑎᑯᑦ᙮
32ᒋᓴᔅ ᒂ ᐃᑕᑦ, “ᓂ ᑭᓄᐛᔨᑕᓐ ᐛᔅ ᐊᓐ ᒥᒋᒻ ᐊᑲ ᒋᔅᒐᔨᑎᒪᒄ᙮”
33ᐊᑯ ᒂ ᑯᒂᒋᒥᑐᒡ, “ᒋ ᐸᑐᑐᐛᐤ ᑲᑭᔭ ᐊᐛᓐ ᒐᒂᔪᐤ ᒐᒋ ᒥᒋᔨᒋ ?”
34ᒋᓴᔅ ᒂ ᐃᑕᑦ, “ᒐᒋ ᐃᑐᑎᒧᒡ ᐅᑦ ᐃᑕᔨᑎᒧᐅᓐ ᐊᓐ ᑲ ᐸᒋ ᐃᑎᓴᐅᑦ ᑭᔭ ᒐᒋ ᒋᔅᑕᐅᒡ ᐊᓂᔭ ᑲ ᐃᓯ ᓂᑐᐛᔨᒥᑦ ᒐᒋ ᐃᑐᑎᒧᒡ ᐊᐅᑯᓐ ᐊᓐ ᒧᔭᒻ ᓂᒥᒋᒻ ᐊ ᐃᑕᔨᑎᒪᓐ᙮ 35ᒋᑦ ᐃᔅᒋᔄᓇᐛᐤ, ‘ᓇᐤ ᐱᓯᒺ ᐊᑯ ᐃᔭᒄ ᒐᒋ ᒪᒧᓴᒋᓂᑭᓄᐅᒋ ᓂᑕᐅᒋᑕᑭᓇ᙮’ ᒥᒄ ᒪᒃ ᓂᔾ ᒋᑦ ᐃᑎᓇᐛᐤ, ᓇᑕ ᒪ ᐃᔭᒂ ᐃᑕᐱᒄ᙮ ᒧᔭᒻ ᐊ ᐃᓯᓇᒂᒡ ᐊᓐᑕ ᑲ ᓂᑕᐅᒋᑕᑭᓄᐅᒡ ᓴᔅ ᐊᒋ ᐃᓯ ᓂᑕᐅᒋᒋ ᐊᓂᔭᔪᐛ ᓂᑕᐅᒋᑕᑭᓇ ᑭᔭ ᒥᒄ ᒐ ᒪᒧᓴᒋᓂᑭᓄᐅᒋ, ᐊᐅᑯᓐ ᒧᔭᒻ ᒐ ᐃᓯᓇᑯᓯᒡ ᐊᓐᒡ ᐊᐛᓐᒋ ᒐ ᑕᑈᑕᒡ ᒥᔽᒋᒧᐅᓂᔪᐤ ᐸᑕᒂᐛ᙮ 36ᐊᓐ ᑲ ᒪᒧᓴᒋᓇᐧᒃ ᐊᓂᔭ ᓂᑕᐅᒋᑕᑭᓇ ᒋᓯᐧᑯᐛᑭᓄᐤ᙮ ᒧᔭᒻ ᐊᓐ ᐊᐛᓐ ᑲ ᐎᒋᐊᑦ ᐊᐛᔪᐛ ᒐᒋ ᐊᔭᔨᒋ ᑲᒋᒡ ᐱᒪᑎᓯᐅᓂᔪᐤ ᐊᐅᑯᓐ ᐊ ᐃᓯᓇᑯᓯᑦ᙮ ᐊᑯ ᒪᒃ ᐊᓐ ᑲ ᓂᑕᐅᒋᑕᑦ ᑭᔭ ᐊᓐ ᑲ ᒪᒧᓴᒋᓇᐧᒃ ᐊᓂᔭ ᓂᑕᐅᒋᑕᑭᓇ ᑕᐱᔅᑯᓐ ᒐ ᒥᔽᔨᑕᒡ ᐛᔅ ᑕᐱᔅᑯᓐ ᒋ ᐊᑐᔅᒐᐅᒡ᙮ 37ᑕᑈᓄᐤ ᑲ ᐃᓇᓄᐅᒡ, ‘ᐸᐃᒄ ᒋᑭ ᓂᑕᐅᒋᑕᐤ ᐊᑯ ᐊᓐ ᑯᑎᒃ ᒐ ᒪᒧᓴᒋᓇᐧᒃ ᐊᓂᔭ ᓂᑕᐅᒋᑕᑭᓇ᙮’ 38ᓴᔅ ᑯᑎᑭᒡ ᒋ ᓂᑕᐅᒋᑕᐅᒡ ᑭᔭ ᒋ ᒥᔅᑎ ᐊᑐᔅᒐᐅᒡ ᐊᓐᑕ ᑲ ᓂᑕᐅᒋᑕᑲᓄᐎᒡ᙮ ᐊᑯ ᒪᒃ ᐊ ᐃᑎᓴᐅᑎᑯᒡ ᒐᒋ ᒪᒧᓴᒋᓂᒪᒄ ᐊᓂᔭ ᓂᑕᐅᒋᑕᑭᓇ᙮ ᓇᒪᔭᐤ ᒋᔾ ᑲ ᓂᑕᐅᒋᑕᔨᓐ ᒥᒄ ᒪᒃ ᐃᔭᐱᒡ ᒋ ᐎᒋᐃᑯᐛᓐ ᐊᓂᔭ ᑲ ᐃᑕᐱᑎᓯᒡ᙮” ᐊᐅᑯᓐ ᑲ ᐃᑕᑦ ᒋᓴᔅ ᐅᒋᔅᒋᓄᐊᒧᐛᑭᓇ᙮
39ᒥᒐᑦ ᓴᒪᕆᔭ ᐃᔪᒡ ᐊᓐᑕ ᐊᓂᔭ ᐅᑕᓇᔪᐤ ᑲ ᐅᒋᒡ ᒋ ᑕᑈᔭᔨᒪᐅᒡ ᒋᓴᓴ᙮ ᐛᔅ ᒋ ᐃᑕᐤ ᐊᓐ ᐃᔎᐤ, “ᒥᓯᐛ ᓂᒋ ᐎᑎᒪᒄ ᑕᓐ ᑲ ᐸᒋ ᐃᑐᐅᒡ᙮” 40ᐃᔅᐱ ᐊᓐᒡ ᐃᔪᒡ ᐊᓐᑕ ᓴᒪᕆᔭ ᐊᔅᒋᒡ ᑲ ᐅᒋᒡ ᑲ ᐸᒋ ᓂᑐᐛᐱᒪᒡ ᒋᓴᓴ ᐊᓐᑕ ᐅᑕᐃᐸᓂᒡ, ᒋ ᐊᔨᐧᑭᒥᐊᐅᒡ ᒐᒋ ᑕᔨᒋ ᐊᓐᑕ ᐊ ᑕᒡ᙮ ᓂᓱ ᒋᓯᑲᐛ ᒪᒃ ᐊᓐᑕ ᒋ ᑕᐤ ᒋᓴᔅ᙮
41ᒥᒐᑦ ᒪᒃ ᐊᐛᓐᒋ ᒋ ᑕᑈᔭᔨᒪᐅᒡ ᒋᓴᓴ, ᐃᔅᐱ ᐱᔭᑐᐛᒡ ᑕᓐ ᑲ ᐃᔅᒋᔄᔨᒋ᙮
42ᒂ ᐃᑕᒡ ᐊᓂᔭ ᐃᔎᐛ, “ᐊᑯ ᑎᔭᑈᑎᒪᒡ, ᓂᔭᓐ ᐛᒋᒡ ᐊᒋ ᐸᑐᐅᒋᑦ, ᓇᒪ ᒥᒄ ᒋᔾ ᐊᒋ ᐃᔅᒋᔄᔨᓐ᙮ ᐊᑯ ᒪᒃ ᒋᔭᔅᑎᓇᑕᔨᑎᒪᒡ ᐎᔾ ᐊᐅᒄ ᒐᒋ ᐱᒪᒋᐊᑦ ᒥᓯᐛ ᐊᐛᔪᐛ᙮”
ᒋᓴᔅ ᑲ ᒥᓏᒋᐊᑦ ᒋᓴᐅᒋᒪᐤ ᐊᐱᒋᐊᑭᓇ ᐅᑯᓯᔪᐛ
43ᐃᔅᐱ ᒪᒃ ᓂᓱ ᒋᓯᑲᐛ ᑲ ᑕᑦ ᒋᓴᔅ ᐊᓐᑕ ᓴᒪᕆᔭ ᐊᔅᒋᒡ, ᐊᑯ ᐊᓐᑕ ᑲᓕᓕ ᐊᔅᒋᒡ ᒂ ᐃᑐᑕᑦ᙮ 44ᐛᔅ ᒋ ᐃᔅᒋᔄᒐ ᒋᓴᔅ, “ᓇᒪ ᒋᔅᑕᔨᒪᑭᓄᐤ ᐅᒋᔅᒋᐛᐃᒐᓱᐤ ᐊᓐᑕ ᐊᓂᔭ ᐊᔅᒋᔪᐤ ᑲ ᐅᒋᑦ᙮” 45ᐃᔅᐱ ᒪᒃ ᑲ ᑎᑯᓯᐧᒃ ᐊᓐᑕ ᑲᓕᓕ ᐊᔅᒋᒡ, ᐊᓐᒡ ᐃᔪᒡ ᐊᓐᑕ ᑲ ᐎᒋᒡ ᓇᔅᒡ ᒋ ᒥᔽᔨᑎᒧᒡ ᐊ ᐛᐱᒪᒡ᙮ ᑭᔭ ᐎᔨᐛᐤ ᒋ ᐃᑐᑕᐛᑯᐱᓇᓂᒡ ᒋᕈᓯᓕᒥᒡ ᒪᒂᒡ ᐊᓐᑕ ᑲ ᒥᑯᓴᓄᐎᒡ, ᒥᓯᐛ ᒪᒃ ᒋ ᐛᐸᑎᒧᐛᐅᒡ ᑕᓐ ᑲ ᐃᑎᔨᒋ ᐊᓐᑕ᙮
46ᐊᑯ ᒥᓐ ᑲᐤ ᒂ ᐃᑐᑕᑦ ᐊᓐᑕ ᑲᐃᓇᒡ ᑲᓕᓕ ᐊᔅᒋᒡ ᑲ ᑎᒂᒡ ᐅᑕᓇᐤ, ᐊᓐᑕ ᑲ ᐃᑐᑕᐧᒃ ᓂᐱᔪᐤ ᒐᒋ ᓱᒥᓇᐳᓂᔨᒡ᙮ ᐊᑯᑕ ᑲ ᑕᑦ ᓇᐸᐤ ᐊ ᐅᒋᒪᐅᑦ᙮ ᐊᓐ ᐅᒋᒪᐤ ᒋ ᑕᔪᐛ ᐅᑯᓴ, ᐊ ᐊᐧᑯᓯᔨᒋ, ᐊᓐᑕ ᒪᒃ ᑲᐳᕐᓇᐊᒻ ᐅᑕᓇᒡ ᒋ ᑕᔪᐛ ᒪᒂᒡ᙮ 47ᐃᔅᐱ ᐱᔭᑕᐧᒃ ᐊᓐ ᐅᒋᒪᐤ ᐊᒋ ᑎᑯᓯᓂᔨᒋ ᒋᓴᓴ ᐊᓐᑕ ᑲᓕᓕ ᐊᔅᒋᒡ, ᐊᓐᑕ ᒍᑎᔭ ᐊᔅᒋᒡ ᐊ ᐅᑐᑕᑦ, ᒋ ᓂᑐᐛᐱᒪᐤ ᐊᑯ ᒂ ᐊᔨᐧᑭᒥᐊᑦ ᒐᒋ ᐃᑐᑕᔨᒋ ᐊᓐᑕ ᑲᐳᕐᓇᐊᒥᒡ, ᒐᒋ ᒥᓏᒋᐊᔨᒋ ᐊᓂᔭ ᐅᑯᓴ, ᐛᔅ ᓴᔅ ᒐᑲᑦ ᓇᒪ ᐅᒋ ᐱᒪᑎᓯᔪᐛ᙮ 48ᒋ ᐃᑎᑯᐤ ᒪᒃ ᒋᓴᓴ, “ᓇᒪ ᓂᑕ ᒋᑭ ᐅᒋ ᐎ ᑕᑈᑕᓇᐛᐤ ᐸᑐᔅ ᐛᐱᒥᔭᒂ ᒪᒥᔅᑲᒡ ᐛᐸᑎᔨᐛᐅᓇ ᐊ ᐛᐸᑎᔨᐛᔭᓐ ᑭᔭ ᐊ ᐃᑐᑎᒪᓐ ᐊ ᒪᒥᔅᑲᑕᔨᑕᒂᒋ ᒐᒂᔪᐛ᙮”
49ᐊᑯ ᐊᓐ ᓇᐸᐤ ᒂ ᐃᓯ ᐎᑎᒧᐛᑦ, “ᐅᑎᐸᔨᒋᒐᐤ, ᐊᔅᑎᒻ ᒪ ᐸᒋ ᐃᑐᑕ ᓂᒋᒡ ᐊᔅᒄ ᐊᑲ ᐳᓂᐱᒪᑎᓯᑦ ᓂᑯᔅ᙮”
50ᐊᑯ ᒋᓴᔅ ᒂ ᐃᓯ ᐎᑎᒧᐛᑦ, “ᒪᒋ ᒋᐛ, ᒋᑭ ᐱᒪᑎᓯᐤ ᐛᔅ ᐊᓐ ᒋᑯᔅ᙮” ᒋ ᑕᑈᑎᒻ ᒪᒃ ᑕᓐ ᑲ ᐃᑕᑭᓄᐅᑦ ᐊᓐ ᓇᐸᐤ, ᐊᑯ ᒂ ᒋᐛᑦ᙮ 51ᒪᒂᒡ ᒪᒃ ᐊ ᐃᔅᐱᓯᐱᔨᑦ ᐊ ᒋᐛᑦ, ᒋ ᓂᒋᐃᑯᐤ ᐊᓂᔭ ᐅᑦ ᐊᐱᒋᐊᑭᓇ ᐊᑯ ᒂ ᐃᑎᑯᑦ, “ᓴᔅ ᒥᔪ ᐱᒪᑎᓯᐤ ᒋᑯᔅ᙮”
52ᐊᑯ ᐊᓐ ᓇᐸᐤ ᒂ ᑯᒂᒋᒐᒧᑦ ᑕᓐ ᑲ ᐃᔅᐱᓯᒋᓯᑲᔨᒡ ᐊᓐᑕ ᑲ ᐅᒋ ᒥᔪ ᐱᒪᑎᓯᔨᒋ ᐊᓂᔭ ᐅᑯᓴ᙮ ᐊᑯ ᒂ ᐃᑕᑭᓄᐅᑦ, “ᐅᑕᑯᓯᒡ, ᐊ ᐃᔎᐱᑕᒋᓯᑲᔨᒡ ᐊᑯᑕ ᑲ ᐳᓂᐱᔨᒡ ᐊ ᒋᓯᑕᐅᐱᔨᑦ᙮”
53ᐊᑯ ᐊᓐ ᓇᐸᐤ ᒂ ᒋᔅᒋᓯᑦ ᐊᐅᑯᓐ ᐊᓐ ᑲ ᐃᔅᐱᓯᒋᓯᑲᔨᒡ ᑲ ᐃᑎᑯᑦ ᒋᓴᓴ, “ᒋᑭ ᐱᒪᑎᓯᐤ ᐛᔅ ᐊᓐ ᒋᑯᔅ᙮” ᐊᑯᑕ ᒪᒃ ᑲ ᐅᒋ ᑕᑈᑕᐧᒃ ᑭᔭ ᒥᓯᐛ ᐊᐛᔪᐛ ᐊᓐᑕ ᐊ ᐸᐃᑯᔅᑲᓇᓯᑦ ᐊᑯᑕ ᒂ ᐅᒋ ᑕᑈᑎᒥᔨᒋ᙮
54ᐊᐅᒄ ᒪᒃ ᐅᔭ ᓂᔄᐤ ᑲ ᒪᒥᔅᑲᒡ ᐃᑎᑦ ᒋᓴᔅ ᐊ ᑎᑯᓯᐧᒃ ᐊᓐᑕ ᑲᓕᓕ ᐊᔅᒋᒡ, ᐊᓐᑕ ᒍᑎᔭ ᐊᔅᒋᒡ ᐊ ᐅᑐᑕᑦ᙮
اکنون انتخاب شده:
ᒠᓐ 4: ᓇᔅᑲᐱ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada