ᓗᒃ 21
21
ᑲ ᐸᐃᑯᓯᑦ ᐃᔎᐤ ᐅᐱᔅᑎᓂᒐᐅᓐ
ᒪᕐᒃ 12.41-44
1ᒪᒂᒡ ᒪᒃ ᒋᓴᔅ ᐊ ᐃᑕᐱᑦ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᒋ ᐛᐱᒪᐤ ᐊ ᐛᔪᑎᓯᔨᒋ ᐊᐛᔪᐛ ᐊ ᐱᔅᑎᓂᒥᔨᒋ ᓱᓇᔭᔪᐤ ᐊᓐᑕ ᑲᒋ ᐱᔅᑎᓂᑭᓄᐎᒡ ᓱᓇᔭᔪᐤ᙮ 2ᐊᑯ ᑭᔭ ᒂ ᐛᐱᒪᑦ ᐊ ᐸᐃᑯᓯᔨᒋ ᐃᔎᐛ ᐊ ᒋᔅᑎᒪᑎᓯᔨᒋ ᐊ ᐱᔅᑎᓇᔨᒋ ᓂᓱ ᓱᓇᔭᐱᔅᑯᓴ᙮ 3ᒋ ᐃᑕᐤ ᒪᒃ, “ᑕᑈ ᒋᑦ ᐃᑎᓇᐛᐤ, ᐊᓂᔭ ᑲ ᐃᔅᐱᔅ ᐱᔅᑎᓂᒐᑦ ᐊᓐ ᑲ ᐸᐃᑯᓯᑦ ᐃᔎᐤ ᑲ ᒋᔅᑎᒪᑎᓯᑦ ᐊᑐᐎᔅ ᒥᓴᔪᐤ ᐎᔾ ᐅᐱᔅᑎᓂᒐᐅᓐ ᐃᔅᐱᔅ ᐊᓐᒡ ᑯᑎᑭᒡ ᑲ ᐱᔅᑎᓂᒐᒡ᙮ 4ᐛᔅ ᐊᓐᒡ ᑯᑎᑭᒡ ᑲ ᐱᔅᑎᓇᒡ ᐊᔪᐱᔪᐅᒡ ᐊᓂᔭ ᓱᓇᔭᔪᐤ ᐱᔅᑎᓂᒧᒡ᙮ ᐅ ᒪᒃ ᑲ ᐸᐃᑯᓯᑦ ᐃᔎᐤ, ᐊᑎ ᐊ ᒋᔅᑎᒪᑎᓯᑦ ᒋ ᐱᔅᑎᓂᒻ ᒥᓯᐛ ᐊᓂᔭ ᐅᓱᓇᔭᓂᒻ ᐊᓂᔭ ᒋᐸ ᐅᒋ ᐱᒪᒋᐃᓱᐤ᙮”
ᒋᓴᔅ ᑲ ᐊᔨᒧᑕᐧᒃ ᒐ ᓂᓱᐅᓇᑎᓂᔨᒡ ᒋᓴᐊᔭᒥᐊᐅᒋᐛᐱᔪᐤ
ᒪᑎᔪᐤ 24.1,2; ᒪᕐᒃ 13.1,2
Luke 21.5-19 (Proper-28 Year C)
5ᐱᔅᒐ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᐊᔨᒧᑎᒧᒡ ᐊᔅᐱᔅ ᒥᔽᓯᔨᒡ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ ᐊ ᒥᔪᓯᔨᒋ ᐊᓯᓂᔭ ᐊᒋ ᐊᐱᒋᐊᑭᓄᔨᒋ, ᑭᔭ ᐊᓂᔭ ᑲ ᐃᓯ ᒥᔽᓯᔨᒋ ᒥᔨᐛᐅᓇ ᐃᔪᒡ ᑲ ᐱᔅᑎᓂᒧᐛᒡ ᒋᓴᒪᓂᑐᐛ᙮ 6ᒋᓴᔅ ᒪᒃ ᒋ ᐃᔅᒋᔄᐤ, “ᐅᔭ ᑲ ᐛᐸᑎᒪᒄ ᒐᒂᔪᐛ ᐊᔅᒄ ᒋᑭ ᐅᑎᒋᐱᔪᐤ ᒥᓯᐛ ᒐ ᓂᓱᐅᓇᑎᒋ᙮ ᓇᒪ ᐛᐛᒡ ᐸᐃᒄ ᐊᓯᓂᔾ ᒋᑭ ᐅᒋ ᐊᑯᑐᐳᐤ ᑯᑎᑲ ᐊᓯᓂᔭ ᐊᓂᔭ ᑕᓐ ᑲ ᐃᑕᐊᑭᓄᐅᑦ᙮ ᒥᓯᐛ ᐊᓯᓂᔨᒡ ᑲ ᐃᓯ ᐊᐱᒋᐊᑭᓄᐎᒡ ᑲ ᐅᓯᑕᑭᓄᐅᒋ ᐅᔭ ᒥᒋᐛᐸ ᒋᑭ ᓂᑎᒋᐛᐱᓇᑭᓄᐎᒡ᙮”
ᑕᓐ ᒐ ᐃᓯ ᒥᒋᐱᔨᒡ
ᒪᑎᔪᐤ 24.3-14; ᒪᕐᒃ 13.3-13
7ᐊᓐᒡ ᒪᒃ ᒋᔅᒋᓄᐊᒧᐛᑭᓐᒡ ᒋ ᑯᒂᒋᒪᐅᒡ ᒋᓴᓴ ᐊ ᐃᑕᒡ, “ᒋᔅᑯᑎᒪᒐᓱᐤ, ᑕᐃᔅᐱ ᒐ ᐃᔅᐱᔨᒡ ᐅ᙮ ᑕᓐᑕ ᒐᒋ ᐅᒋ ᒋᔅᒐᔨᑎᒪᒡ ᓴᔅ ᐊ ᐅᑎᒋᐱᔨᒡ ᐊ ᐃᔅᐱᔨᒡ ᐅ ?”
8ᒋᓴᔅ ᒪᒃ ᒋ ᐃᑕᐤ, “ᐃᔭᒂᒥᒄ ᐊᑲ ᐊᐛᓐ ᒐᒋ ᐎᔭᓯᒥᑕᒄ᙮ ᐛᔅ ᒋᑭ ᒥᒐᑐᐅᒡ ᐊᐛᓐᒋ ᐊ ᑎᑯᓯᒡ ᓂᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᒡ ᐊ ᐃᔅᒋᔄᒡ, ᐊᐅᒄ ᓂᔾ ᙭᙮ ᒥᒐᑦ ᒪᒃ ᐊᐛᔪᐛ ᒋᑭ ᐎᔭᓯᒪᐅᒡ᙮ ᑭᔭ ᒋᑭ ᐃᔅᒋᔄᐅᒡ, ᓴᔅ ᐸᓱᓇᑯᓐ ᒐ ᐃᔅᐱᔨᒋ ᐅᔭ ᒐᒂᔪᐛ᙮ ᐊᑲᐎᔾ ᒪᒃ ᒋᑭ ᐅᒋ ᓇᓴᐛᐛᐅᒡ ᐅᒡ᙮ 9ᐸᑎᒪᒂ ᐊ ᓂᑐᐱᔨᓇᓄᐅᒡ, ᒪᒃ ᐊ ᒪᓯᐧᑲᑐᓇᓄᐅᒡ ᐊᑲᐎᔾ ᒋᑭ ᐅᒋ ᓴᒋᓯᓇᐛᐤ᙮ ᐛᔅ ᐊᐅᒄ ᔭᐃᑕᔾ ᓂᔅᑎᒻ ᒐ ᐃᔅᐱᔨᒡ, ᒥᒄ ᒪᒃ ᓇᒪ ᐊᔅᒄ ᒋᑭ ᐅᒋ ᐅᑎᒋᐱᔪᐤ ᐊ ᐃᔎᐱᔨᒡ᙮”
10ᒥᓐ ᒂ ᐊᑎ ᐃᔅᒋᔄᑦ, “ᐸᐃᑯᓄᒡ ᑲ ᐃᑎᔅᑲᓇᓯᒡ ᐊᐛᓐᒋ ᒋᑭ ᒪᓯᐧᑲᑐᐅᒡ ᐊᓂᔭᔪᐛ ᑯᑎᑲ ᐊᐛᔪᐛ ᐃᔭᒡ ᑲ ᐃᑎᔅᑲᓇᓯᔨᒋ᙮ ᑭᔭ ᐊᓐᒡ ᑲ ᐅᒋᒪᐅᒡ ᒋᑭ ᓂᑐᐱᔨᑐᐛᐅᒡ ᐊᓂᔭ ᑯᑎᑲ ᑲ ᐅᒋᒪᐎᔨᒋ᙮ 11ᑭᔭ ᒥᓯᐛ ᐊ ᐃᔅᐱᑎᔅᑭᒥᑲᒡ ᐅ ᐊᔅᒋᔾ, ᓂᓇᐧᑯᐤ ᐊᓐᑕ ᒋᑭ ᑯᐃᐧᑯᓐ ᑭᔭ ᒋᑭ ᑯᐧᑭᑕᓄᐤ, ᑭᔭ ᒥᔅᑎ ᐊ ᒪᔭᑎᒡ ᐊᐧᑯᓱᐅᓐ ᒋᑭ ᑎᑯᓐ᙮ ᑭᔭ ᒋᑭ ᓄᑯᓇ ᒋᔅᒋᓄᐛᐸᑎᔨᐛᐅᓇ ᐊ ᑯᔅᑕᑎᒂᒋ ᐊᓐᑕ ᒋᓯᑯᒡ᙮”
12“ᐊᔅᒄ ᒪᒃ ᐊᑲ ᐃᔅᐱᔨᒋ ᐅᔭ ᒐᒂᔪᐛ, ᒋᑭ ᒪᑯᓂᑯᓇᐛᐤ ᐊᑯ ᒐ ᓂᓇᐧᑲᒋᐃᑯᐅᔭᒄ᙮ ᒋᑭ ᐃᑐᑕᐃᑯᐛᐅᒡ ᐅᑦ ᐊᔭᒥᐊᐅᒋᐛᐳᐛᒡ ᒐ ᑎᐸᔅᑯᓂᑕᑯᒡ, ᐊᑯ ᒐ ᒋᐸᐅᑕᑯᒡ᙮ ᑭᔭ ᒋᑭ ᐃᑐᑕᐃᑯᐛᐅᒡ ᒋᓴᐅᒋᒪᐛ ᑭᔭ ᒋᓴᐅᒋᒪᓴ ᒐᒋ ᑎᐸᔅᑯᓂᑕᑯᒡ ᓂᔾ ᐅᒋ ᐊ ᐸᒋ ᓇᓴᐎᔭᒄ᙮ 13ᐅ ᒪᒃ ᐃᑐᑕᑯᐅᔭᒂ, ᐊᑯᑕ ᒐ ᐅᒋ ᒥᔪᐱᔭᒄ ᒐᒋ ᐎᑎᒧᐛᑯᒡ ᒥᔽᒋᒧᐅᓂᔪᐤ ᐊᓐᒡ ᐅᒋᒪᐅᒡ᙮ 14ᓂᑲᓐ ᒋᐸ ᐎᔭᔨᑕᓇᐛᐤ ᒐ ᐊᑲ ᐅᒋ ᐊᔨᒪᔨᑎᒪᒄ ᑕᓐ ᒐ ᐃᓯ ᐎᑎᒧᐛᑯᒡ᙮ 15ᐛᔅ ᒋᑭ ᐎᑎᒪᑎᓇᐛᐤ ᑕᓐ ᒐ ᐃᔅᒋᔄᔭᒄ ᑭᔭ ᑭᒐᑕᐛᔨᑎᒧᐅᓐ ᒋᑭ ᒥᔨᑎᓇᐛᐤ ᒐᒋ ᑭᒐᑕᐛᔨᑎᒧᑕᑯᓯᔭᒄ ᐃᔨᒥᔭᒂ, ᑭᔭ ᐊᓐᒡ ᑲ ᐛᐧᑲᑎᑕᑯᒡ ᓇᒪ ᒋᑭ ᒋ ᐊᓏᑎᒧᒡ ᒐ ᐃᔅᒋᔄᐛᒄ᙮ 16ᐛᐛᒡ ᒋᓂᒋᐃᑯᐛᐅᒡ, ᒋᐧᑲᓂᓱᐛᐅᒡ ᒋᐛᐧᑯᒪᑭᓄᐛᐅᒡ, ᑭᔭ ᒋᐎᒐᐛᑭᓄᐛᐅᒡ ᒋᑭ ᐃᑐᑕᐃᑯᐛᐅᒡ ᑎᐸᔅᑯᓂᒐᐅᒋᐛᐱᒡ, ᒋᑭ ᑐᑕᑯᐛᐅᒡ ᐱᔅᒐ ᐊᓐᑕ ᐊ ᑎᓯᔭᒄ ᒐᒋ ᓂᐸᐃᑯᐛᒄ᙮ 17ᒥᓯᐛ ᐊᐛᓐ ᒋᑭ ᐛᐧᑲᑎᑯᐛᐤ ᐊ ᓇᓴᐎᔭᒄ᙮ 18ᒥᒄ ᒪᒃ ᐃᔭᐱᒡ ᒋᑭ ᒥᔪᐱᔨᓇᐛᐤ, ᓇᒪ ᐛᐛᒡ ᐸᐃᒂᐸᒡ ᒋᐱᔎᐅᓄᐛᐛ ᒋᑭ ᐅᒋ ᐅᓂᑕᓇᐛᐤ᙮ 19ᒋᑭ ᐊᔭᓇᐛᐤ ᒋᒋᐛ ᐱᒪᑎᓯᐅᓐ ᐊᑲ ᓄᑎᐳᓂᔭᒂ ᐊ ᓇᓴᐎᔭᒄ᙮”
ᒋᓴᔅ ᑲ ᐊᔨᒧᑕᐧᒃ ᒋᕈᓯᓕᒥᔪᐤ ᒐ ᓂᓱᐅᓇᒋᑕᑭᓄᐎᒡ
ᒪᑎᔪᐤ 24.15-21; ᒪᕐᒃ 13.14-19
20“ᐃᔅᐱ ᒪᒃ ᐛᐱᒪᒂᐛ ᐊᓯᒪᑭᓂᓯᒡ ᐊ ᐛᔅᑲᑲᐳᔅᑕᒡ ᒋᕈᓯᓕᒥᔪᐤ, ᐊᑯ ᒐ ᒋᔅᒐᔨᑎᒪᒄ ᓴᔅ ᐊ ᐸᓱᓇᒂᒡ ᒐ ᓂᓱᐅᓇᒋᑕᑭᓄᐎᒡ᙮ 21ᐊᑯ ᒪᒃ ᐊᓐᒡ ᐃᔪᒡ ᑲ ᑕᒡ ᐊᓐᑕ ᒍᑎᔭ ᐊᔅᒋᒡ, ᐊᓐᑕ ᐱᔅᑯᑎᓇᒡ ᒋᑭ ᐃᑎᓯᒧᒡ᙮ ᐊᑯ ᐊᓐᒡ ᐊᓐᑕ ᒋᕈᓯᓕᒥᒡ ᑲ ᑕᒡ ᒐᔅᑎᓄᐤ ᒋᑭ ᐎ ᓂᑭᑎᒧᒡ ᐊᓂᔭ ᐅᑕᓇᔪᐤ᙮ ᐊᑯ ᐊᓐᒡ ᐊᑲ ᒪᒂᒡ ᐃᑕᑥᐛ ᐊᓐᑕ ᐊᓂᔭ ᐅᑕᓇᔪᐤ, ᐊᑲᐎᔾ ᒥᓐ ᒋᑭ ᐅᒋ ᐃᑐᑕᐅᒡ ᐊᓐᑕ᙮ 22ᐊᐅᒄ ᒪᒃ ᐅ ᒐ ᐅᑎᒋᐱᔨᒡ ᐃᔪᒡ ᒐ ᐛᐛᓯᐊᑭᓄᐎᒡ ᐊᓂᔭ ᑲ ᐃᓯ ᒥᒋᑐᑕᒡ ᐛᔅ ᐊᐅᒄ ᑲ ᐃᓯ ᓂᑲᓐ ᐎᑕᒂᒡ ᒐ ᐃᓯ ᑎᐱᐱᔨᒡ᙮ 23ᑕᑈ ᒋᑭ ᐊᔨᒥᐅᐅᒡ ᐊᓐᒡ ᒪᒂᒡ ᑲ ᑭᓄᐛᔨᒪᓱᒡ ᑭᔭ ᐊᓐᒡ ᑲ ᓄᓴᓂᐊᐅᓱᒡ ᐊᓂᔭᔪᐛ ᐊ ᒋᓯᑲᔨᒋ᙮ ᒋᒋᐛ ᒋᑭ ᐊᔨᒥᓂᔪᐤ ᐊᓐᒡ ᐃᔪᒡ ᐅᑕ ᐊᔅᒋᒡ ᐊ ᑕᒡ᙮ ᐛᔅ ᒋᓴᒪᓂᑐᐛ ᐅᑦ ᐊᐧᑯᔪᐛᓱᐅᓂᔪᐤ ᓇᔅᒡ ᒋᑭ ᒪᑎᑯᔅᑲᑯᒡ᙮ 24ᐱᔅᒐ ᐊᐛᓐᒋ ᓂᑐᐱᔪᐅ-ᒧᐧᑯᒪᓂᔪᐤ ᒋᑭ ᐊᐱᑎᓂᔪᐤ ᐊ ᓂᐸᐊᑭᓄᐎᒡ᙮ ᐊᑯ ᑯᑎᑭᒡ ᒐ ᒪᑯᓇᑭᓄᐎᒡ, ᓂᓇᐧᑯᐤ ᐊᔅᒋᒡ ᒐ ᐃᑐᑕᐊᑭᓄᐎᒡ᙮ ᐊᑯ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᓇᔅᒡ ᒋᑭ ᐎ ᓂᓱᐅᓇᒋᑕᐅᒡ ᒋᕈᓯᓕᒥᔪᐤ, ᐸᑐᔅ ᒋᓴᒪᓂᑐᐛ ᒋᑕᐊᒪᑯᑥᐛ᙮”
ᒋᓴᔅ ᒥᓐ ᒐ ᑎᑯᓯᐧᒃ
ᒪᑎᔪᐤ 24.29-31; ᒪᕐᒃ 13.24-27
Luke 21.25-36 (Advent-1 Year C)
25“ᒋᑭ ᓄᑯᓇ ᒋᔅᒋᓄᐛᐸᑎᔨᐛᐅᓇ ᐊᓐᑕ ᐱᓯᒧᒡ, ᑎᐱᔅᑲᐤ ᐱᓯᒧᒡ, ᑭᔭ ᐊᓐᑕ ᐅᒐᑭᑕᐧᑯᒡ, ᐊ ᐎᑎᒪᑯᔭᒄ ᒐᒂᓐ ᒐ ᐃᔅᐱᔨᒡ ᒐᒋ ᐃᔭᒂᒥᔭᒄ᙮ ᒥᓯᐛ ᐊ ᐃᑎᔅᑲᓇᓯᑦ ᐊᐛᓐ ᐅᑕ ᐊᔅᒋᒡ ᒋᑭ ᓴᒋᓱᐤ᙮ ᒋᑭ ᓴᒋᐃᑯᐅᒡ ᑕᓐ ᒐ ᐃᑎᑕᑯᓂᔨᒡ ᐎᓂᐸᑯᔪᐤ᙮ 26ᒋᑭ ᐊᒂᑕᔨᑎᒧᒡ ᐃᔪᒡ ᐊ ᐃᔅᐱᔅ ᑯᔅᑕᒋᒡ ᐊ ᒪᒥᑐᓇᔨᑕᒡ ᑕᓐ ᐊᔅᒄ ᒐ ᐃᔅᐱᔨᒡ ᐅᔭᔪᐤ ᐊᔅᒋᔪᐤ᙮ ᑭᔭ ᒥᓯᐛ ᒐᒂᓐ ᐊᓐᑕ ᒋᓯᑯᒡ ᐊ ᑎᒂᒡ ᒋᑭ ᐊᒋᐱᔪᐤ᙮ 27ᐊᑯ ᒪᒃ ᒐ ᐛᐱᒪᑭᓄᐅᑦ ᐃᔪᐤ ᐅᑯᓯᓴᓐ ᐊ ᐸᒋ ᔭᓯᑦ ᑭᔅᑯᐅᓂᔅᑯᒡ, ᓇᔅᒡ ᐊ ᓄᑯᓂᔨᒡ ᐅᓱᐧᑲᑎᓯᐅᓐ ᑭᔭ ᐅᒋᔅᑕᔨᑕᑯᓱᐅᓐ᙮ 28ᐃᔅᐱ ᒪᒃ ᒋᒋᐱᔨᒐ ᐊ ᐃᔅᐱᔨᒋ ᐅᔭ ᒐᒂᔪᐛ, ᓱᒃ ᐃᔅᐱᒥᒡ ᐃᑕᐱᒄ, ᐛᔅ ᓴᔅ ᐸᓱᓇᑯᓐ ᒐ ᐱᒪᒋᐃᑯᐅᔭᒄ᙮”
ᒋᓴᔅ ᒥᔅᑎᒂ ᑲ ᐊᐱᒋᐊᑦ ᐊ ᒋᔅᑯᑎᒪᒐᑦ
ᒪᑎᔪᐤ 24.32-35; ᒪᕐᒃ 13.28-31
29ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᔅᒋᔄᑦ, “ᒪᒥᑐᓇᔨᒪᐧᒄ ᒪ ᐅ ᒥᓯᓱᒥᓇᑎᒄ, ᑭᔭ ᒥᓯᐛ ᓂᓇᐧᑯᐤ ᒥᔅᑎᒄ᙮ 30ᐃᔅᐱ ᐎᔭᐸᑎᒪᑯ ᓂᐱᓴ ᐊ ᓂᑕᐅᒋᒋ, ᒋ ᒋᔅᒐᔨᑕᓇᐛᐤ ᓴᔅ ᐊ ᐸᓱᓇᒂᒡ ᒐ ᓂᐱᒡ᙮ 31ᐊᐅᑯᓐ ᒧᔭᒻ ᐊ ᐃᓯᓇᒂᒋ ᐅᔭ ᒐᒂᔪᐛ ᑲ ᐊᔨᒧᑎᒪᑎᑯᒡ᙮ ᐃᔅᐱ ᐛᐸᑎᒪᒂ ᐅᔭ ᒐᒂᔪᐛ ᐊ ᐃᔅᐱᔨᒋ ᒋᑭ ᒋᔅᒐᔨᑕᓇᐛᐤ ᒋᓴᒪᓂᑐᐤ ᐅᒋᓴᐅᒋᒪᐅᓐ ᓇᔅᒡ ᑕᑈ ᐊ ᐸᓱᓇᑯᓂᔨᒡ᙮”
32“ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐᒡ ᑲ ᐱᒪᑎᓯᒡ ᐊᓄᒡ ᓇᒪ ᒋᑭ ᐅᒋ ᒥᓯᐛ ᓂᐳᐅᒡ ᐊᔅᒄ ᐊᑲ ᑎᐱᐱᔨᒡ ᒥᓯᐛ ᑕᓐ ᒋᐸ ᐃᔅᐱᔪᐤ᙮ 33ᒋᒋᒋᓯᒄ ᑭᔭ ᐊᔅᒋᔾ ᒋᑭ ᐃᔎᐱᔪᐛ ᒥᒄ ᒪᒃ ᓂᑦ ᐃᔨᒧᐅᓇ ᓇᒪ ᓂᑕ ᒋᑭ ᐅᒋ ᐃᔎᐱᔪᐛ᙮”
ᐃᔭᒂᒥᒄ ᒧᔅ ᑕᓐ ᐊ ᐃᓯ ᐱᒪᑎᓯᔭᒄ
34“ᐃᔭᒂᒥᒄ ᑕᓐ ᐊ ᐃᓯ ᐱᒪᑎᓯᔭᒄ᙮ ᐊᑲᐎᔾ ᐱᔅᑎᓂᑎᓱᒄ ᐱᓯᒄ ᒐᒋ ᒥᓂᔭᒄ ᒪᒃ ᐱᓯᒄ ᒐᒋ ᒥᒋᓱᔭᒄ ᒪᒃ ᐱᓯᒄ ᒐᒋ ᐊᔨᒪᔨᑎᒪᒄ ᑕᓐ ᐊ ᐃᓯ ᐱᒪᑎᓯᓇᓄᐅᒡ, ᐛᔅ ᐊᔪᐅᒄ ᐊ ᐃᑎᒡ ᑯᑎᑭᒡ ᐊᐛᓐᒋ᙮ ᐊᓐ ᑎᔭᒂ ᒋᑭ ᒋ ᐃᓯᓇᑯᓐ ᓯᔅᒋᑯᒡ ᒐᒋ ᑎᑯᓯᓂᔭᓐ ᒪᒂᒡ ᐊᓐᑕ ᐊᑲ ᐃᑕᔨᑎᒪᒄ᙮ ᐊᓐ ᒪᒃ ᓯᔅᒋᑯᒡ ᑎᑯᓯᓂᔭᓇ, ᒧᔭᒻ ᑕᐱᒂᓐ ᐊᑲ ᐸᓱᐛᔨᑕᐧᒃ ᐊᐛᓯᔅ ᒐ ᑕᐱᒂᓱᑦ ᐊᐅᑯᓐ ᒐ ᐃᑕᔨᑕᒂᒡ᙮ 35ᒥᓯᐛ ᐊᐛᓐ ᐅᑕ ᐊᔅᒋᒡ ᑲ ᑕᑦ ᐊᑲ ᐊᔭᔅᑯᐎᒐ ᒋᑭ ᐎᔭᓯᐃᑯᐤ ᑎᑯᓯᓂᔭᓇ᙮ ᐃᔭᒂᒥᒄ ᒪᒃ ᐊᑲ ᑭᔭ ᒋᔨᐛᐤ ᒐᒋ ᐎᔭᓯᐃᑯᔭᒄ ᑎᑯᓯᓂᔭᓇ᙮ 36ᐃᔭᒂᒥᒄ᙮ ᐊᑲᐎᔾ ᐳᓂᒄ ᐊ ᐊᔭᒥᐊᔭᒄ ᐊ ᓂᑐᑎᒪᔭᒄ ᒐᒋ ᐊᔨᒋᑲᐳᐅᔭᒄ ᑭᔭ ᒐᒋ ᓴᐳᔅᑭᒪᒄ ᒥᓯᐛ ᑕᓐ ᒐ ᐃᔅᐱᔨᒡ᙮ ᑭᔭ ᒐ ᐊᑲ ᒋ ᐊᑐᐛᔨᒥᑕᒄ ᐃᔪᐤ ᐅᑯᓯᓴᓐ ᐃᔅᐱ ᐸᑕᔅᑎᒥᑲᐳᔅᑐᐛᒂ᙮” ᐊᐅᒄ ᒪᒃ ᐅᔭ ᑲ ᐃᓯ ᐎᑎᒧᐛᑦ ᒋᓴᔅ ᐊᓂᔭ ᐅᒋᔅᒋᓄᐊᒧᐛᑭᓇ᙮
37ᐊᓯᑯᒻ ᒋᓯᑲᐛ ᒪᒃ ᒋ ᒋᔅᑯᑎᒪᒐᐤ ᒋᓴᔅ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ ᐊᑯ ᒪᒃ ᐊ ᐊᑎ ᐅᑕᑯᓯᔨᒋ ᐊᓐᑕ ᐊᓂᔭ ᐱᔅᑯᑎᓇᔪᐤ ᐊᓕᐱᔅ ᑲ ᐃᓯᓂᐧᑲᑕᔨᒡ ᐊᑯᑕ ᑲᒋ ᐃᑐᑕᑦ, ᒐᒋ ᑕᑦ ᐊᓂᔭ ᒐ ᑎᐱᔅᑲᔨᒡ᙮ 38ᐎᐱᒡ ᒪᒃ ᒋᔭᒋᓴᐸᔭᔨᒋ, ᒥᓯᐛ ᐃᔪᒡ ᒋ ᐃᑐᑕᐅᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒐᒋ ᓂᑐᑐᐛᒡ ᒋᓴᓴ᙮
اکنون انتخاب شده:
ᓗᒃ 21: ᓇᔅᑲᐱ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada