मत्याल 17
17
येसुना रूप मिळ्न्दिह्ता
(मार्कल 9:2-13; लूकाल 9:28-36)
1आरुङ दियाङ आतापया, याकुबि, योहनि, वेर तमोग़ इर्वुर ओसो पत्रु, वेर मुवुरिन पोसि, येसु तना संगे अलग उंद बेरा मेटापोग़ोन ओतोग़. 2अस्के वेर ऊळनेके, ओना रूप मिळ्न्दता. ओना मोकमि पोळ्दलेह्का मांजिंदु,#तोहचीतव पोल्लोङ 1:16; 10:1 ओसो ओनाङ गेंदेङ वेह्चता लेह्का तिर्मिळ्स्किंदुङ. 3अस्के ऊळाटु, एलिया मुय्तोग़, मोसा मुय्तोग़, वेर इर्वुर मुनेतोर देवुळता कबुरतोर, येसुना संगे वळ्ह्कनदिन वेर मुवुर कग़यवालोर ऊळतोर.
4तेन ऊळिसि पत्रु पया इतोग़, “सामि, माट इगा मनदना, इद बेसु! नीवा विचर मतेके, नना इगा मूंड मंडाङ कीसीकन: उंदि नियेनाह्कु, उंदि मोसा मुय्तोनेनाह्कु, उंदि एलिया मुय्तोनेनाह्कु,” इनजोर येसुन ताल्ह्कतोग़.
5पत्रु इद्रम वळ्ह्कनेकेने, पांड्रि मोयुलि ओर सबेटोरिन मुळ्हता, मुळ्हतापया पोग़ोटा मोयुलताहि उंद आल्का वेनदा वाता: “वेग़ नावा जीवा कीतोग़ मग़ि, वेना लोप्पा नना पका गिर्दाते मह्नन; वेनाङे मीट केंजसोर मन्ह्टु,” इद्रम वेनदा वाता. 6इद आल्कातुन केंजिसि, वेर मुवुर कग़यवालोर रेयिह्कु साङसोर, कप मुळ्न्दिस अरतोर.
7अस्के पया, वेरा एरे वासि, येसु वेरिन बोयिसि, “रेयमाट रा, तेदाटु!” इनजोर इतोग़. 8पया तेदिस ऊळिह्तोर इतेके, येसुन विळ्सिस अगा बोग़े बह इलेग़ आसि, येसुये मतोग़.
9मेटाताहि रेगनेके, वेर मुवुर कग़यवालोरिन येसु उकुम ईस वेहतोग़, “माने-मन्कना नडुम पुटटोनन नना डोलिस मन्जि ओसो तेग़्कनाह्जोम, मीट नेंड बेद ऊळतिर, तेनु बोन्के बह वेहमाटु,” इतोग़. 10“इंगो गूरु! मति देवुळ लोहवाल राजाल वायनामुनेने, (ओना अग़दुन ओप्पे कीयलाह,) एलिया मुय्तोग़ मल्स वायनोग़ इनजोरे सास्त्रमगूरुर इन्ह्तोर. अद्रम बाराह्क इन्ह्तोर?#मलाकी 4:5-6 ” इन्जि वेर येसुन ताल्ह्कतोर. 11अस्के येसु इतोग़, “एलियाल निटमे सबेटविन बेस ओप्पे कीयलाह वास्तोग़े.#बळयिर 3:21 12मति नना मीक वेहतह्नन, एलियाल इतेके वातोग़े, तेला मति लोकुर ओन पुनोर. तम्क विचर वातपु, अहे ओर ओनु तिपल कीतोर. अद्रमे माने-मन्कना नडुम पुटटोनन, नना वने ओरा कयदाहि तिपल एतकन,” इन्जि येसु वेहतोग़. 13वेग़ एलियाना पोल्लो वळ्ह्कनस्के, एग़ मीहवाल योहननाय लोप्पा माक वेहतह्तोग़, इनजोरे वेर मुवुर अस्के पुतोर.
येसु देयम पोयतोग़ पेकान सव्रे कीस्तोग़
(मार्कल 9:14-28; लूकाल 9:37-42)
14-15पया वेरु मेटाकचुल मता मुडगा वातस्के, ओर्वोग़ मन्कल येसुनगा वासि, मिंडाङ कोटिस, जोहर कीसोर इतोग़, “गूरु, नावा मग़िन पिसिह कीमु! ओन्क कुळ्न्दिल रोगम मन्ह्ता, अदिह्क ओन्क पकाय तिपल आस्ता. ओग़ु ऊक-ऊके किसतगा, एतगा अरयह्तोग़. 16नना वेनु नीवाङ कग़यवालोरक्के तच मतन, मति ओरु वेन बेस कीया पग़वोर,” इतोग़.
17अस्के येसु इतोग़, “ए विस्वसलेवोरिर, गलत विचर केवालोरिर, मीवा संगे बेचानाह नना मनदकन? बेचानाह मीट देवुळता लावतुन पुनवाये मनदकिर? मियेनाह्क नाक वेल्लाय कयर वास्ता! अले अह इतेके, ओग़ पेकान नयके ताट,” इतोग़. 18अस्के वेन पेकानु देयमि पोयता इन्जि येसु पुतोग़, पुन्जि देयमतुन दगा ईतोग़, ईतस्के अद देयम ओनग्डाहि पटादुळ पेसिस वितता. पया अदे वेलाते पेकाल सव्रेम आतोग़.
19कतमतोर लोकुर पेसिस अतापया, येसुनाङ कग़यवालोर ओनगा वास ताल्ह्कतोर, “अदिन माट बह पूंड पग़वोम, गूरु?” इतोर. 20येसु ओरिन इतोग़, “देवुळतगा मीवा विस्वस कमि मन्ह्ता, अदिह्कु अद देयमतुन मीट पूंड पग़विर. नना मीक सेतेम वेहतह्नन, मीवा विस्वस नूङमेटा मतेके, इद मेटातुनु मीटु ‘इग्डाहि ओके जर्गा!’ इनजोर इतेके, अद जर्गग़ा. मीट बेदाय कीया पग़यकिर.#21:21; मार्कल 11:23; लूकाल 17:6; 1 कुरिंततोर 12:9; 13:2 21[मति मीटु देवुळतुन पार्तना कीसोर, उपस कीसोर मतेकेने, इद्रमता देयमतुन पूंड पग़यकिर,]” इन्जि इतोग़.#17:21 मत्याल 17:21 इद वचन सबेट्क पाळ्नाङ मोदुल काग्देह्कने रासतद इले.
22ओर कग़यवालोर गालिल पटटे उंदि जागाते जमा आतोर अस्के, येसु ओरिन इतोग़, “माने-मन्कना नडुम पुटटोनन, नाकु कोंटेतोरा कयदे पोस ईयना मन्ह्ता. 23ओरु नाक हव्कनुर, मति नना मूंड दियाने ओसो जीवा अरयकन,” इतोग़. तेन केंजताह्कु, ओर पकाय दुकम आस मतोर.
मंदिरता सारा
24पया येसु तनाङ कग़यवालोर बार कापेर्नाग़ एवतोर. ओर अगा मनेके, मंदिरता सारा एनवालोर पत्रुनके वास ताल्ह्कतोर, “मीवा गूरु येरुसलेमता मंदिरता सारा दोहोग़ा?” 25“इंगो, दोहतह्तोग़े!” अह इन्जि, पत्रु येसुन वेहतलाह लोनलोप्पा ओळियतोग़. पत्रु इदिनलोप्पा ताल्ह्कनामुनेने, येसु ओन इतोग़, “सिमोनि, तेना लोप्पा नीवा विचर बाताल मन्ह्ता, रा? इद बूमता राजालोर सिद्वा-सारा बोरग्डाह एतह्तोर? तनाय लोतोरग्डाहि, बारा दुस्रोरग्डाहि?” 26“आयो, दुस्रोरग्डाहि, गूरु,” इन्जि पत्रु इतस्के, येसु इतोग़, “अह इतेके, लोतोरिह्क सारा दल्गो. 27अद्रमे माट देवुळता मन्कलोरल इनजोरे, माक वने ताना मंदिरता सारा दल्गो. तेला मति ओर कोंटे कीयना आयो इन्जि, माट ओरिह्क ईकले. निमा सम्दुरकचुल अन्जि मीन्क कूसा. बेद मीन मुने दोर्कग़ा, अद मीनता तोडटुनु पळ्ह्किस ऊळा, अगा नीकु नीवा-नावा सारातुह्क आलनाहि, उंदि कल्दर बंडि दोर्कग़ा. अदिन ओसि दोह्चीम,” इतोग़. (पया पत्रु अहे कीतोग़.)
اکنون انتخاب شده:
मत्याल 17: माडियाबाय्बल
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021, Wycliffe Bible Translators, Inc. All rights reserved.