Yoana 2
2
Eibelekenya Yeso nkare metaa naichuo e lmusabibu
1Kore eicha mperot are, naaku keatae nkiyema to lkerenket oji Kana, otii Galilaya. Ketii apa ng'otonye Yeso inia kiyema, 2neitoomonoki sii Yeso o looiteng'eni lenyena teinie. 3Kore payie eichunye naichuo e lmusabibu, nejoki ꞉ng'otonye Yeso, <<Eichunye naichuo.>> 4Nejoki Yeso ninye, <<Yieyio, nyo kirrikinyie ana? Ewuon eitu ebau nkata ai.>> 5Nejoki ꞉ng'otonye lolo aisiaayiak otii inie, <<Entaas najoki ꞉ninye ntae.>> 6Kore nkalo inie netii motioo e nkare ile ee soito, naauno te inie. Kore nenia motioo naa keasichere Lyiaudi tankaraki ntasimi enche. Kore apa moti nabo, naa keya litaii ntomoni isiet metabaki ip nabo o tikitam. 7Nejoki ꞉Yeso lolo aisiaayiak, <<Emputa kuna motioo nkare.>> Neiput ꞉ninche metowuana too nkutukie. 8Neitoki ajoki, <<Entooku naa taata nkiti are niyakiki ilo tung'ani oitacheki latim.>> Neas ninche inia. 9Kore payie eichamcham laitachekinoni la latim inia are naibelekenye aaku naichuo e lmusabibu, neipot ilo tung'ani oyemicho. Kore duo ilo aitachekinoni naa eitu eyielou neing'uaa inia aicho, kake keyielo lolo aisiaayiak, 10naa inia payie etiaka ilo oyemicho, <<Meata chiaake ltung'ani lemeichooyo naichuo e lmusabibu supat tekue. Kore payie eidip lolo ooitoomonoki ta latim aatemerata, neyau naichuo e lmusabibu torno, kake isudoyie iyie naichuo e lmusabibu supat metabaki ana kata!>> 11Naa ana asata ekue e nking'asia nataasa Yeso ta Kana e Galilaya. Teinie eibalunyie nkitoo enye, neiruk looiteng'eni lenyena.
12 #
Mat 4:13
Kore tesiedi ana, nedoyio Yeso alo Kapernaum tenebo o ng'otonye o lalachera lenyena o looiteng'eni lenyena. Nebik teinie nkuti perot.
Etimirayie ꞉Yeso ltung'ana taatua nkaji e Nkai
(Matayo 21:12,13; Marko 11:15–17; Luka 19:45,46)
13 #
Nai 12:1–27
Kore payie enyiku nkata e ntasim e Pasaka, nelo Yeso lochi kerenket oji Yerusalem. 14Netum taatua nkaji e Nkai ltung'ana oomirita nkichu o nkerra o nkutukurruki o lkulikae eibelekeny ropiyiani ewueni too misaii. 15Neitibir liche too lgiitani, nemiraa nenia suom pooki meipung'o taatua nkaji e Nkai. Neibukoo ropiyiani ee laaduo ooibelekenyita ropiyiani, nepukuroki misaii enche nkop. 16Nejoki lolo oomirita nkutukurruki, <<Empung'ie kuna tokitin tene! Emintaa nkaji e Papa lai sokoni namirichiereki.>> 17#SNk 69:9Neparru looiteng'eni lenyena, aajo keigero too Lkigerot nchere, <<Kore nchaman nacham nkaji ino, naa kaanya ana nkima.>> 18Nejoki naa ꞉Larikok loo Lyiaudi ninye, <<Nyo nkitodolunoto e nking'asia nias, naitodolu ajo iata nkitoria niasie kuna pooki?>> 19#Mat 26:61, 27:40; Mrk 14:58, 15:29Newoliki ꞉Yeso ajoki, <<Entar ana aji e Nkai, naa kachet taatua mperot uni.>> 20Nejoki ꞉Lyiaudi, <<Kewa larin 46 echetitae ana aji e Nkai, eji naaku ninye ijo indim atecheta too mperot uni?>> 21Kake kore inia aji e Nkai najoito ꞉Yeso, naa sesen lenye. 22Kore kenya payie eitipiuni ninye too lootuata, neparru ꞉looiteng'eni lenyena inia apa natejo, neiruk ninche Lkigerot o ilo rerei oiroro Yeso.
Keyielo ꞉Yeso netiu ltung'ani aichu
23Kore ake ewuon etii Yeso Yerusalem te inia kata e ntasim e Pasaka, neiruk ꞉lkumo ninye#2:23 Kore ninye naa kejo Yoana nkarna enye. tankaraki natoduaa asat e nking'asia naataasa naaitodolu nkitoo enye. 24Kake eitu eibalakinyie ꞉Yeso ninche koon, amu keyielo mpukunoto e ltung'ani, 25nemeata tipat pee elikini netiu ltung'ani, amu keyielo ntoki pooki natii ltau lo ltung'ani.
اکنون انتخاب شده:
Yoana 2: saq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021, Bible Translation and Literacy