لوقا 15
15
ڒْمَعْنَا ن يِنِّي د يذوْڒن غَار وبْرِيذ
1مَارَّا يِنِّي يدْجَان ذ يعشَّارن ذ يِنِّي يعصَّان قَارّْبن-د غَار عِيْسَى حمَا اَذَاس صنّْطن. 2ڒْحِزب ن يفَرِّيسِيْين ذ يمْسڒْمَاذن ن شَّرِيعَا سَّاوَاڒن ذِي عِيْسَى نَّان: "أَرْيَاز-أَ يتْرحَّاب زݣ يِنِّي يعصَّان يتتّ اَكِذْسن!"
3ئِنْدق-د عِيْسَى ينَّا-ٱسن ڒْمَعْنَا-يَا: 4"ئِجّن زَّايْوم غَارس مِيَّا ن يحُوْڒِيْين مَثَالَان. مڒَا يودَّار-اَس يجّن زَّايْسن، أَتَاف اَذ يجّ تسْعَا أُو تسْعِين ذِي ڒخْرَا اَذ يرَاح اَذ يرْزُو خ ونِّي يودَّارن اَڒ ث غَا يَاف. أَمنِّي نِغ لَّا؟ 5خمِّي ث غَا يَاف اَث يِيسِي خ ؤُغِيڒ نّس اَذ يفَرح. 6أَذ يذْوڒ غَار ثدَّارْث نّس اَذ د يڒَاغَا خ يمدُّوْكَاڒ نّس ذ جِّيرَان نّس اَذَاسن يِينِي فَرْحم اَكِذِي اَقَا ؤُفِيغ اَحُوْڒِي نِّي إِي تُوْغَا ذَايِي يودَّارن! 7أَذَاوم ينِيغ: أَذ فَرْحن ذݣ وجنَّا اَطَّاس خ يِجّن مڒَا يذْوڒ-د غَار وبْرِيذ كْتَار زِي مِن غَا فَرْحن خ تسْعَا أُو تسْعِين نِّي وَار فِّيغن شَا اَبْرِيذ.
8نِغ، شَان ثمْغَارْث غَارس عشْرَا ن دِينَار مَثَالَان، ئِودَّار-اَس يجّن. أَتَاف اَذ تْشعّڒ ڒْقنْدِيڒ اَذ تْسكّ ذِي ثدَّارْث اَذ ترْزُو اَطَّاس خ دِينَار نِّي اَڒ ث غَا ثَاف. أَمنِّي نِغ لَّا؟ 9خْمِي ث غَا ثَاف، أَذ تْڒَاغَا خ ثْمدُّوْكَاڒ ذ ثَاجَّارِين اَذَاسنْت ثِينِي: فَرْحنْت اَكِذِي اَقَا ؤُفِيغ دِينَار نِّي إِي تُوْغَا ذَايِي يودَّارن! 10أَذَاوم ينِيغ: أَمنِّي يجّن مڒَا يعْصَا منْبَعْد يتُوْب، أَتَاف اَكِذس فَرْحنْت لْمَلَائِكَاث ن أَربِّـي."
ڒْمَعْنَا ن وحنْجِير إِݣ يدْجَان ذ اَمْفلّس
11عِيْسَى ينَّا عَاوذ: "تُوْغَا يجّن ن ورْيَاز غَارس ثْنَاين ن يحنْجِيرن. 12ونِّي اَمزْيَان ينَّا-ٱس إِ بَابَاس: آ بَابَا ؤُش-اَيِي ڒْحَقّ ينُو ذِي ڒْوَارْث. صَافِي يكَّر ورْيَاز نِّي يفْرق اَݣْڒَا إِ ثَارْوَا نّس. 13وَامِي عْذُوْن شْوَايت ن وُوْسَّان، أَحنْجِير نِّي اَمزْيَان ييْسِي مَارَّا مِين غَارس ذ اَݣْڒَا يرُوْح غَار يِجّن ن ثْمُوْرْث ثِݣّْوج يسْـپـرْذر ذِنِّي تْمنْيَاث نّس ذِي تفْلَايس. 14وَامِي يضيّع مَارَّا اَݣْڒَا نّس، ئِوْقع ذِي ثْمُوْرْث نِّي يجّن ن بُوْهيُّوْف وَار يُوْفِي مِين غَا يشّ. 15سّنِّي يبْذَا يخدّم غَار يجّن ن ورْيَاز زِي ثْمُوْرْث نِّي يسّكّ-يث اَذ يَرْوس يڒْفَان ذݣ يمَرْجعِيون نّس. 16ذَايس يمزْڒَان اَذ يجَّاون س يقَاشّْون ن ثْسْڒِيغْوَا يِنِّي إِي تتّن يِڒْفَان نِّي، وَار ث يعْثِيق حَدّ. 17ئِبْذَا ڒخْدّنِّي يتْخمَّام مْلِيح ذݣ يِيخف نّس ينَّا: مشْحَاڒ غَارس ذ يخدَّامن غَار بَابَا يتْشطَّا خَاسن وغْرُوْم، نش اَقَايِي ذَانِيتَا تْمتِّيغ س جُّوْع. 18ينَّا: أَذ كَّرغ اَذ ذوْڒغ غَار بَابَا اَذَاس ينِيغ: آ بَابَا عْصِيغ سِيذِي أَربِّـي، عْصِيغ شك. 19ڒخُّو وَار سْذِيهْدْجغ شَا اَذ يڒِيغ ذ مِّيش، اݣّ-اَيِي اَم وخدَّام نّش وَاهَا. 20ئِكَّر يرُوْح غَار بَابَاس. نتَّا اَقَاث عَاذ يݣّْوج اَطَّاس خ ثدَّارْث وَامِي ث يࢲْرَا بَابَاس يقّس-اَس. ئِرُوْح غَارس يتَازّڒ يذرّع-اَس يسدْجم خَاس. 21ينَّا-ٱس مِّيس: آ بَابَا عْصِيغ سِيذِي أَربِّـي، عْصِيغ شك. وَار سْذِيهْدْجغ شَا اَذ يڒِيغ ذ مِّيش.
22ينَّا-ٱسن بَابَاس إِ يخدَّامن نّس: رُوْحم ذغْيَا اَوِيم-د تْشَامِّير ذ اَصبْحَان اَرْضم-اَس-ث. ݣّم-اَس ثْخَاذنْت ذݣ وفُوْس نّس، ݣّم-اَس ثِسِيڒَا ذݣ يضَارن نّس. 23-24أَوِيم-د اَينْدُوْز نِّي يصحّن غَرْصم-اَس. أَ نشّ أَ نْفَرح مِينْزِي مِّي تُوْغَا يمُّوْث ڒخُّو يدَّر. تُوْغَا يودَّار ڒخُّو يتْوَاف. نِثْنِي بْذَان فَرّْحن.
25مِّيس اَمقّْرَان نتَّا تُوْغَاث عَاذ ذݣ ومَرْجع. وَامِي د يذْوڒ غَار ثدَّارْث يقَارّب-د، ئِتسْڒَا إِ لْمُوْسِيقَا ذ شْضِيح. 26ئِڒَاغَا-د خ يِجّن زݣ يخدَّامن يسّقْسَا-ث، ينَّا-ٱس مِين ذَا يوقْعن؟ 27ينَّا-ٱس وخدَّام نِّي قَا ؤُمَاش يذْوڒ-د. ڒخُّو بَابَاش يغَرص-اَس إِ وينْدُوْز يصحّن ڒَاحقَّاش يرحّب زݣ وُوْمَاش وَامِي د يذْوڒ س بُوْحْبڒ نّس. 28ئِقّس-اَس ڒْحَاڒ إِ مِّيس اَمقّْرَان يُوْݣِي اَذ يَاذف غَار ثدَّارْث. ئِفّغ-د غَارس بَابَاس غَار بَارَّا يبْذَا يتْحشَّام-يث بَاش اَذ يَاذف. 29ينَّا-ٱس إِ بَابَاس: نش مشْحَاڒ ن يسݣّوُسَا اَقَايِي خدّْمغ اَكِذش ڒبْدَا تْطَاعَاغ-اَش، عمَّارْص وَار ذَايِي ثُوْشِيذ ؤُڒَا ذ يغِيْذ حمَا اَذ فَرْحغ زَّايس اَك يمدُّوْكَاڒ ينُو. 30وَامِي د يُوْسَا مِّيش-أَ وَانِيتَا إِݣ يـسْپـرْضْرن اَݣْڒَا نّش ذِي لْفَسْدَاث وَاهَا، شك مِين ثݣِّيذ؟ ثْغَرْصذ-اَس إِ وينْدُوز يصحّن؟
31ينَّا-ٱس بَابَاس: لَّا آ مِّي ينُو، شك اَقَاش اَكِذِي ذَانِيتَا إِ ڒبْدَا، مَارَّا مِين غَارِي ذ اَݣْڒَا ينُو اَذ يذْوڒ إِ شك. 32ڒخُّو يتْخصَّا-ٱنغ أَ نْفَرح أَ نزْهُو اَطَّاس مِينْزِي ؤُمَاش تُوْغَا يمُّوْث، ڒخُّو يدَّر. تُوْغَا يودَّار، ڒخُّو يتْوَاف."
انتخاب شده:
لوقا 15: ريف
های‌لایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید