Matoose 4
4
Humbayey Yesuusa naadhi beedosa
Mrq 1:12-13; Luq 4:1-13
1Ye e geedeni Yesuusa Humbayey naadhi beyorosa Ayaana Geeshi saha melaa e aando. 2Yaha oyddi tammi wonta qama xhoondi e naayutto. 3Yenniyani naadhi beyena eruttese Humbayey Yesuusako yoodi <<Neni Wonto yele maaqo'ayko ha shuchita <Mee, boora maaquttuwaye!> hidi hiwwa>> yeydi e hido. 4Yesuusani << <Axi yesesi Wontoy zeerdo katona uddi baaka booranawo maaquwasso> yeydiko e diizuttese>> yeydi e hido.
5Ye e geedeni Humbayey hayla maaqe katamaaka Yerusaleeme esa e aando. Wonto Hayla Zawa qinowa keddaydese godowa essi
6<< <Niya u kaforonikeko Wontoy be woosaxituko e ohe, ne tokey shuchi gara oxheesume be kuchenako niya wokke u ayke>
hidiko e diizuttese.
Ha e gisha neni Wonto yele maaqo'ayko hayafa yekke doondi hodhuwa!>> yeydi e hido.
7Yesuusani <<Fede godo <Ne Laaxe ne Wonto naadhi beedofuna!> hidiko assi e diizuttese>> hidi e hido.
8Assini Humbayey Yesuusa orjena keddaydese bakka gara e aando. Ha saha gara be kaatetona kaatetona yese iitana moddhese kuxa fuula keenge wudita uddina beysi 9<<Bocunti taase ne akkirdako haanxho uddiko neese ta inge>> yeydi e hido. 10Yesuusani <<Neno Humbaye, hanguwa hayafa! <Ne Laaxuse ne Wontose akkiruwa, esawo kuxuwa!> yeydiko e diizuttese>> yeydi e hido.
11Ye e geedeni Humbayey Yesuusa datti dhaddi e hando. Wonto woosaxitini esuko yoodi worgusesa esuse u mahicha.
Yesuusay eruse aytosa
Mrq 1:14-15; Luq 4:14-15
12Yesuusay Yohanisey aykutti tufuttosa be siido geede Galila wude e hando. 13Nazrate katamaafa dhaddi Qifirnahoomeydi hiyutte katamaa handi e utto. Qifirnahoomey bagade da'aa yese katamako. Ye katamay Zabiloone katamaara Naftaleeme katamaaray essaaka yese wudiyako e yese. 14Yeydini e maaddhosi kaayaxi Isayasey zeerdechoshi e aaloronikeko. 15Isayasey ohisine
<<Zabiloone wudiyara Naftaleeme wudiyaray yese godo bagadiya aange oge da'aaka Yordanose waaxi semfa Ayhuda maaquwasiti essa yese Galila!
16Cencha godowa yese axiti orje fo'eko u beedo. Hayboy hade dooshuke fasshi yecho wudiya yese axituse fo'ey kesso>> yeydi hidechoshako.
17Yenniyafa ayti Yesuusay <<Afa kaatetey uddhese gisha hi cubbo dhaddi maaquwayte>> yeydi hissine ohe e ayto.
Oyddi geri xheyse
Mrq 1:16-20; Luq 5:1-11
18Yesuusay Galila bagade da'aanna garichine wolindo na'axhe lam'e e beedo. Usini Phexhroseydi hiyutta Simooniyara esindo na'i Indiraasiyarako u maaqicha. Gulxhe aykeesita be maaqicho gisha esuna aykuso maarabe waassaa u dakkicha. 19Yesuusani <<Taara yoowayte, tani hinumba gulxhe hi aykenike axe hi ooworosako ta mahe>> yeydi e hido. 20Usini be maarabita yaha datti yenniyawo esaara u hando. 21Yahafani haga e garusune fede lam'i wolindo na'axhey Zabdoose nayshi Yayqoobiyara Yohanisiyaray zabhaaka biyade Zabdoosiyara yesine maarabe naqiya u yesune beedi <<Yoowayte taara!>> hidi e hido. 22Yenniyawo essa be yecho zabhaara biyadiyara yaha dhaddi Yesuusaara u hando.
Yesuusaara laga axi handosa
Luq 6:17-19
23Yesuusani Ayhuda Bhikkilo Zawittaaka erusisine afa kaatetese modhe odo ohisine axiti gara yecha be bishana bishana yese hargiyafa uddi loolusisine Galila wude gawwo uddi e hanticha. 24Hargaxe e looluse odoy Sooriya wude aallo uddi e sintinne be bishana bishana hardi maddhundechaashita uddina Yesuusako u oodo. Ye hargaxitaafa xhoozi aytechoshiti jhiice#4:24 jhiice yeydi hiyutta harge Koorusso bidzi bidzi googe <<Cige>> hidi hiyutte hargeko. harge keengeesitaara beenna hantese danda'uwa tokey doccesheeshitaaray usaaka yecha. Yeenxhita Yesuusay uddina e loolusso. 25Galilaafani <<Tammi Katama>> hidi hiyutte wudefani Yerusaleemefani Yuudaafaara Yordanose waaxi semfafaara yoodaasiti iitana axi lagay Yesuusaara u hando.
اکنون انتخاب شده:
Matoose 4: KilleC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید