Mateo 4
4
Tiorepa Jesua nemietá mĩesa oopiyá bada
Marco 1:12-13; Luca 4:1-13
1Mãɨya bak'ari Tachi Ak'õre Jaorepa Jesú ĩjũa pania newẽa bɨdea enemeesima. Maapae tiorepa ichiá mĩesa jarasima nemietá oomẽrá. 2Jesú ewari k'ak'o cuarenta ãst'á mãɨnepa teamasi pida nek'owẽa bada pẽra jarra basima. 3Mãɨya bɨde mĩesa jaraparí chesima. Ichia jarasima:
—Pɨ piarã Tachi Ak'õre Warrapɨra, jarase nãɨrã mawará p'ana pamẽrá.
4Maamina Jesupa p'anoosima:
—Tachi Ak'õre pedeade nãɨya bɨ bɨma: abapuru nek'o bɨdepa ẽpẽra chok'ae baiwẽma, mãɨpari jõma Tachi Ak'õrepa jara bɨ ĩjãa bɨdepa chok'ae baipɨ.#Deuteronomio 8:3.
5Mãɨya bak'ari tiorepa Jesú Jerusalén, Tachi Ak'õre p'uurudea ateewãsima. Mãma Tachi Ak'õre te poro ɨt'ɨ bɨmá ateewãsima. 6Maapae tiorepa jarasima:
—Pɨ piarã Tachi Ak'õre Warrapɨra, nãmãɨpa edá jĩitɨse. Tachi Ak'õre pedeade nãɨya bɨ bɨma:
Tachi Ak'õrepa ɨt'aripa peedarã peeipɨ pɨ k'aripadamẽrá.
Pɨ ãchi juade jitadaipɨ pɨ jĩru mawarapa p'uapiemaapa.#Salmo 91:11,12.
7Mãɨne Jesupa tiorea jarasima:
—Tachi Ak'õre pedeade ichiaba bɨ bɨma: “Pɨ Chipari Tachi Ak'õrea waa mĩesa jararãse nemietá oomẽrá”.#Deuteronomio 6:16.
8Mãɨya bak'ari tiorepa Jesú eya ɨt'ɨ bɨdea ateewãsima. Mãmãɨpa Jesua jõma nãɨ ĩjũane be p'uuru mãɨnepa p'uurucha ne auk'ará k'ede ak'ɨpisima. 9Maapae tiorepa jarasima:
—Pɨ mɨ naa sĩraporode k'obeeipɨra mãɨnepa mɨá pia pedeaipɨra, nãɨ ãarea mɨa pɨá teaipɨ pɨ juade uru bamẽrá.
10Mãɨne Jesupa tiorea jarasima:
—Tiore, ãyá wãse. Tachi Ak'õre pedeade nãɨya bɨ bɨma: “Aba pɨ Chipari Tachi Ak'õreapuru pia pedease. Ichia jara bɨt'a oo base”.#4:10 Tiore. Mãɨ t'ɨ̃ hebreo pedeadepa che bɨma. Deuteronomio 6:13.
11Ara mãɨne tiore Jesuk'á bada ãyá wãsima. Mãɨne Tachi Ak'õrepa ɨt'aripa peedaɨrã Jesumá chedak'ari ichiá nek'opisidama.
Jesupa jaratea beeda
Marco 1:14-15; Luca 4:14-15
12Juan chi Porochoaparí eda jɨ̃a nɨbɨ ũriside Jesú jĩitea Galilea tuadea wãsima. 13Maamina Nazaré p'uurude beé pasima, mãɨpari Capernaum p'uurude bade wãsima. Mãɨ p'uuru senia choma ik'idá bɨma. Nep'talidepa chedaadarã Israel ĩjũane bɨma ichiaba Zabulonepa chedaadarã ĩjũa k'ait'a bɨma. 14Mãɨyasima Tachi Ak'õre pari pedeaparí Isaíapa jarada jĩra. Nãɨya bɨsima:
15«Mãra Zabulón ichiaba Nep'talí ĩjũane berã, judiorãwẽa Galileade berã,
senia chomanea wãpataɨ o k'ait'a berã, Jordán to k'ĩaria berã:
16Mãra p'ãrione tuanasidama Tachi Ak'õre atua p'anana pẽra.
Maamina idi ɨnaane p'anɨma Tachi Ak'õre k'awa p'anɨ pẽra.
Mãra chok'ae p'anɨmina piuda jĩra tuanapachidama.
Maamina idi ɨmata ɨnaaru jĩra Tachi Ak'õrepa piarã ichi k'orea mãrá k'awapii bɨma».#Isaía 9:1-2.
17Mãɨ ewaridepa naa Jesupa nãɨya jara nipasima: «Pajãne Bɨ cheruma ichidirã ichi juade ua bai k'orea.#Daniel 2:44. Mãɨ k'orea mãrapa nemietá oopataɨ itu bɨdak'ari ichimá chet'ɨ».
Jesupa to bat'apataɨrã t'ɨ̃na
Marco 1:16-20; Luca 5:1-11
18Jesú Galilea senia ik'idá nine ẽpẽra ume unusima. Aba Simón pasima, ichiaba Pedro apataɨ. Abaɨ chi ũpẽa André pasima. Mãɨrã to batapachidama. Jesú chesipara to bat'amaa p'anasidama. 19Jesupa ãchiá jarasima:
—Mɨ ome chet'ɨ. Mãrapa to bat'apata jĩra mɨa mãrá jarateaipɨ ẽpẽerã mɨmá enemeenamẽrá.
20Ara mãɨne t'ɨri ameenak'ari Jesú ome wãsidama. 21Mãɨ wawari wãrune Jesupa ẽpẽra mãicha ume unusima. Aba Zebedeo warra Santiago pasima. Abaɨ chi ũpẽa Juan pasima. Ãchi ak'õre ome p'ãp'orrode t'ɨri k'õa bet'a wãamaa p'anasidama. Maapae Jesupa ãchi t'ɨ̃sima ichi ome wãnamẽrá. 22Ara mãɨne ãchi p'ãp'orro mãɨnepa ãchi ak'õre ameenak'ari Jesú ome wãsidama.
Jesú Galilea tuade p'ɨrrɨada
Luca 6:17-19
23Jesú Galilea tuade ãarea p'ɨrrɨasima. Judiorã ará pedeapataɨ techa jarateapachima Tachi Ak'õrepa ichidirã ichi juade ua bai k'orea. Mãɨ pedea pia jarateade wãrucha ãarea ẽpẽrarã k'ak'ua piawẽa be jɨpa beepik'oapachima. 24Mãɨpuru Siria tuade ichi ãarea t'ɨ̃ p'oa beesima. Mãɨ k'orea ẽpẽrarãpa jõma wawariadepa k'ak'ua piawẽa be, k'ak'ua p'ua paara be, jaore mietá pará be, wawa be mãɨnepa sorek'ea be ichimá enemeepachidama. Jesupa ãchi ãarea jɨpa beepipachima. 25Mãɨpuru chok'ará Galileadepemarã, Decápoli ĩjũanepemarã, Jerusalenepemarã, Judeadepemarã mãɨnepa Jordán to k'ĩraripemarã Jesú k'aade wãsidama.
اکنون انتخاب شده:
Mateo 4: tdc
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.