Jone 10
10
U cheke naba eigna mae greireghi sipu
1Mae Jisas ne cheke eghu, “Tutuani fara te chekeni iara ka ghotilo na. Mae ihei te theome ruma ka thofno grengathagna u baradi u sipure, nu apla ka keha philei teuna, mana mae nablau nei mae glalama eghu kolho. 2Eghuteuna mae ihei te ruma kau thofno grengatha na igne ngala mae thofno greireghidi u sipure. 3Eghuteuna mae greireghi grengatha na, filo glanini mana nei na tora ranghini mana. Mana na kilodi nanghadi nogna sipure, eghuteuna nogna sipu mana re na glanini naoglagna mana na. Eghuteuna mana na batu fajifladi ke kosigna bara na. 4Ka vido te atha fajifladi mana ke kosi bara na, mana na au ke uludi mala baubatudi. Eghuteuna nogna sipu mana re na kafe leghuni mana, naugna reꞌe ne lase fakelini u naoglagna mana na. 5Mae te theome laseni reꞌe na, reꞌe rikhani mana nei theome leghuni mana, naugna reꞌe ne theome lase fakelini u naoglagna mana na.” 6Mae Jisas ne toutonu ka mare ka cheke naba igne, nu mare ne theome laseni gaoghathogna cheke mana igne.
Mae Jisas mae greireghi sipu te keli na
7Mae Jisas neke cheke eghu ka mare, “Tutuani fara te chekeni iara ka ghotilo na. Iara gne jateula ngau u grengatha eghu mala rumadi u sipure. 8Naikno teke kulu mei ke ulugu iara re, mare kafe jateula ngau mae nablau nei mae glalama eghu kolho. Eghuteuna u sipure tirodi fanomho ka mare. 9Iara gne jateula u grengatha eghu. Naikno te ruma mei ka iara na, mana ginauna tangomana te ludeni u vido te keli na. Eghuteuna mana ginauna tangomana nate ruma mei nei jifla teu kau nasnagla na. Eghuteuna mana ginauna ludedi u glepo te keli te malagna u nakarhagna na. 10Mae nablau na mei kolho mala blau nei falelehe nei mala lalamadi eghu kolho naiknore. Nu iara gne mei mala tufa ka mare u thofno karha te theo ka huigna na. U nafnata karha te fodu kau glepo te keli.
11 “Iara ngala thofno mae greireghi sipu te keli na, te snakreni karhagu na mala lehe ranghidi nogu sipure. 12Te mae gloku kolho mana te theome khotodi mana sipure, mana tangomana te rikha kokodi u sipure kate filoni mana te mei khuma fakaukathu na. Aonu khuma fakaukathu igne ginauna mei hata kehare, eghuteuna keha sipure na rikha tafri. 13Mana na rikha kokodi sipure, naugna mana mae gloku kolho. Nu mana theome thofno nangadi u sipure.
14-15 “Iara ngala mae greireghi sipu te keli na. Jateula ngau mae Mama te lase ghau iara, nei iara laseni la mae Mama, jateula tuana eghu iara lasedi nogu sipure nei nogu sipu iara re jaola lase ghau iara. Iara snakreni karhagu na mala lehe nei ke fakarhidi eghu nogu sipure. 16Aonu, keha nogu sipure au ngau ke kosi bara. Iara ginauna na atha mei dila ke lamna bara. Reꞌe ginauna nomhini naoglagu iara na, eghuteuna reꞌe ginauna kaisei bukredi ngala nei iara ngala te mala reireghidire eghu. 17Mae Mama na namha ghau iara naugna iara magnahaghei te snakreni karhagu na mala lehe. Eghuteuna iara laseni kate lehe iara na, iara nake karha fapulo. 18Theo kaisei naikno tangomana te falehe ghau iara ka nogna nheta thegna. Naugna iara ngala te au nolaghi te mala snakre ghau thegu te mala lehe nei ke karha fapulo teuna. Tuana ngala unha mae Mama teke chekeni mala eni iara teku na.”
19Kate nomhidi mae Jiu gre cheke mae Jisas igre, mare ne theome kaisei gaoghatho ka nogna cheke mana re. 20Kmana naikno ka mare ne cheke eghu, “Mae igne au kaisei naitu ke lamnagna la fanolini pha'ugna mana na! Ghotilo thosei lao fanomho ka mana!”
21Keha naiknore ne cheke eghu, “Theo. Mae te au naitu na theome tangomana te cheke eghu na. Naugna naitu na theome tangomana te fakelini tathagna mae te dofu na.”
Mae biꞌodi hatimare mae Jiu ne magnahagheni te faleheni mae Jisas
22Ka nhigra te rifu na mae Jisas ne haghe Jerusalem kau gaghamu ghatho fapulogna narane teke fablahigna Sugablahi Jerusalem. 23Eghuteuna, mae Jisas ne nolo ne tei ka varanda gna Sugablahi na kau vido te kiloi nogna varanda mae Solomon. 24Hatimare mae Jiu ne kafe khapru mei ka mae Jisas ne cheke eghu ka mana, “Ghema, iagho faraugha ghami ghehati. Faghose cheke mei sagho mala lase nigho ghehati. Iagho ngala si mae Kraes na ia, ba theo?”
25Mae Jisas ne cheke eghu ka mare, “Iara la chekehi ka ghotilo, eghuteuna ghotilo theome fatutuani ghau ngala iara. Ghotilo la filodihi gloku biꞌo teke edi iara ka nogna nolaghi mae Mama. Eghuteuna glepo te edi iara igre ngala te mala lase ghau iara ghotilo na. 26Nu ghotilo tiromi fatutuani ghau iara, naugna ghotilo theome nogu sipu iara. 27Naikno te leghudi nogu cheke iara igre jateula ngau sipu te laseni naoglagna mae greireghi sipu ia eghu. Iara lasedi reꞌe nei reꞌe kafe leghu ghau iara. 28Iara tusu ranghidi u karha fei tifa na, eghuteuna reꞌe ginauna theome lehe. Eghuteuna theome tangomana kaisei naikno nate blaudi ka iara re. 29Mae Mama mae ihei neke snakre mei sipure ka iara igne mana kaisei mae biꞌo tulao. Eghume theo kaisei naikno te au nolaghi biꞌo jateula Mama teu nate mei blau fajifladi ka mae Mama re. 30Uve, ghepa mae Mama na kaisei ngala.”
31Ka narane tuana hatimare mae Jiu salo thina ne rodi fadi faleheni mae Jisas. 32Nu mae Jisas ne cheke eghu ka mare, “Iara neke edi kmana gloku te keli ka nogna nolaghi mae Mama tela filodihi ghotilo ra. Kau gloku te keli aheva gre site romi fadi falehe ghau iara ghotilo ka thina gnea?”
33Hatimare ne cheke eghu ka mana, “Theo, ghehati theome romi fadi thina nigho eidi nou gloku te keli teke edi iagho re. Nu iagho ne chekedi glepo te faparini God re! Ghehati lase nigho iagho kaisei naikno kolho. Eghuteuna iagho ne magnahaghei nigho themu te nanaba ka God neu. Tuana site romi fadi thina nigho ghehati gnea.”
34Mae Jisas ne cheke eghu ka mare, “Te risoni ka nomi vetula ghotilo themi na, God neke cheke eghu, ‘Ghotilo kafe jateula God eghu.’#10:34 Sam 82:6. 35Tahati laseni unha te chekeni ka grioriso te blahi na tutuani fabrahu. God kilodi naikno te toutonuni chekegna mana tuare jateula thegna God eghu. 36Eghuteuna ka unha gne site ne cheke faparini iara mae Mama teuni ghotilo gnea? Ba, naugna te cheke eghu iara, ‘Iara Thugna God’ teu iara gne? God vahi ghau iara neke kuru mei ghau iara kau nauthoglu gne. 37Jame theome edi iara nogna gloku mae Mama mala edi iara tekure meuna, ghotilo jame nabami te theome fatutuani ghau iara na. 38Nu jame edi iara unha te edi mae Mama re, neubane theome fatutuani ghau iara ghotilo, ghotilo jame fatutuanidi unha te edi iara re. Aonu, ghotilo ginauna laseni mae Mama na au ke lamnagu iara, nei iara au ke lamnagna mae Mama.” 39Hatimare mae Jiu neke fariuriu lokini mae Jisas, nu mana ne rikhadi mare.
40Eghuteuna, ke leghugna igne mae Jisas pulo neke kasa ka keha phile Kho'u Jordan. Mana neke tei au ka vido teke fa'apublahi naikno mae Jone tifa ia. 41Kmana naikno neke mei mala fanomho ka nogna cheke mae Jisas re. Aonu mare cheke eghu fari thedi, “Tore! Mae Jone ia neke theome eni kaisei kofubobhoi jateula mae igne neku. Nu gobigna lepo teke chekedi mae Jone eigna mae igne ra thono tutuani fara.” 42Kmana naikno te au ka vido tuana ne fatutuani ni mae Jisas.
اکنون انتخاب شده:
Jone 10: mrn
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators , Inc. All rights reserved.