Jone 3
3
Mae Jisas ghe mae Nikodimas
1Kaisei mae nanghagna na mae Nikodimas, mana kaisei mae biꞌo ka tothoghei Farasi. 2Kaisei bongi mana neke mei ka mae Jisas, ne cheke eghu ka mana, “Velepuhi, ghehati lase nigho iagho kaisei mae velepuhi biꞌo neke mei funu ka God. Naugna jame te theome togho nigho God na, iagho jame theome tangomana te edi kofubobhoi igre.”
3Mae Jisas ne cheke eghu ka mana, “Uve, tutuani fara te chekeni iara ka iagho na. Theo kaisei naikno tangomanani te ruma ke lamnadi naikno te funei frunidi God re ghilei ke karha majaghani ghu mana.”
4Mae Nikodimas neke ghusna eghu ka mana, “Nu jame kaisei mae tela khomabrohi na, faꞌunha eghu ke karha si mana gnea? Naikno na theome tangomana teke fapea rumai ka thi'a idogna na mala teke karha majaghani na.”
5Aonu, mae Jisas ne cheke eghu ka mae Nikodimas, “Tutuani fara te chekeni iara ka iagho na. Te theome karha mana kau khoꞌu nei Tharunga te Blahi teuna mana theome nabagna te au baludi naikno te funei frunidi God. 6Naugna u thinigna naikno na neke karha kolho ka gaꞌase. Nu u tharungagna naikno na neke karha ka nogna nolaghi Tharunga te Blahi. 7Thosei jaglo nou ka cheke iara ao, ‘Ghotilo ke fapea karha ghu ngala.’ 8Ghathoi sagho u nuri ia. U nuri na ghaghafa nogna u ngala ka vido aheva te magnahaghei tei na. Iagho tangomana te nomhini u naoglagna u nuri na. Nu iagho theome laseni ghaghafa mei funugna aheva ba aheva tei teuna eghu. Jateula tuana eghu naikno te karha majaghani ka nogna nolaghi Tharunga te Blahi na.”
9Mae Nikodimas ne ghusna eghu ka mana, “Faꞌunha eghu tangomana si ignea?”
10Mae Jisas ne cheke eghu ka mana, “Iagho kaisei mae velepuhi biꞌo gna Israel. Nu theome laseniu ngala eghu sagho gaoghathogna na u cheke ignea, ghema? 11Tutuani fara te chekeni iara ka iagho na. Ghehati cheke eidi unha glepo te thofno lasedi nei cheke eidi unha glepo teke filodi kau tathamire. Nu ghotilo theome fatutuanidi unha te chekedi ghehati re. 12Iara chekedi ka ghotilo glepodi nauthoglu igne, nu ghotilo theome fatutuani ghau ngala iara. Eghume ghotilo ginauna theome fatutuani ghaula iara kate toutonudi iara glepodi kligna re! 13Theo kaisei naikno tela tei thokehi kligna na, te mala lasedi unha glepo te edi kligna re. Kaisei iara mae teke mei funu ka God na ngala te lasedi te tangomana te chekedire unha te edi kligna re. 14Mae Moses neke lilisei haghe ka gaju na u thotoghale gna mogo na ka namono nagou na tifa. Eghume mare ginauna jateula tuana eghu na tupijuru ghau iara mae teke mei funu ka God na kau gaju fafatha. 15Aonu ihei te fatutuani ghau iara na tangomana nate athini u karha fei tifa na.”
16 “God ne namhadi fara naikno te au kau nauthoglu igne. Naugna igne mana ne snakre meini thofno mae Thugna kaisei ngala mala ihei te fatutuani ni mana na ginauna theome lehe fabrahu, nu mana na karha fabrahu tifa tifa. 17Naugna God neke theome kuru meini mae Thugna na ka nauthoglu gne mala mei fateni ihei te jafra ka nauthoglu igne, nu mei mala karha naiknore ka mana. 18Tutuani fara, mae ihei te fatutuani ni mae Thugna God na, God na theome fate faleheni mana. Nu mae ihei te theome fatutuani na, God la kulu fate falehenihi mana naugna mana ne theome fatutuani ni mae thofno Thugna God kaisei ngala. 19God fatedi naiknore ka puhi igne: mae Thugna God na neke meihi jateula ngau u naphae neku kau nauthoglu igne, nu naiknore theome magnahagheni mana. Naugna hatimare jateula te au kate romno ra neu ne edi glepo te thono diꞌa fara re. 20Iheire te edi glepo te diꞌare theome magnahagheni u naphae tuana. Mare na theome mei kate phae na naugna ginauna kafe thakle gnafa unha glepo te diꞌa teke edi mare re. 21Nu mae ihei te edi glepo te tutuanire mana ginauna mei kau naphae na. Aonu u naphae na ginauna falalase fakeli ka naiknore unha glepo teke edi God ka mana re.”
Mae Jisas ghe mae Jone Apublahi
22Ke leghugna igne, mae Jisas ne tei baludi nogna mae fanomhore ne au ka nohi Judia. Mae Jisas ne au jare keha narane baludi nogna mae fanomhore ne faꞌapublahidi naiknore. 23Ka narane tuare mae Jone ne faꞌapublahi naiknore ka namono Aenon rhegna Salim, naugna jare na au khoꞌu. Kmana naikno ne tei jare mala apublahi ka mana. 24Ka narane igne mae Jone Apublahi theome au ngau ka suga sosolo. 25Keha nogna mae fanomho mae Jone re ne fapoaphola balugna kaisei mae Jiu eigna nodi vetula mae Jiu te mala titihi fakeli thini na. 26Aonu mare ne mei ka mae Jone ne cheke eghu ka mana, “Mae velepuhi, laseni sagho kaisei mae teke au balumu ka keha phile Kho'u Jordan ia? Mae teke chekeni iagho ka naikno ra, gognarona mana la faꞌapublahi naikno, eghuteuna naiknore la kafe tei ka mana!”
27Mae Jone ne cheke eghu ka mare, “Tutuani fara, theo kaisei naikno te tangomana te eni kaisei glepo na, nu thegna God ngala tangomana te tusu ranghini mana nolaghi na. 28Ghotilo themi la nomhinihi teke cheke eghu iara ia, ‘Iara gne theome mae Kraes. Nu God neke kuru mei ghau iara ke ulugna mana mala kulu tarabana nabrougna mana.’ 29Ghathoi si ghotilo, mae te tolaghi na ngala te khotogna gaꞌase na. Eghuteuna iara gne jateula kheragna mae te tolaghi ia eghu mei ofo balu fanomho ka mana. Eghume kate mei mana te mala hata khetogna na iara gognaro thofno gleale'a fara te nomhi naoglagna mana na. 30Eghume te keli na mana mala ke mae biꞌo, eghuteuna iara mala au ke parigna mana.”
Mae ihei teke mei funu kligna
31Mae ihei teke mei funu kligna na, mana mae ke biꞌo laodi mae te gnafare. Mae ihei teke karha mei ka nauthoglu igne na mana nogna nauthoglu kolho, eghuteuna mana tangomana te cheke eidi kolho glepo gna nauthoglu igne. Nu mae ihei teke mei funu kligna na, mana mae ke biꞌo laodi mae te gnafare. 32Mana toutonu ranghidi naiknore eidi unha glepo biꞌo teke filodi nei nomhidi teu thegna re, neubane eghu ngau theo kaisei naikno te magnahaghei fatutuanidi unha te chekedi mana re. 33Nu mae ihei te fatutuanidi unha te chekedi mana re, mana fatakleni unha te chekeni God na thofno tutuani fara. 34Mae ihei teke kuru mei God funu kligna na mana chekedi unha teke chekedi God re, naugna God neke tusu lao ka mana Tharunga te Blahi na ne fodu ka mana mala toghoni mana. 35God Mama ne namhani fara mae Thugna na ne tusu lao ka mana u nolaghi te mala funei frunidi gobigna lepore. 36Ihei te fatutuani ni mae Thugna God na, mana na athini u karha te theo ka huigna na. Nu mae ihei te theome fatutuani ni mae Thugna God na mana na theome athini u karha tuana. Eghuteuna God ginauna diꞌatagna fabrahu ka mana.
اکنون انتخاب شده:
Jone 3: mrn
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators , Inc. All rights reserved.