Njɔyn 10
10
Njisə̀s ə mɛ̀ ngàyn kûmə̀ ngyəyn ə̀ sèndzè
1Njisə̀s ə mɛ̀ ngàyn zhîzè ə pìə nə, “M pîə sê ghàyn kè nâʼà səmɔʼ nə, ə wùə pə̀yn ə zà ècho mbàyn se nji ətəyn ə ndùə kɔʼɔ njiə ndomve elùʼ ə ndôvè, ə è və nyi ke nâʼà wùə èchɔŋɔ. 2Wùə vɛ ə è njiə ndomve echo mbàyn nyi ngyəynə̀ sèpfɨ. 3Wùə vɛ ə è tsɨ̀ŋnə̀ cho mbàyn nə zɛ ə è chwi cho əndɛve sê vəyn. È tɔŋɔ nâʼàpî ndzè èkè kə zə̂ynzè ezə, è və njìə fɨə è səynse. 4Shɨ̂ŋə̀ kɛ ə È njì fɨ è ndzè sə vəynse, È ve ndûə ə ghənə əshi, se chumtə̀ ndûə vəyn, kûmə̀ nə se nyîə ke kyə̀ ə̀ vəyn. 5Ndzè sə təynse vayn kàʼa ə se chumte wùə ə̀ mɔ̀ʼɔ; se pɨlə tə ndô ndò ə kyì ə wùə nə vɨ̂nə mə ngwùŋ kûmə̀ nə se ke va kyə̀ ə̀ vəyn.”
6Njisə̀s ə mɛ̀ ngàyn nə zɨ̀yn, pîza ghənə ə tàʼa zɨə kê eghɛ zɛ ə È pìə.
Njisə̀s ə tsàyn nə zhi nyi tsì ə̀ sèpfɨ èchùŋ
7Njisə̀s ə pìə kwəynsə̂ nə, “M piə sê ghàyn səmɔʼ nə, Ə̀ nyi Mi cho mbàyn ə se ndzè sə təynse. 8Nâʼà ə̀ghɨ mɔ̀ʼɔ ghəkɨ̂m ghɛ ə tè pə̀yn sə shi sê Mi nyi əghɨ chɔŋə è ghɨ ghɛ ə zhwitə ghɨ, pîza ndzèsè zɨtə̂ va sê ghənə. 9M nyi echo mbàyn, ghɨ ghɛ ə njiə tɔynə̂ ə Mi tə nə̂ ə nyi mə sɔ̀ fɨ, ghənə tə nə̂ ə njiə fɨnə tsɛ̂ fɨə, fɨyn kyi nâʼàpî ghè vɛ ə ghənə kyiŋə. 10Wùə chɔŋɔ pə̂ tsɛ̂ kə se chɔŋ, se zhwi è kɨsè se pofsê. M pəyn kə ghɨghe ə kyi èndam zɛ ze lwinə kwəynə.
11M nyi ngyəyn èchùŋ, zɛ È nyi è pɨaʼtêzè se kwu ə ndzèsè elùʼ. 12Ə̀ pə̀ ezhoghɛ ə ndàʼà ndô wùə nə è və tsɨ̂ŋnə̀ sèndzè mə è va ngyəynə̀ sèndzè kɨ̀sə pɛ̀ sèndzè, è nə̂ fe kə nyàm àpɛ pə̂, ə è tə za sèndzè, ə nyàm àpɛ ətəyn pə̀yn kotê sèndzè sə təynse ə è nji emɔ̀ʼ, ə sə mɔ̀ʼɔse chyase. 13Wùə vɛ ə ndâʼà zâ tə ndô kûmə̀ nə è nyì ke wùə èndaʼa kɔ̂ŋə̀ va se tɔ̀ʼnè è ndzè sə təynse. 14M nyi ngyəyn èchùŋ. M nyîə ke sèndzè sɨmse, ndzè sɨmse e ke Mi 15Kèpî èghɨ kə Pɨ̀a Vɨ̂m ke Mi, M ke ndô Vəyn. M kaʼa M kwu kûmə̀ sè ndzè sɨmse. 16Ndzè sə mɔ̀ʼɔse nyi ndô mə ə̀ kyi Mi mə se va fa mbàynə̀ sèndzè. M kyi se pə kəpì è səynse. Se nə zɨtə̂ kyə̀ zɨ̂mzè, ə se pəyn sə̂ nyi ə mbàyn èmɔ̀ʼ, kyi ke ngyəyn èmɔ̀ʼ.
17Pɨ̀a Vɨ̂m nyîə kɔ̀ŋɔ̀ Mi kûmə̀ nə M nyîə nyi èpɨaʼtêzè se fo ngɨŋ Zɨ̂mè se kwue, tsɔ̀fə kə M kɛse kyî èndam Zɨmze. 18Wùə vîvè va ə è kàʼa è nji tsɨsè èndam zɨme se Mi. Ə̀ kɔ̀ŋɔ̀ kə nâʼà Mi se kwu. M nyîə kyi àtyaʼ se fo endam Zɨme, fɨyn kyi àtyaʼ se kɛsə fiə pə̀yn. Ə̀ zɨnə nyi eghɛ zɛ ə Pɨ̀a nyi mə È və fo tyaʼa nə Mə nə̂.”
19Ghɛ ghɨ̀nə̀ ə Njisə̀s tè wàmne ghə tè pə̀yn èchyasèzè ə ghɨə Njûs ghə fètəyn. 20Ghɨə tsɨəghe e pîə nə, “È nyîə kyi èpamə̂ ə satàynzè, È ndɨŋə zhya kə nâʼà ndò! kûmə̀ ghè ə ghàyn zɨtə sè və?”
21Pîza yî ghe pîə nə, “Wùə èpamə̂ ə satàynzè vayn kàʼa è və wâmnə̀ nyi. Pamə̂ ə satàynzè kàʼa se nəyn zayn nə wùə efòfə ə fe tèluʼ ə?.”
Ghɨ Njûsghè ə mɛ Njisə̀s
22Shîŋə̀ azhi ə posə nə Ndɛ Ètsə̀məke tè nyiə njîə èlùʼ ə Njèlusalɛ̀m. Ə̀ nyi zâ mə ə̀ nyi è pìŋ fofke nyi tsɛ̂sè. 23Njisə̀s tè ghanə tsɛ̂ Etipîə Ndɛ Ètsə̀mə mə ə tè tɔŋtə nə Etipì ə Solomùynzè. 24Ghɨ Njûs yîghe ə pə̀ zùŋtə̀ ə Və ə ngwùŋ ə pfɨfə sê vəyn nə, “Tsàyn sê ghàs nə Ò ndə̀mə̀ tânə̀ zàyn ghàs nə ə kwaʼtə̀ kə ndò kê va səmɔʼ ə? Lote tsàyn sè ghàs səmɔʼ nə ə̀ nyi ghô vɛ ə chɔʼ ndə̂m ə?”
25Njisə̀s ə pə̀ynsə̀ nə, “M nyi mə mə kàynè tsayn sê ghàyn pîza ghàyn ghe tàʼa pomə̂. Ghɛ ə kayntə ghɛ ə M nə̂ ə Pɨ̀a Vɨm və ezə, nyi ghəynghe ə ghe tsâ kûmə̀ Mi. 26Pîza ghàyn vayn pomə̂ kûmə̀ nə ghàyn va sendzè sɨmse. 27Ndzè sɨmse nyîə zɨə kyə̀ zɨ̂m M ke səynse, se chumtə̀ Mi. 28M fo ghənə èndam zɛ ə ze tə mîə va, mə ndzè sə təynse tə kwuə va. Mə wùə vayn kaʼa è kyi fi səynse ə Mì əgho. 29Ghɨ ghɛ ə Pɨ̀a Vɨm fo sê Mi nyîə ngaŋtə̂ tsɛ nâʼàpî ghè, mə wùə vayn kyiə fiə ghənə ə Pɨ̀a Vɨ̂mvè ə gho. 30Pɨ̀a è Mi nyi ke sə eghɛ èmɔ̀ʼ.”
31Ghɨ nə ghɛ ə se fɨnə komtə̂ əchi se tɨmnə̂ vəyn ətəyn. 32Njisə̀s ə pìə sê ghənə nə, “Mə nə̀yn ghɛ ə chûŋə̀ setsɨ̀ ə ghanə shi kə Pɨ̀a Vɨm fo tyaʼa nə M nəyn, famə əfètə̂ ə̀ghɛ, ə̀ nyi zɨ̂yn zə ə ghàyn kyiŋə se tɨmnə̂ Mi sə tə?”
33Ghənə ə pìə sê Vəyn nə, “Ghàs kyiŋə va se tɨmnə̂ ghò kûmə̀ ə̀ghɛ ə chûŋ ghɛ ə Ò nə̀yn. Pîza, ghàs kyiŋə se tɨmnə̂ ghò kûmə̀ nə Ò mɔ̀msə̀ se pì nə Ò nyi Fezhə̀.”
34Njisə̀s ə pə̀ynsə̀ nə, “Ə paʼà nyàʼ ə ghàyn ə ŋwàʼlè àlâŋ nə, Zhə̀fè tè pi nə, ‘Ghàyn nyi mzhə̀?’ 35Ghàs ke ndô nə ghɛ zɛ ə ŋwàʼlè ə Fezhə̀ pìə nyì səmɔʼ, nyi se tə ndamə faŋ; ə nyì sê ghɨ̂yn kə Zhə̀fè tè tɔŋte nə mzhə̀ kə Fe tè tsɛ̀sə tom ə̀ Vəyn se ghənə. 36Kè sê Mi, Pɨ̀a ə chɔʼ Mi ə tomə ndzɨsə̂ ə mbi. E se kwî zàyn nə ghàyn ə pîə nə M sôylə̀ Fezhə̀, kûmə̀ nə M pi nə M nyi Vâ ə̀ Fèzhə̀? 37Ə M nə̂ va fɨ̂aʼ zɛ ə Pɨ̀a Vɨm tom nə M nəyn, kə ghàyn pomə sê Mi. 38Pîza, ə M nə̂ fɨ̂aʼ ətəyn, ghàyn ə tàʼa pomə pì sê Mi, ghàyn ə pomə̂ ə̀ghɛ ghɨm ghe nəghe, endom kə ghàyn ke kwəynsê sə eshìŋə̀ ekwuŋsəze nə Pɨ̀a nyì ghasè Vəyn, M nyi ghasè Pɨ̀a kə ghè tə ghayn.”
39Ghənə ə mɔ̀msə̀ kwəynsə̂ se kyîə ə Njisə̀s, pîza È və ndinə fɨə ə ghənə gho.
40Njisə̀s ə ke kɛsə tyàŋ apàs endaʼa tsô eghaʼâ ə̀ Njondàynkè, elùʼ vɛ ə Njɔyn Fo M̀mò tè fo môm, ə ndamə fu. 41Ghɨ tsɨəghe ə pə̀ sê Vəyn ə pìə nə, “Njɔyn tè paʼà tyə̀yn nâʼà chwìə èkayntə zhîzè èmɔ̀ʼ pîza nâʼàpî èghɛ èkè zɛ ə è tè pi kûmə̀ wùə vɨnə̀ tè nyì səmɔʼ.” 42Ghɨghe fumə setsɨ̀ ə pomə̂ sê Njisə̀s.
اکنون انتخاب شده:
Njɔyn 10: bfm
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید