Matyò 13
13
Ə ngàyn ə̀ pɛ̀ àfùʼ
(Mâk 4.1-9; Lûk 8.4-8)
1Kèpî fumə fetuʼ Njisə̀s ə ndò ə ndɛ ə ndùə tsɨsə̂ etipì ènjwì ə Ngalìlîvè zaʼlə̂ ə̀ghɨ fu. 2Ghɨ ghɛ ghe tè pə̀yn fu tè tsɨ̀ə tsɛ̂sə̀ ndò. Zɨnə mə ə nə̀ Vəyn è və njiə ə ngwùʼ èghaʼâ ə tsɨsə̂ ətəyn, nɔ̂ynkè ə tyəmtə̂ etipì zɨtə̂ sê Vəyn. 3È və tsà ghənə è ghɛ etsɨə ghe ə sengàyn. Ə tsà ngàyn sê ghənə nə.
“Wùə àfùʼ vîvè tè səʼ se màʼa ə ngwàʼ ə̀ vəyn, 4kə è màʼ ngwàʼ ə̀təyn afùʼ, zhîzè ə tàyntə̀ aghòl endomke, nɨ̂ŋmè ə pə̀ tsoftə̂ kwɨlə nâʼà èkɨ̂m. 5Shi yîghe ə tàyntə̀ elùʼ enyɔyn, mə nyì ke fèfɨ̂atə̀ fə mchife. Ə zàŋsə̀ fôlə̀ kûmə̀ nə chîm tè nyùʼte nyi ke ndò. 6Pîza kə chwì tè payn, ə nyɔ̀ʼɔ̀ èfɨa ətəynve və kwuə, kûmə̀ nə ghaŋtə ghənə̂tè tè pâʼà tɔ̀ʼ nji əchi. 7Shi yîghe ə tàyntə̀ əfètə̂m m̀sòlèndzɔŋ, m̀sòlèndzɔŋ mətə̂m ə ndəmə̂ kɔʼɔ ə kolə èfɨa nə vɛ ə ve tè ndəmə. 8Shi yîghe ə tàyntə̀ mchi mêchùŋə̀m, ngwàʼ ə̀təyn ə kɔʼɔ ə pɔŋə nâʼà àchûŋ. Puʼ tîte kyi ə̀shi ewə̀ atu, yîghe m̀ghɨm tufə, ghəmɔ̀ʼɔ m̀ghɨm ta.”
9Njisə̀s ə kwùŋsə̀ nə, “Nâʼà pîndè vɛ ə è kyi tôŋneve, è və tɔ̀ʼɔ̀ zɨtə̂.”
Njisə̀s ə tsàyn ghɛ zɛ ə è zaʼlə ə sengàyn kûmə̀ zəynze
(Mâk 4.10-12; Lûk 8.9-10)
10Kə shîŋə̀ nə kɛ tsɛ̀ Chùmtè èpàm sə Njisə̀sè ə pə̀ ə vəyn etipì ə pfɨfə sê vəyn nə, Ò zaʼlə̂ ə̀ghɨ ə sengàyn kûmə̀ ghe?
11Njisə̀s ə pìə sê ghənə nə, “Zhə̀fè fo ghàyn ètyaʼa nə ghànə ke ə̀ghɛ e ndətə efɔ̀yn ekwùtwəynə, pîza ə tàʼa fo atyaʼ nə kɨ̂yn se ghɨ mɔ̀ʼɔ. 12Nâʼà pîndè vɛ ə è zɨə ke ghɛ e ndətə efɔ̀yn ekwùtwəynə, Zhə̀fè nə̀ pâʼsə̂ è zɨə ke ətəynze kə è və kyi èzɨə keze se tsɨ̀. Pîza nâʼà pîndè vɛ ə è kyi va zɨə ke nə zɨ̂yn, Zhə̀fè nə̀ fiə tsɨsə̀ pî fè fɨatə̀ fɛ ə è kyi. 13M wàmnə̀ sê ghənə ə sengàyn kûmə̀ nə ghənə fe ndò pîza zɨə kê va. 14Zɨnə̀ ə lwiynsê ghɛ zɛ ə Zhə̀fè tè tom tɔynə̂ ə fɨ̀aʼtè Èsayà nə,
‹Ghàyn tə nə̂ ə zɨtə̂ kə nâʼà ə̀ghɛ,
pîza zɨə kê va,
ghàyn tə nə̂ ə fe, fe kwəynsə̂
pîza fe kê va fɨake.
15M pîə zɨnə kûmə̀ nə ghɨ ghɨ̀nə vayn kàʼa fɨyn zaʼlê nâʼà èghɛ
mə ghənə kɨmtê tôŋne ə ghənəvè è shiə ghənə̂ghè. Mə ghənə vayn zɨ vayn kàʼa fe nâʼà àfɨa kyîke.
Ə ze fə va zamə, mə ghənə nyi fe, ə fe kê.
Ghənə tə zɨtə̂ è tôŋne ə ghənə̂vè, ə təmə ghənə̂ zɨ kê.
Mə ə ghənə nə̂yn zɨnə mə, ə kə̀mnə̀ pə̂ sê Mi, ə m tsuʼ ghənə.›”
16Njisə̀s ə tsà kwəynsə̂ sê chùmtè èpàm sə vəynse nə, “Pîza pɔsêzè nyì sê ghàyn kûmə̀ nə ghàyn fe ndò ghɛ ghɛ ə ghàyn nyì se fe, zɨə ghɛ ə ghàyn nyì se zɨ. 17M piə sê ghàyn səmɔʼ nə fɨ̀aʼtè se ghaʼa se tsɨəse è ghɨə Fezhə̀ etsɨə tè nyîə kɔ̂ŋɔ̀ nâʼà sə ŋaŋ se fe əghɛ ghɛ ə ghàyn fe, pîza ə tàʼa fe è kɨsè se zɨ əghɛ ghɛ ə ghàyn zɨə, pîza ə tàʼa zɨ.”
Njisə̀s ə tsàyn ghɛ zɛ ə ngàyn kûmə̀ è maʼ ə ngwàʼè tyə̀nə̀
(Mâk 4.13-20; Lûk 8.11-15)
18“Ghàyn zɨte zôyn ə zaʼle ghɛ zɛ ə ngàyn ə̀ zho nə̂ ngwàʼ chwìtə̀. 19Ghɨ ghɛ ə zɨə tom kûmə̀ èfɔ̂yn ə Fezhə̀e zɨə kê va nyi kə ngwàʼ zɛ ə è tàyntè aghòl endomke. Ndə̂plè ə pə̀ njiə ndô èghɛ zɛ ə fə zho ə ghənə təm. 20Ngwàʼ zɛ è tàyntè ə fètə̂ m̀chi mê ènyɔnə̀m nyi kə ghɨ ghɛ ə fiə tom ə̀ Fèzhə̀ è təmə saŋnəghe kè sə ashìŋə̀ kɛ ghənə zɨ zə̂ynzè. 21Pîza tom nə zɛ ə pâʼà lotə njiə tyə̂m ə ghənə ətəm. Ghənə ə pomə̂ zə̂ynzè kè sə fendiŋə̀ fe tətə̂fè pîza Shɨ̂ŋə̀ kɛ ə tsôsvè kɨ̀sə etsə̂fsè pə̀yn kûmə̀ tom ə̀təyn, ghənə ə kɛsə̂ ndûə epàm. 22Ngwàʼ zɛ ə è tè tàynte əfètə̂m m̀sòlèndzɔŋ nyi kə wùə vɛ è zɨə ghɛ ə Fezhə̀zè, ghɛ mbiə è kɔŋè kûmə̀ èghaʼ ə mbize ə lwiynsə̂ ə̀təm ə vəynghe. Zɨnə mə ə nə̀ vəyn è vayn kaʼa è kwiyne ə və sepi. 23Pîza ngwàʼ zɛ ə è tè tàynte mchi mêchùŋə̀m nyi kə ghɨ ghɛ zɨə ghɛ ə Fezhə̀zè, ə zɨə kê zəynze. Kyì ə ghɨ̀ ghɨ̂yn nə̂ əghɛ əchûŋə̀ kè kə epuʼ ə sɔ̀f zɛ ə ze kɔʼ, zə mɔ̀ʼɔ ze kyi ə̀shi ewə̀ atu, zə mɔ̀ʼɔze kyi ə̀shi m̀ghɨm tufə, zə mɔ̀ʼɔze kyi m̀ghɨm ta.”
Njisə̀s ə mɛ̀ ngàyn kûmə̀ àwə̂yn epike
24Njisə̀s ə mɛ̀ ngàyn ə̀mɔ̀ʼɔ̂ nə, “Fɔ̂yn ə Fezhə̀e nyì kepî kə wùə vɛ ə è zho ngwàʼ èchùŋ ə və afùʼ, 25pîza, fumə epàmə àshîŋə̀ tuʼfe mɔ̀ʼ è tuʼve mə nâʼà pîndè pɨəynə̂ ndò, pàyn ə̀ vəyn ə pə̀ ə zho àwə̂yn epike əfètə̂ ngwàʼ nə zɛ, 26Ngwàʼ ə̀təyn ə folə̀ tuə ngwàʼ və zhə̀tə̀ se fɨ, ghɨghe ə ke fe nə yîyn ə pike pɔŋɔ ndəmə̂ kɔʼɔ əfètə̂ təyn. 27Ghɨ fɨaʼa pɛ̀ àfùʼ ghɛ ə pə̀ se vəyn ə pìə nə, ‘Pɛ̂, ə̀ tè nyi ngwàʼ èchùŋ kə Ò tè zho ə gho afùʼ; yîyn epike ətəyn ndò ghayn zə?’ 28È və pə̀ynsə̀ nə, ‘Ə̀ tè nyi pàyn vîvè èmɔ̀ʼ kə è tè zho wə̂yn ətəynke’ Ghɨ e fɨaʼa ətəynghe ə pfɨfə sê vəyn nə, ‘Ò kɔ̀ŋə̀ ndò nə ghàs ndu chɔʼtê tsɨsè èwə̂yn ətəyn və̂?’ 29È və pìə nə, ‹ngâŋngaŋ, ghàyn kàʼa ghàyn ndu se chɔʼtê, ə ghàyn ə chɔʼtə̂ paʼsə̂ è sɔ̀fsè. 30Ghàyn za ə sɔ̀f sə təynse ə ndəmə̂ paʼsə̂ ndûə kə yî ghə̀ yîynkè se zaʼâ ə fetuʼ fe kwiəfe. Fumə ashìŋə̀ ə m tsayn sê ghɨ kwiə nə ghənə sote tsɨsè chi èwə̂yn sə shi ə kol mkaʼâ ə nyɔʼ. Epàm ətəyn ə se kwiə sesɔ̀f se ndə̀m ə mì etwəyn.›”
Njisə̀s ə mɛ̀ ngàyn kûmə̀ eshi ə mostàzè
(Mâk 4.30-32; Lûk 13.18-19)
31Njisə̀s ə mɛ̀ kwəynsə̂ ngàyn ə̀mɔ̀ʼɔ̂ sê nɔ̂yn kɛ nə, “Fɔ̂yn ə Fezhə̀e nyi kepî kə feshîlə̀ fə ngwàʼ ə̀ fèkàʼ fîfe ə tɔŋtə nə mostà kə wùə njìə è və zho ə və afùʼ. 32Shiə mostà nə zɨ̂yn tətə̂ tsɛ ndò shiə ngwàʼ ghəkɨ̂m, pîza mə shîŋə̀ kɛ ə ze ndəmə kɔʼ kâʼfə təynfe e ghaʼa tsɛ̂ m̀kâʼ mê tətə̂ mè m̀kɨ̂m. Nɨ̂ŋmè e pə̂ pɛ sèndɛ ə fəynfə sengɔyn.”
Njisə̀s ə mɛ̀ ngàyn kûmə̀ fèsə̀ʼ
(Lûk 13.20-21)
33Njisə̀s ə fɨnə mɛ̀ ngàyn zhîzè sê ghənə ə pìə nə, “Fɔ̂yn ə Fezhə̀e nyi kepî kə fèsə̀ʼ ə wùzhɔyn njî, è və fɨ̀aʼsə̀ m̀pfɨ̂ŋ mə kwaŋə̀m kàŋə̀mè m̀ta è və fiyəsə ətəyn m̀ mə kɔʼɔ tsɨ̂ə kə nyî.”
(Mâk 4.33-34)
Eghɛ zɛ ə Njisə̀s wàmnə̀ ə sengàyn kûmə̀ zəynze
34Njisə̀s tè zaʼlê əghɛ nə ghɨyn sê ghɨ nâʼà əkɨ̂m kə sengàyn, È tè piə va ghɛ sê ghənə emɔ̀ʼ ndɔ̀ʼɔ è mɛ̀ sə ngàyn. 35È tè nə̂ nyi se lwiynsê əghɛ ghɛ ə Zhə̀fè tè pi tɔynə̂ ə fɨ̀aʼtè nə,
“M tə nə̂ mə wàmnə̀ sê ghənə ə sengàyn.
M tə zaʼlə̂ ə̀ghɛ sê ghənə mə wùə pâʼà tyəmə̂ ke nâʼà se etuʼ vɛ ə tè pom mbi.”
Njisə̀s ə tsàyn ghɛ zɛ ə ngàyn ə̀ ngwàʼè pi tyə̂nə̀
36Kə Njisə̀s tè ndo za ànɔ̂yn ətəynke ə njiə ə ndɛ, chùmtè èpàm sə vəynse ə pə̀ sê vəyn ə pìə nə, “È tsayn sê ghənə ghɛ zɛ ə ngàyn èwə̂yn epive tè tyə̀ynə.”
37Njisə̀s ə pə̀ynsə̀ sê ghənə nə, “Wùə vɛ ə è tè zho ngwàʼ èchùŋ tè nyi Va wùə. 38Fûʼ ətəynke e nyi mbi, ngwàʼ èchùŋ zɛ e nyi əghɨ ghɛ ə ghe nyi etyə̀ èfɔ̀yn ə Fezhə̀vè, yîyn epike e nyi ə̀ghɨ ghɛ ə ghe nyi ə̂ ndə̂plè etyə̀. 39Pàyn ə wùə vɛ ə è tè zho wə̂yn epi kɛ e nyi ndə̂plè, shîŋə̀ kwiəke e nyi kwùŋse ə mbi, ghɨe kwiəghe e nyi sètsì. 40Kè kə zûŋtə̀ wə̂yn epive ə nyɔ̀ʼɔ̀ ewùs, ə̀ nyì kepî èghɛ zɛ ə ze tə kyânə̀ sê ghɨə ndə̂plə̀ shîŋə̀ kɛ ə mbi tə pə̂ ə kwùŋse. 41Va wùə tə tomə sètsì sə vəynse nə se nji fɨsê ə̀ghɨ ghɛ ə ghe nə̂ nə ghɨghə nə̂ pi è ghɨ mɔ̀ʼɔ ghɛ ghe nə̂ pi. 42Ə màʼà ndzɨsə̂ ghənə elùʼ ewùs, elùʼ vɛ ghənə nə chîə, kwulə ə̀sɔŋ ə ghənə̂ghè. 43Fumə ashìŋə̀, ə ghɨə Fezhə̀ ghɛ ə ghe nyi chichi tə nə̂ ə panə kə kə chwì ə pɨ̀a ghənə̂ efɔ̀yn. Ə̂ kyi nâʼà pîndè tôŋneke, è və tɔ̀ʼɔ̀ zɨtə̂.”
Ngàyn kûmə̀ èghaʼ endətəze
44“Luʼ efɔ̀yn ekwùtwəynve nyi kə eghaʼ zɛ ə ndətè afùʼ, mə shîŋə̀ kɛ ə wùə èmɔ̀ʼ kyiŋ è və ndə̀tə̀ zəynze tɔynə̂ ə vəyn saŋnê, è və pəʼlə̂ nâʼà efɨa vəynve ekɨ̂m kə è kàʼa è zhɔyn fûʼ ətəynke.
Ngàyn kûmə̀ èchi echûŋzè
45Fɔ̂yn ekwùtwəynve nyi kepî nyi kə wùə è pəʼlə, ə è kyiŋə chîə chûŋ ghɛ ə ghe tɛ èkɛve. 46Ə è fe chi echûŋ zhîze kə pəʼlə mə ze tɛ ndò èkɛve, ə è kɛse kwɨlə pəʼlə̂ nâʼàpî ghè vɛ è kyi, ə è ndu zhɔyn zəynze.”
Ə ngàyn kûmə̀ fèlàm
47Njisə̀s ə mɛ̀ kwəynsə̂ ngàyn ə̀mɔ̀ʼɔ̂ nə, “Fɔ̂yn ekwùtwəyn fɨyn nyi kepî kə fèlàm ezhoghɛ wùə màʼ ə tsô ə ko tèkyì tə embwɔ̀tè ətəyn kè tekɨ̂m. 48Ə fèlàm fə təynfe lwiyn, ghənə shɨ̀nə̀ fɨsə̂ etipì ə tsɨsə̂ se komtə̂ fɨsê embwɔ̀ ətəynve. Vɛ ve tsɔ̂fə̀ kə kwɨl, ə ndə̀mə̀ vəynve ətɔ̀yn nə̀ lɔpà, vɛ ə ve tsɔ̂fə̀ va kə kwɨl, ə màʼà. 49Ngàyn zɨ̀nə tyə̀ynə kə kwùŋse ə̀ mbi tə pə̂ ə è zə nyi. Tsìsè tə pə̂ ə se chitê fɨsê ə̀ghɨ piə əfètə̂ ghɨə chichighe, 50ə màʼa ndzɨsê ghənə elùʼ ewùs, elùʼ vɛ ə ghənə tə nə̂ chîə kwɨlə ə̀sɔŋ ə ghənə̂ghè.”
Ezaʼlê emɨze è ze feze
51Njisə̀s ə pfɨfə sê chùmtè èpàm sə vəynse nə, ghənə zɨə kê têndò ghɛ nə ghɨyn ə.
Ghənə ə pə̀ynsə̀ se vəyn nə ghənə zɨə kê ndò.
52È və pìə sê ghənə nə, “E tyə̀nə̀ nə nâʼà pî tyə̀ynsè àlâŋ èkè vɛ ə è pə̀yn sə chùmtè èpàm efɔ̀yn ekwùtwəynve nyi kə pɛ̀ ndɛ vɛ è njìə fɨsə fɨa efe è ve mɨve elùʼ vɛ ə è ndə̀mə̀ vəynve.”
Ghɨə Nazalɛ̀t ghə tə Njisə̀s
(Mâk 6.1-6; Lûk 4.16-30)
53Njisə̀s tè mɛ̀ mɨ̀se sengàyn nə sɨ̂nə̀ ə ndò fumə elùʼ 54ə kɛse kwɨlə̂ ə vəyn ə tɔ̂ŋ ə zhə̀tə̀ se zaʼlê əghɨ ə se ndɛ sə atsɨ̀yntese. Ghɨ ghɛ ə tè zɨ kə è zaʼlə̂ tè nyi èkaynze. Sè pfɨfə nə, “È njì ghayn kyì etɔf eghaʼâzè nyiə? È kwì zayn sə̂ nə̂ ə̀ghɛ kayntə ghɨnə? 55Ə̀ vɨnə va ke nâʼà vâ wùə vɨ̀nə è kɔmə fɨave nyîə? Ə va Mèli kə è piə və? Ghɔnyiə vəynghe va Njə̂m, è Njosɛ̀f, è Shimùyn è Njondàs ə̀? 56Piə ghɔnyìə vəynghe zəynghe əkɨ̂m ndamə kə nâʼà fa tə̀ʼ? È njì ghayn tɔfe è tyaʼa sə̂ nə̂ ə̀ghɛ ekaynə ghɨyn ə?” 57Ghənə ə ke zhə̀tè se pàyn ə Njisə̀s.
Njisə̀s ə pìə sê ghənə nə, “Ə ndamə ngɨmnə̂ fɨ̀aʼtè ə̀ Fèzhə̀ naʼàpî ghayn ə̀ tsɛ̂ kə va ə vəyn ə tɔ̂ŋ è sas ə ndɛ ə ghənə̂zè.” 58Kə ghənə tè tàʼa pomə Njisə̀s, È və tàʼa nə̀yn əghɛ əkayntəghe fumə.
انتخاب شده:
Matyò 13: bfm
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید