Lúkɩ 14

Zozíi yalɩma sɔ́kʋ́ gupuonyɔ Zúfʋnyʋa a nyɔbhleyru kʋ́

(Lúkɩ 6.6‑11; 13.10‑17)

1Zúfʋnyʋa a nyɔbhleyru a múó kʋ́, Falizɩ́ɛnyʋa a cífɩ a múó wle Zozíi ɔ gbó a ká kʋ́ lii. Mà nyʋaá kʋ̀ ʋ́ a, ŋwʋ́ɛ́ Zozíi yɩ́ gɔ̀. 2Mà nyɔ a múó bɔ́ɔ Zozíi drɩ̀ a, gúó ʋ̀ bhlɔ́ɔ́ a, ʋ́ nio lé ɔ́ bóbùò. 3Lé Zozíi bháʋ́ niwɔlɩ lé ɔ́ yrá lɔ̀ a másɛnyʋaá yà Falizɩ́ɛnyʋaá sɔ́ kʋ ʋ́ a, mà: «Nyɔ yi míi lé ɔ yi ɔ liyʋ yalɩma Zúfʋnyʋa a nyɔbhleyru kʋ́ ʋʋ?» 4Ɔ́ yrá a, nyɔ nɩ́ né saà lé Zozíi yalɩma gupuonyɔɔ́ lé ɔ́ srʋ ɔ́ mà ɔ mʋ gbó. 5Lé ɔ srʋ nyʋaá mà: «A nyièdɩ a Nyɔɔ́ a Yuwliyʋɔ́, ɩ́zà ɔ dɔ̀dɔ̀bhlɩ nɩ bhli nyúbhukuo a mnɩ́ Zúfʋnyʋa a nyɔbhleyru kʋ́ a, ɔ nɩ́ ka dáamúó kʋ lé ɔ kɛ́ɛ́ mɔ̀ɔ sa a?» 6Zozíi yrá sɩ́tɛ̀ a, á nyièdɩ a nyɔ a múó coco nɩ́ niwɔlɩ yrɩ́bha.

A ná mʋ́mɔ drɩ̀ a kpí a mnɩ́ a bɔ́ɔlɛɛ́

7Nyʋaá á wle lilie a zà a, cémʋ́ drɩ̀ a kpí a mnɩ́ bɔ́ɔlɛɛ́ á wà a, Zozíi ŋwʋ́ɩ́ yɩ́gɔ̀, ɩ́ ka ŋnɩ lé ɔ́ pá nyʋa fɩ́ɛ́ kʋ̀ ʋ́ a dɔ̀, ɔ́ anɩ́: 8«Nyɔ nɩ wle mɔ̀ dɛ́ɛ́ a pálɛ ŋwɩ́ta a, lé nɩ̀ yi ʋ́ a, nàa mʋ́ drɩ̀ a kpó a mnɩ́ bɔ́ɔ ka mà à nɩ́ máà yì, nyɩ́kpɔkádɔ yi lɛ yi. 9Lé nyɔɔ́ ɔ̀ wle aa sɔ́ɔ a, nɩ ka lɛ mɔ̀ srʋ mà: Soglù, lé nyɩ́kpɔkádɔ̀ɔ̀ ɔ̀ yi a, ɔ ká sá bɔ́ɔ! Ɔ nɩ nií a, zʋ̀ʋ yi lɛ mɔ́ bhlá lé bɩ́kʋ́ ɔ́ nà ka yɩ́ lɛ bɔ́ɔ ka mʋ. 10Na a nɩ wle mɔ̀ jrè lé nɩ̀ mʋ a, bɔ́ɔ bɩ́, lé nyɔɔ́ wle mɔ̀ a, ɔ ká yi lé jrè a nyʋa fɩ́ɛ́ a klʋ́ jɩ̀, ɔ́mɔ́ kà mɔ̀ srʋ mà: Plɩ́ drɩ̀ a kpó a mnɩ́ kà sá bɔ́ɔ. Tányɩɛ́ mʋ́ ɔ́ na ká yɩ́ lɛ́ mɔ̀ sɩ́tɛ̀ srʋ á, ɩ́ yi yɩ́ lɛ mɔ̀ kpá ŋwʋ́.#14.8‑10 A zɛlɩɩ sáà Níní 25.6‑7. 11Ná srʋɛ amɔ mà, nyɔ nɩ bhá ɔ nyoku kʋ́ a, Lagɔ ɔ́ɔ kwléloó sá, ɩ́zà nyɔɔ́ ɔ̀ kwléle ɔ nyoku sá a, ɔ́mɔ́ Lagɔ bhá kʋ́.»

Wle ŋazɩ̀nyʋa a ká li

12Nyɔɔ́ ɔ̀ wle Zozíi lilie a zà a, Zozíi srʋ ɔ́ mà: «Nɩ cí mà kà nà gbó nyʋa wle lilie a zà a, nàa wle ɩ̀ bheyinyʋa, ɩ̀ nɩ́ayúó, nà lɔ́lɔ́kpɩnyʋa, nàa wle lɛkanyʋaa yà sɔ́ a sí dáamúó a, ámá nɩ̀ wle a, á míi lé a wle sáà mɔ̀ a gbó lilie a zà, bhʋ́ a tányɩɛ́, a nɩ́ yɩ́ nà lelilɩ a kpa kaa. 13Naa nɩ̀ cí mà kà nyʋa lilie a zà nà gbó wle a, wle ŋazɩ̀nyʋa, bhlɛ́kanyʋa, bhɩbhlanyʋa, wle yɩ́bhlanyʋa. 14À nɩ̀ ŋwɔ́ɔ ámá nɩ̀ wle a, yà pʋ́, máà bhʋ́anaá nɩ́ ka mɔ̀ lelilɩ a zà wle lé a ká aa kpa pɛ́ɛ, Lagɔ nà kà kɛ́zɔ̀ mɔ̀ pɛ́ɛ yruó kʋ́ nyʋaá à bhli Lagɔ̀nyùzɔ a, á na ká kɛ́zɔ̀ galɔ̀ a.»

Lelinyʋa a núnúó

(Matíe 22.1‑10)

15Zozíi cí sɩ́tɛ̀ a, nyʋa ɔ yà sɔ́ lie a, á nyièdɩ a nyɔ a múó sané, ɔ́ anɩ́: «Nyɔɔ́ nà kà kɛ́zɔ̀ Lagɔ a Léyibhlɩɛ́ a mnɩ́ li a, ɔ́ ya pʋ́!» 16Lé Zozíi pá núnúó lé ɔ́ srʋ ɔ́, ɔ́ anɩ́: «Ɩ̀ dʋdʋɛ, nyɔ a múó pi lelilɩ, lé ɔ́ wle nyʋa kɔ́kɔ́mnɩ́ lilie a zà. 17Lelitanyɩ ŋnɩ a, ɔ́ cíe ɔ cóyʋ nyʋaá wle ka: A yi mà lelilɩɛ́ ya yrɩ̀lɩ. 18Mà nyʋa a lɔ̀fɩ́ɛ́ wɔlɩ́ ceamúóó ámá á cíé, áa bhibhie mà ɔ cielaá. Tagànyɔ̀ɔ̀ anɩ́: Yáa lágba kla, ɩ́ ka lé ɩ mʋ mɔ̀ɔ kakamnɩ́lɛ́ lé ká mɔ̀ɔ dʋdʋ̀, naa ɩ́ bhibhie mɔ̀ mà nɩ́ ka yɩ́ ɔ̀ yi! 19Lé nyɔ ànɔ srʋ ɔ́ mà: Yáa dòdòbhlìi kla, ŋwnɔ́ lé yʋwlɩ a cɩ́ a gbɩ́, náa fɩɩ́ trányɩ ka lágbaá, naa nyɔkɔɔ̀ mà, nɩ́ ka yɩ́ ɔ̀ yi! 20Ànɔ srʋ ɔ́ sɔ́kʋ́ mà: Kakamnɩ́lɛ́ ɩ́ wlʋ́ lɛ́ ná ŋwnɔ́ fláa ka, naa nɩ́ ka yɩ́ ɔ̀ yi.

21Cóyʋɔ́ yrɩ́bha lé ɔ́ yi lé wɔlɩ́ɛ́ fɩ́ɛ́ nyʋaá cí a, ɔ́ sa mɔ̀ mɩ́ ɔ kanyɔ. Mà ɔ́ kanyɔɔ́ ŋwʋ́ dɩ lé ɔ́ srʋ ɔ́ sɔ́kʋ́ mà: Vʋ́vʋ̀à kʋ́ lé bhli dúó, mʋ crɩ́kpaá lé mʋ tríi, wle ŋazɩ̀nyʋa, wle bhlɛ́kanyʋa, wle bhɩbhlanyʋa wle sa yɩ́bhlanyʋa, a yi. 22Cóyʋɔ́ mʋ lé ɔ́ yi a, ɔ́ srʋ ɔ́ kanyɔ mà: Kanyɔɔ̀, nɔnʋɔ́ ɩ̀ nyɛ́ mɔ́ɔ a, yʋ́ʋ zɔ̀ bhɩa, mà sabɔ̀da kʋ àyɩ ʋ́. 23Kanyɔɔ́ anɩ́: Bhli bìdí kʋ́ a nyízɛ̀ɛ̀, dɛ́ɛ́ nà kà bìdé yɛ́ a, pla ʋ́, nyʋa fɩ́ɛ́ nà kà ʋ́ ŋnɩ a, wle á, nɩ pɩ́ɛ́ fɩ́ɛ́ lé a ká yi bhè gbó ká nyʋa kʋ́ yíè. 24Mà nyʋa ànàà ɩ́ wle lé à nɩ ka lɛ́ dá yi a, nɩ́ ka á nyièdɩ á nyɔ gbó lelida ŋnɩɩ̀.»

Cégbá mʋ́ nyɔ yi nɩ lé ɔ́ yi Zozíi a kʋjɩ̀nyɔ plɩ́ a

(Matíe 10.37‑38)

25Tányɩ a múó, Zozíi yà nyʋa kɔ́kɔ́mnɩ́ sɔ́ bhlie nyúzɔ á mnɛ. Lé Zozíi yrɩ́bha lé ɔ́ gà la klʋ́, lé ɔ́ srʋ á mà: 26«Nyɔɔ́ nɩ̀ cí mà ɔ̀ kà mɔ́ kʋ́ jɩ́ a, ɔ wà mɔ́ lé ɔ zi ɔ tʋ́ kʋ́, ɔ nɛ́ kʋ́, ɔ ŋwnɔ kʋ́, ɔ yʋ́, ɔ nɩ́ayúó lé ɔ nyoku sɔ́ kʋ́, à nɩ nɩ́ sa ŋwɔ́ɔ a, ɔ nɩ́ ka ná kʋjɩ̀nyɔ plɩ́. 27Nyɔɔ́ nɩ ka ɔ kúsu a gbɩdɩɛ míi lé ɔ̀ kà mɔ́ kʋ́ jɩ́ a, ɔ nɩ́ ka ná kʋjɩ̀nyɔ plɩ́.

28Náa yrá ca a, a nyièdɩ a nyɔ gbá nɩ̀ yrá lé ɔ̀ kà wlʋ kádʋ pá, lé ɔ̀ nɩ́ bɔ́ɔ fɩ́ɛ́ sá lé ɔ̀ kà bhobho lé moníe ɔ́ ka a, ɩ nɩ yi míi lé ɩ nɩ yi wlʋɔ́ zɔ̀ bhɩa a, ɔ kɩ́ɩ́ yɩbhlɩ áa? 29Ɔ nɩ srí wlʋɔ́ lé ɔ nɩ nɩ́ ʋ́ pápʋ́ zɔ̀ bhɩa, nyʋaá fɩ́ɛ́ nà kɔ̀ɔ̀ yɛ́ a, á yió nyɩà. 30Lé a yi lɛ́ cí mà: A lɛ́bhɛɛ nyɔɔ́ lɩ̀à, ɔ cíe wlʋ a pápʋ́ kʋ́, mà ʋ́ sɩɔ́, ɔ nɩ́ ʋ́ zɔ̀ bhɩa!

31A lɛ́bhɛ sɔ́kʋ́ʋ, lóo nɩ cí mànɩ́ ɔ ká ɔ lilo tʋ́ fa a, ɔ́ɔ bɔ́ɔ fɩ́ɛ́ sá, lé ɔ́ bhobho námasa, ɔ́ nɩ yi míi lé ɔ nɩ yi tavʋ̀nyʋa a dí a gbɩ́ bhá lé nɩ yi ɔ liyʋɔ́ ɔ̀ kà tavʋ̀nyʋa a dí a kʋ́gbá a sɩa a, ɔ́ bhobhuí. 32Ɩ́ nɩ ŋwɔ́ɔ mà ɔ nɩ́ ka míi a, ɔ́ sa nyʋa, lé bhlɩ́ɛ́ jɩ̀ ɔ liloó yà ɔ tavʋ̀nyʋa sɔ́ kʋ a, á mnɛ ɔ́ wlú sra ka, lé á núnule. 33Náa srʋɛ amɔ, nyɔɔ́ ɔ̀ nɩ ka ɔ kakalɩɛ́ fɩ́ɛ́ a gbʋ́ wlʋ́, lé ɔ̀ ká mɔ́ gɔ̀ yi a, ɔ nɩ́ ka ná kʋjɩ̀nyɔ plɩ́.

34A lɛ́bhɛ gùu, ʋ́ náa, mà ʋ nɩ yi la mɛ́nɩmɛ bhɩa a, cégbá á yi la sɔ́kʋ́ mʋ́ mɛ́nɩma áa? Ʋ nɩ́ yɩ́ la céana a ninie ka. 35Ʋ nɩ́ ka la dʋdʋ̀ a mnɩ́ kʋ́ náma, lé a nɩ́ kʋʋ la sáà aglɛ́ɛ kʋ́ bhá, áa yi yɩ́ la mʋ́ klá pá. Ɔ̀ nɩ̀ kà nyúkwlí ɔ̀ kà nú a, ɔ nú!»

انتخاب شده:

Lúkɩ 14: NEY

های‌لایت

به اشتراک گذاشتن

کپی