Lúkɩ 23
23
Á fa Zozíi Pilátɩ yà Elódʋ sɔ́ drɩ̀
(Matíe 27.2,11‑14; Málɩ́kɩ 15.1‑5; Záan 18.28‑38)
1Nyʋa a lɔ̀fɩ́ɛ́ soglù, lé á fa Zozíi Pilátɩ gɔ̀. 2Á ŋwʋ́lɔ gbʋ́ wlú, ɩ́mɩ́ ŋwɔ́ɔ mà: «Nyɔ lɩ̀à ɔ́mɔ́ ɔ̀ ŋáta bhlɩ́ a mnɩ́ a nyʋa a wɛ́. Ɔ́ srʋ á mà a ná pɛ́ɛ lóo kádɔ Sezáa a lapóo lé ɔ́ wlele sáà ɔ nyoku lóo lé Kláyɩ́sɩ.» 3Lé Pilátɩ yrɔ́ɔ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi srʋ ɔ́ mà: «Ɩ́mɩ́ ɩ̀ cíe lɛ́.» 4Lé Pilátɩ srʋ Lagɔ̀bʋ̀bɔ̀nyʋa káda lé jrè a lɔ̀fɩ́ɛ́ mà: «Nyumo wɔlɩdrèè nyɔɔ́ lɩ̀à ká lɛ́ nɩ a, nɩ́ àyɩ má yɛ́.» 5Mà nyʋaá nɩ́ ka ŋwnʋ́, wɔlɩceamúó ɩ́mɩ́ á cíe: «Ɔ́ ŋáta bhlɩ́ɛ́ a mnɩ́ a nyʋa a wɛ́, Galilée mʋ́ ɔ́ bhálɩɩ́ kʋ́, lé ɔ yɩ̀sɔ́ ŋnɩ Zudée lé ɔ́ plɩ́ɩ mɔ̀ɔ a bhlɩ́ a lɔ̀fɩ́ɛ́ a mnɩ́ lé ɔ́ ya lɛ́ dɛ́ ŋnɩ.» 6Mà Pilátɩ nú wɔlɩ́ɛ́ a, ɔ́ yrá námasa, Galiléeyʋ ɔ nɩ ŋwɔ́ɔ a. 7Bhʋ́ á srʋ ɔ́ mà Galiléeyʋ ɔ́ ŋwɔ́ɔ, lóo Elódʋ a bhlɩ́ a mnɩ́ a nyɔ kʋ̀ʋ. Bhʋ́ ɔ́ srʋ nyʋa mà a fɔɔ́ Elódʋ gɔ̀, bhʋ a tányɩɛ́ Elódʋ kʋ Zelízalɛ́mʋ.
8Mà Elódʋ yɛ́ Zozíi a, lɔlɔɔ́ ɔ̀ bhlɔ́ a, ʋ́ plɩ́ ɔ́ gɔ̀, ɔ́ wɔlɩ́ɛ́ á cíé lé ɔ́ núé a, ɩ́zà ɔ yɛ́tʋ bhlɔ́ɔ́, ɔ kɔ́ɔ́ sáà lɛ̀wɔ̀lɩ drɩ̀ nɩ ɔ kɩ́ɩ́ yɛ́ máà. 9Ɔ́ yrálɔɔ́ wɔlɩ́ kɔ́kɔ́mnɩ́ kʋ́, mà Zozíi nɩ́ ɔ́ né sra. 10Lagɔ̀bʋ̀bɔ̀nyʋa káda yà lɔ̀ a másɛnyʋa sɔ́ kʋ ʋ́, á ŋwʋ́lɛ Zozíi gbʋ́ wlú gbabhlesa. 11Bhè Elódʋ yà ɔ sʋ́ja sɔ́ kʋ ʋ́ á nyɩalɔɔ́ á trʋlɔɔ́, lé á plɔ náma kotu mʋ́ lé á yrɩ́bhɔɔ́ sɔ́kʋ́ lé á fɔɔ́ Pilátɩ gɔ̀. 12Bhʋ́ a yruó kʋ́ blɔ̀blɔ́, Pilátɩ yà Elódʋ sɔ́ plɩ́ bheyinyʋa, bhè a nɩ́ wá wàwà.
Pilátɩ ŋwnʋ́ lé a ká Zozíi kúsu jɩ̀ kʋ
(Matíe 27.15‑26; Málɩ́kɩ 15.6‑15; Záan 18.39–19.16)
13Pilátɩ wle Lagɔ̀bʋ̀bɔ̀nyʋa káda, ɔ́ wlele nyɩ́kpɔkáda, lé bhlɩ́ a mnɩ́ a nyʋaá fɩ́ɛ́, 14lé ɔ́ srʋ á mà: «Nyɔ a la lɛ́ mɔ́ dɛ́ gɔ̀ lé a nie lɛ́ mà ɔ̀ ŋáta bhlɩ́ a mnɩ́ a nyʋa wɛ́ a, a klʋ́ jɩ̀ lé ɩ́ yrálɔɔ́ wɔlɩ́ɛ́ fɩ́ɛ́ kʋ́, lé wɔlɩdrèè à nyù lé à kà à zà a nyɛ́lɔɔ́ lɛ́ gbʋ́ a, nɩ́ àyɩ má yɛ́.» 15Elódʋ a sɛ́fʋ céamúó, ɔ nɩ́ sáà mɔ́ nyumo wɔlɩpɩʋ gɔ̀ yɛ́ɛ, ɩ́mɩ́ ka ŋnɩ́ a zà ɔ́ yrɩ́bha àmɔ̀ mɔ́ gɔ̀. A dʋdʋ̀ʋ̀, nyɔɔ́ nɩ́ nyumosa nɩ lé a kɔɔ́ bhlá. 16Naa, ná kɔ́ɔ́ nyʋa nyɛ́ á kɔ́ɔ́ sɩ́á lé kɔ́ɔ́ sá cíe. [17Flíiflíiglɩ̀sɩ́sɩ̀ɛ̀ fɩ́ɛ́ a tányɩ, Pilátɩ cíe kɔ́ɔ̀kɔ́ jɩ̀ŋwʋ̀nyɔ sá.#23.17 Ámá wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] 18Mà nyʋa fɩ́ɛ́ kʋ̀ ʋ́ a, gá mʋ́ á sa yrè, á nie: «Bhlá nyɔɔ́ lɩ̀à, bhè cíe Balabásɩ sá!» 19Bhè Balabásɩɛ́ nyʋaá sa lɛ́ a, tányɩ a múó kʋ ʋ́ lé yrè klu bhlɩ́ a mnɩ́, gɔ̀mna yà nyʋa sɔ́ a nyièdɩ, lé ɔ́mɔ́ Balabásɩɛ́ bhlá nyɔ, bhʋ́ á ŋwʋ́ ɔ́ jɩ̀ɩ. 20Mà cémʋ́ Pilátɩ yrá lé ɔ́ ká Zozíi sá cíe a, bhʋ́ ɔ́ cílaá sɔ́kʋ́ gɔ̀. 21Ɔ́ niwɔlɩ nɩ́ bhli, lé á ŋwʋ́ ɔ́ yrè: «Kʋ ɔ kúsu jɩ̀, kʋ ɔ kúsu jɩ̀!» 22Lé Pilátɩ srʋ á sɔ́kʋ́ taàda mà: «Wɔlɩdrè gbá kɛtɛkʋ́ ɔ́ nɩ lé à nyù lɛ́ à? Wɔlɩdrèè à kà lɛ́ ɔ́ kwɩ́ɛ́ plɩ́ a, nɩ́ àyɩ má yɛ́, ná ká nyʋa srʋ, lé á kɔ́ɔ́ sɩ́á, fɩ́ɛ́ lé kɔ́ɔ́ sá cíe.» 23Mà nyʋa nɩ́ ka ŋwnʋ́ʋ, á ŋwʋ́ ɔ́ sɔ́kʋ́ yrè fɩ́sa, á nie a kʋ ɔ kúsu jɩ̀, ɩ́mɩ́ tuo ʋ́. 24Cémʋ́ á yrá a, ɩ́mɩ́ Pilátɩ nɩ. 25Ɔ́ cíe Balabásɩ sá, bhè ɔ́mɔ́ fa wá gɔ̀mna kʋbhlalɛ gɔ̀ lé ɔ̀ bhlá wá nyɔ lé á ŋwʋ́ wá jɩ̀ɩ, lé ɔ́ nyɛ́ a Zozíi, lé cémʋ́ á wà a á kɔ́ɔ́ ɔ̀ mɩ́ nɩ.
Á kʋ Zozíi kúsu jɩ̀
(Matíe 27.31‑56; Málɩ́kɩ 15.20‑41; Záan 19.17‑37)
26Á fa Zozíi á mnɛ, lé a yà nyɔ a múó sɔ́ gbɩ́dà a, ɔ́ wlʋ́ɛ́ lágba, ɔ́mɔ́ á wlele Sɩlɛ́nɩ a Simɔ́ɔ, lé sʋ́ja bhlio kʋ́ lé á srʋ ɔ́ mà ɔ bháʋ́ kúsuó, lé ɔ gbɛ Zozíi jɩ̀. 27Bhlɩ́ a mnɩ́ a nyʋa kɔ́kɔ́mnɩ́ gbɛlɔɔ́ jɩ̀, ŋwná kʋ̀ a nyièdɩ á sro sɩɩ́ wlú á ŋwíé á zɩzra ɔ́ zà. 28Lé Zozíi yrɩ́bha wlú lé ɔ́ gà la klʋ́, lé ɔ́ srʋ á mà: «Zelízalɛ́mʋ a ŋwnáyɩ, a ná ŋwí mɔ́ɔ, mà a yà a yúó sɔ́ a zà a nɩ ŋwí! 29A lɛ́bhɛɛ, yruú yi ʋ́ kʋ, lé á yi kɛ́zɔ̀ cí mà: Ŋwnáá à nɩ́ à zà yʋ́ va lé a nɩ ka kɔ́ɔ̀kɔ́ yʋ́ va lé à nɩ ka kɛ́ yʋ́ nyɩ́a a, á ya pʋ́! 30Bhʋ́ a tányɩɛ́, nyʋa yi kíkí srʋ mà: Bhli àmɔ̀ jɩ̀ lé ŋwʋ́ŋwɛ àmɔ̀ kʋ́! 31Naa, a nɩ bhli sɩ́tɛ̀ suyalʋ kʋ́ a, cégbá mʋ́ á yi kɛ́zɔ̀ yɛyɛsu nɩ áa?»
32Nyʋaá à fa Zozíi a, á fa sáà bhʋ́ a yruó blɔ̀blɔ́ kàpàkápányʋa a sɔ́, a ká a yà Zozíi sɔ́ gá bhláa. 33Mà á ŋnɩ á wlele wlúkofó a, bhʋ́ sʋ́jàà kʋ Zozíi kúsu jɩ̀, lé á kʋ sáà kàpàkápányʋaá sɔ́ɔ́, á kʋ múó Zozíi a lilie kʋ́, lé á kʋ ànɔ ɔ́ kɔmɩa kʋ́. 34[Lé Zozíi sané, ɔ́ anɩ́: «À Tʋ́ʋ̀! Cielaá, mà wɔlɩ́ɛ́ á nie a, a nɩ́ɩ yì!»#23.34 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] Bhè sʋ́jàà kʋ ʋ́ á bhábhalɛ ɔ kótié, nɩ̀gbɩ á pá, mɔ̀ɔ jɩ̀ ɩ́ bhlile a, nà bháʋ́ nànɩ kotu.#23.34 A zɛlɩɩ sáà Lɔlɔ 22.19.
35Bhè dú a nyʋaá fɩ́ɛ́ kʋ ʋ́, á dʋdʋɛ, ɛ̀ nɩ̀ ŋwɔ́ɔ Zúfʋnyʋa kádàà a, áa nyɩalɔɔ́, á nie: «Ɔ́ɔ sa ʋ́ nyʋa neé à, ɔ́mɔ́ nɩ̀ ŋwɔ́ɔ Kláyɩ́sɩ lé Lagɔ nɩ gbázɩ̀ mʋ́ a, ɔ́ sa yɩ́ ʋ́ ɔ nyoku neé a!» 36Bhè sʋ́jàà a sɛ́fʋ ŋnɩ ɔ́ gɔ̀, á nyɩalɔɔ́ lé á nyɛ́ ɔ́ nɔkalʋ mnáada. 37Lé á srʋ ɔ́ mà: «Mɔ̀ nɩ ŋwɔ́ɔ cɩ́cása Zúfʋnyʋa a lóo a, sa yɩ́ ʋ́ ɩ̀ nyoku neé!» 38Kúsuó jɩ̀ á kʋ Zozíi a, á kʋ sáà ʋ wlú kʋ́ kplipá lé á jɩ́jrà jɩ̀ Zúfʋnyʋa a lóo.
39Mà kàpàkápányʋaá sɔ́ɔ́ á kʋ kúsié jɩ̀ a, múó vlávla Zozíi, ɔ́ srʋ ɔ́ mà: «Máà nànɩ́ mɔ̀ ŋwɔ́ɔ Kláyɩ́sɩ a, sa yɩ́ ʋ́ ɩ̀ nyòku neé bhè kà máà ʋ́ àmɔ̀ neé sa à!» 40Bhʋ́ sɔ́ anɔɔ fɔɔ́ cícíé, ɔ́ srʋ ɔ́ mà: «Mɔ̀, nɩ́ gúu Lagɔɔ? Mɔ̀ɔ á na ká bhlá ɔ́mɔ́ bhísakʋ́ a! 41À nɩ ŋwɔ́ɔ àmɔ̀ a, wɔlɩ́ɛ́ à nɩ a, ɩ́ kalɩmɛ mʋ́ à kʋ̀, mà ɔ́mɔ́, ɔ nɩ́ nyumo wɔlɩ́ nɩ!» 42Lé ɔ́ srʋ Zozíi mà: «Zozíi, bhobho ná wɔlɩ́ tányɩɛ́ mʋ́ nà kà nà léyibhlɩɛ́ a mnɩ́ mʋ a!» 43Lé Zozíi srʋ nyɔɔ́ mà: «Cɩ́cása a mnɩ́ a zà, náa srʋɛ mɔ̀ mà zɩmnɛ́ɛ́ lɩ̀à bhlɔ̀bhlɔ̀ yáa mɔ̀ sɔ́ à yi Lagɔ̀duú pla.»
44Yrʋ́ ya yiosa wlú nyièdɩ ŋnɩ, mà fɩɩ́n bhè yrʋ́ɔ́ múò lé cúcú pla bhlɩ́ɛ́ fɩ́ɛ́ jɩ̀, ʋ́ kʋ plaàda ààn lé glíyi á ta kla. 45Yrʋ́ɔ́ mɔ́mnɔ ʋ́ lé Lagɔ̀wlʋ̀ɔ̀ a mnɩ́ a lɔkwɩ kádɛ̀ɛ̀ kʋ̀ mɔ̀ a, ɛ́ nyièdɩ yralɔ mʋ́ pɩ́ sɔ́. 46Bhè Zozíi bhɩa wɔlɩ́: «À Tʋ́ʋ̀! Yáa mɔ̀ ná wúgɔ̀ɔ̀ wlɩ ŋwʋ́!#23.46 A zɛlɩɩ sáà Lɔlɔ 31.6.» Ɩ́ bhli a, ɔ́ɔ dí nyobhuo. 47Sʋ́ja a kámanyɔɔ́ kʋ̀ ʋ́ a, tányɩɛ́ mʋ́ ɔ́ yɛ́ wɔlɩɛ́ plɩ́ a, ɔ́ fa Lagɔ a ŋwnú ɔ́ nie: «Nyɔɔ́ lɩ̀à a nɩnɩgbɩ srí la cɩ́cása sá!» 48Nyʋaá fɩ́ɛ́ kʋ̀ la ʋ́ lé à yɛ́ wɔlɩ́ɛ́ a dá a, bhɔtɔwɔlɩ mʋ́ á yrɩ́bha áa kʋda. 49Nyʋaá fɩ́ɛ́ à yì Zozíi, lé ŋwnáá à jɩ́ɛ́ wá mʋ́ kʋ́ lé ɔ yàsɔ́ wlʋ́ Galilée a, á lɔ̀fɩ́ɛ́ nɩ́ ʋ́ ŋnɩ, á wlʋ́ ʋ́ gwá, mɔ̀ɔmɔ̀ á kʋ lé á dʋdʋ̀ wɔlɩ́ɛ́ fɩ́ɛ́ ɩ̀ plɩ́ a.
Á zízìè Zozíi
(Matíe 27.57‑61; Málɩ́kɩ 15.42‑47; Záan 19.38‑42)
50Nyɔ a múó, ɔ́mɔ́ á wlele wá Zɔ̀zɛ́fʋ, ɔ́ kʋ Zúfʋnyʋa a lɔ̀ a tɩ́tɩ́ jrìkádàà a mnɩ́, duokʋ́namanyɔ lé ɔ nɩnɩgbɩ srí sá. 51Mà Zúfʋnyʋa a dúó ŋwɔ́ɔ Alimatée a, mɔ̀ a nyɔ kʋ̀ʋ. Mà ɔ sɛ́fʋɔ́, Lagɔ a Léyibhlɩɛ́ a yiyitanyɩɛ́ mɛ́ ɔ́ gláa, ɔ́ ŋwɔ́ɔ nyɔ lé ɔ̀ nɩ́ Zozíi a bhlábhlá wɔlɩ́ɛ́ a jrè kʋ. 52Ɔ́mɔ́ Zɔ̀zɛ́fʋɔ́ ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. 53Ɔ́ a múóó ɔ́mɔ́ sà gàzɛ̀ɛ̀ kúsuó jɩ̀, lé ɔ̀ pɩpɩɛ́ lɔkwɩ lé ɔ̀ ŋwʋ́ɛ́ lésuó a mnɩ́. Mà lésuó, cɔ́kʋ a mnɩ́ á wlúlʋʋ́, a nɩ́ à zà mʋ́ kʋ́ mnɩ́ púò. 54Zúfʋnyʋa a nyɔbhleyru yie lɛ a, ɩ́ ka ŋnɩ́ lé nyʋa a yrɩlɩlɛ yɩ́. 55Ŋwnáá à yà Zozíi sɔ́ námnɩ kʋ́ lé á wlʋ́ Galilée a, á yà Alimatée a nyɔ Zɔ̀zɛ́fʋ sɔ́ mʋ lesuó gɔ̀, lé á dʋdʋ̀ cémʋ́ á púo gàzɛ̀ɛ̀ sá a, á yɩ́ɩ́. 56Ŋwnáá yrɩ́bha lé á yi dú. Á yi a, á yrɩ̀lɩ̀ kpʋ́ lé dàŋwóni a ká lɛ gàzɛ̀ɛ̀ gɔ̀ ŋwʋ́, máà Zúfʋnyʋa a nyɔbhleyru kʋ̀ lɛ ʋ́, a nɩ́ zrɩ nɔnʋ, sɩ́tɛ̀ mʋ́ lagɔ̀jràmáá cíe.
اکنون انتخاب شده:
Lúkɩ 23: NEY
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.
Lúkɩ 23
23
Á fa Zozíi Pilátɩ yà Elódʋ sɔ́ drɩ̀
(Matíe 27.2,11‑14; Málɩ́kɩ 15.1‑5; Záan 18.28‑38)
1Nyʋa a lɔ̀fɩ́ɛ́ soglù, lé á fa Zozíi Pilátɩ gɔ̀. 2Á ŋwʋ́lɔ gbʋ́ wlú, ɩ́mɩ́ ŋwɔ́ɔ mà: «Nyɔ lɩ̀à ɔ́mɔ́ ɔ̀ ŋáta bhlɩ́ a mnɩ́ a nyʋa a wɛ́. Ɔ́ srʋ á mà a ná pɛ́ɛ lóo kádɔ Sezáa a lapóo lé ɔ́ wlele sáà ɔ nyoku lóo lé Kláyɩ́sɩ.» 3Lé Pilátɩ yrɔ́ɔ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi srʋ ɔ́ mà: «Ɩ́mɩ́ ɩ̀ cíe lɛ́.» 4Lé Pilátɩ srʋ Lagɔ̀bʋ̀bɔ̀nyʋa káda lé jrè a lɔ̀fɩ́ɛ́ mà: «Nyumo wɔlɩdrèè nyɔɔ́ lɩ̀à ká lɛ́ nɩ a, nɩ́ àyɩ má yɛ́.» 5Mà nyʋaá nɩ́ ka ŋwnʋ́, wɔlɩceamúó ɩ́mɩ́ á cíe: «Ɔ́ ŋáta bhlɩ́ɛ́ a mnɩ́ a nyʋa a wɛ́, Galilée mʋ́ ɔ́ bhálɩɩ́ kʋ́, lé ɔ yɩ̀sɔ́ ŋnɩ Zudée lé ɔ́ plɩ́ɩ mɔ̀ɔ a bhlɩ́ a lɔ̀fɩ́ɛ́ a mnɩ́ lé ɔ́ ya lɛ́ dɛ́ ŋnɩ.» 6Mà Pilátɩ nú wɔlɩ́ɛ́ a, ɔ́ yrá námasa, Galiléeyʋ ɔ nɩ ŋwɔ́ɔ a. 7Bhʋ́ á srʋ ɔ́ mà Galiléeyʋ ɔ́ ŋwɔ́ɔ, lóo Elódʋ a bhlɩ́ a mnɩ́ a nyɔ kʋ̀ʋ. Bhʋ́ ɔ́ srʋ nyʋa mà a fɔɔ́ Elódʋ gɔ̀, bhʋ a tányɩɛ́ Elódʋ kʋ Zelízalɛ́mʋ.
8Mà Elódʋ yɛ́ Zozíi a, lɔlɔɔ́ ɔ̀ bhlɔ́ a, ʋ́ plɩ́ ɔ́ gɔ̀, ɔ́ wɔlɩ́ɛ́ á cíé lé ɔ́ núé a, ɩ́zà ɔ yɛ́tʋ bhlɔ́ɔ́, ɔ kɔ́ɔ́ sáà lɛ̀wɔ̀lɩ drɩ̀ nɩ ɔ kɩ́ɩ́ yɛ́ máà. 9Ɔ́ yrálɔɔ́ wɔlɩ́ kɔ́kɔ́mnɩ́ kʋ́, mà Zozíi nɩ́ ɔ́ né sra. 10Lagɔ̀bʋ̀bɔ̀nyʋa káda yà lɔ̀ a másɛnyʋa sɔ́ kʋ ʋ́, á ŋwʋ́lɛ Zozíi gbʋ́ wlú gbabhlesa. 11Bhè Elódʋ yà ɔ sʋ́ja sɔ́ kʋ ʋ́ á nyɩalɔɔ́ á trʋlɔɔ́, lé á plɔ náma kotu mʋ́ lé á yrɩ́bhɔɔ́ sɔ́kʋ́ lé á fɔɔ́ Pilátɩ gɔ̀. 12Bhʋ́ a yruó kʋ́ blɔ̀blɔ́, Pilátɩ yà Elódʋ sɔ́ plɩ́ bheyinyʋa, bhè a nɩ́ wá wàwà.
Pilátɩ ŋwnʋ́ lé a ká Zozíi kúsu jɩ̀ kʋ
(Matíe 27.15‑26; Málɩ́kɩ 15.6‑15; Záan 18.39–19.16)
13Pilátɩ wle Lagɔ̀bʋ̀bɔ̀nyʋa káda, ɔ́ wlele nyɩ́kpɔkáda, lé bhlɩ́ a mnɩ́ a nyʋaá fɩ́ɛ́, 14lé ɔ́ srʋ á mà: «Nyɔ a la lɛ́ mɔ́ dɛ́ gɔ̀ lé a nie lɛ́ mà ɔ̀ ŋáta bhlɩ́ a mnɩ́ a nyʋa wɛ́ a, a klʋ́ jɩ̀ lé ɩ́ yrálɔɔ́ wɔlɩ́ɛ́ fɩ́ɛ́ kʋ́, lé wɔlɩdrèè à nyù lé à kà à zà a nyɛ́lɔɔ́ lɛ́ gbʋ́ a, nɩ́ àyɩ má yɛ́.» 15Elódʋ a sɛ́fʋ céamúó, ɔ nɩ́ sáà mɔ́ nyumo wɔlɩpɩʋ gɔ̀ yɛ́ɛ, ɩ́mɩ́ ka ŋnɩ́ a zà ɔ́ yrɩ́bha àmɔ̀ mɔ́ gɔ̀. A dʋdʋ̀ʋ̀, nyɔɔ́ nɩ́ nyumosa nɩ lé a kɔɔ́ bhlá. 16Naa, ná kɔ́ɔ́ nyʋa nyɛ́ á kɔ́ɔ́ sɩ́á lé kɔ́ɔ́ sá cíe. [17Flíiflíiglɩ̀sɩ́sɩ̀ɛ̀ fɩ́ɛ́ a tányɩ, Pilátɩ cíe kɔ́ɔ̀kɔ́ jɩ̀ŋwʋ̀nyɔ sá.#23.17 Ámá wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] 18Mà nyʋa fɩ́ɛ́ kʋ̀ ʋ́ a, gá mʋ́ á sa yrè, á nie: «Bhlá nyɔɔ́ lɩ̀à, bhè cíe Balabásɩ sá!» 19Bhè Balabásɩɛ́ nyʋaá sa lɛ́ a, tányɩ a múó kʋ ʋ́ lé yrè klu bhlɩ́ a mnɩ́, gɔ̀mna yà nyʋa sɔ́ a nyièdɩ, lé ɔ́mɔ́ Balabásɩɛ́ bhlá nyɔ, bhʋ́ á ŋwʋ́ ɔ́ jɩ̀ɩ. 20Mà cémʋ́ Pilátɩ yrá lé ɔ́ ká Zozíi sá cíe a, bhʋ́ ɔ́ cílaá sɔ́kʋ́ gɔ̀. 21Ɔ́ niwɔlɩ nɩ́ bhli, lé á ŋwʋ́ ɔ́ yrè: «Kʋ ɔ kúsu jɩ̀, kʋ ɔ kúsu jɩ̀!» 22Lé Pilátɩ srʋ á sɔ́kʋ́ taàda mà: «Wɔlɩdrè gbá kɛtɛkʋ́ ɔ́ nɩ lé à nyù lɛ́ à? Wɔlɩdrèè à kà lɛ́ ɔ́ kwɩ́ɛ́ plɩ́ a, nɩ́ àyɩ má yɛ́, ná ká nyʋa srʋ, lé á kɔ́ɔ́ sɩ́á, fɩ́ɛ́ lé kɔ́ɔ́ sá cíe.» 23Mà nyʋa nɩ́ ka ŋwnʋ́ʋ, á ŋwʋ́ ɔ́ sɔ́kʋ́ yrè fɩ́sa, á nie a kʋ ɔ kúsu jɩ̀, ɩ́mɩ́ tuo ʋ́. 24Cémʋ́ á yrá a, ɩ́mɩ́ Pilátɩ nɩ. 25Ɔ́ cíe Balabásɩ sá, bhè ɔ́mɔ́ fa wá gɔ̀mna kʋbhlalɛ gɔ̀ lé ɔ̀ bhlá wá nyɔ lé á ŋwʋ́ wá jɩ̀ɩ, lé ɔ́ nyɛ́ a Zozíi, lé cémʋ́ á wà a á kɔ́ɔ́ ɔ̀ mɩ́ nɩ.
Á kʋ Zozíi kúsu jɩ̀
(Matíe 27.31‑56; Málɩ́kɩ 15.20‑41; Záan 19.17‑37)
26Á fa Zozíi á mnɛ, lé a yà nyɔ a múó sɔ́ gbɩ́dà a, ɔ́ wlʋ́ɛ́ lágba, ɔ́mɔ́ á wlele Sɩlɛ́nɩ a Simɔ́ɔ, lé sʋ́ja bhlio kʋ́ lé á srʋ ɔ́ mà ɔ bháʋ́ kúsuó, lé ɔ gbɛ Zozíi jɩ̀. 27Bhlɩ́ a mnɩ́ a nyʋa kɔ́kɔ́mnɩ́ gbɛlɔɔ́ jɩ̀, ŋwná kʋ̀ a nyièdɩ á sro sɩɩ́ wlú á ŋwíé á zɩzra ɔ́ zà. 28Lé Zozíi yrɩ́bha wlú lé ɔ́ gà la klʋ́, lé ɔ́ srʋ á mà: «Zelízalɛ́mʋ a ŋwnáyɩ, a ná ŋwí mɔ́ɔ, mà a yà a yúó sɔ́ a zà a nɩ ŋwí! 29A lɛ́bhɛɛ, yruú yi ʋ́ kʋ, lé á yi kɛ́zɔ̀ cí mà: Ŋwnáá à nɩ́ à zà yʋ́ va lé a nɩ ka kɔ́ɔ̀kɔ́ yʋ́ va lé à nɩ ka kɛ́ yʋ́ nyɩ́a a, á ya pʋ́! 30Bhʋ́ a tányɩɛ́, nyʋa yi kíkí srʋ mà: Bhli àmɔ̀ jɩ̀ lé ŋwʋ́ŋwɛ àmɔ̀ kʋ́! 31Naa, a nɩ bhli sɩ́tɛ̀ suyalʋ kʋ́ a, cégbá mʋ́ á yi kɛ́zɔ̀ yɛyɛsu nɩ áa?»
32Nyʋaá à fa Zozíi a, á fa sáà bhʋ́ a yruó blɔ̀blɔ́ kàpàkápányʋa a sɔ́, a ká a yà Zozíi sɔ́ gá bhláa. 33Mà á ŋnɩ á wlele wlúkofó a, bhʋ́ sʋ́jàà kʋ Zozíi kúsu jɩ̀, lé á kʋ sáà kàpàkápányʋaá sɔ́ɔ́, á kʋ múó Zozíi a lilie kʋ́, lé á kʋ ànɔ ɔ́ kɔmɩa kʋ́. 34[Lé Zozíi sané, ɔ́ anɩ́: «À Tʋ́ʋ̀! Cielaá, mà wɔlɩ́ɛ́ á nie a, a nɩ́ɩ yì!»#23.34 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] Bhè sʋ́jàà kʋ ʋ́ á bhábhalɛ ɔ kótié, nɩ̀gbɩ á pá, mɔ̀ɔ jɩ̀ ɩ́ bhlile a, nà bháʋ́ nànɩ kotu.#23.34 A zɛlɩɩ sáà Lɔlɔ 22.19.
35Bhè dú a nyʋaá fɩ́ɛ́ kʋ ʋ́, á dʋdʋɛ, ɛ̀ nɩ̀ ŋwɔ́ɔ Zúfʋnyʋa kádàà a, áa nyɩalɔɔ́, á nie: «Ɔ́ɔ sa ʋ́ nyʋa neé à, ɔ́mɔ́ nɩ̀ ŋwɔ́ɔ Kláyɩ́sɩ lé Lagɔ nɩ gbázɩ̀ mʋ́ a, ɔ́ sa yɩ́ ʋ́ ɔ nyoku neé a!» 36Bhè sʋ́jàà a sɛ́fʋ ŋnɩ ɔ́ gɔ̀, á nyɩalɔɔ́ lé á nyɛ́ ɔ́ nɔkalʋ mnáada. 37Lé á srʋ ɔ́ mà: «Mɔ̀ nɩ ŋwɔ́ɔ cɩ́cása Zúfʋnyʋa a lóo a, sa yɩ́ ʋ́ ɩ̀ nyoku neé!» 38Kúsuó jɩ̀ á kʋ Zozíi a, á kʋ sáà ʋ wlú kʋ́ kplipá lé á jɩ́jrà jɩ̀ Zúfʋnyʋa a lóo.
39Mà kàpàkápányʋaá sɔ́ɔ́ á kʋ kúsié jɩ̀ a, múó vlávla Zozíi, ɔ́ srʋ ɔ́ mà: «Máà nànɩ́ mɔ̀ ŋwɔ́ɔ Kláyɩ́sɩ a, sa yɩ́ ʋ́ ɩ̀ nyòku neé bhè kà máà ʋ́ àmɔ̀ neé sa à!» 40Bhʋ́ sɔ́ anɔɔ fɔɔ́ cícíé, ɔ́ srʋ ɔ́ mà: «Mɔ̀, nɩ́ gúu Lagɔɔ? Mɔ̀ɔ á na ká bhlá ɔ́mɔ́ bhísakʋ́ a! 41À nɩ ŋwɔ́ɔ àmɔ̀ a, wɔlɩ́ɛ́ à nɩ a, ɩ́ kalɩmɛ mʋ́ à kʋ̀, mà ɔ́mɔ́, ɔ nɩ́ nyumo wɔlɩ́ nɩ!» 42Lé ɔ́ srʋ Zozíi mà: «Zozíi, bhobho ná wɔlɩ́ tányɩɛ́ mʋ́ nà kà nà léyibhlɩɛ́ a mnɩ́ mʋ a!» 43Lé Zozíi srʋ nyɔɔ́ mà: «Cɩ́cása a mnɩ́ a zà, náa srʋɛ mɔ̀ mà zɩmnɛ́ɛ́ lɩ̀à bhlɔ̀bhlɔ̀ yáa mɔ̀ sɔ́ à yi Lagɔ̀duú pla.»
44Yrʋ́ ya yiosa wlú nyièdɩ ŋnɩ, mà fɩɩ́n bhè yrʋ́ɔ́ múò lé cúcú pla bhlɩ́ɛ́ fɩ́ɛ́ jɩ̀, ʋ́ kʋ plaàda ààn lé glíyi á ta kla. 45Yrʋ́ɔ́ mɔ́mnɔ ʋ́ lé Lagɔ̀wlʋ̀ɔ̀ a mnɩ́ a lɔkwɩ kádɛ̀ɛ̀ kʋ̀ mɔ̀ a, ɛ́ nyièdɩ yralɔ mʋ́ pɩ́ sɔ́. 46Bhè Zozíi bhɩa wɔlɩ́: «À Tʋ́ʋ̀! Yáa mɔ̀ ná wúgɔ̀ɔ̀ wlɩ ŋwʋ́!#23.46 A zɛlɩɩ sáà Lɔlɔ 31.6.» Ɩ́ bhli a, ɔ́ɔ dí nyobhuo. 47Sʋ́ja a kámanyɔɔ́ kʋ̀ ʋ́ a, tányɩɛ́ mʋ́ ɔ́ yɛ́ wɔlɩɛ́ plɩ́ a, ɔ́ fa Lagɔ a ŋwnú ɔ́ nie: «Nyɔɔ́ lɩ̀à a nɩnɩgbɩ srí la cɩ́cása sá!» 48Nyʋaá fɩ́ɛ́ kʋ̀ la ʋ́ lé à yɛ́ wɔlɩ́ɛ́ a dá a, bhɔtɔwɔlɩ mʋ́ á yrɩ́bha áa kʋda. 49Nyʋaá fɩ́ɛ́ à yì Zozíi, lé ŋwnáá à jɩ́ɛ́ wá mʋ́ kʋ́ lé ɔ yàsɔ́ wlʋ́ Galilée a, á lɔ̀fɩ́ɛ́ nɩ́ ʋ́ ŋnɩ, á wlʋ́ ʋ́ gwá, mɔ̀ɔmɔ̀ á kʋ lé á dʋdʋ̀ wɔlɩ́ɛ́ fɩ́ɛ́ ɩ̀ plɩ́ a.
Á zízìè Zozíi
(Matíe 27.57‑61; Málɩ́kɩ 15.42‑47; Záan 19.38‑42)
50Nyɔ a múó, ɔ́mɔ́ á wlele wá Zɔ̀zɛ́fʋ, ɔ́ kʋ Zúfʋnyʋa a lɔ̀ a tɩ́tɩ́ jrìkádàà a mnɩ́, duokʋ́namanyɔ lé ɔ nɩnɩgbɩ srí sá. 51Mà Zúfʋnyʋa a dúó ŋwɔ́ɔ Alimatée a, mɔ̀ a nyɔ kʋ̀ʋ. Mà ɔ sɛ́fʋɔ́, Lagɔ a Léyibhlɩɛ́ a yiyitanyɩɛ́ mɛ́ ɔ́ gláa, ɔ́ ŋwɔ́ɔ nyɔ lé ɔ̀ nɩ́ Zozíi a bhlábhlá wɔlɩ́ɛ́ a jrè kʋ. 52Ɔ́mɔ́ Zɔ̀zɛ́fʋɔ́ ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. 53Ɔ́ a múóó ɔ́mɔ́ sà gàzɛ̀ɛ̀ kúsuó jɩ̀, lé ɔ̀ pɩpɩɛ́ lɔkwɩ lé ɔ̀ ŋwʋ́ɛ́ lésuó a mnɩ́. Mà lésuó, cɔ́kʋ a mnɩ́ á wlúlʋʋ́, a nɩ́ à zà mʋ́ kʋ́ mnɩ́ púò. 54Zúfʋnyʋa a nyɔbhleyru yie lɛ a, ɩ́ ka ŋnɩ́ lé nyʋa a yrɩlɩlɛ yɩ́. 55Ŋwnáá à yà Zozíi sɔ́ námnɩ kʋ́ lé á wlʋ́ Galilée a, á yà Alimatée a nyɔ Zɔ̀zɛ́fʋ sɔ́ mʋ lesuó gɔ̀, lé á dʋdʋ̀ cémʋ́ á púo gàzɛ̀ɛ̀ sá a, á yɩ́ɩ́. 56Ŋwnáá yrɩ́bha lé á yi dú. Á yi a, á yrɩ̀lɩ̀ kpʋ́ lé dàŋwóni a ká lɛ gàzɛ̀ɛ̀ gɔ̀ ŋwʋ́, máà Zúfʋnyʋa a nyɔbhleyru kʋ̀ lɛ ʋ́, a nɩ́ zrɩ nɔnʋ, sɩ́tɛ̀ mʋ́ lagɔ̀jràmáá cíe.
اکنون انتخاب شده:
:
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.