Matie 11

1Zezwii 'nyɛɛ 'ɔ ‑gänɩwaa kʋgbä'sɔ ‑kpɔ 'dɩ 'wëë, 'n ɔ yiɛ 'wʋ ‑sɔ, bhlɩ 'la a ‑gwlɩɩ 'wuë 'mö, 'n ɔ yiɛ ‑mä nɩkpa Lagɔwɛlɩɩ 'nyɛɛ mö.

Zaa Batisɩ yɛ nɩkpa Zezwii 'wʋ tie

(Lwiikö 7.18-23)

2‑Lɛ a 'tɛnyɩ 'la 'mö, Zaa Batisɩ ‑wʋ ‑bhlɛ ‑mä ‑jie 'mö 'n ɔ yiɛ Kliisɩ 'a nʋnʋlii 'wuë a 'dɩ 'nʋ. Zaa 'n ɔ yoo 'ɔ ‑gänɩwaa a gla'mö a ‑mumuë 'wʋ tie, 3wa 'kɔ nimï 'yɩbhää mö nɩɩ: «Puënyɔɔ ‑a ‑kʋnɩ a‑a, mö ‑n glɩnɩ bhä, ‑maa ‑mɔmɔɔ ‑a 'kä bhä ‑kʋnɩ ‑a?» 4Zezwii lɛ naa: «Wɛlɩɩ a ‑ngöä, 'n ‑lii 'wuë a yɩlɩɛ 'wʋʋ, a nɩ mö a 'kä Zaa yɩ 'dɩ 'nyɛ. 5'Kukwlekäwa a yilaa do, kpälɛkpälɛwa nɛmö, 'zlalɩbhäwa yɛmanɩ, 'yukwïlagbögbakäwa a yukwïlaa do, ‑wa yɛ a‑a 'ku 'wëë, wa glɔ, ngäzɩwaa 'wuë, wa nyʋä Lagɔ 'a 'Mänatɩtɩɩ. 6Yɩ 'wuë 'mö, ‑ɔ 'nɩ na za Lagɔ 'a 'yioo 'wʋ 'bhöö, 'ɔ ‑jɔlʋ!»

Sɛ'ɛ Zezwii bhïlaa Zaa Batisɩ a dɛ

(Lwiikö 7.24-35)

7Zezwii 'nyɛɛ sa'a Zaa Batisɩ 'a tietiewaa 'dɩ, wa möä 'wëë, nɩkpaa ‑wa soo yɔwʋ, wa 'yila 'klʋ 'n ɔ yiɛ Zaa Batisɩ a dɛ bhïla, ɔ lɛ naa: «'Saa a mö a bhä ‑mä 'muse 'klʋ kie? ‑Bʋbʋkwëyi a ‑mɛ 'vuu ziazianɩ 'mö, 'mö a mö a bhä 'ylɩmöä ‑a? 8'Saa a mö a bhä ‑mä kie 'nɩ? Nɩkpɛ a ‑mɔɔ ‑suä ‑banɩ a ‑banɩ 'mö, 'mö a mö a bhä 'ylɩmöä ‑a? 'Nɩɛ ‑wa ‑suä wʋlʋnɩbanɩ 'mö, wʋlʋnɩbïdi wa glɩ'ɛ 'mö. 9A nɩ nyɩaaa ‑ka 'dɩ, 'saa a möä bhä ‑mä kie 'nɩ? Lagɔ a 'möbhïlanɩnyɔ a'aa a bhä 'ylɩmöä mö ‑a? Nn miɛ! Lagɔ a 'möbhïlanɩnyɔɔ Zaa glɩnɩ a‑a, ‑maa ɔ'bhë ɔ zi Lagɔ a 'möbhïlanɩnyɔ 'wʋ. 10Ɛ'ɛ ‑bhö nyɩasɛ, ‑maa ɔ dɛ yɩ cɛlɩ a‑a ‑mä Lagɔbɔgʋʋ 'mö nɩɩ:

Yɩɛ, 'na ‑gbäglɛyii 'mö n tiee ‑mä ‑na 'yuku, ɔ 'kä ‑na'a 'yioo ‑sɛ. # 11.10 Malasii 3.1.

11‑Tiamö n nyanyɩɛ 'dɩ nɩɩ, mä'ä 'ylʋ zɛmö a nɩkpaa 'wuë gla'mö nɩkpɛ a ‑mɔ 'kää 'ghïli ‑ɔ 'kää Zaa 'wʋ zi, ɔ'ɔɔ ‑bhlɛ gwëlio. ‑Maa ‑sɩbhä yɩ ‑wʋ 'mö 'pɩwʋ mää Lagɔ 'kämanɩɛ, ‑ɔ glɩnɩɛ ‑mä a 'tikëyii, mɔɔ 'ghïliɛ mɔɔ ziɛ Zaa 'wʋ. 12Tɛɛnɩ ‑mä 'tɛnyɩ 'mö dɛɛ Zaa Batisɩ bhïla a‑a Lagɔwɛlɩɩ ‑këë zɩ'ɛ, 'pɩwʋ mää Lagɔ 'kämanɩɛ a mömɛ, 'mö ɛ 'tɛɛ. Nɩkpa a ‑muë 'tɛmanɩɛ wanyɩ 'yli yɔwʋʋ, mʋa möä ‑mä. 13Moyizɩ ‑nyɛ Lagɔ 'a 'möbhïlanɩwaa 'wuë 'sɔ, wa ‑wʋ 'Pɩwʋʋ mää Lagɔ 'kämanɩɛ a dɛ bhïla dɔ'wʋ ‑këë, 'n Zaa Batisɩ yiɛ 'yli 'wlʋ. 14A ‑kä a 'kɩ 'mö 'nʋ nʋʋ, a nɩ yɩbhlɩsɛnɩ sɛ nɩɩ, Lagɔ 'a 'möbhïlanɩnyɔɔ Elii, ‑ɔnyɩ dɛ yɩ cɛlɩɛ ‑mä Lagɔbɔgʋʋ 'mö nɩɩ, ɔ yi 'bɩwʋ yii, 'mö Zaa Batisɩ glɩnɩɛ. 15‑Ɔ ‑kä 'yukwïla 'wlu ‑kä, ɔ nɩ 'nʋa ‑bhlɛ.

16‑Sɩkaa a nɩkpaa, 'saa n 'kʋa bhä 'wʋ pälɩ 'nɩ? Wa 'kä bhɩɛ 'yuë a ‑muë 'bhlinɩ'ɛ 'du 'mö, 'n wa pä'ɛ ‑mumuë wɛlɩ 'wʋ nɩɩ:

17‑A yɛ a za ‑klɩmö bhlɩ,

a'aa yɩ.

‑A yɛ'ɛ 'lɩgbʋlwɩ bhlɩ,

a'aa 'wi.

18Nyɩasɛ n'n‑ä ‑sɩbhä gbä, ‑maa Zaa Batisɩ yiɛ, ɔ'ɔ li, ɔ'ɔ 'nɩmä. Wa lɛ: Nɩkpɛ ‑mɔ nɩ, zuzukwëzokwë ɔ kää ‑gömö. 19Nɩkpɛ a 'Yu ɔbhlɩ, ɔ yiɛ, ɔ li, ɔ nɩmä, ‑maa wa ‑kɔɔ 'wʋ yɩlɩɩ wa lɛ: A yɩɛ, nɩkpɛ ‑mɔ nɩ, ‑ɔ kää lililibho ‑nyɛ nʋnɩmälibho 'sɔɔ. Lapoomoni a 'wʋbhliwa ‑nyɛ 'nyinylolinʋwa ‑mumuë 'sɔ, ‑ɔ glɩnɩɛ wa bheyii. ‑Maa 'dɩ n nyanyɩɛ dɛ'ɛ nɩɩ, nɩkpɛ 'a nʋnʋlii mɩɩ tulanɩɛ 'ylimö nɩɩ 'ɔ wɛlɩɩ, Lagɔ 'a 'nɛɛnɔɔ 'mö ‑mä yɩ 'bhöönɩɛ.»

‑Gwlɩ ‑mimii 'nɩɛ 'yɩbhä yɩ 'kä Zezwii dlɩ 'wʋ ‑kä

(Lwiikö 10.13-15)

20Zezwii gbää sa'a 'wëë, ‑gwlɩɩ ɔ ‑bhɛnɩɛ zɩzɛli a ‑bɛ 'mö, maanyɩ nɩkpaa 'nɩɛ ligba wa 'kä 'wa ‑lizokuu kɛ'mö ‑sɛɛ, 'n ɔ yuëë 'lʋnɩ. Ɔ lɛ naa: 21«Kolazɛɛ a nɩkpanyɩ, a ‑nyɛ Bɛtɩsayidaa a ‑nʋa 'sɔ, a nɩɩ 'mö yɩ 'kää tenyii 'tɛɛ, ɛ'ɛ ‑bhö nyɩasɛ, ‑maa zɩzɛlii n nʋnɩɛ ‑mä 'a mä'aa, ‑mä Tiilɩ glɔ 'mö 'n Sidɔɔ glɔ 'mö ‑mä n ‑kɩɩ a nʋnɩɩ, ‑mä a nɩkpa, wa yɛ laa'a ‑pa ligba wa 'kä 'wa ‑lizokuu kɛ'mö ‑sɛ. Wa yi a ‑bädɩ dlu, wa yi a nyɛnglɛlekwi 'mö päla, nzɩɩ wa 'kä nɩkpabhë 'ylimö tulanɩ nɩɩ, wa yɛ 'wa 'nyinylolii yɩbhlɩnɩ. 22‑Sɩbhä a za, Lagɔ 'a ‑zijle 'kädaa a zlɩɩ ‑kä ghlɛɛ, Tiilɩ ‑nyɛ Sidɔɔ 'sɔ a ‑nʋa ‑waaa Lagɔ ‑yii, wa ‑nyɛ abhʋa 'sɔ a dɔ'wʋ, 'a 'nyinylolii a 'pɛna Lagɔ 'kanyɩɛ 'nyɛɛ, a yi 'mö 'tɛɛ, a yi wa ‑naa 'wʋ zi. 23Zaa, abhʋa abhlɩ, Kapɛnaɔmö a ‑nʋänyɩ, a ‑tɔnɩ bhä nɩɩ, Lagɔ yeanyɩ 'mä ghäyɩ 'wʋ dɛ a dɛ 'gïla ‑a? Ɛ'ɛ ‑bhö ‑sɩbhä ma. ‑Maa ɔ yeanyɩ dʋdʋ 'wʋ ‑lɛ ‑këë a yi ‑mä 'kudu 'wʋ ghlɛ. Ɛ'ɛ ‑bhö nyɩasɛ, ‑maa zɩzɛlii n nʋnɩɛ ‑mä 'a ‑glɔɔ 'möö, ‑mä Sodɔɔmö a ‑glɔɔ 'mö, ‑mä n ‑kɩɩ a nʋnɩɩ, 'wa ‑glɔɔ yi a ‑bhlɛ zɩ'ɛ ‑bhölɩ. 24‑Sɩbhä a za n nyanyɩɛ 'dɩ nɩɩ: Lagɔ 'a ‑zijle 'kädaa a zlɩɩ ‑kä ghlɛɛ, Sodɔɔmö a ‑nʋa, wa ‑nyɛ abhʋa 'sɔ a dɔ'wʋ, 'a 'nyinylolii a 'pɛna Lagɔ 'kanyɩɛ 'nyɛɛ, a yi 'mö 'tɛɛ, a yi wa ‑naa 'wʋ zi.»

A nɩ yinɩ Zezwii ɔ 'kanyɩ 'tɩɩglɩglɛ 'nyɛ

(Lwiikö 10.21-22)

25‑Lɛ a 'tɛnyɩ 'la ‑bhʋlʋ ‑kpɔ 'mö, 'n Zezwii yiɛ Lagɔ bhälɩ, ɔ lɛ naa: «‑Atʋ, zlɩ ‑nyɛ dʋdʋ 'sɔ a ‑lowli, ‑na 'nglɩ nɩ 'ghlimanɩ. Wɛlɩɩ ‑yɩ ziza‑a a‑a, 'nɛɛnɩwaa ‑nyɛ 'bɔgʋyiwaa 'sɔ 'nɩɛ yɩbhlɩnɩɩ, nyɩasɛnɩkpa ‑waaa dɛsɛ ‑kä nɩkpa a 'yila 'klʋ a dɔ'wʋʋ, sɛ ‑n kälɩnuënyɩɛ kɛ 'klʋ a za, n 'ghlimanɩ ‑na 'nglɩ. 26Nn, ‑Atʋ, ‑sɩbhä ‑n 'yɩbhɩɛ, nza yɩ 'plɩɛ ‑sɩbhä 'wʋ.

27‑Amö na dɩba Lagɔ 'nyɛɛ ‑lii 'wuë yowʋ. ‑Bɛ 'nɩɛ Yuu ‑yi 'n ɛ 'nɩ ‑bhö Dɩbaa mɔɔ, ‑bɛ 'nɩɛ'ɛ Dɩbaa ‑yi 'n ɛ 'nɩ ‑bhö Yuu mɔɔ, 'n ɛ 'nɩ ‑bhö'ɛ nɩkpa ‑muë Yuu yɩbhää ɔ 'kä Dɩbaa sʋlʋnɩ muë.

28Zaa, abhʋa yɛɛ yɔlɔ, 'gblukuu a ‑suä 'wlu a za‑a, a nɩ yinɩɩ, a 'kä nyɛpɛ. 29‑Amö na a, dlɩ 'wʋ n yɔnɩɛ, n'n‑ä nanyɩ 'kɔdɔsɛ ‑su. Zaa, a nɩ nglu 'wʋ, n 'kä a 'cɩanyɔ 'zʋ, 'na Lagɔwɛlɩɩ n 'kanyɩɛ 'cɩaa, yɩ 'kanyɩ ‑su, ‑sɩbhä a dɔ'wʋ a yi ‑tiamö nyɛpɛ. 30'Na Lagɔwɛlɩɩ n 'kanyɩɛ 'cɩaa, yɩ 'klʋkpamözʋzwɛ 'nɩɛ 'mö 'tɛɛ, ɛ'ɛɛ ɛ 'kä a dɛ 'gblukwë 'käda glɩnɩ.»

اکنون انتخاب شده:

Matie 11: bet

های‌لایت

به اشتراک گذاشتن

کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

در مورد BdG2 اطلاعات بیشتر کسب کنید

Matie 11

آیات محبوب کتاب مقدس از
Matie 11

بشنويد Matie 11

كتاب‌ مقدس:

Bété, Guiberoua

ترجمه: BdG2 - bet

Matie 11

Matie 11

آیات محبوب کتاب مقدس از Matie 11

بشنويد Matie 11

كتاب‌ مقدس:

Bété, Guiberoua

ترجمه: BdG2 - bet

Matie 11

آیات محبوب کتاب مقدس از
Matie 11