Zâŋ 3
3
Nikodɛm sé gel a Zezú
1Fariziyɛ̧́ a há̧na rɛŋɛ́ ɓá Nikodɛm, ké kaw ɓá mbêw a ɓil a mbây a Juyífri. 2Ké gí ziŋ Zezú a sû̧ŋ, a sa hí̧ nɛ́ ɓá: «Gáŋnjuku, rú tu ɓá Gáŋvbôn pé, pé mɔ́ ɓay a mɔ́ gí tɔ́ʼɔhɛ̧ hí̧ rú, ɓayhí̧lé njuku a há̧na zi ma niŋ hɛ̧sáʼama ɓá báŋké ka mɔ kaw niŋáké, ka Gáŋvbôn mí zi tí kuu mɛ̌ nyáy.»
3Zezú fere a sa hí̧ nɛ́: «Katína mi sa hí̧ mɔ́: Kú mí zi mbuŋ njuku ɓá a féké yáy, ké tí kó Pû a Gáŋvbôn nyá.» 4Nikodɛm vbí nɛ́: «A̧ní rá̧ kú e rembuŋ njuku ka hɔ̧́ dáy ɓá mbuŋa a féké ɓáy lé? Ké zi ma ri ɓil a mâa a mɛ̌ ɓá a féké, a kú rembuŋ nɛ́ ɓáy mbaa?» 5Zezú fere a sa: «Katína mi sa hí̧ mɔ́, njuku a há̧na zi ma ri Pû a Gáŋvbôn, a kú mí zi mbuŋ nɛ́ ka ŋgboro a mbii rá̧ Têm Pukí yáy. 6Njuku a kú mbuŋ ka ŋgboro a hay mûn, ɓá njuku, a njuku a kú mbuŋ ka ŋgboro a Têm a Gáŋvbôn, ɓá Têm. 7Dáy, mɔ́ ná kaw yér ɓay hɛ̧ ka mi sa hí̧ mɔ́ ɓá: “Belɓá kú mbuŋ wǎyri too ɓá mbuŋa a féké ɓáy.” 8Kúna ku ɓá báŋké a ké ziy, mɔ́ lá garaké, a zi tu gel a ké gírú malé kaw serú yá. Nǎŋnɔ́ pé e niŋ ziŋ njuku ka ziŋ mbuŋa ka ŋgboro a Têm a Gáŋvbôn.»
9Dáy Nikodɛm sa hí̧ nɛ́: «Nǎŋ dáy hɛ̧ké e niŋ a̧ní lé?» 10Zezú fere a sa: «Mɔ̌, ka ɓá gáŋnjuku tɔ́ʼɔhɛ̧ ka tísiri a Izirayɛ́l, mɔ zi tu hɛ̧ nɔ́rí̧ nyá lé? 11Katína mi sa hí̧ mɔ́ gbátɓay: Rú kaw saɓay a hɛ̧ ka ná tuy, rá̧ hɛ̧ ka ná kóy, dáy i zi zibɔʼɔ ɓay a ɓurú yá. 12I zi láɓulaw hí̧ mí nyá, gelka mi saɓay a hɛ̧ a tísiriri hí̧ wǎyri. Dáy, i niŋ a̧ní rá̧ a láɓulaw hí̧ mí, ka mǐ, mí saɓay a hɛ̧ a nûnalêri hí̧ wǎyri lé? 13Njuku a há̧na mbêw ka he sé nûnalê zi tí yá, ɔ ɓá Gun a njuku hɛʼɛ ka ɗere gí tísiri. 14Ɓá báŋké ka Mɔyíze gbaŋ sôy sé sâa ka lawkɔ́r, nǎŋnɔ́ kɔ́, belɓá kú gbaŋ Gun a njuku sé sâa,#3:14 Í kɛ̧́ ɓil mbété a Bonké 21:9 15ɓay a njuku ka láɓulaw hí̧ nɛ́y, ké ziŋ ndísɛ̌ʼɛ dát. 16Ɓayhí̧lé, Gáŋvbôn zi njuku a tísiriri mambá, dáy a hí̧ Gun mbêw a mɛ̌, rá̧lǒo njuku mí láɓulaw hí̧ nɛ́ lé, ké ɓɔ́l yá, ké ziŋ káwa ndísɛ̌ʼɛ dát. 17Gáŋvbôn katína, zi pé Gun a mɛ̌ gí tísiri ɓay a ké gí walɓay kɔ̧ tûl njukuri yá, dáy ɓay a njukuri kú ziŋ pɛ̧́na ka ŋgboro a mɛ̌. 18Njuku ka láɓulaw hí̧ Gun a Gáŋvbôn, kú tí walɓay kɔ̧ tûlé yá, a njuku, ka zi láɓulaw hí̧ nɛ́ nyáy, kú walɓay kɔ̧ tûlé dá, ɓayhí̧lé, ké zi láɓulaw hí̧ Gun mbêw a Gáŋvbôn nyá. 19Nǎŋnɔ́, í kó báŋké ka walɓayké e niŋáy: Geltáŋa gí tísiri, dáy njukuri zi tirí̧ma ndé geltáŋa, ɓayhí̧lé péna niŋa a kuriri zi belyá. 20Njuku ka niŋ hɛ̧ belyáy, ŋgú geltáŋa, ɓayhí̧lé, ké erú ka wɔ́w, ɓay a ɓékéhɛ̧ a mɛ̌ri̧, ké zi ná tɛ̧́ kɔ̧ kála. 21Dáy a njuku ka tɔ́ŋ gbátɓay, gí ɓil geltáŋa, rá̧lǒo kú kó péna niŋa a mɛ̌, a ké niŋ ɓá táŋáké ka ŋgboro a Gáŋvbôn.»
Zâŋ saɓay a Zezú
22A falké, Zezú kuu gunbɛʼɛri sé ɓil kaw a Judé. Ké gé kaw kuu kuriri nâm kpay, a ɓá njukuri nyá batêm. 23Zâŋ kɔ́ ɓá njukuri nyá batêm ka Enɔŋ a gbaŋa Salîm, ɓayhí̧lé mbii ŋgɛ̧́ a gelké mambá. Njukuri gí gé lé dáy, ké ɓá kuriri nyá batêm. 24(Katína lé, kú pa̧n ŋgbá Zâŋ ka̧n vûn sɛl yá ɓáy.)
25Dáy gunbɔʼɔ a Zâŋ a fékéri tí táhá̧narí̧ kuu Juyíf a há̧na, sé tûl sáŋna mɔny mûn. 26Kú sé ziŋ Zâŋ a sa hí̧ nɛ́ ɓá: «Gáŋnjuku, mɔ yɛʼɛrɛ njuku a há̧na nɔ́, a kaw kuu mɔ̌ a helkála mbii a Jurdɛ́ŋ, njuku nɔ́ ka mɔ saɓay a mɛ̌y? Ké kaw ɓá njukuri nyá batêm, dáy njukuri ɓá ŋgɛ̧́náké gé ɓá gé lé!» 27Zâŋ sa hí̧ kuriri ɓá: Gáŋvbôn mí zi hí̧ njuku hɛ̧ há̧na nyáy, njuku zi ma ziŋ hɛ̧ a há̧na mbêw yá. 28Wǎyri, i tu ka mûn a wǎyri kɔ́, a mi sa ɓá: «Mǐ, mi zi tí ɓá Kiris yá, dáy kú pé mí ɗambɛlɛ.» 29Njuku ka wûny ɓá a mɛ̌y, ɓá njuku nyá wûny, dáy mbáŋa a njuku nyá wûny, ew gbɛ́ŋɛ́ ɗɛ́ŋ a láɓay a mɛ̌, ké mbá a lawrína, ɓay a ké lá kɔŋ a njuku nyá wûny. Ɓá lawrínaké nɔ́ pé e ka gel ní, nǎŋnɔ́ mi mbá a lawrína. 30Belɓá ké hɔ̧́ sé mbɛl, a mǐ, mí resé fal.
Njuku ka gí a nûnalê
31«Njuku ka gí a sâay, e ka tûl hɛ̧ri̧ too. Njuku ka e a tísiri kaw ɓá njuku a tísiri, a sa ɓá ɓay a hɛ̧ a tísiri. A njuku ka gí a nûnalê (e ka tûl a njukuri too.) 32Ké saɓay a hɛ̧ri̧, a ké kó ka a láy, dáy njuku a há̧na mbêw zi nyá ɓayké yá. 33Dáy njuku ka nyá ɓay a mɛ̌, sa ɓá táŋáké ɓá Gáŋvbôn sa gbátɓay. 34Njuku ka Gáŋvbôn pé nɛ́y, saɓay a Gáŋvbônri̧, ɓayhí̧lé Gáŋvbôn hí̧ nɛ́ Têm Pukí a mɛ̌ ɓá ŋgɛ̧́náké. 35Bâa zi Gun dáy a ɓá hɛ̧ri̧ too kɔ̧ ɓil ndɔ̂ʼɛ. 36Njuku ka láɓulaw hí̧ Gun e ziŋ ndísɛ̌ʼɛ dát, a njuku ka zi láɓulaw hí̧ Gun nyáy, tí ziŋ ndísɛ̌ʼɛké nɔ́ dát nyá, dáy ɓá hɛ́rɛ a Gáŋvbôn pé e ɗere kɔ̧ tûlé.»
انتخاب شده:
Zâŋ 3: pnz
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 CABTAL