Zâŋ 5
5
Zezú ŋgɛ́rɛ njuku mûn a hûlké
(Zâŋ 7:19-24; 9:1-17)
1Falké le, Zezú uru a sé Zerúzalɛ̂m sé gel mára̧ a Juyífri. 2Dáy a Zerúzalɛ̂m, ka gbaŋ nzáʼa ndol a Mbóléri, gun fâ̧w a há̧na erú rá̧ bɔʼɔ bóró ndíɓí erú a kú ɗí ka nzáʼa Hebiré ɓá Betɛsda. 3Ka bɔʼɔ bóróké nɔ́rí̧, njuku záŋmári̧ ɓá ŋgɛ̧́náké nárú̧: Râ̧wri̧, njuku bɔʼɔ belyári rá̧ njukuri ka mûn a kuriri húy.[Kú zoko láŋa a mbii. 4Ɓayhí̧lé aŋnze a há̧na kaw ɗere dát gí ɓil fâ̧wké, ka gí laŋ mbii, lé njuku záŋmá ka tí ɗere ɗambɛl sé ɓil mbiiké, a fal láŋa mbiiké nɔ́ ɗɛ́ŋ, ziŋ ŋgɛ́rɛ a záŋmá a sí̧ lé too a ké erúy.] 5A gelké nɔ́, njuku a há̧na erú, ka e a záŋmá mbimbɔ̂m bonsáy a zíndɔ̂ʼɔsére dáy. 6Gelka, Zezú kó nɛ́ ná tísiriy, ka a tu ɓá záŋmá a mɛ̌ ɗiɓaŋ dáy, ké vbí nɛ́ ɓá: «Mɔ zi ɓay a ziŋ ŋgɛ́rɛ lé?» 7Njuku záŋmá fere a sa hí̧ nɛ́: «Gáŋnjuku, mi zi tí ka njuku ɓá mí vbú ɓil fâ̧w ka mbii kaw láŋa nyá. Gelka, mí zi ɓay a mi ɗéré sé le, njuku a féké tí ɗere ɗambɛl hí̧ mí dá.» 8Dáy Zezú sa hí̧ nɛ́: «Mɔ́ uru, a mɔ́ mbí hîi a mɔ́, a séséna.» 9Núnmbɛ̧́nɛ́, njuku ráy ziŋ ŋgɛ́rɛ, a uru a mbí hîi a mɛ̌, a tí séséna. 10Sêeké nɔ́ ɓá nâm ɔʼɔ a Juyífri, dáy mbây a Juyífri sa hí̧ njuku ráy ka ziŋ ŋgɛ́rɛ ɓá: Sénɛ́ ɓá sêe ɔʼɔ, sáŋna zi hí̧ mɔ́ ŋgboro ɓá mɔ́ hol hîi a mɔ̌ nyá. 11Ké fere a sa hí̧ kuriri ɓá: «Njuku ka ŋgɛ́rɛ mí sa hí̧ mí ɓá: Mí mbí hîi a mǐ, a mí séséna.» 12Dáy kú vbí nɛ́ ɓá: Njuku así̧ sa hí̧ mɔ̌ ɓá, mɔ́ mbí hîi a mɔ̌, ka séséna lé? 13Dáy njuku ka ziŋ ŋgɛ́rɛ zi tu ɓá njuku a sí̧ lé yá. Ɓayhí̧lé, Zezú ɓɔ́l a ɓil a njukuri ka e a gelké.
14Falké Zezú resé ziŋ njuku ráy a ɓil vûn gɔ́ŋ Gáŋvbôn, a sa hí̧ nɛ́ ɓá: Mɔ ziŋ ŋgɛ́rɛ a ŋgɛŋnɛ́ dá, mɔ́ niŋ ɓékéhɛ̧ mbaa, ɓay a hɛ̧ a féké ké tí ná ziŋ mɔ́ ndé a nɛ́ ɓáy. 15Njuku ráy rekála, a sé sa hí̧ mbây a Juyífri ɓá Zezú pé ŋgɛ́rɛ nɛ́y. 16Ɓaykénɔ́ pé Juyífri ɛ́ ŋgboro ɓay a í Zezú, ɓay ka ké niŋ hɛ̧ké a sêe ɔʼɔy. 17Dáy Zezú, fere a sa hí̧ kuriri ɓá: «Bâa a mǐ kaw niŋ péna dát, nǎŋnɔ́ mǐ kɔ́, mi kaw niŋ péna.» 18Ɓay a tûl ɓay nɔ́, mbây a Juyífri ɛ́ ŋgboro í Zezú, tí ɓá ɓay a ké niŋ péna a sêe ɔʼɔ yá, ɓá ɓay ka ké ɗí Gáŋvbôn ɓá Bâa a mɛ̌y, ka reɓá mûn nɛ́ lé Gáŋvbôn.
Kpɔ́ŋa a Gun a Gáŋvbôn
19Zezú rembí ɓay a sa: «Katína mi kaw sa hí̧ wǎyri gbátɓay: Gun, ma niŋ hɛ̧ há̧na ka tûlé yá, ké niŋ ɓá hɛ̧ri̧ a ké kó Bâa a mɛ̌ niŋ. Hɛ̧ri̧ too ka Bâa a mɛ̌ niŋ, Gun niŋ ɓá báŋké kɔ́. 20Ɓayhí̧lé, Bâa zi Gun, a tɔ́ʼɔ nɛ́ hɛ̧ri̧ too a ké niŋ. Dáy Bâa e tɔ́ʼɔ nɛ́ hɛ̧ niŋa a hɔ̧́náké ka ndé a nɛ́rí̧, ɓay a í kaw yér sé tûlké. 21Ɓá báŋké nɔ́ ka Bâa toma hûlri, ka hí̧ kuriri ndísɛ̌ʼɛy, nǎŋnɔ́ kɔ́, Gun hí̧ ndísɛ̌ʼɛ hí̧ njuku a ké ziy. 22Bâa zi walɓay ka̧n tûl a njuku a há̧na nyá, dáy ké hí̧ kpɔ́ŋa walɓay too hí̧ Gun, 23rá̧lǒo njukuri too kú hɔ̧́ Gun ɓá báŋké a kú hɔ̧́ Bâa kɔ́y. Njuku ka zi hɔ̧́ Gun nyáy, zi hɔ̧́ Bâa ka pé nɛ́ gí yá.
24Katína, mi sa hí̧ wǎyri gbátɓay: Njuku ka láɓay a mǐ, ka láɓulaw hí̧ njuku ka pé mí gíy, e ziŋ káwa a ndísɛ̌ʼɛ dát. Kú tí walɓay ŋgbá nɛ́ mbaa, nǎŋnɔ́ ké tá a ɓil hûl sé ɓil káwa a ndísɛ̌ʼɛ dá. 25Katína, mi sa hí̧ wǎyri gbátɓay: Nâmké e gína, dáy nâmké ka̧ dá, ka hûlri e lá kɔ́ŋ a Gun a Gáŋvbôn rá̧ njukuri ka e lá kɔ́ŋké, e ziŋ káwa a ndísɛ̌ʼɛ. 26Ɓayhí̧lé ɓá báŋké ka Bâa erú ka ndísɛ̌ʼɛ a gé léy, nǎŋnɔ́ pé ké hí̧ Gun kɔ́ ndísɛ̌ʼɛ a gé léy. 27Dáy Bâa hí̧ Gun kpɔ́ŋa walɓay kɔ̧ tûl a njuku, ɓayhí̧lé ké ɓá Gun a njuku. 28Í kaw yér sé tûlké yá, ɓayhí̧lé nâmké e gína, hûlri too ka e a ɓil lɔ̂ʼɔpâl, e lá kɔ́ŋɛ́, 29a toma, a njukuri ka niŋ bélahɛ̧, e toma ɓay a ziŋ ndísɛ̌ʼɛ, dáy a njukuri ka niŋ a ɓékéhɛ̧y, e toma ɓay a tá sé mbɛl walɓay. 30Mi zi niŋ hɛ̧ há̧na ka tûl ní nyá, mi walɓay sé tûl hɛ̧ ka Gáŋvbôn sa hí̧ mí, dáy walɓay a mǐ, ná ɓá ndáráké, ɓayhí̧lé mi zi ɛ́ hɛ̧ ka mi ziy yá, mi ɛ́ ɓá hɛ̧ ka njuku ka pé mí gí ziy.»
Njukuri ka saɓay a Zezú
31«Mí ɓá mǐ, pé sa ɓay a mǐ ka mûn ní, ɓay a mǐké, zi tí ka nɛ́rɛ̧ nyá. 32Dáy njuku a há̧na erú, a kaw saɓay a mǐ, dáy mi tu ɓá, ɓay ka ké sa sé tûl ní ɓá gbátɓay. 33I pé njukuri sé gel a Zâŋ dáy, ké saɓay hɛ̧ a ké kó, ka a lá sé tûl a gbátɓay ɓá táŋáké. 34Mi zi zoko ɓá, njuku ké sa hɛ̧ a ké kó ka a lá sé tûl ní nyá, dáy mi saɓayké nɔ́ ɓay a i ziŋ pɛ̧́na. 35Zâŋ kaw ɓá báŋa lámbe a kú ɓá hɔrɛ ka̧nrú̧ ɓay a ké táŋgel, dáy i zibɔʼɔké, a ri mûn a wǎyri nâm kpay a ɓil geltáŋaké. 36Dáy a mǐ, mi erú ka njuku ka hɔ̧́ ndé Zâŋ, a kaw saɓay a mǐ, ɓayhí̧lé péna ka Bâa hí̧ mí, ɓá mí niŋ, pénáké nɔ́ saɓay a mǐ, a tɔ́ʼɔ ɓá katína ɓá Bâa pé, pé mí gíy. 37Bâa ka pé mí gíy, saɓay a mǐ kɔ́. Dáy, i zi lá kɔ́ŋɛ́ bɔʼɔ mbêw yá, a zi kó nûn nɛ́ bɔʼɔ mbêw yá. 38I zi koro ɓay a mɛ̌ ka̧n law a wǎyri yá, ɓayhí̧lé i zi láɓulaw hí̧ njuku a ké pé nɛ́ gíy yá. 39I kɛ̧́ hɛ̧ ka ɗé ka̧n ɓil Mbété a Gáŋvbôn, ɓayhí̧lé i kɛrɛ ɓá, i e ziŋ káwa a ndísɛ̌ʼɛ a ɓilké. A zi tu ɓá, ɓá hɛ̧ ɗéna nɔ́rí̧ pé kaw saɓay a mǐ nyá. 40Dáy i zi ɓay a gí gel ní, a i gí ziŋ gbát ndísɛ̌ʼɛ yá!»
41«Mi zi ɛ́ ɗéla ka gí a gel a njukuri yá. 42Dáy mi tu wǎyri, mi tu ɓá i zi tí ka zína a Gáŋvbôn ka law a wǎyri yá. 43Mi gí ka rɛŋ a Bâa a mǐ, i zi nyá mí nyá. Nǎŋnɔ́ njuku a féké mí gí ka rɛŋɛ́y, i e nyá nɛ́. 44Dáy a̧ní rá̧, i erú ka láɓulaw lé, wǎyri ka ɛ́ ɓá hɔ̧́na a bazeŋ a wǎyri, ka zi ɛ́ hɔ̧́na ka gí a gel a Gáŋvbôn mbêw yáŋ nyáy? 45I zi ná kɛrɛ ɓá mǐ, mí e walɓay ka̧n tûl a wǎyri a mbɛl a Bâa a mǐ, njuku ka e walɓay ka̧n tûl wǎyri, pé ɓá Mɔyíze ka i ɓá kɛrɛ a wǎyri ka̧n tûléy. 46Dáy wǎyri mí láɓulaw katína hí̧ Mɔyíze, í e láɓulaw hí̧ mí kɔ́, ɓayhí̧lé ké ɗé a saɓay a kó mǐ. 47Dáy ka i zi láɓulaw sé tûl hɛ̧ a ké ɗé yáy, e niŋ a̧ní rá̧ i láɓulaw sé tûl ɓay a mǐri̧ lé?»
انتخاب شده:
Zâŋ 5: pnz
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 CABTAL