Maˍkuˆ 13
13
Ang buinˉ paˉ kyaˉ cawngˉ ang huiˍ ya kangˍ ya chaw naeˉ awˍ lawng na Yeˍsuˆ upˍ biˍ jiˍ
1Yeˍsuˆ ang buinˉ paˉ kyaˉ cawngˉ ang huiˍ hkaoˍ veu ca yao awkˍ aeˉ beu ta peˍ htiˍ hu maˇ, Boˇ, saˍ laˉ veuˉ, hu beun. Haw ba huiˍ sutˆ nae uiˉ nae yumˉ maenˍ yumˉ mang jiˉ maˍ nae ha biˍ jiˍ.
2Yeˍsuˆ ha biˍ jiˍ, Yumˉ maenˍ yumˉ mang ningˉ na naˇ ang myangˉ laˍ. Huiˍ sutˆ nae yumˉ ningˉ uiˉ beu haw ba uiˉ muiˉ ya kla hpaetˍ laeˍ naeˍ. Ningˉ keung haw ba tiˍ suiˍ htaˍ veu tiˍ suiˍ baˍ ya ca nae beu tiˍ hkeu ya kangˍ ya chaw naeˉ nae ha biˍ jiˍ.
Tawngˍ tin saˉ hkeu naˇ nae ang nyamˍ uiˍ beu naˍ mekˆ laeˆ hkaˍ naˍ uiˍ
3Hingˉ nawngˍ veu, Yeˍsuˆ nawˍ Saˍlongˍ miˉ kuingˍ veu nae ang buinˉ paˉ kyaˉ cawngˉ ang huiˍ kaˍ seu mae kaˍ hpaw yao duingˉ beu, Peˍtruˆ, Yaˍkok, Yoˉhanˍ nae Anˍdreˍ yawng ngaˍ naˉ jiˉ. 4Hingˉ ceuˉ uiˉ aˍ aˉ mae ang nyamˍ hkeu veu hpeuˍ laˉ naeˇ. Hingˉ hkaˉ hko laˉ hko puing kawˉ laˉ naeˉ ang nyamˍ veu aˉ mae uiˉ naˍ mekˆ hpeuˍ laˉ naeˉ nae gu na upˍ bae lao nae Yeˍsuˆ na ang paˉ veu nae naˉ jiˉ. 5Yeˍsuˆ mangˇ muiˉ, Changˉ htiˍ hu nae muiˉ nawng na tiˍ kaeˍ baˍ ya kaeˍ laˍ naeˍ uiˉ saˍ laiˍ saˍ tiˍ ca bu nae ha biˍ jiˍ. 6Changˉ ang byaˍ uiˍ ga beu ang maengˉ ningˉ na caiˍ yao hkeu lui naeˉ. Gaˇ yang mangˉ yaˇ nae ciˍ yao changˉ ang byaˍ uiˍ na tiˍ kaeˍ kaeˍ lui naeˉ nae ha biˍ jiˍ. 7Nawngˍ ngaˍ suikˆ peu lang naeˉ awˍ lawng nae suikˆ peu lang naˇ nae uiˉ awˍ lawng hingˉ na ya kyaˍ beu, baˍ hkae jo. Hingˉ kan uiˉ ya hpeuˍ laˉ naˇ. Hta yao muiˉ, tawnˍ tin veu baˍ hkeuˉ suing. 8Changˉ ceuˉ htiˍ ceuˍ nae htiˍ ceuˍ si hae lang naeˉ. Ang meungˉ htiˍ meungˍ nae htiˍ meungˍ si hae lang naeˉ. Htiˍ tawngˍ nae htiˍ tawngˍ veu miˍ siˉ uin naeˉ uiˉ nae baeˍ naeˍ suˍ naeˍ uiˉ byaˍ laˉ naeˉ. Ningˉ ceuˉ ningˉ uiˉ aˍ tuk naeˉ hpan naeˉ uiˉ ya hkamˉ buˉ naeˉ uiˉ tawnˍ hpanˍ yangˍ naˇ.
Ya hkanˍ ya chuiˍ yaˍ laeˍ naeˍ awˍ lawng kaˉ huˍ veu up biˍ jiˍ
9Nawng muiˉ saˍ tiˍ ca bu. Changˉ uiˉ aˍ nawng na aˉ muˍ tatˉ kyaˉ veu ap lae laˍ naeˍ. Nawng ngaˍ Yuˉdaˆ changˉ ceuˉ hpawm lang kyaˉ hkaoˉ veu tuiˍ maek laˍ naeˍ na ya hkamˉ buˉ naeˉ. Hkunˉ hawˉ hkamˇ nae ang suingˉ huiˍ uiˍ tawngˍ naˍ veu cung yao yawng ca naeˉ kaˉ seu ga saˍ laiˍ saˉ hkiˉ hpeuˍ naeˍ. 10Mawnˍ pyawˉ naeˉ uiˉ ang buinˉ tangˍ ang maenˍ uiˍ muiˉ changˉ ceuˉ hkaˉ hko laˉ hko uiˉ na kaˉ huˍ veu ya maˍ biˍ naeˍ. 11Changˉ uiˉ aˍ nawng na haoˉ ngaˍ aeˉ laˍ yao aˉ muˍ tatˉ kyaˉ veu ap aeˉ laˍ naeˍ. Haeˉ mae beu, aˉ mae uiˉ jeuˇ ciˍ ceuˉ nae baˍ kuitˍ man laeˍ jo. Hingˉ nyamˍ veu, nawng na hpuiˉ yao piˉ bae laˍ jiˍ hingˉ na ciˍ vo. Aˉ mae yao nae baoˇ, ciˍ naeˍ maˇ nawng baˍ aˍ. Ang hkawˍ laˉ ang suingˉ sangˉ mangˉ yaˇ ciˍ jiˍ. 12Ang pawngˍ aiˉ htiˍ hu nae htiˍ hu saˉ caˉ tiˍ chaw lang yao siˉ kyaˉ veu ap lae naeˉ. Ang vangˉ maˇ ang yaˍ hkyaˉ uiˉ na saˉ caˉ tiˍ chaw naeˉ. Ang yaˍ hkyaˉ uiˉ muiˉ ang muing vangˉ uiˉ na saˉ caˉ tiˍ chaw yao siˉ kyaˉ veu ap lae naeˉ. 13Changˉ hkaˉ hko laˉ hko uiˉ muiˉ ga ang maengˉ pa nae nawng na hu buinˉ laˍ naeˍ. Hta yao muiˉ, tawngˍ tin veu tiˍ hkeu yumˉ naeˉ uiˉ yiˍ naenˉ naeˉ maˇ htaiˍ awkˍ naeˍ uiˉ na ya hkamˉ naeˉ.
14Tiˍ kangˍ tiˍ chaw hkiˍ yao chaˍ ga kaeˍ ga blawˉ nae uiˉ ang ceuˉ#13:14 Pa rawˉ hpaet Daˍyeˍlaˆ hkai jiˉ laˉ mae chaˍ ga kaeˍ ga blawˉ nae ang ceuˉ nae ca kyaˉ baˍ aˍ nae uiˉ beu ca naeˉ na nawng ya myangˉ beu (ang laiˍ ningˍ na hpatˆ naeˉ changˉ uiˉ ngaˍ bae bu), Yuˉdaˆ ang meungˉ hkaoˉ veu ca naeˉ changˉ uiˉ ngaˍ hkawngˉ kyaˉ miˉ kuingˍ veu hpangˉ bao. 15Yumˉ buingˍ htaˍ veu ca naeˉ changˉ uiˉ baˍ lungˍ ngangˍ lae jo. Ningˉ htaˍ veu muiˉ ang keungˍ htiˍ ceuˍ ceuˍ laˍ lae naeˉ nae yumˉ hkaoˉ veu baˍ awngˍ lae jo. 16Hyaˉ veu ca naeˉ changˉ uiˉ muiˉ aˍ sangˍ yang beu ang kaˍ ang tum hingˉ laˍ lae laeˍ naeˍ nae baˍ lae laeˍ jo. 17Ang nyamˍ hingˍ hkaoˉ veu hpa pungˉ ba nae ang yaˍ nuing paet chuˍ yao ca naeˉ changˉ uiˉ ngaˍ ya yakˍ ya kap naeˇ. 18Ang nyamˍ hingˍ chawˍ nyamˍ veu baˍ yaˍ laˉ jo nae ang buinˉ paˉ voˍ. 19Aˉ mae yao nae baoˇ vaˍ, Ang suingˉ Hpaˍcao taeng beu nae tangˍ yao ya muiˉ tiˍ hkeu htiˍ cangˍ nae muiˉ baˍ hpeuˍ myang ngangˉ suing nae uiˉ kaˉ nawngˍ veu muiˉ laˍ laˍ baˍ hpeuˍ laeˍ nae uiˉ tuk kyaˉ hpan kyaˉ uiˉ hingˉ nyamˍ veu hpeuˍ laˉ naeˉ. 20Ang suingˉ Hpaˍcaoˍ nawˍ hingˉ nuing hingˉ na piˉ tawt naeˉ hingˉ mae baˍ baoˉ vaˍ, htiˍ hu nae muiˉ a sak baˍ caeˍ taw. Caˇ, Hpaˍcaoˍ cheˉ yuˉ jiˉ changˉ saˍ laiˍ nawˍ hingˉ nuing hingˉ ngaˍ piˉ tawt laˉ naeˉ. 21Hingˉ nyamˍ veu changˉ htiˍ hu hu maˇ nawng na, Hu bao. Hkrit mangˉ nawˆ ca ngaeˉ hawˆ ca ngaeˉ nae ha laˍ yao muiˉ baˍ yumˍ jo. 22Aˉ mae yao nae baoˇ, Hkrit aˍ tuˆ nae pa rawˉ hpaet aˍ tuˆ uiˉ taw laˉ yao, ang kaˍ nae baoˇ, cheˉ yuˉ yao chiˉ jiˉ changˉ uiˉ na muiˉ tiˍ kaeˍ kaeˍ naeˍ saˍ laiˍ, naˍ mek laekˆ hkaˍ naˍ uiˍ manˍ kyaˍ uiˍ ha naeˉ. 23Ningˉ pa nae nawng saˍ tiˍ ca bu. Kaˉ hko laˉ hko uiˉ na ga nawng na kaˉ huˍ veu maˍ htaˍ laˍ byaˇ nae ha biˍ jiˍ.
Changˉ mangˉ htiˍ cangˍ lui laeˍ naeˍ
24Hingˉ nuing uiˉ beu tuk kyaˉ hpan kyaˉ uiˉ peunˉ na yao, miˍ nuingˍ maˇ vuingˉ vangˉ aeˉ yao awˍ ha mangˉ muiˉ ang chit baˍ pa nae hpeuˍ naeˍ. 25Awˍ guiˍ uiˍ muiˉ buingˍ htaˍ veu kla luiˍ yao buingˍ htaˍ veu ca naeˉ tanˉ hkoˉ uiˉ muiˉ uin an laˉ naeˉ. 26Haeˉ mae beu, Changˉ maˇ laˍ htiˍ ang huiˍ uiˍ nae mun hpungˉ ang huiˍ uiˍ ya yao buingˍ hkaiˍ uiˍ na ta yao lui laeˍ na changˉ uiˉ ya myangˉ naeˉ. 27Haeˉ mae beu, Changˉ maˇ buingˍ htaˍ naiˍ htangˍ uiˍ na caiˍ yaˍ naeˍ. Nuingˉ chaˍ htaˍ veu cawtˍ buingˍ htaˍ htaˍ veu hkeu lae, mae kaˍ hu kyaˉ hanˍ tawnˍ kaˍ seu, yang cheˉ yuˉ yao chiˉ jiˉ changˉ uiˉ na chawnˉ laˉ lang biˍ naeˍ. 28Suingˍ hpuk pangˉ veu uˉ paˍ maˍ hingˍ na henˍ yaˍ vo. Suiˍ hpuk pangˉ hingˉ ngaˍ ang du du laˉ yao ang hpaˍ awkˍ laˉ baoˇ hawmˉ nyaˉ saˉ hkeungˉ jaˇ nae nawng ang bae yaˇ. 29Hingˉ lawˉ yaˇ, nawng muiˉ ningˉ uiˉ kanˉ hpeuˍ lanˉ na ya myangˉ beu Changˉ maˇ langˉ kaw htang veu hkeungˉ laˉ jaˇ nae bae bu. 30Ga nawng na maˉ manˉ nae hkai hkaemˍ laˍ vaˍ. Ningˉ uiˉ ceuˉ hkaˉ hko laˉ hko baˍ hpeuˍ laˍ nae baoˉ vaˍ, ya muiˉ a sak teˍ yaˍ yao ca naeˉ changˉ uiˉ baˍ siˍ. 31Buingˍ htaˍ nae nuingˉ chaˍ pyo aengˉ yao muiˉ ga ciˍ tangˍ ningˉ ngaˍ aˉ lawˍ beun muiˉ baˍ pyo nae ha biˍ jiˍ.
Hingˉ nuing hingˉ nyamˍ na aˍ sangˍ muiˉ baˍ bae
32Hingˉ nuing hingˉ nyamˍ na nawˍ A vangˉ Hpaˍcaoˍ baˍ baoˇ aˍ sangˍ nae muiˉ baˍ bae. Buingˍ htaˍ veu ca naeˉ buingˍ htaˍ naiˍ htangˍ muiˍ baˍ bae. Changˉ mangˉ muiˉ baˍ bae. 33Saˍ tiˍ tangˍ yao, hawˍ yao ca bao. Aˉ mae yao nae baoˇ hingˉ nyamˍ ngaˍ aˉ mae beu hkeu lui naeˉ nae nawng baˍ bae. 34Hingˉ nyamˍ ngaˍ changˉ htiˍ hu ang meungˉ htiˍ baˍ veu awkˍ aeˉ naeˉ na ang tuˉ yaˇ. Yang yumˉ veu awkˍ taw aeˉ beu yang caiˍ yaˍ naeˍ changˉ uiˉ na yawng ya vaˍ naeˍ kanˉ uiˉ nae aˉ hkvangˍ aˉ yaˍ uiˍ piˍ yao, langˉ kaw veu hawˍ hu mangˉ na muiˉ maenˍ nae hawˍ vo nae sangˍ saˍ jiˍ. 35Yumˉ suingˉ maˇ ang vuingˉ beu lui laenˍ la. Miˍ hkiˍ tuingˍ hkuingˍ beu lui laenˍ la. Miˍ hkiˍ hyaˍ hpaˍ htiˍ heˍ beu lui laenˍ la. Saw hta ang daˍ hingˍ uiˉ beu lui laenˍ la nawngˍ baˍ bae. Hingˉ pa nae, saˍ tiˍ ca yao hawˍ ca voˍ. 36Haeˉ mae baˍ baoˇ, yaˇ tiˍ chitˍ nae lui laeˍ yao nawng yuˍ nuˍ awngˉ ngangˉ yao ca naeˉ na myangˉ laˍ naeˍ yaˇ. 37Saˍ tiˍ nae hawˍ yao ca voˍ. Nawng na ga ha laˍ naeˍ lawˉ changˉ hkaˉ hko laˉ hko uiˉ na ga ha laˍ naeˍ yaˇ nae ha biˍ jiˍ.
اکنون انتخاب شده:
Maˍkuˆ 13: pyy
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators, Inc.