Maˍkuˆ 16
16
Yeˍsuˆ teˍ laˉ laeˍ jiˍ
1Yuˉdaˆ changˉ ceuˉ beu vanˍ sin nuing peunˉ yao Maˍgaˍdaˉlaˆ vengˍ changˍ Maˍriˆ, Yaˍkok beu ang muing Maˍriˆ nae Saˍloˍmeˍ yawng ngaˍ Yeˍsuˆ na hyang kyaˉ hingˉ keung aeˉ yao, laeˍ biˍ naeˍ nae na manˍ ang hawmˉ uiˉ vuiˉ jiˉ. 2Hingˉ nawngˍ veu, htiˍ nuing saw hta ang daˍ miˍ nuingˍ taw langˉ beu, yawng law ba lawngˍ hkawngˍ hkawngˍ chawˍ veu aeˉ jiˉ. 3Haeˉ mae beu, yawng ngaˍ gu na ang sangˍ jeuˇ law ba lawngˍ hkawngˍ hkawngˍ chawˍ langˉ kaw hingˉ ngaˍ naengˍ taw lang laˍ naeˍ nae, htiˍ hu nae htiˍ hu hkai lang jiˉ. 4Caˇ, yawng hu laeˍ yao, law ba ang huiˍ maˍ manˉ hingˉ ngaˍ naengˍ taw lang peunˉ jiˉ na ya myangˉ lae jiˉ. 5Haeˉ mae beu, yawng law ba ang hkawngˉ hiˉ keung awngˉ aeˉ yao, ang hpaenˉ ang pawnˍ tum nae yaˍ hkaˍ htiˍ hu na laˍ maˍ kaˍ seu duingˉ yao ca naeˉ na yawng ya myangˉ beu hkaek ya laeˍ jiˍ. 6Yang yawng na ha biˍ jiˍ. Baˍ hkae jo. Laˍ kang htaˍ veu htaˍ saeˍ jiˍ Naˍsaˍraet changˉ Yeˍsuˆ mangˉ na nawng saˉ ngaeˉ laˍ. Yaˇ teˍ laˉ laeˍ byaˇ. Yaˇ ningˉ keung baˍ ca. Yang na chiˉ jiˉ nawˆ hu lui. 7Caˇ, nawng aeˉ yao, yang beu ta peˍ uiˍ na nae Peˍtruˆ na ningˉ mae ha aeˉ bu. Nawng huˍ veu Gaˍliˉlaeˉ ang meungˉ veu yaˇ laeˉ lang byaˇ. Hingˉ keung veu, nawng na upˍ saˍ laˍ jiˍ laˉ mae nawng yang na ya myangˉ lae naeˉ yaˇ nae yawng na ha biˍ jiˍ. 8Hkaˍ ba yaˍ hingˉ uiˉ aˍ hkae did did biˍ yao manˍ jiˍ. Law ba lawngˍ hkawngˍ hkawngˍ chawˍ hingˉ hkaoˉ veu, yawng awkˍ taw aengˉ yao huinˍ yao aeˉ laeˍ jiˍ. Hkaek yaˍ laeˍ yao yawng htiˍ hu na muiˉ baˍ upˍ biˍ. (Maˍkuˆ 16:9-20 ningˉ ngaˍ ang daˍ beu Camˉ lik ang yo htiˍ baˍ uiˍ beu baˍ ya myangˉ).
Yeˍsuˆ yang ang to hingˉ Maˍgaˍdaˉlaˆ vengˍ changˍ Maˍriˆ na piˉ myangˉ jiˉ
9Htiˍ sin hingˉ naiˍ veu kaˉ huˍ veu htiˍ nuing hingˉ saw hta ang daˍ Yeˍsuˆ teˍ laˉ laeˍ peunˍ yao, yang beu ang to hingˉ Maˍgaˍdaˉlaˆ vengˍ changˍ Maˍriˆ na kaˉ huˍ veu piˉ myangˉ jiˉ. Hkaˍ ba yaˍ hingˍ maˇ cangˉ saˍ jiˍ beu Yeˍsuˆ deˍ yaˍ cetˍ hu kaˍ taw biˍ jiˍ htiˍ hu mangˉ yaˇ. 10Yeˍsuˆ kawngˉ ca myang naeˉ changˉ uiˉ htiˍ ba kuitˆ manˍ kuitˆ hawngˉ laeˍ yao ungˉ yao ca beu, Maˍriˆ aeˉ yao yawng na hkai biˍ jiˍ. 11Yeˍsuˆ teˍ yaˍ yao cangˉ ngaeˉ nae Maˍriˆ yang na ya myangˉ jiˉ awˍ lawng yawng ya kyaˍ yao muiˉ baˍ yumˍ.
Yeˍsuˆ ang to ta peˍ nyiˍ hu uiˉ na piˉ myangˉ jiˉ
12Hingˉ nawngˍ veu, ta peˍ hkaoˍ veu ta peˍ uiˍ nyiˍ hu hkawngˍ hkaoˍ veu aeˉ laeˍ beu, Yeˍsuˆ awˍ hang sangˉ htuˆ maˍ meunˍ lang nae hkaoˉ veu yang ang to hingˉ yaˉ yetˍ na piˉ myangˉ jiˉ. 13Yaˉ yetˍ lui laeˍ yao ca saˍ jiˍ changˉ uiˉ na hkai biˍ yao muiˉ baˍ yumˍ.
Yeˍsuˆ yang ta peˍ uiˍ na ang tangˍ piˍ jiˍ
14Hingˉ nawngˍ veu, ta peˍ htiˍ cheˍ htiˍ hu uiˉ caˍ yao ca beu, yang ang to hingˉ yawng na piˉ myangˉ jiˉ. Yawng baˍ yumˍ hki nae nuing ba kaenˍ hka yao, Yeˍsuˆ yawng na iˍ jiˍ. Yeˍsuˆ teˍ laˉ laeˍ jiˍ na ya myangˉ nga jiˉ changˉ uiˉ hkai biˍ yamˉ baˍ yumˍ nae pa nae yao, yang yawng na iˍ jiˍ. 15Hingˉ nawngˍ veu Yeˍsuˆ yawng na ha biˍ jiˍ. Nuingˉ chaˍ htaˍ nawˆ nawng aˉ keung na baˍ upˍ aeˉ yao mawnˍ pyawˉ naeˉ uiˉ ang buinˉ tangˍ maˍ aeˉ voˍ. 16Yumˉ yao baˆtiˆsamˍ hkamˉ yuˉ naeˉ changˉ uiˉ ngaˍ htaiˍ awkˍ nae na ya hkamˉ naeˉ yaˇ. Baˍ yumˍ nae uiˉ changˉ ngaˍ ciˍ yangˍ naeˍ na ya hkamˉ buˉ naeˇ yaˇ. 17Yumˉ naeˉ changˉ uiˉ htiˍ baˍ hkaoˍ veu naˍ mekˆ ningˉ uiˉ na ya myangˉ naeˉ yaˇ. Naˍ mekˆ lek hkaˍ naˍ hingˉ uiˉ aˍ, ga ang maengˉ uiˉ na cuˉ yao deˍ yaˍ uiˍ na ya kaˍ taw naeˉ. Yawng ciˍ tangˍ ang byaˍ ceuˍ ciˍ laˉ naeˇ yaˇ. 18Yawng ngaˍ u langˉ uiˉ na chu naeˉ. Nam pit hingˉ na yawng tangˉ yao muiˉ yawng htiˍ ceuˍ baˍ hpeuˍ. Changˉ daˉ uiˉ htaˍ veu yawng laˍ puˍ boeˉ yao changˉ hingˉ uiˉ pyo laˉ laeˍ naeˍ nae Yeˍsuˆ ha biˍ jiˍ.
Yeˍsuˆ buingˍ htaˍ veu lae laeˍ jiˍ
19Ang suingˉ Yeˍsuˆ yawng na haeˉ mae hkai peunˉ biˍ yao, Hpaˍcaoˍ yang na buingˍ htaˍ htaˍ veu chiˍ ta laeˍ yao, Hpaˍcaoˍ beu laˍ maˍ kaˍ seu yang duingˉ yao ca lae jiˉ. 20Ta peˍ uiˍ muiˉ awkˍ taw aengˉ yao, aˉ keung na baˍ upˍ ang buinˉ tangˍ maˍ aeˉ jiˉ. Ang suingˉ Hpaˍcaoˍ nawˍ yawng kawngˉ kanˉ vaˍ yao naˍ mekˆ htiˍ baˍ uiˍ ha taw naeˉ hkaoˉ veu, ang buinˉ tangˍ hingˍ na piˉ teˍ yaˍ laˉ jiˉ.
اکنون انتخاب شده:
Maˍkuˆ 16: pyy
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators, Inc.