Luk 24
24
A Iesu ithal ml arna m'ienen
(Matiu 28:1-8; Mak 16:1-10; Sun 20:1-10)
1Laha, arna napn itauamu a uik, arna m'etav'aran nrnren, avrav'a asn navap kavua ru nai m'in ip'as, la atvandedp' sarei hara, m'er m'ertu kinkin uraur avrav'a m'er. 2Kavla ti atuhsla sera nav'et itukar karliu na navap. 3V'eti naran avrav'a a nln, ahavla p'akn a Mlin a Iesu ml. 4Laha, naran avtah ani istudau, pavrni, dui iru arp'tir asnr, klusar ier istudau. 5Hir avdedrn ihuadau kaviaul kavp'a nadep'. Laha, arvr anr karvr ti a, “?Inap'i hin kvtala m'ertu isilv' asn m'lna m'ertu im'a? 6#Mat 16:21; 17:22,23; 20:18,19; Mak 8:31; 9:31; 10:33,34; Luk 9:22; 18:31-33.Hin ialak atlaha, v'eti itthal ml. Pavv'ahur v'nen itvr sarei a kam'i naran idlak uam a Kalili, kavr ti a, 7‘Aktu Kana, nv'i Net M'ertu, al lm'ar m'ertu stu pr, katu Kana arna su lamu. Sarei, arna nitla napn, p'ethal ml.’ ”
8Laha, avv'ahur v'nenan lera, 9Kavln navap kavrav'a asnr m'ertuan a Iesu inal lman iamk (11) m'er m'ertu uraur udlani, kavvrp'ep'a si udlani lera anr. 10Artav'et la avvr si udlani lera anr apusel, avv'i a Meri, iv'i tav'et a Maktala, m'ei a Suana, a Meri, iv'i a unian a Sim'is, m'er tav'et kinkin uraur avlak m'er. 11V'eti avv'ah ti v'nenar inep'a v'nenar m'ertu idilin uaki, ahavv'ahr. 12Laha, a P'ita ip'tir kavrvr kadav'a asn navap kariri a nln, kala kalik iter a nut iamk, karuh ml kadahau, katah istudau a sei itu hin.
A Iesu iv'iv'en Hin arna navanel iv'a a Emeas
(Mak 16:12,13)
13Laha, pavrni, arna napn lera, hir kinkin arru arv'a arna v'anu iamk, nahan iv'i Emeas, iv'i kilumita inal lman iamk (11) dan a Serusalem ier nut lera. 14Arna navanel arv'ana karvrur si udlani la itu hin ra. 15Laha, naran arv'ana karvrur si lera, hin a Iesu ima kav'el m'er. 16V'eti si kinkin itukar m'atar a ti akarledaui.
17Laha, ivr anr, kavr ti a, “?Krv'ana karvrur v'ata naran krv'el, iani ti nahm'i istu kalal?”
18Sarei, hir kinkin iamk, nahan iv'i a Kliupas, ivrprani, kavr ti a, “Nsarei Nakm kv'i v'anudl a Serusalem, Nakm kamk uaki kaarndu sei itu hin atlera arna naran laha.”
19Laha, ivr anr kavr ti a, “?V'ata itu hin?”
Arvrprani karvr ti a, “Sei ier a Iesu, iv'i Dui a Nasaret, kav'i Pruvet, kalil arna parian m'a v'nenan arna nahn Atua m'er nahr nelnal. 20V'eti arpris lil, m'er armlinam'em' avtaui a ti ipam'a kavtaui arna su lamu. 21V'eti kam'em' nvv'ah ti Hin ipav'i M'ertu la ipulla m'ertu a Isrel ha. V'eti si uraur ml arna si lera, dika iv'i nitla napn a ti si lera itu hin. 22V'eti tav'et kinkin asnm'em' avani ti nvtah istudau. Hir avrav'a m'etav'aran nrnren asn navap. 23V'eti ahavla p'akn, kavrama ml kavvr ti avla sei iv'i ensel arvr anr karvr ti isilv' ml. 24Laha, m'ertu kinkin asnm'em' avrav'a asn navap kavla ti inep'a nut tav'et avvri inap'ei, v'eti ahavlei.”
25Laha, ivr anr kavr ti a, “U, kam'i ptm'i ihei, nlm'i iavrvr a ti parv'ah v'nen udlani pruvet atvvr sarei. 26Iviviln a ti der lera ipaier a Kristu, sarei ti ipalev' si p'sp'asan.” 27Laha, a Iesu iv'iv'en Paivul udlani anr la ivrur Hin ha. Iv'iv'iv'endinei arna v'nenan a Musis dav'a kav'iv'en v'nenar pruvet udlani.
28Dav'a, avmima asn v'anu la avrn ti apavrav'a aranan ha, v'eti Hin iv'el inep'a ti irn ti ipav'a a nut uraur uam. 29V'eti armiman ani ihua, karvr ti a, “Palak m'a kam'em', sena ti itv'i knarev', nut pa ti neiel ipatpl.” Laha, iv'a eim kalak m'er.
30Sarei, naran ilak asn tiv' m'er, ilev' p'ret kavr ip'as an Atua sanan, kakausi katau anr. 31Laha, m'atar iela hin, arledaui, sarei a Iesu ihahei asnr.
32Laha, arvrvr a hir karvr ti a, “Naran hin iv'ana m'a nakd arna navanel kav'iv'en Paivul a nakd, iani ti nld irn ip'as istudau.” 33Iv'amk m'a naran lera, arp'tir karv'el karv'a ml a Serusalem, karla m'ertuan inal lman iamk (11) avp'lt m'er m'ertu kinkin avlak m'er, karvr ti a, 34“Nrvrdaui, a Mlinad itthal sarei katv'iv'en sera hin an a Saimun.” 35Laha, arvr si udlani anr itu hin arna navanel m'a nut arledaui inap'ei naran ikaus p'ret.
A Iesu iv'iv'en Hin anr m'ertuan
(Matiu 28:16-20; Mak 16:14-18; Sun 20:19-23; Parei 1:6-8)
36Naran adrvr si lera uam, a Iesu ip'tir a p't nut nar kavr anr kavr ti a, “Pavlak arna tamat.” 37V'eti hir avtah ani kavdedrn ihuadau kavv'ah ti avla m'im'iln kinkin. 38Laha, a Iesu ivr anr kavr ti a, “?Kvrn istu sena v'ata? ?Inap'i hin kvv'hv'ahur sei istudau arna nlm'i? 39Pavp'a lm'ak m'a tlk. Iv'i Kana uaki. Pavier p'akk kavp'a Kana, sena ti m'im'iln p'akn m'a sun ihei, ipanep'a nut kvla ti Kana nnap'ei.”
40Ivr si lera sarei, kav'iv'en lm'an m'a tln a ti apavlei. 41Laha, avrn ip'as ani kavtah ani istudau, v'eti adavv'ah mamahi uam. Laha, a Iesu ivr anr kavr ti a, “?Tim'ah iak asnm'i?” 42Laha, avtu pna tilau atvtahpa sarei ani m'a ns sukapak kinkin. 43Laha, ilav'i kahani arna nahr.
A Iesu iv'iv'en mamh v'nen arna Paivul ivruri
44Kavr anr kavr ti a, “Ntvr sera v'nen lera a kam'i naran ndlak uam asnm'i, kavr ti si udlani la v'nen huan a Musis m'a v'nenar pruvet m'a npin ivri kavrur Kana ha, ipatu hin pr.”
45Sarei, imhmah a v'ahienar a ti apavrndu sei Paivul ivri, kavr anr, kavr ti a, 46“Paivul ivr ti iviviln a ti der ipaier a Kristu ipanap'i lera, sarei ti ipathal ml arna m'ien arna nitla napn. 47Kavr ti apavrp'ep'a v'nen p'as arna nahan, arna nut a Serusalem ipatauamu, dav'a kavrp'ep'ei arna v'anu udlani, a ti m'ertu apavvav nlr, a ti Atua ipalev'la si stuar. 48Kam'i ktvla sera si udlani lera. 49#Parei 1:4.Laha, pavlei, Kana ntep'a turanienan a Tetiak aranam'i. Laha, kam'i pavlak arna nut a Serusalem ipaier naran Atua ipatu nut huan a kam'i, ipandan arna nut eia.”
A Iesu iv'a arna nut eia
(Mak 16:19,20; Parei 1:9-17)
50 #
Parei 1:9-11. Sarei, iv'av'ar kavrav'a a nut iamk ihih P'etani. Laha, iah lm'an kamhmah anr. 51Naran itmhmah sarei anr, Atua ilev'lei kani ti iv'a eia. 52Laha, avpatei. Sarei, kavm'alet ml a Serusalem kavrn ip'as istudau. 53Kavlak nakl al nmah tamat kavr ip'as an Atua kavpatei nakl. Amen.
اکنون انتخاب شده:
Luk 24: nmb
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Presbyterian Reformed Church of Australia