Liike 1
1
Liike ɛ́ mí vɛ̃hṹ wĩ́nlɔ́ ɲún ɛ̀ munkɛ ɛ̀ lɛ́ Teofiile ǹ
1Teofiile, nìnbirìe cɛ̀rìɛɛ ɛ́ nɛ ɓɛ wĩ́ hɔ́ bòo lɛ ɛ́ wɔ́ ké tĩ́ihṹ. 2Ɛ́ ɓɛ́ wɛ̃́ hɔ́ kɛ̀a bòo lɛ ɛ́ ɓɛ́pe lɛ mɔn hɔ̀ àá pehɔ̀ fìi ɓánlɔ́ ɛ́ dàa bie hɔ̀ ɛ́ lɛ́ kie ǹ. Ɓàasiè sɔ ɛ́ iè ɓɛ̀pe lɛ ɛ́ Dɔfĩn tɔrɛ nɛ ɓɛ bie mí bienù. 3Ɛ́ sí iè pe ɛ́ ńpe ɛ́ ɓiɛ̀ dàa hĩ́nà dìekɛa ɛ́ dàa dũnɛ hɔ̀pe bòo lɛ wɔ́ hɛ̀lɛ̀lɛ̀ àá pehɔ̀ fìi ɓánlɔ́, ɛ́ ń nɛ hɔ sãa kɔ̀pe nì-bɛhɔ́ Teofiile, hɔ̀ sãa ɛ̀ ǹ wĩ́ hɔ́ bòo lɛ wɔ́ sɛ̀mɛ́kɛa ɓán ɛ̀ lɛ́ kɔ̀ ǹ, 4bòo lɛ ɛ́ wé ɛ̀ kɔ̀ dũń sãàní kɛ́ hɔ́ bòo lɛ ɛ́ ɓɛ́ kɛ̀rɛa àá kɔ ɛ́ bɔn.
Zɛkɛri ɓà hṹnu Elizabɛte póo tìnlɔ́ bòo
5Pɛ̃̀hṹ lɛ ɛ́ Herɔɔde ɛ́ dàa hàarí iè Zudee bɛ́zuú, ɛ́ Dɔfĩn khɛ̃́ndàarɔ dɔ̀ lɛ yèrè ɛ́ ɓɛ́ nɛ Zɛkɛri ɛ́ hàarí wi yán kɛ́ á bòo ɛ́ sɛ̃̀ khɛ̃́ndàarɔ Abiya ɓà zũnù ǹ. Àpe Zɛkɛri sɔ ɓà hṹnu yèrè ɛ́ ɓɛ́ nɛ Elizabɛɛte lɛ lò ɓiɛ̀ iè Dɔfĩn khɛ̃́ndàarɔ wì-bɛhɔ́ Aarɔn zũnù hãá dɔ̀. 6Ɓɛ̀ hàarí ɛ́ cã̀aní ɓɛ́ ɲuunáa Ɲunsɔ Dɔfĩn híɛhɔ́ ɛ́ pehɔ̀ ɲunù bienù àá pehɔ̀ làndɛ́ míkùi ɛ̀ mɛ̀ndɛ̃ sãa sãa. 7Kɛ́ ɓɛ́ den hàarí yí dàa zĩncáahɔ́ wɛ̀; iè hɔ̀ lɛ á Elizabɛɛte ɛ́ den hàarí yá te wɛ̀; ɛ̀ ɓɛ̀ lò den hàarí kĩ́nkɛa ɓɛ́ ɲuunáà.
8Ɛ́ wurù dɔ̀ zɔn, ɛ́ Zɛkɛri ɛ́ mí khɛ̃́ndàarɔmu tɔnlɔ́ ɛ̀ tɛ́ Dɔfĩn híɛhɔ́, iè hɔ̀ lɛ ɛ́ hɔ́ tɔnlɔ́ sɔ tánlɔ́ ɛ́ hàarí van dɛ̃un ɔ̀pe àá ɓá ńkɔhĩ́. 9Ɓɛ̀ khɛ̃́ndàariè ɛ́ den hàarí wóò leń nìnbí-cóoní ɓɛ́ tĩ́ihṹ à vɛ zɔ le Dɔfĩn zũ-bɛhɔ́, ɛ̀ zɔ cĩ̀ní hɔ́ yurɔ́ lɛ tũnù tĩ yán. Ɛ́ Zɛkɛri iè pe ɛ́ hɔ́ lenkɛrɔ́ sɔ siɛ lɔ̀n á te hɔ ɛ́ mii zɔ wé. 10Ɛ́ hɔ́ lɛ á Zɛkɛri ɛ́ zɔn wi le Dɔfĩn zũ-bɛhɔ́ hũn ɛ́ hɔ̀ bòo dɔ̀ lɛ tũnù tĩ ɛ̀ cĩ̀ní, ɛ̀ ɓɛ̀ nìzã̀amáa ɓɛ́kùi ɛ́ lɔ́ wi hɔ yíe ɛ́ Dɔfĩn hɛ̃nnin.
11Ɛ́ Ɲunsɔ Dɔfĩn mɛlɛkɛ dɔ̀ ɛ́ ɓɛrɛ zɛ̃́niɛ míte à Zɛkɛri ǹ. À mɛlɛkɛ sɔ ɛ́ hṹn dɛ̃̀ lè miyiɛ́ leǹlén dúekéré ńdóonín, lèpe lɛ ɛ́ ɓɛ́ wóò cĩ̀ní hɔ́ bòo lɛ tũ̀nù tĩ lɔ̀n. 12Ɛ́ hɔ́ lɛ ɛ́ Zɛkɛri mɔn ɔ̀, á yòó zɛ́rɛ dɛ̃̀ cɔũn. 13Kɛ́ á mɛlɛkɛ ɛ́ den zɔn bie lɛ́ à ǹ nɛ làa: «Zɛkɛri, bí zán wɛ̀, iè hɔ̀ lɛ ɛ́ Dɔfĩn ɛ́ ɲɛ́ kɔ́ hɛ̃nnɛ̀. Mì hṹnu Elizabɛɛte ɛ́ ɓén te zuú, ɛ̀ kɔ̀ cé piè yèrè nɛ Zãn. 14Hɔ̀ ɓén lɛ́ tĩwiɛ̀ dɛ̀bɛhɔ́ kɔ ǹ, ɛ̀ ɓɛ̀ nìnbirìe cɛ̀rìɛɛ ɛ́ lò ɓén wɛní ɓɛ́te piè tenlɔ́ bòo hũn. 15À ɓén wé nì-bɛhɔ́ Dɔfĩn híɛhɔ́, à yí fɔ́ɓán à wóo ɲu divɛ̃n tàá ɲɛmu lɛ wóò ɓaà nìnbírɔ wɛ̀. À ɓén tí àá Mɛkɛ̃n-Sãanu kɛ́ á wi ɓá nín vùikì hũn. 16À ɓén lɛ́ ɛ́ ɓɛ́ Yizarayɛɛle nìɛ cɛ̀rìɛɛ ɛ́ khũ̀á ɓen ɲí Ɲunsɔ lɛ iè peɓɛ̀ Dɔfĩn bòo. 17À ɓén wé Dɔfĩn tɔnkɛrɔ, à ɓén vɛ Dɔfĩn híɛhɔ́ àá hɔ́pe Dɔfĩn bɔ̀háanírɔ Elii mɛkɛ̃ni àá piè pànkɛ́, ɛ̀ dàá lɛ́ ɛ̀ ɓɛ̀ yàáɓɛ̀ àá ɓɛ́ zɛ̀ɓɛ̀ tĩɛ̀ ɛ̀ khũ̀á wé dìcóoní, ɛ̀ ɓɛ̀pe lɛ ɛ́ ɲɛkɛ̃̀a dɛ̃un lɛ yáà ɲí bòo ɛ̀ khũ̀á khíi ɲí ɓɛ́ nìcã̀aníriè bɔ̀dũmunù bòo. Ɛ́ kɛ̀amu, á iè pe wo ɓén sɛ́sɛ́ ɓɛ́ dàa nìɛ lɛ ɓɛ ɛ̀ tɛ̀ à Ɲunsɔ bòo ɛ́ lɛ́ à ǹ.»
18Ɛ́ Zɛkɛri ɛ́ zɔn khɛ́ lɛ́ á mɛlɛkɛ ǹ nɛ làa: «Ń wo nin wiɛ dàá dũń kɛ́ hɔ́ bɔn? Iè hɔ̀ lɛ ɛ́ ń wo iè nìkĩ́ihṹ ɛ̀ kìe hṹnu lɔ́líe ɛ́ lò ɓiɛ̀ ɛ́ yí mìniɛ wɛ̀.» 19Á mɛlɛkɛ ɛ́ zɔn kɔ̃́niɛ ɔ̀ ɛ́ nɛ làa: «Ǹpe iè mɛlɛkɛ Kabiriyɛɛle, ń wi Dɔfĩn híɛhɔ́ ɛ́ pehɔ̀ tɔnlɔ́ ɛ̀ tɛ́; hɔ̀pe Dɔfĩn ɛ́ te nin tɔrɛ nɛ n ɓen khɛ́ àá kɔ ɛ̀ bie lepe bentĩnu sɔ lɛ ɛ̀ lɛ́ kɔ ǹ. 20Kɛ́ hɔ́ lɛ ɛ́ kɔ́ yí dɛsĩ̀ niǹ biehĩ́ ǹ, lɛ lò iè bòo lɛ ɓén wé lé yìi lɛ ɛ́ Dɔfĩn nɛ hɔ wé hũn, ɛ́ kɔ́ diɛnù ɛ́ mii lɛ, ɛ̀ kɔ̀ bí dàń bie fúu kɛ́ yí bòo lɛ ɛ́ hɔ́ van wɔ́ vɔ́.»
21Ɛ́ hɔ́pe sí ɛ́ wé kɛ̀amu kɛ́ ɓɛ́ nìzã̀amáa ɛ́ lɔ́ dɛ̃̀ hɔ̀ yíe ɛ́ ɔ̀ Zɛkɛri ɛ̀ hìé, kɛ́ ɓɛ̀ ɛ́ ɓɛ́te ɛ̀ dìekɛnin nɛ a wiɛ dàa van zɔn mii lé Dɔfĩn zũ-bɛhɔ́ hũn kɛ̀amu. 22Ɛ́ bòo lɛ á Zɛkɛri ɛ́ ɓɛrɛ lɔ́, à yí dɛ̀ ɛ́ yá bie àá ɓɛ́ wɛ̀, ɛ́ ɓɛ́ wo dũnɛ kɛ́ á van zɔn mɔn bɔ̀zɛ̃́níriè dɔ̀ lè Dɔfĩn zũ-bɛhɔ́ hũn. Á wo khie ɛ́ lóoníkɛ ɛ̀ lɛ́ ɓà ǹ àá mí níhĩ́ kɛ́ piè ɲunù híɛ ɛ́ yá bòo ɛ̀ bie wɛ̀.
23Ɛ́ hɔ́ lɛ á Zɛkɛri tɔnlɔ́ vɔ́ lé Dɔfĩn zũ-bɛhɔ́ hũn, á khũ̀a ɓɔn mí yíe. 24Ɛ́ hɔ́ yí khíi mii wɛ̀ ɛ̀ ɓà hṹnu Elizabɛɛte ɛ́ khie tù púo, á kɛrɛ mí yíe fúu ńpĩ́ihɛ̃ hùanú kɛ́ á ɛ́ bie mí tĩì hũn ɛ́ nɛ làa: 25«Lɛ iè Ɲunsɔ sãamu lɛ á wɔ́ àá mi; à lerɛ niǹ lùwiè ɛ́ lɔ́ niǹ lɔ̀n ɓɛ̀ nìnbirìe yìe hũn.»
Mɛlɛkɛ dɔ̀ ɛ́ Yiezu tenlɔ́ bòo bie àá ɓà nín Maari
26Ɛ́ pehɔ̀ ńpĩ́ihɛ̃ húiezílán, ɛ̀ Dɔfĩn tɔrɛ à mɛlɛkɛ Kabiriyɛɛle á van hɔ̀ Kalile lóo dɔ̀ lɛ yèrè ɛ́ ɓɛ́ nɛ Nazarɛɛte, 27à ńyentí dɔ̀ viì, ɓà ńtɛ̃́un yèrè ɛ́ ɓɛ́ nɛ Zozɛɛfu. Àpe Zozɛɛfu sɔ ɛ́ iè ɔ̀ bɛ́zuú Daviide hũn yɛ̀nù dɔ̀; àpe ńyentí sɔ yèrè ɛ́ ɓɛ́ nɛ Maari. 28Á mɛlɛkɛ ɛ́ van zɔn ɔ̀ Maari viì ɛ́ zɔn bie lɛ́ à ǹ ɛ́ nɛ làa: «Nín kɔ̀ fòoní kɔ̀pe lɛ ɛ́ Dɔfĩn hiì ɛ́ wi lɔ̀n. Ɲunsɔ Dɔfĩn ɛ́ wi àá kɔ.» 29Á mɛlɛkɛ biehĩ́ ɛ́ hɛ̀ yòokɛa ɔ̀ Maari lɔ̀n fúu ɛ́ piè bɔ̀dũmunù ɛ́ hɛ̀ vṹnun; á wo ɛ́ míte ɛ̀ dìenin nɛ lèpe fòoní sɔ sí ɲún ɛ́ wo iè lè dúsɔ. 30Á mɛlɛkɛ ɛ́ wo zɔn bie lɛ́ à ǹ nɛ làa: «Maari, bí zán wɛ̀ iè hɔ̀ lɛ ɛ́ Dɔfĩn wɔ́ mí hiì àá kɔ. 31Kɔ́ ɓén tì púo, ɛ̀ kɔ̀ ɛ́ te zuú, ɛ̀ kɔ̀ cé piè yèrè nɛ Yiezu. 32À ɓén wé nì-bɛhɔ́ ɛ̀ ɓɛ̀ wóo ɓén vi-e nɛ Dɔfĩn lɛ wi hɔ bòo míkùi ɲún hũn Zuú, ɛ̀ Ɲunsɔ Dɔfĩn ɛ́ ɓén lɛ́ ɓà zĩkĩ́n Daviide bɛ́záanú wànlè ɔ̀ ǹ. 33À ɓén wé bɛ́zuú à Zakɔɔbu zũnù nìɛ lɔ̀n, ɛ̀ piè bɛ́záanú ɛ́ yá vé yá mi wɛ̀.» 34Ɛ́ Maari ɛ́ zɔn ɔ̀ mɛlɛkɛ ɛ̀ dìenin ɛ́ nɛ làa: «Ń wo yí dũ bɛ́rɔ ɛ́ hɔ́pe sí ɛ́ wo ɓén wé kɛ wiɛ?» 35Á mɛlɛkɛ ɛ́ zɔn kɔ́niɛ ɔ̀ ɛ́ nɛ làa: «Lè Mɛkɛ̃n-Sãanu ɛ́ mii ɓen síɛ kɔ̀ lɔ̀n, ɛ̀ hɔ̀ Dɔfĩn lɛ wi hɔ bòo míkùi ɲún hũn ɛ́ ɓén síɛ hiɛ kɔ ǹ àá mí pànkɛ́ kɛ̀a ie ńtìɛrún bòo sí. Ɛ́ sí iè pe temu lɛ́ ápe zĩncáahɔ́ lɛ ɛ́ kɔ ɛ̀ te ɛ́ dàa ɓén wé nìnbírɔ lɛ ɛ́ bòo sɛ̃̀ Dɔfĩn, ɛ̀ ɓɛ̀ wóo ɓén vi-e nɛ Dɔfĩn Zuú. 36Ɛ́ kɔ́ húi lò, à mì ńnáà Elizabɛɛte, ɛ́ lò ɓiɛ̀ tù hɔ̀ púo mí hɛ́kĩ́imu hũn, lɛ iè pehɔ̀ ńpĩ́ihɛ̃ huezĩ́, kɛ́ ɓɛ́ nìnbirìe ɛ́ lò hṹn wóo nɛ a yí dɛ̀ zĩncáahɔ́ ɛ́ yá te wɛ̀. 37Ɛ́ bòo dɔ̀ lɛ ɛ́ wóò wé tɛ Dɔfĩn viì ɛ́ mí lò!» 38Ɛ́ Maari zɔn bie ɛ́ nɛ làa: «Ǹpe iè Ɲunsɔ wɔnù; nɛ hɔ wé mi ǹ kɛ̀a bòo lɛ ɛ́ kɔ́ dàa khɛ́ hɔ́.» Á mɛlɛkɛ ɛ́ wo fùɛrɛ̀sí-e ǹ à khie cɔ́.
Maari van ɓá ńnáà Elizabɛte ɛ̀ khínin
39Ɛ́ pehɔ̀ yìi hũn, ɛ́ Maari ɛ́ hĩ́nà lìɛkɛasí ɛ́ van hɔ̀ Zudee pɛ̃̀hɛ̃ lóo dɔ̀ lɛ wi hɔ ɓúkùo hũn. 40Á van zɔn ɔ̀ Zɛkɛri zũnù ɛ́ zɔn fòoniɛ ɔ̀ Elizabɛɛte. 41Á Elizabɛɛte piè ǹɲí Maari fòoní lòo, ɛ̀ piè zĩncáahɔ́ ɛ́ zɔn kìrie piè vùikì hũn. Ɛ́ lé Mɛkɛ̃n-Sãanu ɛ́ ɓen síɛ ɔ̀ Elizabɛte lɔ̀n, 42á zɔn bérɛ ɛ́ nɛ làa: «Dɔfĩn munɛ kɔ ɛ́ dúɓɛa nin ɓɛ̀ hã́a ɓɛ́kùi tĩ́ihṹ, ɛ̀ pehɔ̀ dúɓìɛ ɛ́ wi-e zĩncáahɔ́ lɛ wi kɔ hũn lɔ̀n. 43Ǹpe ɓiɛ̀ iè wieni ɛ́ niǹ Ɲunsɔ ɓà nín ɛ́ dàa ɓɛrɛ niǹ viì? 44Ɛ́ kɔ́ húi lò, pe niǹ ɲí kɔ́ fòoní lòo, à zĩncáahɔ́ ɛ́ zɔn kìrie àá tĩwiɛ̀ nin hũn. 45Kɔ̀ ɲún hɛ̀ tĩ, kɔ̀pe lɛ ɛ́ dũmuasɛ̃̀ nɛ a Ɲunsɔ bòo lɛ á khɛ́ lɛ́ kɔ ǹ ɛ́ ɲunù ɓén tí.»
Maari ɛ́ Ɲunsɔ bɔ̀tente wérɛ́ bòo ɛ̀ bie
46Ɛ́ Maari ɛ́ zɔn bie ɛ́ nɛ làa:
«Ǹpe niǹ bɔ́nú ɛ́ niǹ Ɲunsɔ ɛ̀ ɓàanínin,
47Ɛ̀ niǹ mɛkɛ̃nì ɛ́ hɛ̀ tú àá tĩwiɛ̀,
Hɔ̀ Dɔfĩn lɛ iè niǹ fuenírɔ bòo hũn;
48Iè hɔ̀ lɛ ɛ́ Hɔ́ tɛ̀ ɛ́ siɛ huie mi ǹ, ǹpe lɛ iè pehɔ̀ wɔn-hãá lɛ bɔ̀werà mí.
Ɛ̀ wo dàá fìi ɓɛ́ àá zoòni, ɛ́ ɓɛ́ nìnbirìe ɛ́ wóo ɓén bie fúu nɛ ń iè ɲún tĩ̀nù ɓàasɔ.
49Iè hɔ̀ lɛ ɛ́ Dɔfĩn pànkɛ́ ɓàasɔ ɛ́ wɔ́ bòo bɔ̀bɛ̃hɛ̃ ɛ́ lɛ́ mi ǹ.
Hɔ̀pe ɛ́ iè Dɔfĩn lɛ ɛ́ ce.
50Ɓɛ̀ nìnbirìe lɛ ɛ́ Dɔfĩn ɛ̀ mɛ̀ndɛ̃,
ɛ́ Hɔ́ wóò mi miinɛ pɛ̃̀hṹ míkùi hũn.
51Hɔ̀ wɔ́ pànkɛ́ bòo àá mí núnú,
ɛ̀ Hɔ̀ ɲɛun ɓɛ̀ yèncɛ̀riè ɛ́ ɓɛ́ zɔ̀ saakɛa.
52Hɔ̀ suukɛa ɓɛ̀ pànkɛ́ ɓàasiè ɛ́ lɔ́ ɓɛ́ bɛ́záanú wànlàa lɔ̀n,
ɛ̀ ɓɛ̀ nìnbirìe lɛ wóò siɛní ɓɛ́te ǹ iè pe ɛ́ Hɔ́ hóoniɛ yòoniɛ.
53Ɓɛ̀ nìnbirìe lɛ ɛ́ hɔ́ hĩni ɛ́ ɓé ɛ́ Hɔ́ lɛ́ hɔ́ bòo bɔ̀kuì nin,
ɛ̀ ɓɛ̀ bòo ɓàasiè ɛ́ Hɔ́ fùɛrɛ̀sí nin ɛ́ ɓɛ́ cɔ́ àá ɓɛ́ nínkã́amáa.
54Hɔ̀ ɓɛrɛ sĩiniɛ Yizarayɛɛle nìɛ lɛ iè piè tɔntɛ́riè,
ɛ̀ Hɔ̀ hũn ɛ́ yí ɓé mí bɔ̀tente wénlɔ́ ǹ
55àá Abarahaamu àá mí hũn nìɛ pɛ̃̀hṹ lɛ yá vé hũn,
kɛ̀a bòo lɛ á dàa hàarí bie hɔ̀ ɛ́ lɛ́ kè zĩkĩ́nɓɛ̀ ǹ.»
56Ɛ́ Maari ɛ́ kɛsí Elizabɛte viì ɛ́ dɛ̃un ńpĩ́ihɛ̃ bɔ̀nbɔ̀ tĩ ɓà ńmàa, à hĩ́nà khũ̀a ɓɔn.
Zãn Batiisi tenlɔ́ bòo
57Ɛ́ lé pɛ̃hṹ lɛ á Elizabɛɛte ɛ́ fɔ́ɓán à te hũn ɛ́ van dɛ̃un, á tɔn mí zuú. 58Ɛ́ ɓà yíe nìɛ àá ɓà nìɛ ɛ́ ɲɛ́ kɛ́ ɓɛ́ nɛ Ɲunsɔ Dɔfĩn ɛ́ mɔn piè miinɛ̀ àá bɔ̀bín, ɛ́ ɓɛ́ páaníɛ ɛ́ wɛ ɓɛ́te àá ɔ́. 59Ɛ́ hɔ́ lɛ á zĩncáahɔ́ ɛ́ yú wihĩ́ hùutĩ, ɛ́ ɓɛ́ ɓɛrɛ ɛ́ ɓɛ́ ɓen fĩ̀-ɛ. Ɛ́ ɓɛ́ nɛ ɓà yàá yèrè Zɛkɛri iè pe ɛ́ ɓɛ́ cé ɛ̀ lɛ́ à ǹ. 60Kɛ́ ɓà nín ɛ́ den zɔn bie ɛ́ nɛ làa: «Ńɓùé, piè yèrè ɛ́ mii wé Zãn.» 61Ɛ́ ɓɛ́ zɔn bie lɛ́ à ǹ nɛ làa: «Mì zũnù nùún dɔ̀ lɛ yèrè Zãn ɛ́ mínɛ lò!» 62Ɛ́ ɓɛ́ khie khɛ́ àá ɓɛ́ níhĩ́ ɛ́ dìe ɔ̀ zĩncáahɔ́ ɓà yàá ǹ nɛ piè yɛ̀nù yèré ɛ́ mii wé lé dúsɔ. 63Á Zɛkɛri nɛ ɓɛ lɛ́ lé dìɛ dɔ̀ nɛ mí wĩ́ lɔ̀n, à síɛ wɛ̃́ ɛ́ nɛ: «Pie yèrè ɛ́ iè Zãn.» Ɛ́ hɔ́ hɛ̀ yòokɛa ɓɛ̀pe ɓɛ́kùi lɔ̀n. 64Ɛ́ mí laà hũn, ɛ́ Zɛkɛri ɛ́ den ɲunù zɔn yú haa, ɛ̀ pìe diɛnù ɛ́ kuie, á den zɔn yú ɛ́ bie ɛ́ Dɔfĩn ɛ̀ ɓàanínin. 65Ɛ́ ɓɛ́ nìnbirìe lɛ ɛ́ lúwikɛ ɓà ǹ ɓɛ́kùi ɛ́ hɛ̀ zɛ́rɛ. Ɛ̀ hɔ̀pe Zudee pɛ̃̀hɛ̃ ɓúkùo míkùi hũn, ɛ́ ɓɛ́ nìnbirìe ɛ́ wɔ́ hɔ́pe bòo sɔ lɛ wɔ́ bòo ɛ́ ɓɛ́ bie. 66Ɛ́ ɓɛ́ nìnbirìe lɛ hàarí ɛ́ hɔ̀ ɲí ɓɛ́kùi ɛ́ ɓɛ́ hũn ɛ̀ vɛ̀ pehɔ̀ lɔ̀n kɛ́ ɓɛ́ ɛ́ ɓɛ́te ɛ̀ dìekɛnin ɛ́ nɛ làa: «Ápe zĩncáahɔ́ sɔ lɛ ɛ́ wo ɓén wé ńwìe?» Dɔfĩn pànkɛ́ ɛ́ den hàarí wi àá ɔ́.
Zɛkɛri ɛ́ Dɔfĩn bɔ̀bɛ̃hɛ̃ wénlɔ́ bòo ɛ̀ bie
67Á zĩncáahɔ́ ɓà yàá Zɛkɛri ɛ́ lé Mɛkɛ̃n-Sãanu ɛ́ ɓen siɛ tú á wo khie ɛ́ hɔ̀ Dɔfĩn bòo ɛ̀ hàaní ɛ̀ lɛ́ ɓɛ́ nìnbirìe ǹ ɛ́ nɛ làa:
68«Nɛ Ɲunsɔ, Yizarayɛɛle Dɔfĩn yèrè ɛ̀ ɓàaní, iè hɔ̀ lɛ á huie mí nìɛ siɛniɛ, à yɛ̀ peɓɛ̀ ɲún ǹ.
69Pehɔ̀ tɔntɛ́ Daviide hũn nìɛ hũn,
iè pe ɛ́ Hɔ́ zɔn lerɛ à fuenírɔ pànkɛ́ ɓàasɔ nin ɛ́ lɛ́ kiè ǹ.
70Sí iè bòo lɛ ɛ́ hɔ́pe Dɔfĩn ɛ́ hàarí bie àá mí bɔ̀háaníriè tentiè ɲihĩ́ɛ hɛ̀rí hàarí.
71Hɔ̀pe Dɔfĩn ɛ́ den hàarí lɛ́ mí ɲunù nɛ mí ɓén leń kie ɛ́ lé kìe ńbíyanliè núnú hũn,
àá ɓɛ́pe nìnbirìe lɛ ɛ́ hɛ́rɛ kie núnú hũn.
72Ɛ́ Hɔ́ iè pe wo mɔn kìe zĩkĩ́nɓɛ̀ miinɛ̀ kɛ̀amu,
ɛ̀ pehɔ̀ hũn ɛ́ yí ɓé lé ɲɛbíi dɛ̀tente lɛ ɛ́ Hɔ́ hàarí dú àá ɓɛ́ wɛ̀.
73Hɔ̀pe Dɔfĩn ɛ́ den hàarí dú ɲɛ́-bíi àá kìe zĩkĩ́n Abarahaamu,
74nɛ mí ɓén leń kie ɛ́ lé kìe ńbíyanliè núnú hũn,
ɛ̀ kè dàá dàń pehɔ̀ tɔnlɔ́ ɛ̀ tɛ́ kɛ́ ké yá zánkɛ wɛ̀;
75ɛ̀ kè wé nìnbirìe lɛ bòo ɛ́ sɛ̃̀ Hɔ̀ ǹ, nìnbiriè lɛ ɛ́ cã̀aní pehɔ̀ híɛhɔ́,
kè mɛkɛ̃nì sítĩnlɔ́ míkùi hũn.
76Ɛ́ kɔ́pe niǹ yɛ̀nù! ɓɛ̀ wóo ɓén ve kɔ nɛ Dɔfĩn lɛ wi hɔ bòo míkùi ɲún hũn bɔ̀háanírɔ,
iè hɔ̀ lɛ ɛ́ kɔ́ ɓén dí é Ɲunsɔ híɛhɔ́ ɛ̀ wookɛ piè wṹuhɛ̃,
77ɛ̀ kɔ̀ ɛ́ zɛ̃́ní ɛ́ lɛ́ piè nìɛ ǹ nɛ a ɓén dé sɛ́wɛ́rí ɛ́ lɛ́ ɓà ǹ peɓɛ̀ bɔ̀koohɛ̃ bòo hũn,
à ɛ́ fuení ɓà ǹ.
78Kè Dɔfĩn ɛ́ hɛ̀ sãa, ɛ̀ Hɔ̀ wóò mi ɓɛ nìnbirìe miinɛ̀.
Hɔ̀ ɓén lɛ́ ɛ́ mí ńpiemu ɛ́ yòó lé hɔ́ hóohũn ɛ́ siɛ ciení kie ǹ kɛ̀a ie wurù lɛ siɛ ɛ́ hɛ̀ yòó bòo sí,
79ɛ̀ Hɔ̀ ɛ́ ciení ɓɛ́ nìnbirìe lɛ wi hɔ síbínú hũn àá hɔ́ húmú ńtìɛrún hũn,
ɛ̀ Hɔ̀ ɛ́ bè kè zehĩ́ lè hũn-wiɛ̀ wṹn lɔ̀n.»
80Á zĩncáahɔ́ ɛ́ hṹn tí yòó, kɛ́ piè mɛkɛ̃ni ɛ́ ɓiɛ̀ ɛ́ hɔ̀ pànkɛ́ ɛ̀ yí. Á kɛrɛ lè ńɲiherà hũn fúu ɛ́ van dɛ̃un lè pɛ̃̀hṹ lɛ á dàa zɔn lɔ́ zɛ̃́niɛ míte ɓɛ̀ Yizarayɛɛle nìɛ ǹ.
اکنون انتخاب شده:
Liike 1: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation